OMOCHANKO 14
14
Esegi ya Kedorilaoma
1Ekaba ase amatuko ’Amurafeli, omoruoti o Shinari, na Arioki, omoruoti o Eleasari, na Kedorilaoma, omoruoti o Elamu, na Tidali, omoruoti o Goimu, 2abaruoti aba bagakora esegi na Bera, omoruoti o Sodomu, na Birisa, omoruoti o Gomora, na Shinabu, omoruoti o Adima na Shemeberi, omoruoti o Seboimu, na omoruoti o Bela noro Soari. 3Aba bonsi bakabwatana, bagasangererekana ase ense omweya ya Sidimu, agwo nao Enyancha y’Omonyo ere. 4Konya bamokoreire Kedorilaoma emiaka ikomi na ebere, korende omwaka o ikomi na gatato bakaanga, tibamokorera naende. 5Na omwaka o ikomi na kane Kedorilaoma na abaruoti baria babwataine nere bagacha, bakarwania na kobua Abarefai ase Asteroti‐Karinaimu, na Abasusi ase Hamu, na Abaemi ase Shawe‐Kiriataimu, 6na Abahori ase egetunwa Seiri goika Eli‐Parani ore ang’e nerooro. 7Erio bakairana goika Enimisifati, noro Kadeshi, bagasaria ense yonsi y’Abaamaleki, na eya Abaamori abwo bamenyete Hasasoni‐Tamari.
8Agwo omoruoti o Sodomu, na oyo o Gomora, na oyo bw’Adima, na oyo o Seboimu, na oyo o Bela, noro Soari, bakagenda, bakabwatana ase okorwana esegi ase ense omweya ya Sidimu, 9barwane na Kedorilaoma, omoruoti o Elamu, na Tidali, omoruoti o Goimu, na Amurafeli, omoruoti o Shinari, na Arioki, omoruoti o Eliesari. Abaruoti abwo bane bakarwania baria batano. 10Na ense omweya ya Sidimu nigo yaichire amabwago ’esike gete, na abaruoti abwo ba Sodomu na Gomora ekero barenge gotama, bakagwa ase amabwago ayio ime, na abatigarete bagatama gochia ebitunwa igoro. 11Erio ababisa bagasakora chinibo chionsi chia Sodomu na Gomora, na endagera yabo yonsi bakaira chinsobo. 12Naboigo bagoosa Loti, omwana omomura omwabo Aburamu, oyomenyete agwo Sodomu, bakamoira amo nenibo yaye.
13Omonto oyomo, oyotamete korwa ase abooswa, akagenda agatebia Aburamu Omoibirania, oyomenyete ase akanani k’emete enga buna emetontera ka Mamure, oria Omoamori, momura omwabo Esikoli na Aneri. Abwo konya bakorire okobwatana na Aburamu. 14Aburamu agachia koigwa ng’a oyomwabo osakoirwe na gwoswa, agatoma abamura baye abakong’u, abaiboire bwoye, abamanyire korwana esegi, babwatie ababisa goika Dani. Abarwani aba nigo barenge amagana atato, na ikomi na batano na batato. 15Bwachia koba botuko, Aburamu agaatanana abanto baye, erinde barwanie ababisa babo, akababua akabaseria goika Hoba, sugusu ya Damesiki. 16Erio akairania enibo yonsi, na akairania boigo Loti omwabo amo nenibo yaye, na abakungu, na abanto bande abasakoretwe.
Melkizedeki ogosesenia Aburamu
17Ekero Aburamu are koirana korwa ase ogoita Kedorilaoma amo nabaruoti baria barenge nere, omoruoti o Sodomu agasoka komorototera ase ense omweya ya Shawe, eyio n’Ense omweya y’Omoruoti. 18Erio Melkizedeki, omoruoti o Salemu#14:18 Salemu noro Yerusalemu, akarenta omogati na edivai; ere nigo arenge omokuani o Nyasae Ore Igoro Mono. 19Akamosesenia, akabora,
“Aburamu asesenigwe na Nyasae Ore Igoro Mono,
oyotongete igoro na ense;
20Nyasae Ore Igoro Mono atogigwe, oyo obekire ababisa bao ase amaboko ao!”
Aburamu akamoa ensemo ya ikomi ya kera egento ekiabwate. 21Omoruoti o Sodomu agatebia Aburamu, “Ing’a abanto baane, korende enibo ero oire aye.” 22Korende Aburamu agatebia omoruoti o Sodomu, “Naimokirie okoboko kwane na gotiana ase Omonene Nyasae Ore Igoro Mono, oyotongete igoro na ense, 23ng’a tinkoira nonya ng’ake eusi, gose enuga y’egekoroto kiao, gose kende gionsi kiao, obaise gocha goteba: Ninche natenenkirie Aburamu. 24Tinkoira gento otatiga endagera eyio abamura abwo bariete, na ensemo y’abwo bagendete amo nainche; tiga Aneri, na Esikoli, na Mamure, barabwo baire ebiabo.”
Okuqokiwe okwamanje:
OMOCHANKO 14: EKEGUSIIBBLE
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
OLD EKEGUSII BIBLE PROTESTANT EDITION
©Bible Society of Kenya, 2020