Matayo 7
7
Okuramura na indengo
(Lk. 6:41-42)
1Musige kuramura, emwe one korereki musige kuramurwa. 2Kwo kuba okuramura kunu omuramura emwe one nikwo muriramurirwa. Na indengo inu omurengamo, niyo one murirengerwa emwe. 3Kubaki ourora akakongokera kanu kari mu ri:so ryo wanyu, nawe utakurora riti riri mu ri:so ryao? 4Tere amwi urimubwira kutiki owanyu ati, Siga nikuso:sye aka:nu kanu kari mu ri:so ryao, ke:nu riti riri mu ri:so ryao? 5Rurimi awe, tangata uso:sye riti mu ri:so ryao, mbe niwo urore kisi okuso:sya akakongokera mu ri:so ryo wanyu. 6Mutayanaga mbwa ci:nu ce:ru, amwi mute:saga jiru:ru jemwe imbere ya jingurube, jasiga okujitajirira ne bigere byajo, nijicu:ka okubaka:bura.
Okusabwa
7Musabwe muriyabwa, muyenje muribona, mwibu:re muri:gurirwao. 8Kwo kuba mu:nu wo:ne unu kasabwa kayabwa, na unu kayenja kabona, na unu ke:bu:ra ke:gurirwao. 9?Amwi ni mu:nu ki mwimwe omwana wae akamusabwa obusima kamuyana ebui? 10?Akamusabwa iswi kamuyana injoka? 11Kambe emwe ababi:bi mumenyere okuyana aba:na bemwe ebi:nu bye kisi, ?Esomwana unu ari mu rwire atakukira muno okuyana ebye kisi banu abamusabwa? 12Mbe byone binu omwenda aba:nu okubakoreraga emwe, nemwe one mubakorerega kutyo, kwo kuba eco nico ebiragiro na baragi.
Jinjira ebiri
13Mwingire mu muryango omufunde, kwo kuba omuryango omugari na injira inu eigenda mu kusimagira ni ngari, na banu abaturako ni ba:fu. 14Okuba omuryango omufunde na injira inu eigenda mu buanga ni funde na banu abaibona bakeere.
Abaragi abo rurimi
15Mwikenge abaragi bo rurimi, banu aba:ja kwimwe bafwae bifwaro bya ji:na:ma, nawe munda ni misege miruru mika:busi. 16Muribamenyera ku matwasyo gebwe. ?Abanoga emijabibu ku bikomati amwi abanoga jitini ku matobo:ro? 17Nikwo kutyo eti ryone erye kisi eritwasya amatwasyo ge kisi, nawe riti ribi:bi eritwasya amatwasyo mabi:bi. 18Riti rye kisi ritakutura kutwasya amatwasyo mabi:bi, nyaburiko na riti ribi:bi ritakutura kutwasya amatwasyo ge kisi. 19Eti ryone rinu ritakutwasya matwasyo ga kisi abaritema nibaryesa mu murio. 20Nikwo murikora nimubamenyera ku matwasyo gebwe. 21Tari ati mu:nu wo:ne unu kambwira ati, Ratabugenyi, Ratabugenyi, nuwe aringira mu bukama bwa mu rwire, tari unu kakora ebyo Rata unu ari mu rwire binu kenda. 22Ba:fu barimbwira ku rusiku niriya ati, Ratabugenyi, Ratabugenyi, ?citakoraga oburagi mwisi:na ryao, no kuirisya emisambwa mwisi:na ryao no kukora ebirugu:ro byafu mwisi:na ryao? 23Mbe niwo ndibabwiririrao ati, Nitendega kubamenya emwe. Munso:keko, emwe banu omukora obunyamusi.
Jinfuka ebiri
(Lk. 7:1-10)
24Mbe mu:nu wo:ne unu kongwa ebigambo byani binu no kubikora kwarikora nasusanyibwa rwo mu:nu wo bwenge unu ombakire inyumba yae ku rutare. 25Iŋuba nigwa, emigeresi nijiurura, omuyaga niguutu:tura nibibuma inyumba eyo, nirema okugwa, kwo kuba yombakirwe ku rutare. 26No mu:nu wo:ne unu kongwa ebigambo byani narema okubikora, arisusanyibwa rwo mutamutamu, unu ombakire inyumba yae mu nsenyi. 27Iŋuba ni:gwa, emigeresi nijiurura, omuyaga niguutu:tura, nibibuma inyumba, ni:gwa no kugwa kwayo nikuba kunene.
28Ejire Yesu amara ebigambo ebyo, ebise nibirugu:ra okwiigisya kwae. 29Kwo kuba abeigisyaga rwo mu:nu unu amenyere kata, tari rwa bandiki bebwe.
Okuqokiwe okwamanje:
Matayo 7: KIJ1960
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Kijita New Testament © The British and Foreign Bible Society and The Bible Society of Tanzania, 1960.
