Luku 22
22
Judas dʼo̩wo̩ tef ukpo aro̩kpo̩ ñwu Jisus
1Oñ uje̩wñ-ucholo ki ma nʼo̩jo̩wu n, e-ku ma do̩ ko̩ Elaloji le̩ me̩ro̩wo̩.
2Tak amagboji amatama kpai amako̩takada feju alu ku ma ale ku ma dʼowñ kpa; todu ailo amone̩ aba ma.
3Oñ Setan mugudu tefu Judas, ku ma hiodu ko̩ Iskario̩t, owñ dʼef aluka amame̩gweji le̩. 4Tak i kwʼo̩mo̩ le nako̩la kpai amagboji amatama kpai amagboji amadide Unyi O̩jo̩, alu kʼi ale kʼi adʼowñ ñwu ma mu. 5Taku ma kwoyo̩, oñ ma jalu kpʼowñ ku ma dʼo̩ko̩ ñw u. 6Oñ i je̩, i tʼafeju adiko kʼi amʼowñ du ñwu ma mu e̩gba kʼo̩wo̩ amone̩ le̩ ma jʼane̩ o̩mo̩ n.
Ma ñwʼujowñ Elaloji che
7Tak o̩jo̩ e-uje̩wñ ku ma ma dʼo̩jo̩wu tʼo̩ n lewa, owñ chʼe-kʼi dukpe̩ ku ma kpa iche̩bo̩ Elaloji tila. 8Oñ i fu Pita kpai Jo̩n kpe̩ lo kakini, Me̩ lo ku me̩ fʼe̩wñ Elaloji ñwo̩che ñw a kʼa ki je̩. 9Taku ma ka ñw u kakini, Ugbo i dʼe̩ e̩do̩ kʼa ñwo̩che? 10Oñ i ka ñwu ma kakini, Me̩ go, abu ku me̩ mugudu tef ewo-i, e̩ne̩ ki ane̩ otube̩ omiofo ade kpai ame̩: me̩ ki tʼo̩ ubi tef unyi kʼi alo tʼefu-wñ. 11Tak ame̩ ki ka ñw e̩ne̩fe̩nyi unyi le̩, kakini, Akone̩wñ le̩ aka ñw e̩ kakini, Ugbo unyi uru ononojo de̩ ugbo kʼu naje̩ Elaloji kpai amako̩che̩-mi? 12Tak e̩ne̩ le̩ adʼunyi-ojale lile e-kʼe̩wñ ugugu jʼefu-wñ ña me̩; o̩mo̩ me̩ ñwo̩che. 13Oñ ma le, ma la li kʼi dʼalu kʼi ka ñwu ma. Taku ma fʼElaloji ñwo̩che.
Elaloji otilala kʼi je̩. Urewa-wñ
14Tak e̩gba kʼauwa-wñ jo̩, i guane̩, ame̩nukpuche̩ la jʼane̩ kpʼowñ. 15Tak i ka ñwu ma kakini, E̩ño̩-wñ che mi alu du kʼe̩ño̩ ache one̩ kʼu je̩ Elaloji-i kpʼame̩ o̩gba tak u li uwa le̩; 16todu eka naka ñwu me̩-i kakini, I nʼugbo du kʼu najʼe-i ge̩ n, gbogbo tʼe̩gba kʼi che̩kpa ojane̩ O̩jo̩. 17Tak i mʼago gba oñ abu kʼi fʼugwa gwa, i kakini, Me̩ mʼe-kide̩ du ku me̩ kpe̩ ñw o̩la-me̩: 18todu naka ñwu me̩ kakini, Akwʼifai i nʼugbo du kʼu nañmo̩ kwef e̩ro achiwebe̩te̩ma ge̩ n, gbogbo tʼe̩gba kʼojane̩ O̩jo̩ lewa. 19Tak i mʼakala du oñ abu kʼi fʼugwa-wñ gwa, i fʼu bu, oñ i mʼu du ñwu ma, kakini, E-kide̩ chʼaño̩la-mi [ku ma du chele todu me̩: me̩ che e-kide̩ kʼi chʼurewa-mi. 20Tak i mʼago du e̩go̩ e-le̩ abu ku ma fʼo̩je̩ ane̩ je̩ kpa, i kakini. Ago kide̩ chʼalo tito̩ ekpe̩ ef e̩bie̩-mi, e-ku ma du dafo todu me̩.] 21Ama me̩ go, o̩wo̩ e̩ne̩ kʼi adu mi ñwu ma mu le̩ dʼoj itebulu-i ugbo mi-i. 22Todu O̩ma One̩ alo alu ku ma date̩ chuu; ama atogwo ki chʼe-e̩ne̩ ku ma dʼowñ ñwu ma mu lugbo-wñ! 23Taku ma chane̩ enʼo̩la-ma ene, e̩ne̩ ki dʼefu ma kʼi ache kʼi che e̩wñ kide̩.
