GÉNESIS 3
3
Runaqa Diospa nisqanta p'akin
1Katareqa may jina yuyaysapa karqa, Señor Dios tukuy monte animalesmanta ruwasqasninmanta nisqaqa. Pay warmita taporqa: Ajinatachu Diosqa nisunkichej huertapi kaj tukuynin sach'aspa poqoyninta ama mikhunkichejchu?, nispa.
2Warmitaj kuticherqa: Atiyku mikhuyta tukuynin sach'aspa poqoyninta. 3Huerta chaupipi kaj sach'allamanta Diosqa niwayku amapuni mikhunaykuta, ni llujchirinallaykutapis. Chaymanta mikhunkichej chayqa, wañunkichej, niwayku.
4Kataritaj nerqa warmiman: Chayqa mana cheqanchu, mana wañunkichejchu. 5Dios yachan allinta, maypachachus chay sach'aj poqoyninta mikhojtiykichej sumaj yachayniyojman tukunaykichejta. Ajinamanta chaywan qankunaqa Dios jina kankichej, yachankichejtaj imachus allin kajta mana allin kajtapis.
6Warmitaj sach'ata qhawarerqa mikhunapaj jina moq'eyta. Jinallataj chayta mikhuykuspa imatapis yachanapaj jina. Ujnin poqoyninta p'itispataj mikhuykorqa; qosanmampis jaywarqa, paypis mikhuykullarqataj. 7Kikimpachataj ñawisninku kicharikorqa, reparakorqankutaj q'alaslla kashasqankuta. Kikimpachataj higos laqhesmanta p'achasta sirakorqanku, chaywantaj mayt'ukorqanku.
8Qhareqa warminwan uyarerqanku Señor Diospa purisqanta, ch'isiyay wayra wayrapi huerta ukhupi kayman jaqayman purishajta. Paykunataj usqhay usqhayta huerta ukhupi pakaykukorqanku sach'as ukhuman. 9Señor Diosqa qharita wajyarqa: Maypitaj kashanki?, nispa.
10Qharitaj kuticherqa: Uyarerqayki huerta ukhupi purishajta, manchachikorqayki q'alalla kaspa, chayrayku pakaykukorqani.
11Diostaj taporqa: Pitaj nisunki q'alalla kasqaykitari? Kay sach'aj poqoyninta amapuni mikhunkichu, nisqaytachu mikhorqanki?, nispa.
12Qharitaj kuticherqa: Qampa qowasqayki warmeqa chay sach'aj poqoyninta qowarqa, noqataj mikhuykorqani.
13Señor Diostaj warmita taporqa: Imatataj ruwarqankiri? Paytaj kuticherqa: Katari ch'aukiyawan, chayrayku mikhorqani chay sach'aj poqoyninta.
14Señor Diostaj nerqa katariman: Kayta ruwasqaykirayku kunanqa maldicisqa kanki tukuy uyaspa, tukuy monte animalespa chaupimpiwan. Kunanmanta jaqaymanqa qhatatakuspa purinki, jallp'atataj mikhunki tukuy kausayniykipi. 15Qantawan warmitawan chejninachisqaykichej. Jinallataj mirayniykiwan mirayninwampis chejninakonqanku. Miraynin umaykita saronqa, qantaj chaki talonninmanta khaninki.
16Warmimantaj nerqa: Nanayniykita aswan ashkhata yapasaj onqoj kashajtiyki, nanaywantaj onqokunki wawasniykita. Munasqaykitaj qosaykiman apasonqa, paytaj qanta kamachisonqa.
17Qharimantaj nerqa: Warmiykita kasusqaykirayku, chay sach'aj poqoyninta amapuni mikhunkichu mikhuspa nerqani chayta, kunanqa jallp'a maldicisqa kanqa; ancha ñak'ariywantaj poqochinki mikhunaykipaj tukuy kausayniykipi.
18Jallp'aqa wiñachipusonqa khishkasta, tukuy sajra qhorastawan; qantaj qhasi qhoraspa poqoyninta mikhunki. 19Jump'i suruyta llank'anki mikhunaykipaj ñut'u jallp'aman tukunaykikama; imaraykuchus jallp'amanta ruwasqa kanki, jallp'a kanki, jallp'amantaj kutinki.
20Qhareqa warminta suticharqa Evata, imaraykuchus pay karqa tukuy kausajkunaj maman. 21Señor Diosqa p'achasta ruwaporqa animalespa qarasninmanta qhari warmipaj, jinaspataj paykunaman p'achallicherqa. 22Nerqataj: Runaqa ujninchej jina kunanqa, yachan allin kajta, mana allin kajtapis. Kunanqa ama makinta oqharillachuntajchu, kausay sach'aj poqoyninta orqhospa mikhuykuspataj wiñaypaj kausanampaj.
23Chayrayku Señor Diosqa runata Edén huertamanta qharqorqa; churarqataj jallp'ata llank'anampaj, mayqenmantachus ruwasqa karqa chayta. 24Ajinata runataqa jawaman qharqorqa. Querubinestataj sayaricherqa Edén huertaj inti llojsimuyninnejman, uj larwashaj espadatawan, muyuyninta muyushajta, jark'anampaj amapuni pipis kausayta qoj sach'aman qayllaykunampaj.
Okuqokiwe okwamanje:
GÉNESIS 3: QCHSB
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Qheshwa Biblia DC © Sociedades Bíblicas Unidas, 1986.