JOHAN 11
11
Lazar thi thu
1 #
Lk 10.38-39; Jn 12.3 Chun, mi pakhat, Mari le a zuorpuinu Martha umna khuo Bethania mi, Lazar damnaw a um a.
2(Mari, hriek rim inhnik Lal chu nâla, a sama a ke hrutu kha, kha minu ṭapa Lazar a nih dam naw chu.)
3 #
Lk 7.37-38
Chun, a farnuhaiin Isu kuomah, “Lalpa, ngai ta, i hmangai kha a damnaw ie,” tiin mi an tir a.
4Isûn chu chu a hriet a, “Hi natna hi thina ding a ni nawh, Pathien ropuina ding a ni lem, Pathien Naupa chu hi lei hin a la mawina dingin,” a ta.
5Chun, Isûn Martha hai, a zuorpuinu hai, Lazar hai a hmangai a.
6Chuleiin, a damnaw ti a hrietin a umna ngaiah ni hni a la um ta rawp a.
7Chun, chu hnunga chun a închûktirhai kuomah, “Judai ramah fe nâwk ei tiu,” a ta.
8Chun, inchûktirhai chun a kuomah, “Rabbi, kha hma el khan Judahaiin lunga dêng an tum che kha; chuong sa sa chun chutaka chun i la fe rawp ding am a nih?” an ta.
9Isûn, “Sûnah dârkâr sâwm le pahni a um naw am a nih? Mi sûnah a lêng chun a pêm ngai nawh, hi khawvêl var hi a hmu leiin.
10Amiruokchu, mi zânah a lêng chun a pêm hlak, amaa chun var a um naw leiin,” a ta, a dawn a.
11Chuong thu chu a hril a; chun, chu hnunga chun an kuomah, “Ei ruolpa Lazar chu a ininnghil ta a; a ininnghil keihar dingin ka fe ding a nih,” a ta.
12Chuongchun, inchûktirhai chun a kuomah, “Lalpa a ininnghil a ni chun dam nâwk el a tih,” an ta.
13(Isûn a thi thu a hril a nih; nisienlakhawm, anni chun a châwl sûnga a ininnghil thu a hril amanih an ta.)
14Chuongchun, Isûn fietakin an kuomah a hril a, “Lazar a thi a nih.
15Chutaka ka um naw chu ka lâwm pêk cheu, in ring theina dingin; nisienlakhawm, a kuomah fêng ei tiu,” a ta.
16Chun, Thoma#Thoma (Ar.), Didum (Gr.) inphir tina ve ve an nih (Didum an ti bawk) chun, ân chûktir chanpuihai kuomah, “A thinaa thi ve dingin fe vêng ei tiu,” a ta.
Thonâwkna le Hringna Isu chu
17Chuongchun, Isûn a tlung chun, ni li thlânah a lo um tah ti a hriet a,
18Bethani chu Jerusalem kâwl a na, fing sâwmpanga laia hla a nih;
19chuongchun, an ṭapa thi chunga sukthlamuong dingin Judahai rawi tamtak Martha le Mari kuomah an hung a.
20Martha chun Isu a hung ding a nih ti a hriet phingleh a va tuok a; Mari ruok chu inah a la ṭhung zing a.
21Chun, Martha chun Isu kuomah, “Lalpa hitaka um ni la chu, ka ṭapa a thi naw ding bah.
22Tukhawm hin Pathien kuoma i ngên taphawt chu Pathienin pêng a ti che ti ka hriet,” a ta.
23Isûn a kuomah, “I ṭapa tho nâwk a tih,” a ta.
24Martha chun a kuomah, “Ni kin nia, thonâwknaa chun thonâwk a tih ti ka hriet,” a ta.
25Chun, Isûn a kuomah, “Kei hi thonâwkna le hringna chu ka nih; tûkhawm a mi ring chu thi sienla khawm hring zing a tih;
26tukhawm a hring taphawt a mi ring chu kumkhuoin thi naw nih; chu thu chu i ring am?” a ta.
27Ama chun a kuomah, “Ring e Lalpa, Krista, Pathien Naupa, khawvêla hung ding chu i ni ti ka ring ie,” a ta.
Isu a ṭap
28Chun, chu thu chu a hril zo phingleh a fe a, a zuorpuinu Mari chu arûkin a va ko a, “Inchûktirtu hitakah a um a, a ko che,” a ta.
29Ama chun chu chu a hriet phingleh a tho vak a, a kuomah a va fe a.
30(Isu chu khuo a la lût naw a, Marthain a va tuok laia, a umna ngaiah a la um a.)
31In sûnga a thlamuongtu a umpui Judahai chun, Mari a tho vaka, a suok an hmu phingleh, thlâna ṭap dingin a fe amanih an ta, an zui a.
