Akisy. 11
11
Aduketait ŋina alo Babilon
1Akitodol apaki ŋin, erworosi ŋituŋa a akwap a daadaŋ aŋajep apei ka ŋakiro ŋapei. 2Ani apaki ŋina awotuniata ikes alo Kide, todolut nadipo ŋina a Sinar, toloma nen. 3Tolimok ŋinituŋanan ikidunyet keŋ tema, “Bua etiyautu ŋamatapali, ido ecunya ejok.” Kisitiyata ikes ŋamatapali akilo ŋamoru, kisitiyata eminae akilo ecoto. 4Temasi, “Potu, odukutu etaun yok, odukokisi aduketait ŋina aoyan ŋina edoli aita keŋ nakuj, ikotere ikiruwor iwon ŋulu ikiyenen alotuŋa, ido nyikielar iwon nakwapin daadaŋ.”
5Abu Ekapolon bu kwap akiŋolikin etaun ŋol ka aduketait ŋin ŋina potu ŋituŋa ŋul toduko. 6Tolimu Ekapolon tema, “Kiŋolikisi, erae ikes ŋituŋa ŋipei, ka irworosi ikes aŋajep apei, erae na akisyakinet a ŋuna elosete ikes akitiya, nyipiyori tokona ikes ibore daadaŋ ŋini ecamito ikes akitiya. 7Potu oloto kwap, enyala aŋajep kec, ikotere tojoŋoto apupo make.” 8Kiela Ekapolon ikes anakibois a ŋin nakwapin daadaŋ, kiteesik ikes akiduk etaun. 9Aŋun, aponi tonyarae etaun ŋol Babilon, anerae abu Ekapolon kinyalak aŋajep ŋina sek arae apei anakwap, tojoŋoto ŋituŋa apupo make; tosodi kiela ikes nakiboisyo ŋuna ka akwap a daadaŋ.
Ŋipapae a Sem
(1 Ŋakiro a ŋirwa 1:17-27; Luk. 3:34-36)
10Erae lu ŋipapae a Sem. Ani apaki ŋina adolioto ŋikaru a Sem amiat, abu touru Aripakasad, ŋikaru ŋiarei ekaku ka akalele. 11Kedau auruun Aripakasad, abu Sem kiboi ŋikaru ŋamiae ŋakan, touru ŋisapa ŋice ka ŋapesur.
12Kedau Aripakasad akiboi ŋikaru ŋatomoniuni ka ŋikan, abu touru Sela; 13kiboi Aripakasad ŋikaru ŋamiae ŋaomwon ka ŋiuni kedau auruun Sela. Touru ŋisapa ŋice ka ŋapesur.
14Kedau Sela akiboi ŋikaru ŋatomoniuni, abu touru Eber; 15kiboi Sela ŋikaru ŋamiae ŋaomwon ka ŋiuni kedau auruun Eber. Touru ŋisapa ka ŋapesur.
16Kiboi Eber ŋikaru ŋatomoniuni ka ŋiomwon, touru Peleg; 17kiboi Eber ŋikaru ŋamiae ŋaomwon ka ŋatomoniuni kedau auruun Peleg. Touru ŋisapa ŋice ka ŋapesur.
18Kedau Peleg akiboi ŋikaru ŋatomoniuni, abu touru Reu; 19kiboi Peleg ŋikaru ŋamiae ŋaarei ka ŋikanikaomwon kedau auruun Reu. Touru ŋisapa ka ŋapesur.
20Kedau Reu akiboi ŋikaru ŋatomoniuni ka ŋiarei, abu touru Serug; 21kiboi Reu ŋikaru ŋamiae ŋaarei ka ŋikanikaarei kedau auruun Serug. Touru ŋisapa ŋice ka ŋapesur.
22Kedau Serug akiboi ŋikaru ŋatomoniuni, abu touru Naor; 23kiboi Serug ŋikaru ŋamiae ŋaarei kedau auruun Naor. Touru ŋisapa ŋice ka ŋapesur.
24Kedau Naor akiboi ŋikaru ŋatomoniarei ka ŋikanikaomwon, abu touru Tera; 25kiboi Naor ŋikaru amiat ka ŋitomon ka ŋikanikaomwon kedau auruun Tera. Touru ŋisapa ŋice ka ŋapesur.
26Kedau Tera akiboi ŋikaru ŋatomonikanikaarei, abu touru Aburam, Naor ka Aran.
Ŋipapae a Tera
27Erae lu ŋipapae a Tera. Abu Tera touru Aburam, Naor ka Aran. Touru Aran Lot. 28Abu Aran totwan alo Ur, anakwap a ŋina a Ŋibabiloniyae. Apaki ŋin, ariŋa papa keŋ eyari aneni edounere. 29Apotu Aburam ka Naor kiitasi; kiit aburam aberu ŋina anyaritae Sarai, Naor daŋ kiit aberu ŋina anyaritae Milika, nakoku ka Aran a ŋolo arae papa a Milika ka Isika. 30Nai akolupana Sarai, amam ikoku.
31Torukosi Tera ka lokoku a Aburaam ta Lot lopapait keŋ lokoku ka Aran kaapei ka Sarai aberu ka Aburam, toloto alo Ur anakwap a ŋina a Ŋibabiloniyae tari nakwap ŋina a Kanaan. Nai ani edolunete ikes Aran, toloma nen. 32Ani edolete ŋikaru a Tera ŋamiae ŋaarei ka ŋikan, totwan iŋes alo Aran.
Okuqokiwe okwamanje:
Akisy. 11: NIB2008
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Ngakarimojong Interconfessional Bible © Bible Society of Uganda, 2008.