उत्पत्ति 13
13
अब्रामने बालु लोत फ्रेयाब
1झाइले अब्रामइ ह्रोंसए प्ह्रेंस्यो, ह्रोंसने मुँबै तोन्दोंरि सैमैं नेरो ह्रोंसए अलिए च्ह लोतै या किंसि मिश्र ह्युलउँइँले कैंडो क्रेखसि नेगेब बिबै ह्युलर फेखइ। 2अब्राम बेल्ले प्लबै म्हि मुँल तलेबिस्याँ चने खेदोमैं मारा-चाँदिमैं ल्हें मुँल।
3च नेगेबउँइँले प्रदै ओंसों चइ बेथेल नेरो ऐए म्हाँजोर तम्बु टौंदिबै क्ल्ह्योर फेखइ। 4चइ चर ओंसों ख्रो पिंबै क्ल्ह्यो बनेसि याहवेहए मिं किंल।
5अब्रामने बालु ह्याबै लोतलै या र-क्युमैं, खेदोमैं नेरो तम्बुमैं मुँल। 6चमैंए र-क्युमैं नेरो खेदोमैं ल्हें तसि चमैं ङ्हिंए खेदोमैंए ल्हागिरि च ह्युलर्बै छिइ आयो। छतसि चमैं बालु टिल् आखाँब् तइ। 7छतमा अब्राम नेरो लोतए खेदो छब्मैंए न्होंरि प्होंगि तइ। च त्हेर कनानीमैं नेरो परिज्जीमैं या च ह्युलर टिमल।
8छतमा अब्रामइ लोतने बिइ, “ङ्यो ह्रोंसए म्हिमैं ग। छतसि ङ्यो नेरो ङ्योए प्ह्रोंछैंमैं न्होंरि प्होंगि आतबै ल्हागिर 9ङ्यो फ्रेयाल् त्हुम्। ङ्ह्योद्, ताँन् ह्युल क्हिए ओंसों मुँ। क्हि त्हर्ग्योउँइँ ह्यास्याँ ङ क्योलोउँइँ ह्यामुँ क्हि क्योलोउँइँ ह्यास्याँ ङ त्हर्ग्योउँइँ ह्याम्।”
10लोतइ खन्तोंदोंन् ङ्ह्योमा क्यु ल्हें मुँबै यर्दन स्योंए ब्याँसि सोअर समा फेनब् म्रोंइ। च क्ल्ह्योर याहवेहजी बनेबै अदनए बगैंचा धोंन् तब नेरो मिश्र ह्युलर धोंले क्यु ल्हें मुँल। (चु ताँ याहवेहजी सदोम नेरो गमोरा बिबै सहर नास लब् भन्दा ओंसोंबै ताँ ग।)#उत २:१० 11छतमा लोतइ यर्दनर्बै ताँन् ब्याँसि त्हाँसि स्यारउँइँ ह्याइ। छले चमैं ङ्हिं फ्रेयाइ। 12अब्राम कनान ह्युलर्न टिइ। लोत बिस्याँ ब्याँसिर्बै सहरजरे टिनेइ। चइ सदोम बिबै सहर समा ह्रोंसए तम्बु टौंउँदिसि टिइ। 13सदोमर्बै म्हिमैं दुष्टमैं मुँल। चमैंइ याहवेहजी आखोबै पाप केमैं लमल।
अब्राम हेब्रोन बिबै सहरर ह्याब
14लोत अब्रामने फ्रेयाबै लिउँइँ याहवेहजी अब्रामने बिइ, “तारे क्हि मुँबै क्ल्ह्योउँइँले ताइ (उत्तर) माइ (दक्षिण) स्यार (पूर्व) नेरो छ्यो न्हु (पश्चिम) खन्तोंदोंन् ङ्ह्योद्। 15क्हिइ म्रोंबै ताँन् क्ल्ह्यो क्हि नेरो क्हिए सन्तानलाइ ङइ खोंयोंन् बिलै क्ल्हे तबर पिंब्मुँ।#चिब्मैं ७:५ 16ङइ क्हिए प्हसेमैं पृथ्बीर्बै त्हुल् धोंलेन् ल्हें लमिंब्मुँ। खाबज्यै त्हुल् च्योल् आखाँ! त्हुल् च्योल् खाँम् बिस्याँ क्हिए प्हसेमैं या च्योल् खाँब्मुँ। 17रेद्! ह्युलए खन्तोंदोंन् ह्याद्। तलेबिस्याँ ङइ चु ताँन् क्ल्ह्यो क्हिलाइ पिंब्मुँ।”
18झाइले अब्रामइ ह्रोंसए तम्बु सार्दिसि हेब्रोनर मुँबै मम्रेए फलाँटए सिंधुमैं ङाँर खसि चर्न टिइ। चइ चर याहवेहए ल्हागिर ख्रो पिंबै क्ल्ह्यो घ्रि बनेइ।
Okuqokiwe okwamanje:
उत्पत्ति 13: GCMB
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2020, Wycliffe Bible Translators, Inc. All rights reserved.