SAN MATEO 12
12
Jesús apkeltámeséyak apnakxo hótahap apyexna ekhem apkellókasamakxa apkelyampé énxet'ák judíos
(Mr 2.23-28; Lc 6.1-5)
1Apweynchámeyha axta Jesús neyseksa aksok kélcheneykekxa, cham'a ekhem sábado apkellókasamakxa axta apkelyampé énxet'ák judíos. Meyk axta kelnápak apkeltámeséyak, apnakxégkek axta hótahap apyexna,#Dt 23.25. keñe axta aptókagko m'a apaktek. 2Apwet'ak axta énxet'ák fariseos xa, keñe axta aptaha apcháneya Jesús se'e:
—Elano, xama aksok apkelánegkok apkeltámeséyak megkólhayo nak anlának ekhem sábado nellókasamakxa nak nelyampé.
3Aptahak axta apchátegmowágko Jesús se'e:
—¿Yagkólyetseteyk kéxegke weykcha'áhak aptémakxa axta David, cham'a eyakhama axta meyk yetlo apkelxegexma'a? 4Aptaxnegwokmek axta Dios tegma appagkanamap apagkok, aptókagkek axta anhan ma'a pan kélpagkancheso axta Dios,#1 S 21.1-6. cham'a megkólhayók axta etwok David tén han ma'a apkelxegexma'a, wánxa aksa etwok ma'a énxet'ák appasmo nak apkelmaxnéseso Dios énxet'ák apagkok.#Lv 24.9. 5¿Yagkólyetseteyk nahan Moisés segánamakxa apagkok ekxeyenma nak meláneykegkok melya'asáxma énxet'ák appasmo nak apkelmaxnéseso Dios énxet'ák apagkok, mellókasemek eykhe apkelyampé ekhem sábado nellókasamakxa nak nelyampé?#Nm 28.9-10. 6Eltennásek eyke ko'o ekyetna xama aksok ektakmela agko' se'e mexnawok ma'a tegma appagkanamap nak. 7Megkólya'ásegkok kéxegke ektémakxa nak ekxeyenma eknaktáxésamaxche s'e: ‘Wánxa aksa ko'o seyámenyého kóltehek kéxegke ekha apmopyósa kóllanok kélmók, keñe maltamho helmések ma'a aksok ektekyawa nak.’#Os 6.6; Mt 9.13. Kaxtemek xeyk kélya'áseyak, megkólsexnenayhek xeyk énxet'ák meláneykegko nak xama aksok ekmaso. 8Yetneyk apmopwána elának aksok ekhem nellókasamakxa nelyampé m'a aptaha nak Apketche énxet.
Jesús aptakmelcheseyam xama énxet ekyame apmek ekhem apkellókasamakxa apkelyampé énxet'ák judíos
(Mr 3.1-6; Lc 6.6-11)
9Apxegkek axta Jesús apkeñama m'a, aptaxnegwokmek axta tegma apchakneykekxexa axta énxet'ák judíos. 10Apheyk axta xama énxet ekyame apmek ma'a; apkeltamhok axta eykhe énxet'ák etegyaha aptemésesakxa yakwayam esexnenak Jesús. Aptahak axta apkelmaxneyeyncha'a s'e:
—¿Megkamyawaxcheya kóltakmelchesók xama énxet apháxamap ekhem sábado?
11Aptahak axta Jesús apchátegmowágko s'e:
—¿Yaksak kélxama kéxegke apyetna kéltóso nekkések, apteyekmek agkok kañe' máxek ekhem nellókasamakxa nelyampé megkólya'ameya yakwayam kóllekwók?#Lc 14.5. 12¡Apmomnáwa apagko' énxet mexnawok nekkések! Ekeso eñamakxa negkegwagko nak anlának aksok ektakmela ekhem nellókasamakxa nelyampé.
13Keñe axta aptaha apcháneya Jesús énxet ekyame apmek se'e:
—Epékes apaktog.
