Matayo 7

Ohusalira abandi omusango

(Luk 6:37-38,41-42)

1“Mutasaliranga bahyenywe misango, mwesi Hatonda saalibasalira. 2Olwohuba, mu ngeri enyene eyi musaliramo abahyenywe emisango, njʼeyi mwesi Hatonda alibasaliramo. Era ehipimo ehi mu pimiramo abandi, ehyene ehyo mwesi cʼehi balibapimiramo.#Mar 4:24 3Lwahiina ehiri hu wahyo njʼehiraŋi hyʼohuloma, waleherera ehi huliho ewe wamwene? 4Oŋanga otye ohuloma mulebewo oti, ‘Mulebe yange, leha kutuse ahaatu hu moni,’ aye ewe wamwene nʼotebona oguutu oguhuli hu moni? 5Munafuusi ewe, sooka wetuseho oguutu oguhuli hu moni ko oŋange ohutusa ahaatu ahali hu wahyo.

6“Simuŋambanga ebiitu ebyabufu mwabiŋa ababbengi. Olwohuba bali hyʼembiiji ejityakirira ebiitu ebyʼomugaso jonoona, era bali hyʼembwa ejibacuuhira jabaluma.”

Saba, yendula era kookona

(Luk 11:9-13)

7Ngʼaŋo Yesu aloma beegi babe ati, “Mulombenga, Hatonda alibaŋa ehi musaba, mwegumyenga ohwendula, muligundula era mukookonenga, balibeguliraŋo. 8Olwohuba hiisi asunga bamuŋa, owendula agundula, nʼakookona yeesi bamwiguliraŋo. 9Ale njʼani hu enywe aŋa omwana wuwe ebaale nʼamusungire omugaati 10oba aŋa omwana wuwe etemu nʼamusungire enyeeni? 11Olwo ŋaahani obanga enywe ababi mumanyire ohuŋa abaana benywe ebiraŋi, ne Senywe ali mwigulu saalihira bugali weene ohuŋa ebiraŋi abo abamusunga?

12“Olwʼehyo mu hiisi hiitu hyosihyosi, muholerenga abahyenywe ebi mwahendire mwesi babaholere. Ebyo mu buupi njʼebiri mu magambi nomu ebi banaabbi baŋandiiha.”#Luk 6:31

Omulyango omudiiŋi nʼomugalamu

(Luk 13:24)

13Yesu geyongera ohuloma abeegi babe ati, “Mufubenga ohwingirira mu mulyango omudiiŋi, olwohuba omulyango ogwingira mu husihiiriha mugalamu, nʼengira eyolayo ngalamu era bangi abayibitamo. 14Ne omulyango ogwingira mu bulamu obutaŋwaŋo mudiiŋi, nʼengira eyolayo yahwenyigiirisa, nʼabayigundula sibangi.

Omusaala nʼebibala byagwo

(Luk 6:43-44; 13:25-27)

15“Mwehuumenga abanaabbi abʼobudulingi, abaaja eyi muli ni baboneha bawombeefu hyʼetaama, aye mugati mula ni bali hya nalaŋa. 16Ne munahabafaanihisye hu bikolwa byawe. Ebibala ebyʼomusaala ogu balanga baati omutiini sibabinoga hu buŋwa obusaba, nʼebibala byʼemizabbibbu sibabinoga hu manani. 17Mu ngeri njʼenyene hiisi musaala omulaŋi gwama ebibala ebiraŋi, aye omusaala omubi gwama ebibala ebibi. 18Omusaala omulaŋi sigwama bibala ebibi era nʼomusaala omubi sigwama bibala ebiraŋi. 19Hiisi musaala ogutataho bibala ebiraŋi bagutemaaŋo, era bagudanya mu muliro.#Mat 3:10; Luk 3:9 20Hyʼemisaala, abanaabbi abʼobudulingi boosi mulibafaanihisya hu bikolwa byawe.#Mat 12:33

21“Si hiisi owunanga ati, ‘Musengwa, Musengwa,’ aja hwingira mu buŋugi wa Hatonda, ohutusaho oyo ahola ebi Bbaabba ali mwigulu genda. 22Hu ludaalo olwo, bangi balindoma baati, ‘Musengwa, Musengwa, sihwasomesanga mu siina liryo? Sihwabbinganga emisambwa hu baatu era hwahola ebyamaliholiho bingi mu siina liryo?’ 23Aye ese ndibagobolamo lwatu ti; ‘Simbamanyire era simanyire nʼeyi muŋwera. Olwʼehyo, mupwere ni naaŋo enywe abahosi bʼebibi.’#Zab 6:9

Omutongoli omugesi nʼomubuyabuya

(Luk 6:47-49)

24“Olwʼehyo hiisi aŋulira ebibono byange gahena gabiholeraho, ali hyʼowatongola enyumba yiye hu mabaale. 25Efula yagwa, ngʼamaaji gabanda, ngʼepunga ehubba enyumba eyo, aye siyefumuliraŋo olwohuba gayitongola hu mabaale. 26Aye hiisi aŋulira ebibono byange ebyo, ndabiholeraho, ali hyʼomuutu omubuyabuya, owatongola enyumba yiye hu mujehe. 27Efula ni yagwa, ngʼamaaji gabanda, ngʼepunga ehubba enyumba eyo yefumuliyeŋo yosiyosi yaŋwera hwiroba.”

28Yesu ni gahena ohuloma ebibono ebyo, ehiŋindi hyʼabaatu hyeŋunja bugali esomesa yiye.#Mar 1:22; Luk 4:32 29Olwohuba gasomesanga nʼobuŋangi, sosi hyʼabasomesa bʼamagambi ga Hatonda.

Okuqokiwe okwamanje:

Matayo 7: NUJ

Qhakambisa

Dlulisela

Kopisha