E̩ne̩lile ogbolo
24Tak ukana lewa te̩ ef uma, e̩ne̩ ku ma do̩ kʼi tʼuma le ef uma. 25Oñ i ka ñw ma kakini, Amonu abo uche̩ichi dʼo̩la-ma chʼodu-ma; oñ ma do̩ abo ki nʼo̩da-ma ko̩ amabʼone̩ che. 26Ame̩ muda adʼabe̩le̩ n; ama e̩ne̩ ki tule ef ume̩, owñ ki dabe̩ne̩ kʼi chʼimo̩to̩; oñ e̩ne̩ ki chʼagboji kʼi dabe̩ne̩ kʼi ache e̩wñ ñw one̩. 27Todu e̩ne̩ tule? e̩ne̩ ki chekukane̩ ku ma dʼe̩wñ ñw u je̩? abe̩k e̩ne̩ kʼi ache e̩wñ ñw u? I chʼe̩ne̩ ki chekukane̩ n? Omi muda dʼalumeji-me̩ dabe̩ne̩ kʼe̩ne̩ ki ache e̩wñ ñw one̩.
28Ame̩ la chʼabo ku ma te̩tabʼumi gu ef ajama-mi ku ma ja mi ma. 29Omi la adʼojane̩ du te̩ ñw me̩-i dabalu kʼAta-mi dute̩ ñw mi, 30todu kʼame̩ ki je̩ kʼame̩ ki ño̩ ñmo̩ oj itebulu-mi ojane̩ e-mi; me̩ lañʼagugu oj ede akajo̩ amo̩lo̩pu Israe̩l me̩gweji le̩.
Jisusi ka ñw Saimo̩n tane̩
31Saimo̩n, Saimo̩n, go, Setan tene me̩, kʼi fʼume̩ fe̩ dab o̩ka; 32omi muda gbo̩ko̩bʼO̩jo̩ todu we̩ kʼe̩do̩-ekono-we̩ ki we eda; tak uwe̩ e̩gba kʼe̩ mudabiwa e̩ nahi amo̩maye-we̩ e̩re̩ nyane̩. 33Oñ i ka ñw u kakini, Ondu, o̩la-mi che̩mu kʼu na le bʼuwe̩ tef unyi uga kpai tef uku ge̩. 34Oñ i kakini, Naka ñw e̩ Pita, aiko̩ ako̩ eñini n, gbogbo tak e̩ fʼaire̩ re̩ onu me̩ta ka kʼe̩ ma mi n.
35Tak i ka ñwu ma kakini, E̩gba kʼu kpʼume̩ uche̩ ku me̩ ma ne̩ alita n le̩ fa? kpʼugbo̩ o̩ko̩ kpʼe̩da le̩ fa? e̩wñʼka ña me̩? Oñ ma kakini, O̩da, i nʼe̩wñ du ki ña wa n. 36Oñ i ka ñwu ma kakini, Ama fa-i, e̩ne̩ ki nʼalita namʼu du kpai ugbo̩ o̩ko̩ abe̩le̩ ge̩; oñ e̩ne̩ ki ma ne̩ n kʼi namʼotogbo-wñ du ta kʼi fʼugbada la. 37Todu naka ñwu me̩ kakini, E-ki che̩ko̩tane̩ le̩ achekpoji efu mi tila, kakini, Ma la fʼowñ choli tef ame̩nugbite̩re̩: todu e̩wñ e-o̩la-mi chenʼukpoji. 38Oñ ma kakini, Ondu, go, ugbada meji de̩. Oñ i ka ñwu ma kakini, I bo̩jo̩ me̩.
Ge̩tse̩mani
39Tak i kwodufu oñ i le tʼoj uwo O̩lif alu kʼi te̩tache; amako̩che̩ le̩ ño̩ tʼo̩ ubi. 40Oñ abu kʼi tʼugbo le̩ i ka ñwu ma kakini, Me̩ chadua ku me̩ we etʼef ajama. 41Tak i chejugbolo kwʼugbo ma le jiji dabalu kʼone̩ arikpolo okuta; tak i mʼokuku ko nyane̩ achadua, 42kakini, Ata-mi, iche̩wñ kʼe̩ neku e̩ mʼago kide̩ du bʼumi te̩: i muda chʼe-ki dʼumi e̩do̩ n chai e-ki dʼuwe̩ e̩do̩ kʼi wache. 43Tak onucheʼka kwʼefojale wa kwotejugede ñw u ki bʼiñmi tʼiñmi ñw u. 44Oñ abu kʼeju-wñ kpa nana i no̩ feju kpa rʼadua ache tule; ugu kʼi gu la dab e̩bie̩ ki akito̩ wane̩ dab o̩kpo̩ omi lile. 45Tak abu kʼi kwane̩ bʼadua-wñ te̩ i lewa ugbo amako̩che̩ le̩, oñ i li ma abu ku ma jʼalolu noj e̩do̩dudu. 46Tak i ka ñwu ma, kakini, E̩wñ chi ku me̩ jʼalolu? Me̩ kwane̩ ku me̩ chadua, todu kʼame̩ ki we egudu nyef ajama.