Appékesek axta apaktog xa énxet nak, takmelwokmok agko' axta anhan, hágweykxók axta m'a mók. 14Xama axta apkelántepa énxet'ák fariseos, apkeláneykxek axta apkelpakmeyesma yakwayam yakhek Jesús.
Temegkek axta m'a ektémakxa axta apxénamap Jesús eknaktáxésamaxche
15Xama axta apleg'a amya'a Jesús, keñe axta apxega. Apxámok axta énxet apyetlo, apkeltakmelcheseykmek axta Jesús apyókxoho apkelháxamap, 16apkeltamhok axta anhan Jesús megkóltekkesesha apwesey nepyeseksa énxet. 17Cháxa ektahakxa axta ektaha m'a apkeltenneykencha'a axta Isaías, aptaha axta Dios appeywa aplegaso, aptéma axta apkeltenneykencha'a s'e:
18“Keso seyásenneykha ko'o s'e,
ko'o axta selyéseykha,
aptaha nak han seyásekhayo,
leklamok nahan ewáxok aptémakxa.
Agkések sat nahan ko'o Espíritu ahagkok,
eltennasha sat nahan apyókxoho énxet'ák
ma'a ekxeyenma nak ko'o ewáxok
ektaha ekpéwomo.
19Mepakmésmakha sat, melpáxamha sat nahan,
megkañexchek sat nahan appeywa m'a
ámay nepyeseksa tegma apwányam.
20Megyentaksek sat ma'a yamámok ektakhé nak,
mespanchesek sat nahan ma'a
chálewaso yátépépe agkok
ketse' ekpánma nak.
Elenxanmohok sat ekwokmoho
apkelyahákxoho énxet'ák ma'a
apkeltémókxa nak antehek Dios.
21Apxámokxoho énxet'ák sat
etnahagkok melya'áseyam ma'a.”#Is 42.1-4.
Jesús apxénamap eñama ekméso apmopwána kelyekhama'
(Mr 3.20; Lc 11.14-23; 12.10)
22Kélyentegkek axta aphakxa Jesús xama énxet meyke apakta'ák tén han meyke appeywa, kelyekhama' ektawáseykha axta m'a. Apwetáseykxeyk axta exma Jesús tén han aptekkesásekxo appeywa. 23Aptahak axta cha'a apkelmaxneyeyncha'a pók apyókxoho énxet'ák ekpelakkasa apkelwet'a s'e: “¿David apketche enxeykel'a xa?”
24Xama axta apkelleg'a énxet'ák fariseos xa, aptahak axta apkelpakmeta s'e: “Kelyekhama' wese' agkok ekwesey Beelzebú nak ekméso apmopwána yakwayam elántekkesek kelyekhama' xa.”#Mt 9.34; 10.25.
25Apya'ásegkok axta Jesús ektahakxa elchetamso apwáxók xa énxet'ák nak. Aptahak axta apkeláneya s'e: “Apkexpancháseykpek agkok énxet'ák xama apkelókxa keñe etnehek apkelenmexamap, apnaktawásamap apancha'awók etnahagkok. Apkexpancháseykpek agkok nahan énxet'ák apheykha tegma apwányam, esenhan apheykha nak xama tegma, megkawegkók apheykha. 26Hawók nahan ektémakxa m'a Satanás, tekkesek agkok mók kelyekhama' xamo' nak, elexpanchásamáxche agko' katnehek, kamassegwók ma'a ektémakxa nak ekmowána. 27Kélxénchek kéxegke selántekkesa ko'o kelyekhama' eñama ekmowána m'a Beelzebú, nakso' agkok ektéma xa, ¿yaksak ekméso apmopwancha'a elántekkesek kelyekhama' m'a apkelyetleykekxa nak kéltémakxa kéxegke? Cháxa keñamak ekwetáxko ekyetna megkólakhémo kéxegke xa. 28Elántekkesek agkok ko'o kelyekhama' eñama apmopwána m'a Dios Espíritu apagkok, cháxa magkenatcheso ekwa'a kélnepyeseksa kéxegke m'a aptémakxa nak Wese' apwányam Dios.