32Chun, Mari chun Isu umna chu a va tlung a, a hmu phingleh a ke bulah a bawkkhup a, a kuomah, “Lalpa, hitaka um ni la chu ka ṭapa a thi naw ding bah,” a ta.
33Isu chun Mari ṭap le a hung zuitu Judahai ṭap chu a hmuin, a lungrilin ân rûm a, a lungngai a.
34“Ama chu khâwlai am in inzâl a?” a ta. Anni chun a kuomah, “Lalpa, hung la, en ta,” an ta.
35Isu a ṭap ta a.
36Chun, Judahai chun, “En ta u, Lazar hi a lo va hmangai de e!” an ta.
37Nisienlakhawm, ṭhenkhat chun, “Hi mitdel mit sukvartu hin, hi mipa khawm hi ân thi naw tir thei naw am a nih?” an ta.
Lazar keithoa a um thu
38Chun, Isu chu a lungrilin ân rûm nâwk a, thlân chu a tlung ta a. Chu thlân chu pûk a na, a kawtkhâra chun lung pakhat a um a.
39Isûn, “Lung hi dawm tâwl ro,” a ta. A thipa farnu Martha chun a kuomah, “Lalpa, tuhin chu thu tâng a tih, a thina ni li a ni ta si a,” a ta.
40Isûn a kuomah, “I ring chun Pathien ropuizie hmûng i tih, ka ti naw che am a nih?” a ta.
41Chuongchun, lung chu an dawm tâwl a. Chun, Isu a dâk a, “Pa, ka thu i ngai leiin i chungah ka lâwm ie.
42Kumkhuoin ka thu i ngai hlak ti ka hriet zing a nih; nisienlakhawm, mipui ngîr khup lei hin chu chu ka ti a nih, nangin i mi tir ti an ring theina dingin,” a ta.
43Chun, chuonga a ṭawng zo phingleh râwl inringtakin, “Lazar, hung suok rawh,” a ta, a khêk a.
44Mithi chu a kut le a kehai thlân puona tuom pumin a hung suok ta a, a hmai khawm puona tuom a nih. Isûn an kuomah, “Sût unla, infetir ro,” a ta.
Isu sukhlum ding thu an rawt
(Mt 26.1-5; Mk 14.1-2; Lk 22.1-2)
45Chuleichun, Mari lêngpuitu Isu thilthaw hmu Juda mi tamtakin Isu an ring ta a.
46Nisienlakhawm, a ṭhen Pharisaihai kuomah an va fe a, an kuomah Isu thilthawhai chu an hril a.
47Chuongchun, thiempu lalhai le Pharisaihai chun rorêltuhai an ko khâwm a, “Iengtin am thâwng ei ta? Hi mipa hin thilmak tamtak a thaw si a.
48Hieng anga ei thlathlam el chun mi po poin ama ring an ta; chun, Roma mihai hung an ta, ei hmun le ei chihai hi mi lâkpêk an tih,” an ta.
49Chun, anni laia mi pakhat, Kaiapha, chu kuma Thiempu Laltak chun an kuomah, “Nangnîn iengkhawm in hriet dêr nawh.
50Ei hnam pumpui bohmang nawna dingin, mipui aia mi pakhat thi ei ta dingin a ṭhalem ti in hriet phak naw a nih,” a ta.
51(Chu thu chu ama phuokfâwmin a hril nawh, chu kum chun Thiempu Laltak a na, an chihai nêka Isu a thi ding thu a hril lâwk a ni lem.
52Chuhai chihai ai chau chun a ni nawh, Pathien nau khawvêla indarhai po po pâwl khata a ṭhuoi khâwmna dingin a ni bawk.)
53Chuongchun, chu ni chena inthawk chu ama sukhlum dingin an inrâwn rawp a.
54Chuleiin, Isu chu Judahai lai ân langin a lêng nâwk ta naw a, chutaka inthawkin thlalêr dep tienga khaw pakhat Ephraim an tia chun a va fe ta lem a; chutaka chun inchûktirhai leh an um ta zing a.
55Chun, Judahai Fekân Ruoiṭhe chu a hnai ta a, mi tamtak inthien dingin rama inthawk, Fekân Ruoiṭhe hma chun, Jerusalemah an hang fe a.
56Chuongchun, Isu an zawng a, Pathien biekinah ngir pumin an inbiek a, “Ieng am in ring a? Ruoiṭhenaah hung naw ni maw?” an in ti a.
57Thiempu Lalhai le Pharisaihaiin ama chu an man theina dingin tûkhawmin a umna an hriet chun phuong ding a nih ti thu an pêk ta si a.
Okuqokiwe okwamanje:
JOHAN 11: HMOVBSI
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