Ma fu Jisus mu
47Oñ abu kʼi nʼo̩la aka ta, me̩ go, o̩wo̩ amone̩ kpai e̩ne̩ ku ma do̩ ko̩ Judas kʼi chʼoka ef amame̩gweji le̩ tʼuma o̩gba, oñ i te̩me̩ru Jisus kʼi dʼalu-wñ kʼo̩ alu. 48Ama Jisus ka ñw u kakini, Judas, e̩ nʼalu ekʼO̩ma One̩ alu adu ñw u ma mu le̩? 49Oñ abu kʼabo ku ma jo̩ lʼo daka li e̩wñ ki awa-che, ma kakini, Ondu, a dʼugbada da? 50Tak e̩ne̩ʼka efu ma fʼadu agboji amatama le̩ da, oñ i mʼeti-wñ awo̩to̩ la. 51Ama Jisus dohi oñ i kakini, Me̩ naje̩ gbogbo ta. Tak i dʼo̩wo̩ kad eti-wñ, i fʼu che tʼe̩gu-wñ. 52Oñ Jisus ka ñw amagboji amatama kpai amagboji amadide unyi O̩jo̩ kpai abogijo ku ma wa ako bʼo̩ le̩ kakini, Me̩ dufu wa kpai ugbada kpai ugbolo dabe̩ne̩ ku me̩ gbe̩re̩ adinya? 53Omi dʼugbo me̩ o̩jo̩ñwa o̩jo̩ñwa ef unyi O̩jo̩, me̩ la nʼo̩wo̩-me̩ dala bʼumi ma n: e-i muda chʼauwa e-me̩ kpai e-o̩da e̩chubi.
Pita faire̩ Ondu re̩
54Taku ma gwo̩nyʼowñ alo, oñ ma mʼu du le tef unyi agboji amatama. Pita muda tʼo̩ ubi o̩najiji. 55Oñ abu ku ma fʼuna ko alumeji anuku le̩, ku ma la gugu kpai o̩la-ma jo̩. Pita kwogugu alumeji-ma. 56Oñ imo̩to̩ onobule̩ʼka fʼowñ li abu kʼi gugu ugbo ugane̩ le̩, tak i kejurʼu chii, i kakini, E̩ne̩-i ño̩ dʼugbʼowñ ge̩. 57Ama i raire̩, i kakini, Onobule̩, u mʼowñ no. 58Taku ma jo̩ pe̩, oñ e̩nomune̩ fʼowñ li, i kakini, Uwe̩ ño̩ dʼefu ma ge̩. Pita muda kakini, One̩, i chʼomi no. 59Tak i dabe̩ne̩ kʼauwaʼka oñ e̩nomune̩ ojoji gwo̩nyʼo̩la le̩ gbiti kakini, Ochochi e̩ne̩-i ño̩ dʼugbʼowñ ge̩; todu abo Galili i che. 60Ama Pita kakini, One̩, u mema e̩wñ kʼe̩ ka-i n. Tak e̩re̩re̩le̩ abu kʼi nʼo̩la le̩ aka, aiko̩ ko. 61Tak Ondu murida, oñ i go Pita. Taku Pita libekadʼo̩la e-Ondu le̩, abu i kʼi ka ñw u kakini, E̩ raire̩ mi onu me̩ta tak aiko̩ ki ko̩ eñini-i. 62Tak i ledufu nyʼaraku anyanyi.
63Tak aboke̩le̩ ku ma mu Jisus ne̩ gaga le̩ kwochʼo uke̩, ma fʼu gwo. 64Taku ma fʼe̩wñ ji u eju, oñ ma tʼowñ ene kakini, Kache̩ ke: e̩ne̩ dʼe̩wñ nʼuwe̩-i? 65Ma la ka e̩wñ omune̩ nyʼowñ o̩la wewe achakpabie̩ owñ.
Ma du Jisus wʼo̩gba amatama ogijo
66Tak abu kʼo̩jo̩ muñwa, abo̩hiala abogijo amone̩ le̩ wajo̩, tʼamagboji amatama tʼamako̩takada; oñ ma dʼowñ alo tef ujo̩ abo̩hiala-ma, ma kakini, 67Iche̩wñ kʼuwe̩ che Kraist le̩, e̩ naka ñw a. Ama i ka ñwu ma kakini, Dagba u ka ñwu me̩, i nʼugbo du ku me̩ jʼake̩do̩no n: 68Dagba u tʼume̩ ene, i nʼugbo du ku me̩ jʼadohi n. 69Ama akwʼe̩gba-i O̩ma One̩ agugu o̩wo̩ awo̩to̩ ukpahiu e-O̩jo̩. 70Oñ o̩chaka ma kakini, Mak uwe̩ chʼO̩ma O̩jo̩? Tak i ka ñw ama kakini, Ame̩ ka kʼomi che. 71Oñ ma kakini, Eku e̩nibenu ño̩ ku wa taa? Todu awa onugo gbo̩ alu e-wñ.
Okuqokiwe okwamanje:
Luku 22: IGL70
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
O̩TAKADA O̩LA O̩JO̩ Bible in Igala © United Bible Societies, 1970.