29“¿Háxko katnehek etaxnegwók énxet kañe' apxagkok ma'a énxet ekha nak apyennakte, tén han elyementók ma'a aksok apagkok, cham'a melpexteta enxoho sekxo'. Wánxa aksa yepwának elyementók aksok apagkok ma'a apkelpexteta enxoho.
30“Enxet aptaha nak mehepasmo ko'o, apteme senmexeykha;#Mr 9.40. énxet mehewháneyo nak seyancháseykekxa ko'o, yexpánchesek.
31“Ekeso eñamakxa seltennasa nak kéxegke peya meyakmagkásekxék Dios ekyókxoho ektémakxa nak melya'asáxma énxet'ák, tén han ma'a ekyókxoho ektémakxa nak cha'a apkelpakméteykha ekmaso, wánxa agkok, eyakmagkásekxak sat eyke Dios ektahakxa enxoho ekxeyenma ekmaso Espíritu Santo. 32Kawomhok sat nahan meyakmagkáseykekxa Dios aptémakxa m'a énxet apxeyenma ekmaso nak ma'a aptaha nak Apketche énxet; wánxa agkok eyakmagkásekxak sat#Lc 12.10. eyke Dios aptémakxa m'a énxet apxeyenma nak ekmaso Espíritu Santo neyseksók apha keso náxop, tén han ma'a egmonye sat.
Ekyexna keñamak kélyekpelchémo yámet
(Lc 6.43-45)
33“Tásek agkok yámet, tásek katnehek ma'a ekyexna; asagkók agkok yámet, asagkek katnehek ma'a ekyexna; ekyexna cha'a kañék kélyekpelchémo yámet.#Mt 7.20; Lc 6.44. 34¡Kélhawók kéxegke yéwa!#Mt 3.7; 23.33; Lc 3.7. ¿Háxko katnehek kólxének aksok ektakmela eyesagko enxoho kéltémakxa kéxegke? Ekyókxoho ektémakxa nak elchetamso apwáxok énxet katyapwakxak ma'a apátog.#Mt 15.18; Lc 6.45. 35Aksok ektakmela cha'a exének ma'a énxet ektakmela nak aptémakxa, hakte keytek aksok ektakmela m'a apwáxok, keñe m'a énxet ekmaso nak aptémakxa, aksok ekmaso cha'a exének, hakte keytek aksok ekmaso m'a apwáxok. 36Eltennásek ko'o kéxegke peya kólxénekxohok ektémakxa kélpeywa naksa m'a ekhem nelyekpelchamáxchexa sat. 37Kélpeywa kélagko' sat kañék kélyekpelchamáxkoho kéxegke, meyke kéltémakxa sat kexaha, kélsexnánémaxche esenhan.”
Enxet'ák elmasagcha'a apkeltémakxa apkeltémo étak aksok sempelakkaso nak agweta'
(Mr 8.12; Lc 11.29-32)
38Nápakha énxet'ák fariseos axta apkelpakmétak, tén han ma'a apkelxekmóso nak Dios énxet'ák apagkok ektémakxa segánamakxa, aptahak axta apcháneya Jesús se'e:
—Sẽlxekmóso, egmenyék negko'o agwetak elának xép aksok sempelakkaso nak agweta'.#Mt 16.1; Mr 8.11; Lc 11.16.
