OMOCHANKO 22
22
Ibrahimu okoborigwa arue Isaka abe ekeng’wanso
1Ekaba nyuma y’amang’ana ayio, Nyasae akabekera Ibrahimu ogoteemwa. Akamorangeria, “Ibrahimu!” Na Ibrahimu akamoitabera. “Nao inde aa.”
2Nyasae akamotebia, “Moire Isaka, omwana oyo oo omomoima, oyobwanchete, ogende nere goika ense ya Moria. Agwo omorue abe ekeng’wanso ki’ogosambwa ase egetunwa ekemo ki’ebio ndakworokie.”
3Ibrahimu akaimoka mambia chuni, akabeka ebinto ase etigere yaye, akairana abamura babere amo nere, na Isaka omwana oye. Agaatia chinko agochia gosambera ekeng’wanso, akaimoka, akagenda gochia aase aria atebetigwe na Nyasae. 4Rituko ria gatato Ibrahimu akaimokia amaiso aye, akarora aase aria akare are. 5Erio Ibrahimu agatebia abamura abarenge komo, “Ikaransa inwe aiga amo netigere! Inche amo nomwana oyo one nkogenda tore gochia aria, tosasime, erio toirane asemore naende.”
6Ibrahimu akaimokia chinko echi arenge gochia gosambera ekeng’wanso, agatweka Isaka omwana oye, na ere omonyene akaimokia omorero na omoyio. Bakagenda amo bonsi babere. 7Isaka agakwana na Ibrahimu ise, agateba, “Tata!”
Ise akamoitabera, “Nao inde aa, omwana one.”
Isaka akamoboria, “Rora, omorero ne chinko ntobwate, korende ng’ai emanwa y’engondi ere togochia gokorera ekeng’wanso ki’ogosambwa?”
8Ibrahimu akamoiraneria, “Omwana one, Nyasae nenyorere emanwa y’eng’ondi ase ekeng’wanso eke.” Erio bakagenderera amo bonsi babere.
9Kobaikire aase aria atebetigwe na Nyasae, Ibrahimu akaagacha egesasimero agwo, akaara chinko igoro yaye, agasiba Isaka omwana oye, akamwareria igoro ye chinko chiria. 10Erio Ibrahimu akarambora okoboko kwaye, akabogoria omoyio anyenye omwana oye. 11Korende omomalaika bw’Omonene akamorangeria korwa igoro, akabora, “Ibrahimu, Ibrahimu!”
Ere akamoitabera, “Nao inde aa.”
12Omomalaika oria akamotebia, “Toramborera omwana okoboko kwao, gose tomokorera ing’ana rinde rionsi. Bono namanyire ng’a nomoirogete Nyasae, naende narorire ng’a tondineti omwana oo omomoima.”
13Ibrahimu akaimokia amaiso aye, akarora magega aye eng’ondi emingichi ebwatire chingunchara ase orosana nemerande. Ibrahimu akagenda, akarusia eng’ondi eyio, akayerua, ekaba ekeng’wanso ase ribaga ri’omwana oye. 14Ibrahimu akaroka aase aria Yahwe‐Yire;#22:14 Yahwe‐Yire: engencho yaye: Omonene okororwa gose okoa (1 Am ’Eb 1:32–33; 1 Am ’Eb 1:28–31) buna abanto bagokwana goika rero iga, “Ase egetunwa ki’Omonene nao ekonyorekana.”
15Omomalaika bw’Omonene akarangeria Ibrahimu korwa igoro eria kabere, akamotebia, 16“Omonene otebire: Netianirie inche omonyene, ekiagera gwakorire ring’ana eri, gose tondineti omwana oo omomoima. 17Ase ogosesenia ningosesenie, na ase okomenta nimente ororeria rwao, robe oronge buna ching’enang’eni chia igoro na buna omokenye ore engegu y’enyancha, na ororeria rwao inarobue emechie y’ababisa babo, 18na ase ororeria rwao ebisaku bionsi bi’ense inabisesenigwe, ekiagera kwanyigwereire.” 19Erio Ibrahimu akairana gochia ase abamura baria barenge komo; bonsi bakaimoka, bakagenda amo gochia Beeri‐Seba; na Ibrahimu akaba okomenya agwo Beeri‐Seba.
Ororeria rwa Nahori
20Nyuma y’amang’ana ayio kaerire Ibrahimu agatebigwa ng’a, “Milka oiboreire momura omino Nahori abana. 21Abana abwo nabwo aba: Usi, omwana oye omotangi, na Busi omwabo, na Kemueli, ise Aramu, 22na Kesedi, na Haso, na Pilidasi, na Yidilafu, na Betueli.” 23Betueli nere omoiborete omoiseke ore korokwa Rebeka. Abwo batano na batato nabwo Milka aiborerete Nahori, momura omwabo Ibrahimu. 24Naende omokungu oye o sere‐sere, ore korokwa Reuma, akamoiborera Teba, na Gahamu, na Tahasi, na Maaka.
Okuqokiwe okwamanje:
OMOCHANKO 22: EKEGUSIIBBLE
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
OLD EKEGUSII BIBLE PROTESTANT EDITION
©Bible Society of Kenya, 2020