Matei 8
8
Yesu antepwa mundu mwene matana
(Mal 1:40-45, Luk 5:12-16)
1Yesu paeli bu'ka kukitu'mbi', ipi'nga yambone ya bandu yaatikummi'ngi'ya. 2Mundu yumo mwene matana ngaisa kilikita nnu'ngi' yake kammakia, “Bwana, mana upendile, unipeleteye.” 3Yesu nga golwa luboko lwake na kunkunywa mundu yu'lu', kummakia, “Mbala, upeleteke.” Yu'lu' mundu ngaimukya matana gake gapeletike. 4Bu'kapo, Yesu ngammakia, “Likowe li' ulibi'ke pamwoyo wako, kaneummakiye mundu. Lakini uyende kwa mpi'ndo wa dini ukannaye mwobile nambi'yambi'. Bu'kapo, upiye salaka kati mwaamulise Musa, li'nga ipange ukong'ondeli kwa bandu boti panga upeleteyilwe.”
Yesu antepwa ntumisi wa mpi'ndo wa asikali ba Roma
(Luk 7:1-10)
5Yesu paabile kayingya pakilambo sa Kapernaumu, mpi'ndo yumo wa asikali ba Roma aatikunnyendelya na kunnu'ba, 6“Ntumisi wangu' endatetelya, aminya utamwe wo tomboloka.”
7Yesu ngammakia, “Nilu'a isa nintepwe.” 8Ila yu'lu' mpi'ndo wa asikali ngannyangwa, “Bwana, nenga nipwaikali kukupokya wenga nnyumba yangu'. Lakini kwa amuli yako bai, ntumisi wangu' alu'a yu'yu'ki'lwa. 9Kwa mwanjaa ata nenga na mundu ywanibile pai' ya utawala wa alongosi, kai' nibile na asikali bababile pai' yangu'. Na mana nimmakiye yumo, ‘Yenda!’, nembe endayenda. Mana nimmakiye ywi'ngi', ‘Wise!’, nembe endaisa. Na mana nimmakiye ntumisi wangu', ‘Panga mono’, nembe apanga mwanimmakiye.”
10Yesu pagayu'wine mayi'gi'yo go, aatisangala na kwabakia bandu babaabile kabammi'ngi'ya, “Kakape nendakummakianga, munni'ma woti wa Isilaili, namonali mundu mwene imani ngu'lu' kati yu'. 11Nimmakianga panga baaisa bandu bambone bu'ka kumbwani na kundondi, nabembe baatama pakitamo simo na Bulaimu, Isaki na Yakobi pakalamu ya Ukulungwa wa Kunani. 12Lakini Baisilaili baingi babaapalikwe baa muukulungwa wo baataikulilwa panja kulubi'ndu', na akwo balu'a li'la no yaga mino.”
13Bu'kapo, Yesu ngammakia yu'lu' mpi'ndo wa asikali, “Ubuyangani kasako, na ipange kati mwauu'bi'lile.” Na ntumisi wake ngayu'yu'ki'lwa saa yi'yi'lu'yi'lu'.
Yesu aatepwa bandu baingi
(Mal 1:29-34, Luk 4:38-41)
14Yesu payingi munyumba ya Petili, aakwembite mau' mukwe ba Petili bagonjike pakindanda kabaminya oma. 15Bai, Yesu ngankunywa na luboko lwake, ngayu'yu'ki'lwa. Abo mau' ngabayi'ma no tumbwa kuntumikia.
16Na payabile kakupilya, bandu baingi babaabile na moka ngabaletelwa kwa Yesu. Yesu ngaabi'nga balu' moka, kaamulisa kwa liyi'gi'yo lyake bai, na kwatepwa atamwe boti. 17Aapangite nyo li'nga gatimi mayi'gi'yo gagalongelilwe na nnondoli Isaya,
“Ywembe aapu'twi ukigopi witu no pu'twa kigombo sa matamwe gitu.”
Babapwaika panga aumini
(Luk 9:57-62)
18Yesu paabweni bandu bambone kabanti'li'ta, ngaamulisa banamasi' bake baloki liyi' li'ngi' lya litanda. 19Mwalimu yumo wa salya ngannyendelya na kummakia, “Mwalimu, nenga nilu'a kubi'ngi'ya kwokwoti kwalu'a yenda.” 20Yesu ngannyangwa, “Ibweya babile na mapango gabe go tama, na iyuni babile na iyumba yabe, lakini Mwana wa Mundu aoba no pogonjeka lubau lwake.”
21Na mundu ywi'ngi' mukipi'nga sa banamasi' bake ngammakia, “Bwana, uniyi'ki'ti'ye wi'ti' nikasike tati' bangu'.” 22Lakini Yesu ngannyangwa, “Unibi'ngi'ye, waleke babawile basikane bene na bene.”
Yesu agaamulisa mabi'mbi' ga baali gatame liki
(Mal 4:35-41, Luk 8:22-25)
23Nembe Yesu ngayingya mungalaba, banamasi' bake ngabammi'ngi'ya no longwana nakwe. 24Lolekeya, baimukya mabi'mbi' mubaali kagapukatya no tumbwa kwiwi'ki'lya ngalaba yoti. Apo, yai Yesu agonjike lugono. 25Banamasi' bake ngabamwegelya na kunnyumuya kabammakia, “Bwana, twendawaa! Utukosopoli!” 26Yesu ngaabakia, “Mwanjaa namani muyogopa, mwenga mwabene imani njene?” Bu'kapo, ngayi'ma na kuukalipya wu'lu' nsunga na mabi'mbi', ngakubaa liki muno. 27Balu' bandu baatisangala kababaya, “Ayu' mundu, mundu gani? Ata nsunga wa mubaali wendakunnyu'wa!”
Yesu aatepwa bandu abi'li' bene moka
(Mal 5:1-20, Luk 8:26-39)
28Nembe Yesu paikite kwiyi' ya litanda kunni'ma wa Agelasi, aakwembine na bandu abi'li' babaatwi'li moka kababu'ka kumasiko. Baabile akali' muno, ata bandu baakombwili pi'ta ndi'la yo. 29Nabembe ngabatumbwa kemelya kababaya, “Ubile na makowe gani na twenga, wenga wa Mwana wa Nnu'ngu'? Wisi pano kutuku'su'mbwa pangali timya nsimu witu waubi'kilwe?”
30Papipi na pandu po, paabile na kipi'nga kiku'lu' sa magu'be kabali'lya. 31Balu' moka ngabampembelelya Yesu kabammakia, “Mana kautubi'nga, utuyi'ki'ti'ye tuyende tukayingi mukipi'nga si'lu' sa magu'be.” 32Yesu ngaabakia, “Muyende!” Ngababu'ka na kwayingya balu' magu'be, na kipi'nga soti ngakibutuka kakielya mungeleuko, mpaka mulitanda, ngabawaa.
33Balu' bandu babasungage magu'be ngababutuka yenda kumisengo no yaulya goti gagapangike, na galu' gagaapiti balu' bandu abi'li' babaatwi'li moka. 34Bu'kapo, bandu boti ba misengo yo ngabayenda kwembana na Yesu. Nabembe pabaamweni, ngabannu'ba abu'ke mumisengo yabe.
Okuqokiwe okwamanje:
Matei 8: Matumbi
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2019 Pioneer Bible Translators