39Aptahak axta apchátegmowágko Jesús se'e:
—Apkeltamhok étak aksok sempelakkaso agweta'#Mt 16.4; Mr 8.12. se'e énxet'ák elmasagcha'a nak apkeltémakxa, apyenseyam nak han apkelyetlo Dios. Wánxa sat kólxekmósek kéxegke aksok sempelakkaso agweta' ma'a ektémakxa axta Jonás aptaha axta Dios appeywa aplegaso. 40Kaxhok sat ma'a ektémakxa axta Jonás apha antanxo ekhem tén han antanxo axta'a kañe' kelasma ekyawe awáxok,#Jon 1.17. sat nahan katnehek ma'a aptaha nak Apketche énxet, antanxo ekhem, antanxo axta'a, sat katnehek apyetno kañe' xóp. 41Yaknaha sat ma'a énxet'ák apheykencha'a axta tegma apwányam Nínive, cham'a ekhem nelyekpelchamáxchexa sat, cham'a kéltaha sat nahan kélyekpelchémo énxet'ák apheykencha'a nak se'e kaxwo' nak, elsexnenak sat énxet'ák hakte apkelyakmagkasegkek axta apwáxók ma'a énxet'ák apheykencha'a axta Nínive, cham'a apkelleg'a axta apkeltenneykha Jonás;#Jon 3.5. akke exnawok Jonás aksok ekyetna nak se'e. 42Katnamha sat nahan wese' ekwányam eñama nak Nepyeyam cham'a ekhem nelyekpelchamáxchexa sat, cham'a kéltaha sat nahan kélyekpelchémo énxet'ák apheykencha'a nak se'e kaxwo' nak, kalsexnenak sat énxet'ák, hakte tayépok agko' axta eñamakxa eltamho keyxhok ektémakxa apya'áseykegkoho Salomón ma'a,#1 R 10.1-10; 2 Cr 9.1-12. akke exnawok Salomón aksok ekyetna nak se'e.
Espíritu ekmaso ektakhémo
(Lc 11.24-26)
43“Tekkek agkok xama kelyekhama' énxet apwáxok, kamhagkok ma'a yókxexma ekyamakakxa nak exma meykexa yegmen, yakwayam enxoho kategyaha ellókasamakxa ekyampé; agkok nahan kót'ak, keñe katnehek elchetamso awáxok se'e: 44‘Atakhohok sat ma'a exagkok, cham'a sektepakxa axta.’ Takháwok agkok, keñe kóteyágwakxak énxet apwáxok ektémol'a tegma meyke ekha kañe', kéláxñeso, tén han kéltakmelcháseykekxoho kañe'. 45Keñe kaxog, kánchesekxak ma'a siete kelyekhama' elmasagcha'a agko' nak, megkaxnawo xa mók nak, kasawhaxkohok nahan kalántaxnegwók xa énxet apwáxok nak, keñe kayeykhágwomhok agko' ektahakxa xa énxet nak, megkaxók ma'a ektémakxa axta sekxo'. Sat nahan katnehek xa énxet'ák elmasagcha'a nak apkeltémakxa keso negwánxa nak.”
Egken, tén han Jesús apkelyáxeg
(Mr 3.31-35; Lc 8.19-21)
46Apkeltennáha axta makham Jesús nepyeseksa énxet'ák, cham'a ekyo'ókmo axta egken, tén han ma'a apkelyáxeg, mokók axta kapakhetchesek. Yókxexma axta chaknáha, 47kéltennásekxek axta Jesús. Entahak axta amya'a apcháneyákpo s'e:
—Yókxexma exchek kenmáha egken tén han apkelyáxeg, xép xeyk kélmokók kólpakhetchesek.
48Aptahak axta apchátegmowágko Jesús ma'a ektaha axta apkeltennáseykekxa:
—¿Yaksak ko'o méme, yaksak nahan ma'a elyáxeg?
49Appenteyhagkok axta Jesús apkeltámeséyak, aptahak axta s'e:
—Keso ko'o méme s'e, tén han elyáxeg. 50Enxet ektahakxa enxoho apkelané m'a apmopmenyého nak Táta apha nak néten, cha'a aptaha eyáxeg ko'o m'a, tén han elyáxeg kelwán'ák, tén han méme ahagkok ko'o m'a.
Okuqokiwe okwamanje:
SAN MATEO 12: LEGN
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Lengua Sur (Enxet) New Testament © United Bible Societies, 1992.
