Emiighom 6
6
Ạsipioghom awe aḅirini phọ
1 #
Job 1.6; 2.1 Mem dị awe omiigh ọmaraghian omuzeḍi aḅirini phọ kụ ọmaraghiom nmạnyaan. 2Kụ buniin ạnmuny phọ Ẹnaan ọmiin ẹnighe ạnmanyaan awe ịsien aḅirini phọ kụ bịdi ọsighiogh nmạnyaan bụphe ọḅeeraan bọ bịdi ophinogh. 3Kụ Ọmoogh-we phọ ạḅem mọ, “Mị kạ́ngo mun ọgel awe ọrol kꞌagee-pọ, ịdi eḍighi bọ bịdi iphulupul. Emiigh nyịidipho kụ ẹghiom bịdi kọ́tol ghan mun opele oniin okuron rꞌịyaldi ạsia.” 4#Igb 13.33Riiḍio phọ ịpe phọ, kụ ọghiom kẹn ni ghisigh, ikakara awe ụrol li sịen ade phọ. Bụen phọ ẹemara ẹemara awe phọ ạnmanyaan awe ọmaraghinaan bọ nmụny phọ Ẹnaan. Bịdi kụ arephelegbe dị ooleghaan geediidi phọ.
5 #
Mat 24.37; Luk 17.26; 1 Pit 3.20 Mem dị Ọmoogh-we phọ ạmiin bọ ịdi ạsipioghom awe melheeny sịen ade phọ, ḅịle mọ ịitughian ạbidi eḍighi ịkaraph ịkaraph oomo amem, 6ịiḅaghami ni nyọdi ịpe eḍighi bọ kụ ọdi ạlhem bọ we aseere sịen aḅirini phọ, kụ ẹeḅaghami nyọdi iboom. 7Kụ Ọmoogh-we phọ ạḅem mọ, “Mị kapiemi we phọ ạbuen mị ạlhem bọ, we rꞌịnam, rꞌoomo ịpe rekuura bọ sịen ade phọ, rꞌịnun okuaḍio phọ. Mị rạkunu ni mọ mị ạtuan eeghe kụ ạlhem bọ ọnyo ạbidi.” 8ANoa bịn kụ aseleman risigh Ọmoogh-we phọ.
ANoa
9-10 #
2 Pit 2.5
Ọphon ọghaaph aNoa. Ọdi ạmar ịraar alephiri ạnmuny, ạSem, rꞌạHam rꞌaJafet. ANoa ọ́moogh esi ọḍagha ḅịle kẹn ọdi bịn kụ aḍighi ogey oye sịphe oghiil phọ ọdi. Ẹnaan rꞌaNoa uuḍikuan ni. 11Kụ ọlo oomo ạbunon awe ụphu ni risigh Ẹnaan, ḅịle ọwa sighiton bịn kụ aapaany. 12Ẹnaan ekiton ephogh kụ ẹmiin mọ aḅirini phọ mạphu. Oomo areten awe sịen aḅirini phọ mẹphu.
13Kụ Ẹnaan ẹḅeni Noa mọ, “Mị magbiighi amuneni, mị kapiemi oomo awe phọ odi bọ sịen aḅirini phọ. Ọwa sighiton rꞌạraagham bịn kụ memuza sịen aḅirini phọ. Mị kapiemi bịdi rꞌaḅirini phọ. 14Sịghe ogeny oreeny ạkaam oghuugh ạna, adoghoḍi iisoph kụ ạza ạgalaga azuom kụ agbul mạyagh oreeny ologhi phọ rꞌọman phọ. 15Ịduon kụ ịdi nạ kạka bọ oghuugh phọ: ạḍidoony phọ eḍighi ịnya okuron ịraardi rꞌọphaanya ạrada, ẹreghe phọ eḍighi oḍualdi rꞌịyal ạrada, aḍiphoph phọ inyadi rꞌịraar ạrada. 16Zạ ạgalaga oghuugh phọ; kụ asugheeny eephoghi dị ẹman eniin ẹda rꞌegbem, igbo ạgalaga phọ rꞌịigaany ooghironom oghuugh phọ. Sịphe ologhi oghuugh phọ ịraar ẹedaneen kụ ẹrol. Kụ ạlogh eghuugh ọogaany phọ. 17Mị katom mụum-aḍigho ạsighe atu sịen ade phọ ophiemiom ạtorotoro ịyaar dị ẹmoogh ḍiphooghu. Tọro ịyaar sịen ade phọ kemugh ni, 18kụ ọlo mị kakiran ịyo rꞌạna. Iḍigh ologhi oghuugh phọ, nạ rꞌạnir ạna, rꞌạnmuny ạna, rꞌạnmariir ạbidi. 19-20Sịghe ạloghom ologhi sịphe oghuugh phọ ẹya rꞌelephiri ạtorobo ọdo ẹnam rꞌẹnun, ọbo bịdi ọtol eye. 21Sịghe ạloghom ọdo kịrokiro ariiḍien lọ nyina rꞌạbidi kole ghan.” 22#Hib 11.7Kụ aNoa ạtuugh oomo ịpe Ẹnaan ẹḅeni bọ nyọdi aḍighi.
Okuqokiwe okwamanje:
Emiighom 6: ẠḌI
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS