Matayo 2
2
Abengeso nibamuyenja Yesu
1Wejire Yesu e:burwa mu Beteleemu ya Buyaudi, mu siku jo mukama Erode, mbe abengeso banu baso:kere ebuturuka nibakinga Yerusalemi. 2Nibaika ati, Ari a:ki unu e:buywe Omukama wa Bayaudi? Okuba carorere injota yae ebuturuka, nici:ja okumuramya. 3Nawe Omukama Erode ejire ongwa nawa omwoyo na ba Yerusalemi bo:ne aamwi nage. 4Nakofya abagabisi abakuru bo:ne na bandiki ba ba:nu, nababu:sirisya ati, ?Kristo ariburirwa a:ki? 5Mbamubwira ati, Mu Beteleemu ya Buyaudi, kwo kuba nikwo kutyo byandikirwe no muragi ati,
6Na:we Beteleemu mu ca:ro ca Yuda, utari muto:to mu bakuru ba Yuda.
Okuba Omutungi ariso:ka mwawe
Unu arire:ba aba:nu bani.
7Mbe niwo Erode nabirikira abengeso bwitebe, nababu:sirisya muno omwanya gunu injota yabonekeemo. 8Nabatuma Beteleemu na:ika ati, Mugende muyenjeyenje muno Omwana oyo, nawe mukamubona mu:je mumbwire, korereki anye one nije okumuramya. 9Wejire bongwa ebyo mukama nibe:muka, mbe rora, injota eyo baroree ebuturuka ni:batangatira ni:ja niimereguru anu Omwana ariga:ri. 10Wejire barora injota nibakonderwa ekonderwa ryafu butamire. 11Mbengira mu nyumba, mbarora Omwana na Maryamu nyiramwene, nibafukama nibamuramya, nibasurumura jinsagwa jebwe, nibamufu:wa emigemu ja jaabu no mugaju na mafuta amarange. 12Wejire bakengibwa na Nyamuanga mu ciro:to ati, musige kusuba ku Erode, nibasuba ewabo nibatura ku njira indi.
13Mbe wejire bagenda, mbe rora, maraika wa Ratabugenyi namusoromokera Yusufu mu ciro:to na:ika ati, Imuka, ugege Omwana na nyiramwene, wirukire Misiri, ubeyo kukinga runu ndikubwirira, kwo kuba Erode kajo:kuyenja Omwana amwite. 14Wejire arafya, nagega Omwana na nyiramwene mu ngeta nagenda Misiri. 15Naba eyo kukinga Erode anu afwiriye, korereki cikumire cinu Ratabugenyi a:ikiriye mu muragi ati, Nabirikiye Omwana wani okuso:ka Misiri.
16Mbe Erode wejire arora ati abengeso bamujimya, najira risungu ryafu, natuma aba:nu okwita aba:na be cisambaya banu bariga mu Beteleemu na mu mbibi jagwo jo:ne, banu bamarire myaka ebiri na banu bariga bacari kujimara, rwo mwanya gunu ababu:sirisisyemo abengeso kutyo gwariga guri. 17Mbe niwo cakumiye eco ca:ikirwe no muragi Yeremiya na:ika ati,
18Oburaka bungwiriywe mu Rama,
Okukunga no kurira jimamu,
Raeli naririra aba:na bae,
Atakwenda kusi:ri:sibwa kwo kuba batacariwo.
Mbasuba Najareti
19Erode wejire afwa, maraika wa Ratabugenyi nasoromokera Yusufu mu ciro:to mu Misiri, 20Na:ika ati, Imuka, ugege Omwana na nyiramwene, ugende mu ca:ro ca Israeli, kwo kuba banu bayenjaga Omwana okumwita bafu:ye. 21Nemuka nagega Omwana na nyiramwene naja mu:si ya Israeli. 22Wejire ongwa ati Arikelao atungire Buyaudi kubwa Erode esemwene, no:baya okusubayo. Nakengibwa na Nyamuanga mu ciro:to, nabarama nakinga mu mbara ja Galilaya. 23Wejire bakinga nibe:kara mu ruguyo runu rwatogwaga Najareti; korereki bikumire binu byaikirwe na baragi, ati, Aritogwa Munajareti.
Okuqokiwe okwamanje:
Matayo 2: KIJ1960
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Kijita New Testament © The British and Foreign Bible Society and The Bible Society of Tanzania, 1960.
