Génesis 14
14
Lotta prësu apaykäyaptin Abram kutitsimunqan
1Tsay witsaymi Sinar markapa mandakuq reynin karqan Amrafel. Tsaynöllam Elasar markapa mandakuq reynin karqan Arioc. Elam markapa mandakuq reynin karqan Quedorlaomer. Goim markapa mandakuq reyninnam karqan Tidal. 2Tsay chuskun reykunam guërrachö kaykäyarqan Sodoma markapa reynin Berawan, Gomorra markapa reynin Birsawan, Adma markapa reynin Sinabwan, Zeboim markapa reynin Semeberwan y Bela markapa reyninwanpis. Bela markapa jukaq shutinmi karqan Zoar. 3Tsay pitsqan reykunam Sidim pampaman soldädunkunata qorikätsiyarqan. Tsay pampachömi kananqa Kachi Lamar kaykan. 4Tsay reykunatam rey Quedorlaomer chunka ishkay wata poderninchö katsirqan. Tsaypita juk wata päsaskiptinmi pitsqan reykuna willanakur Quedorlaomerpa contran shäriyarqan.
5Tsaymi juknin watachöna rey Quedorlaomer yanapaqnin reykunawan y soldädunkunawan Astarot Karnaimman aywayarqan. Tsaychö pelyarmi refaíta runakunata wañuskatsir Ham markapa aywarpis zuzitakunata wañutsiyarqan. Tsaynöllam Save-quiriataimpa aywarnin emitakunatapis wañutsiyarqan. 6Tsaypitanam Seir jallqakunapa aywar horeo runakunatapis wañutsiyarqan. Wakin kaq horeo runakuna qeshpiyaptinmi Parányaq qatikachar aywayarqan. Tsayqa desiertu lädunchömi karqan. 7Tsaypita kutimurmi rey Quedorlaomerwan paqtan aywaqkuna En-mispatman chäyarqan. Tsay markapam jukaq shutin karqan Cades. Tsay kinraypa aywarmi amalecita runakunata jankat ushakätsiyarqan. Tsaynöllam Hazezon-tamar partichö täkuq amorreo runakunatapis wañutsiyarqan.
8Tsaymi Sodomapa, Gomorrapa, Admapa, Zeboimpa y Belapa mandakuqnin reykuna alistakuyarqan Sidim pampachö guërrata rurayänanpaq. (Bela markapa jukaq shutinmi Zoar karqan.) 9Tsaychömi tsay pitsqa reykuna chuskun reykunawan pelyayarqan. Tsay chuskun reykunam kayarqan Elampa mandakuqnin rey Quedorlaomer, Goimpa mandakuqnin rey Tidal, Sinarpa mandakuqnin rey Amrafel y Elasarpa mandakuqnin rey Arioc. 10Sidim pampachömi brea#14.10 Breaqa yanam imayka qetänö pätsim. pözukuna atska karqan. Tsaymi Sodomapa y Gomorrapa reyninkuna soldädunkunawan guërrapita qeshpiyanqanchö tsay brea pözukunaman jeqarpuyarqan. Wakin kaq reykunanam soldädunkunawan jallqakunapa qeshpir aywakuyarqan.
11Tsaychö pelyar venciskirmi chuskun reykuna soldädunkunawan Sodoma y Gomorra markakunapita mikuykunatawan llapan mas chaniyuq kaq imaykakunatapis apayarqan. 12Abrampa sobrinun Lottapis Sodomachö täkuykaptinmi llapan imaykankunatawan prësu apayarqan. 13Tsaynö apaykäyaptinmi juk runa qeshpiskir Abramta willaq aywarqan.
(Abramqa hebreo runam karqan. Payqa amorreo runa Mamripa encina munti chakranchömi täkurqan. Mamre Escolpa y Anerpa wawqinmi karqan. Paykunam Abramwan yanapanakuyänanpaq willanakushqa kayarqan.)
14Sobrinun Lotta prësu apaykäyanqanta musyaskirmi Abramqa makinchö yuriq serviqninkunata qorirqan. Tsay runakunaqa kimsa pachak chunka pusaqmi (318) kayarqan. Tsay llapanta pusharkurmi prësu apaq runakunata qatipar Dan markayaq Abram aywarqan. 15Taripaykurmi serviqninkunawan illaqpita paqaspa atacar venciyarqan. Tsaypita qeshpiqkunatam Hoba markayaq qatipäyarqan. Tsay markaqa Damasco markapa norti kaqläninchömi karqan. 16Reykunata venciskirmi llapan imayka apayanqanta qechuskirninkuna kutitsiyämurqan. Tsaynöpam sobrinun Lottapis imaykankunatawan kutitsiyämurqan. Tsaynöllam warmikunatawan ollqukunatapis prësu apayanqanta kutitsiyämurqan.
Abramta Melquisedec bendisinqan
17Quedorlaomertawan yanapaq reykunata venciskir Abram kutiykämuptinmi Sodoma markapa mandakuqnin rey Save pampaman tinkuparqan. Tsay pampapa jukaq shutinmi Mandakuq Reypa Pampan karqan. 18Tsaymi Salem markapa mandakuqnin rey Melquisedecpis tsayman chaykur tantatawan vïnuta Abramta qararqan. Melquisedecqa poderösu Dios Yayata serviq sacerdötim karqan.#14.18 Hebreo idiömachömi nin: Melquisedecqa El-Eliónta serviq sacerdötim karqan. El-Eliónqa Dios Yayapa jukaq shutinmi karqan. Tsaynöllam nin Gén. 14.19-20, 22 versïculukunachöpis. 19Tsaymi Melquisedec Abramta bendisir nirqan:
<<Ciëlutawan kay patsata kamaq poderösu Dios Yaya bendicionninta qamman churaykallämutsun.
20Poderösu Dios Yaya alabashqa kaykullätsun.
Paymi yanapashushkanki contraykikunata vencinaykipaq>>.
Tsaynö niptinmi Abramqa llapan imayka kutitsimunqankunapita diezmuta Melquisedecta qararqan.#Heb. 5.6, 10; 6.20—7.17.
21Tsaynam Sodoma markapa mandakuqnin rey nirqan: <<Marka majïkunata kutiykatsimar tsaypita kaqtaqa imaykatapis llapanta apakuy>>.
22Tsaynam Abram nirqan: <<Ciëlutawan kay patsata kamaq poderösu Dios Yayapa shutinchö jurarmi nishkä 23qampa kaqtaqa ni juk jïlullaykitapis ni llanqi watullaykitapis mana apanäpaq. Tsaynöpam aläbakur <Noqa kanqäpam Abram rïcuyashqa> ninkitsu. 24Serviqnï runakuna mikuyanqallanna katsun. Peru aywäsimaq Aner, Escol y Mamre runakunam sïqa derëchun kaqkunata apakuyanqa>>.
Okuqokiwe okwamanje:
Génesis 14: qxn
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2011, Wycliffe Bible Translators, Inc. All rights reserved.