JOHAN 16
16
Thlarau Inthieng sinthaw
1“Sukthlûka in um nawna dingin hieng thu hi in kuomah ka hril ta hi.
2Inkhâwmna inahai inhnawngtir an ti cheu a, anih, tûkhawm a sukhlumtuhai cheu chun Pathien chungah thilṭha thawin inhrieng an tih, chuong ang hun chu a tlung ding a nih.
3Chuong thil chu thâwng an tih, Pa le kei an mi hriet naw leiin.
4Hieng thu hi in kuomah ka hril ta hi, a hun chu a hung tlung pha, ka hril ta cheu ti in hriet nâwkna dingin. Hieng thil hi a tîra inthawk ka la hril naw hrim cheu a nih, in kuoma ka la um leiin.
5Tu ruok hin chu a mi tirtu kuomah ka fe ding a nih, nangni rawi tukhawmin, ‘Khâwlai am i fe ding?’ tiin in mîn dawn si nawh.
6Nisienlakhawm, hieng thu hi in kuomah ka hril leiin in lungril chu lungngaiin a sip ṭeu lem ta a.
7“Nisienlakhawm, thu indiktak ka hril cheu hi, ka fe in ta dingin a ṭha; ka fe naw chun Thlamuongtu chu in kuomah a hung naw ding a ni si a; kei ka fe ruok chun in kuomah hung tir ka tih.
8Ama chu a hung tlung chun suol thua dâm, fel thua dâm, rorêl thua dâm khawvêl an thiemnaw inhriettir a tih;
9suol thua dâm thiemnaw chang an tih, kei an mi ring naw leiin,
10fel thua dâm thiemnaw chang an tih, Pa kuomah ka fe ding a na, nangnîn in mi hmu nâwk ta naw ding lei hin;
11rorêl thua dâm thiemnaw chang an tih, hi khawvêl lal hi inthiemlova a tlûk ta leiin.
12“In kuomah thu hril ding tamtak ka la nei ta rawp a; nisienlakhawm, tuhin chu tlin hri naw ti niu.
13Nisienlakhawm, ama Thlarau indiktak chu a hung tlung pha chun, thutak po poa chun ṭhuoi lût a ti cheu a, ama phuok fâwmin thu a hril âwm si naw a, thu a idawng taphawt chu hril lem a tih; thil hung tlung dinghai khawm inhriettir a ti cheu.
14Ama chun kei mi chawimawi a tih, ka taa mi lâng a ta, in kuomah ân hriettir ding cheu a ni si a.
15Pain thil a nei po po ka ta a nih; chuleiin, ‘ka taa mi lâng a ta, in kuomah inhriettir a ti cheu,’ ka ti hi.
Lungngaina hlimna hung inchang ding
16“Sâwt nawtêah nangnîn kei mi hmu naw ti niu a, sâwt nawtêa bawk nangnîn kei mi hmu nâwk in tih,” a ta.
17Chun, a închûktirhai ṭhenkhatin, “Ei kuoma a thu hril hi ieng am a na? ‘Sâwt nawtêah nangnîn kei mi hmu naw ti niu a, sâwt nawtêa bawk nangnîn kei mi hmu nâwk in tih,’ a ti le, ‘Pa kuoma ka fe ding leiin,’ a ti hi,” an in ti a.
18Chun, anni ma chun, “Hi hi ieng am a na? ‘Sâwt nawtê,’ a ti hi. A thu hril hi a ngaina ei hriet nawh,” an ta.
19Chun, ama indawn an nuom ti Isûn a hriet a, an kuomah, “ ‘Sâwt nawtêah nangnîn kei mi hmu naw ti niu, sâwt nawtêa bawk nangnîn kei mi hmu nâwk in tih,’ tia hi ka thu hril hi in indawn maw?
20Titakzetin, ka hril cheu hi, nangni in mitthli tlâng a ta, ṭap rak bawk in ta, khawvêl ruok chu lâwm an tih, nangni lungngai in ta, nisienlakhawm, in lungngai chu lâwmin inchang a tih.
21Nuhmeiin nauha ân vawiin a lungngai hlak, a hun a tlung ta leiin, nisienlakhawm, nau a hung nei phing chun a thlaphâng chu a hriet nâwk ta ngai nawh, khawvêla mihriem hung pieng chu a lâwm leiin.
22Chun, tuhin nangni in lungngai, nisienlakhawm, hmu nâwk ka ti cheu a, in lungril lâwm a tih, in lâwm chu tukhawmin lâkpêk naw ni hai cheu.
23Chu ni chun nangnîn kei iengkhawm mîn dawn naw ti niu. Titakzetin, titakzetin ka hril cheu hi, Pa kuomah in hni taphawt chu ka hmingin pêng a ti cheu.#Ziek ṭhenah, “Ka hminga Pa kuoma in hni taphawt chu pêng a ti cheu, ” ti a nih
24Tu chen hin keia hmingin iengkhawm in la hni nawh; hni ro, chuongchun hmûng in tih, in lâwm a kimna dingin.
Khawvêl ka hne tah
25“Chuong thu chu a thawiin in kuomah ka hril tah; a hun a tlung ding a nih, chu pha chun a thawiin in kuomah thu hril nâwk ta naw ning a, fietakin Pa chanchin hril lem ka ti cheu.
26Chu ni chun keia hmingin thil hnîng in ta, chun, ‘Pa kuomah keiin ngên pêk ka ti cheu,’ ka ti naw cheu a,
27Pa ngeiin a hmangai si cheu a, nangnîn kei in mi hmangai a, Pathiena suok ka nih ti in ring leiin.
28Kei Pa kuoma inthawka hung suok a, khawvêla hung ka nih; khawvêl fe san a, Pa kuoma fe nâwk ding ka nih,” a ta.
29A închûktirhaiin, “Ngai ta, tuhin chu fietakin thu i hril a, a thawi hrim hrimin i hril ta naw hi.
30Nangin iengkim i hriet a, tukhawm indawn che i ngai nawh ti tuhin kan hriet tah; hi hi lei hin Pathien kuoma hung suok i ni ti kan awi ie,” an ta.
31Chun, Isûn a dawn a, an kuomah, “Tuhin chu in awi ta maw?
32Ngai ro, a hun a tlung ding a ni tah, anih, a tlung zing tah, chu pha chun, mâni in sengah indar vawng in tih, keia khât chauin mi thlâthlam in tih; nisienlakhawm, Pa ka kuoma a um leiin makhât chauin ka um si nawh.
33Hieng thu hi in kuomah ka hril ta hi, keimaa in thlamuongna dingin. Khawvêla hin rinumin in um hlak; nisienlakhawm, thlamuongtakin um ro, keiin khawvêl ka hne tah,” a ta.
Okuqokiwe okwamanje:
JOHAN 16: HMOVBSI
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
