Matiyò 7

Jisòs fî yiki na kə ghàn ki njahtu ghɨ̂tù kə Yènfù bê ki tanitu

(Lûk 6.37-38, 41-42)

1“Kə ghàn hi ke njahtu ghɨ̂tù kə Yènfù bê ki tanitu.” 2Ghàn shìki ke njahtu ghɨ̂tù kəbi wùni lumu, ma Yènfù bê ki ghàn kəbi yâ. Ghàn shihi ke njahtu wûtù hì fêkà wûn nâbi ghɨ̀ni fêkà, ma ghɨ bê boŋa fek kəbi ghàn a fèk àtɨna. 3Njwô ghə te wò ke kə fu namtà fe fu mô a wâ nâ yi sê, yena wi fûŋ à fùkàk ghe ghɨ mô a wò yi se agha? 4Yi mô ni wò mô hi jìs yàni ha wâ nâ na, ‘Tek ma mu fihi namtà fe a wò yi se,’ a mô yâ wo kəta fûŋ à fùkàk a wo yi sê agha? 5Wò wùt wunâ wò kama nê gha ni! Yìti fihi fûŋ à fùkàk ghe ghɨ mô a wo yi sê, ma yi yuli ma wò ki khɨlî hi yen a namtà fe fu mô a wâ na yi sê.

6“Kə wò bè lyê shyə yulana ma wò fo ha busu. Wò ki nî kəbi ni, ma su nê kahà lumli wò. Kə wò bè lyê mwə̀ mù jùŋ ma wò tumhi ha kùnduku. Wò ki nî kəbi ni, wu làhi baha jèlì nì wulu.”

Jisòs yiki na ghɨta buf mwə̀ me ghɨna khɨŋa

(Lûk 11.9-13)

7Ghàn buf ma ghɨ nê fo ha ghàn, ghàn khɨŋ ma ghàn nê yen, kûmtì jwo ndâ ma ghɨ nê jumi ha ghàn. 8Beka à buf nâbi nde, ma ghɨ fo, khɨŋ nâbi nde ma wù nê yen, a kûmtì nâbi nde jwo ndâ ma ghɨ nê jimi ha wûn. 9À mò nde a ghàn a fùtɨ̂n a wâ wûn bufa shyə yəna ma wù fo ti ha wûn agha? 10Ki buf yili ma wù fo ywò ha wûn agha? 11Ghɨt a be te ghàn shìki khə hi fo mwə̀ mù jùŋ ha mwəlà mânù, ma nâ Bì wânù we wù mò a nyə̂ ma wù nê faŋ yàni hi fo mwə̀ mù jùŋ ha ghɨt ghe ghɨ bufa ha wûn agha?

12Yi mô na ghàn hi nê ha ghɨta ni te ghàn kòŋà na ghɨna ni ha ghàn. Ghɨna mò to gha ghe sak yi Musìs yike nì fòktìsù chiksu chìntè jîsà.

Jisòs yiki na ghɨta khɨli hi tohna yi jwô tetani

(Lûk 13.24)

13Ghàn lyi yi lak yi fə̀n wù Fùyènù chyàlà wu lum wu jwo mbàn yi tetani, beka jwo mbàn yi chiki ye mò luk wu ngəku. Lum we wu yênà wu lùk wu bobhenu ghaka kə ni, ghɨt a dona yênà afû. 14Biyani, jwo mbàn ye yi yênà wu lùk wu bònù mô tobte kə ni, lum we wu yênà afû tobte kə ni, ghɨt a dona yena wi.

Jisòs yiki kum fukâk nì tam we fu mo

(Lûk 6.43-44)

15Ghàn hi tôknà kum nì fòktìsu fəmsu. Su bu hi bèn ha ghàn, su hi kə̂kà te sù njyə̀, biyani a mô kə nâ nyam su basu. 16Ghɨ yena khɨle fukâk a wu tam afa fu mo. Ghɨ tà ye timi hì konà tamu fikù a kwo tù tùŋà makə wumu a tàŋsù yùsù. 17Yi mô kəbi yi ghəl te kâk fu jûŋ fù mo kə tamu jûŋù, fu be fu mo kə tam wu be. 18Kâk fu jûŋ fù wi hi mo jə̀ tam wu be, fu be fu bu hi mo jə̀ tam wu jûŋù. 19À faŋ nâbi fùni kâk fù hi mo tam wu jûŋù, ma ghɨ nê gbet à maka wu wùs. 20Yi mô kəbi na ghɨ yena khɨle fòktìsu fəmsu kə gha afa ghɨna nè.

Jisòs fî yiki kum tuk wu saku

(Lûk 13.25-27)

21À wijə ghɨt à jɨ̀m a ghɨ toŋte mu na Bâba a ghɨ bè lye a yi lak yi fə̀n wù Fùyènù. À bè lye kə ghɨt ghe ghɨna toŋte ni fê nê kə te Bom a nyə̂ khɨŋa. 22À bè hì mô wu tuk afa Yènfù bè saka mbyî, ma ghɨt a dona bê hi bufa ha mu na, ‘Bâba, Bâba, ghàh ndùku fôktè wijə gha Fùyènì a wo yi yet agha? Ghàh ndùku jûmà fihe wi yohnù be a ghɨta wùn, fê nê gha kanana ale ghɨ dô kə ni a wo yi yet agha?’ 23Wu yu mefû ma mu bê jis à banhi ha ghɨna na, ‘Mu tà timi hì khə ghàn ghɨt ghɨ̂n ghàn jùmtè wijə lâŋ wù Fùyènù. Ghàn lo chya a mu ashyə̂!’

Jisòs fî yiki kum nki tu ba tu tù bà

(Lûk 6.47-49)

24“Yi mô na nâbi nde wù yute gha ghɨ̂n a mu jìsà hì nê kə te mu jìsa mò te wùt wù tofana we wù shihi ba ndâ wûn lem chyə tɨna nì te, 25wuli nâ, jwosu tasu fwô, fufa ta chya fî shiklò, biyani ndâ àtɨ̂n te bwùhà beka chyə ndâ atɨna ndùku mô ma ghɨ lem nì te.”

26“Biyani, ma à yute nâbi nde jis yi mi yîn hì nê wi kə te mu jìsà, ma wù nê hi mô te a ngwòna wùt we wù tì lye ndâ wûn yen ba a tô sùsi, 27wuli nâ, jwosu tasu fwu chyâ, nâ fufa ta chyâ shik ndâ tɨ̂n, kə wu yu yì fən nâ fən yi bəmani.”

28À ndùku mô te Jisòs tì yike mihe gha ghɨn ni, jwo yum nôn à ghɨ̂t ghê, wu lum afa wù ndùku yike atɨ̂n, 29beka wù ndùku yike wi te chichàsu ghɨna su saksu. Wù ndùku yike kə nâ te wut we wù kəta jyaka wuna ghɨ ngɨŋa.

Okuqokiwe okwamanje:

Matiyò 7: bmv

Qhakambisa

Dlulisela

Kopisha