Génesis 13
13
Abramwan Lot rakikäyanqan
1Egiptupita Abram kutikurmi warminta pusharkur llapan imaykanta apakurkur Neguevman charqan. Paywanmi sobrinun Lotpis aywarqan. 2Abramqa kapuqyuq karmi qoriyuq, qellayyuq y maytsika wätayuq karqan. 3Abramqa Neguevpita patsakun patsakun aywarmi Bet-elman charqan. Tsaypitanam yapay aywarqan Bet-elpita Hai markaman aywanachö puntata täkunqanman. 4Tsaychömi altarta puntata perqanqanchö Dios Yayata mañakur adorarqan.
5Lotpis tiyun Abramnö rïcu kaptinmi atska üshankuna, cabrankuna, wäkankuna y carpankunapis karqan. 6Peru ishkanpa maytsika wätankuna kaptinmi qewapis karqannatsu. Tsaynöpam paqta täkuyta puëdiyarqannatsu. 7Tsaymi Abrampa mitsikuqninkunawan Lotpa mitsikuqninkuna maqanakuyaq. Tsay witsaymi tsay markachö cananeo runakuna y ferezeo runakunapis täkuyarqanraq.
8Tsay wäta mitsiqninkuna piñanakur maqanakuyaptinmi sobrinun Lotta Abram nirqan: <<Tsay castalla kaykarqa ama chikinakushuntsu ni mitsikuqnintsikkunapis piñanakuyätsuntsu. 9Rikanqaykinöpis kay sitiuqa jatunmi. Karu karu täkunapaq mayqan partitapis akrakuy. Janaq kaqpa aywaptikiqa ura kaqpam aywashaq. Ura kaqpa aywaptikiqa janaq kaqpam aywashaq>>.
10Tsaymi Lotqa Jordán mayu kuchun entëru pampakunata rikarqan Zoar marka kaqläpa. Tsay pampakunachö qewapis y yakupis atska kaptinmi Edén huertanöraq#Gén. 2.8-9. y Egiptunöraq karqan. Tsaynömi karqan Sodoma y Gomorra markakunata Dios Yaya manaraq ushakätsiptin. 11Tsaymi mas alli kaptin Jordán mayu kuchun pampakunata Lot akrakurqan. Tsaynöpam Abrampita rakikar rupay yarqamunan kaq läduman aywakurqan. 12Abramqa patsan Canaánllachömi quëdakurqan. Lotnam Jordán mayu kuchun pampakunachö kaykaq markakunaman aywar Sodoma marka cercanchö täkurqan. 13Sodomachöqa Dios Yayapa contran jutsasapa runakunallam täkuyarqan.
14Lot aywakuskiptinnam Abramta Dios Yaya nirqan: <<Kay täkuykanqaykipita norti kaqpa, sur kaqpa, rupay yarqamunan kaqpa y rupay jeqanan kaqpa shumaq maytsaypa rikachakuy. 15Tsay llapan rikanqaykitam entregashayki qampaq y qampita miraq aylluykikunapaq imayyaqpis kananpaq.#Hech. 7.5. 16Qampitam aylluykikunata miratsishaq imayka mayu kuchunchö arenïllatanö yupaytapis mana puëdiypaqta. 17Aywarnin rikapakamur entërupa tumamunki. Tsay llapan rikanqaykitam entregashayki>>.
18 Dios Yaya tsaynö niptinmi llapan imaykankunata apakurkur Hebrón markapa cercanman Abram aywakurqan. Tsaychömi atska encina jachakuna Mamre runapa karqan. Tsaychö täkurmi altarta perqarqan Dios Yayata adorar mañakunanpaq.
Okuqokiwe okwamanje:
Génesis 13: qxn
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2011, Wycliffe Bible Translators, Inc. All rights reserved.