Matana Enjil 16
16
Bag. 16.
1Tekki jeriberu an Farisichigon Sadugichigon targi isigsan, tirgi aya wekki simerton amintidir an. 2Ter rude wetidirsum: „Gu shareyankin, ir awerun: ‚Eshei bisereyanin an. Mine sime gelanbungad.’ 3Wide fejirkon awerun: ‚Olongu annessi bibogn an. Mine sime shobrebungad.’ Wo habisi, ir aïyirrua simena koigi? Wide wattichina amarachigi eske aïyirmunun? 4Jil mili, us, aya wekki aïsigna? Amara wekkon tekki bitirtakkitirmunum, Yunandig anmenkin.“ Wide mugosir talossum.
5Hirani essin jerro waw bidargi tirgodon kal wekki injedtararki iwossan. 6Yesu tirgi wetidirsum: „Innewertichigi harsewe Farisichigon wide Sadugichigonna kosarroton.“ 7Hirani tinnewertichigodon wesan: „Ar kalgi argodon? attamendungad teran ikke awen.“ 8Yesu iyiros wetidirsum: „Minegon ir adamrerun indo kalgi kagmendungi, wo ogji iman gelilkoni. 9Elekenbokon ir iyirkomnun? Wala ajilemnun tube dicched awtakkelgi ogij eluf dijna jiradilo? Wide shibir mukkottekki kewdelloton injitakkelgi? 10Wala tube kolodti ogij eluf kemisna jiradilo? Wide shibir mukkottekki kewdelloton soke injisungi? 11Won mine iri: afehmemendun, irgi wetidirkirin innewertichigi Farisichigon Sadugichigonna kosarroton harsew an, wala kal werna gisagi wemensingi?“ 12Mani wattigi fehmesan ter kalna kosarna gisa wekki wemensingi, ama Farisichigon Sadugichigonna kurkidarki.
13Yesu Gaisariye Filibusdir bijurgi tenna hiranigi isigirsum: „Mingi zoli aweran zolna todir?“ 14Tir wesan: „Weri aweran: ‚Hana akidiril term an.’ Echeli weri aweran: ‚Eliya term an.’ Echeli werigon aweran: ‚Ermiya term an. Walagon nebichirton werm an.’ “ 15Tirgi wetidirsum: „Won iri ni term an aigi awerun?“ 16Siman Butrus widegir wesum: „Er komisbul teran, arti aïbulna tod teran.“ 17Yesu widegir tekki wetirsum: „Barkebun, Siman, Yunana tod. Mine jitagon gewgon ekki ingi aminkomnan, abo simechir dalg anmenkin. 18Aigon ekki awetirrin, er Butrus teran“ — Butrus anegon kulu teran — „Widegon in kulun dogor anna kenisagi bigoirin. Wala dielin agarna babi tendogor bigudrakolanminan. 19Simechina mulkina muftahkon ekki bitirrin. Wide er digrin malegon ariddogor, bidigtakkin simechir. Wide er kusin malegon ariddogor, bikustakkin simechir.“ 20Ter wide hiranigi wetidirsum: „Zol wekki wetirmenwe ai komisbul ter eringi.“
21Mani wattirton ugudisum Yesu tenna hiranigi amintidirarki Urushalimgir juwar tendogor dangi, wide samlirton wide fegirin samli dulirton wide abajilirton digrigir biwejatakkingi, widegon bibetakkingi, ama ugros toskittir bimbelkaningi. 22Butrus tekki jembi wekkir tol ojju hede wetirsum: „Ennaiton in warian agad, wo tir. Wala wer teddeton ekki durmeninged.“ 23Ama ter Butrusk abidi lefte wetirsum: „Annaiton warian, wo shetan! Er atrayanbudenin. Mine enn erig artindimeningad, ama zolind engad.“
24Yesu tenna hiranigi wide wetidirsum: „Wer on aigi tebeadti weriskin, tennewertigi gubos wide tenna berki soke injed aigi tebaer agad. 25Mine tennewertigi dukarki wersil bidabrin. Wide anna jiradilo tennewertigi dabrilgon belkanin. 26Won minder zolgi nefaen, ter on alam malegi jamegred wide tennewertigi dabroskin? Wala min wekki zol bitirin tennewertina agarro? 27Zolna tod bitakanin tenn abona mejdir wide tenna malaikariged. 28Mani wattigi zol nutin bijazitakkikanin tenn awid nawre. Aleged irgi wetidirrin, weri indo eleken daran, ingu diarki bisunemnan, zolna todti nalmendangon, tenna mulkir tabungon.“
Okuqokiwe okwamanje:
Matana Enjil 16: XNZ1912
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Published by the British and Foreign Bible Society in 1912.
