Matiu 3
3
Jɔɔnn nba din wuur niib Yennu nyunwuru na labaar
(Mak 1.1-8; Luk 3.1-18; Jɔɔnn 1.19-28)
1Li yoo maŋ na, Jɔɔnn nba wuur niib Yennu nyunwuru na din be muuk ni, Judea tingbouŋ ni, ki mɔɔntir Yennu barŋanii ki yeen a 2“Nyikin man i biit, kimaan Yennu naan dinu per na.” 3Yennu sɔkinii Aisaya din poŋ sɔb ŋɔɔ Jɔɔnn poewa a
“Nisɔɔ tan sii be muuk ni ki hoot ki yaa a
‘Ŋammit man ti Yomdaanɔ baaru sɔnu ki turɔ,
ki bia ŋamm u sɔnii ki lii took.’ ”
4Jɔɔnn din lia lagumii kobit liatire, ki bia boob gbann u siak ni, ki u jeet din tee naasuut nan siate. 5Li yoo ki Jerusalem doo ni teeb, nan Judea tingbouŋ ni teeb kur, nan Jɔɔdann mɔkir tingbouŋ ni teeb kur din saan u boor ni, 6ki fiit bi toonbiit, ki u wurib Yennu nyunwuru Jɔɔdann mɔkir maŋ ni.
7Wa din tan la ki Farisiinba nan Sajusiinba bonchiann ki bi mun baat u boor ni a wun wurib Yennu nyunwuru na, ki u betib a “Yimm walabirii na! Ŋmee kpaani a yii tin ki nyi Yennu wutoor nba yaa lin baar i paak na ni? 8Yii tuun man linba sa wann nan i set nyik i biit. 9I daa mɔk parbifaant nan Abraham tee i yeja; n beerie, Yennu sa fit ki fiin tana nba na ki lin kpant Abraham yaaboona. 10Pajar poŋ teen siira a wun chɔɔ tiinii; ki tiik nba kur ki loon lɔɔnŋana, bi sa chɔɔre ki lur muu ni. 11Min ŋanin wuuri nyun ki li want nan i nyik i biita, ŋaan wunba yaa wun baar n poor po na cheen; ki n poŋ ki ŋan nan ki n jii u taasaati; ŋɔɔe sa jii Yennu Seyeeŋ nan muu ki wuur i para. 12U dia u dilenn ŋmanniie ki yaa wun lenn bonŋann, ki nyinn dibin ki wuun u bɔɔr ni, ŋaan joo fouŋ na muu nba kan mi ki kpeenni.”
Jɔɔnn nba din wur Yisa biaŋinba
(Mak 1.9-11; Luk 3.21-22)
13Li yoo maŋ ki Yisa din nyii Galilee ki saan Jɔɔdann mɔkir po, ki baar Jɔɔnn boor ni a wun wurɔ Yennu nyunwuru. 14Ki Jɔɔnn ki saki, ki yetɔ a “Mine bo sa baar a boor ni ki a wurin, ŋaan ki a mun tan baat n boor ni-ii?”
15Ŋaan ki Yisa yetɔ a “Ŋaant ki lin tun nna mɔtana, kimaan nnee ki li ŋan ki tin tun toonŋana kura.” Li yoo na ki Jɔɔnn sak.
16Wa wur Yisa Yennu nyunwuru ki gbenn yoonba, li taakpaak ni ki Yisa nyii nyun na ni; ki sanpaapo tan loot, ki u la ki Yennu Seyeeŋ siik u paak ki naan nan ŋmann na, ki tan jakin u paak. 17Ki kunkɔr nyii sanpaapo ki yet a “N Bilonkakii na, ŋɔɔe ki n numm gboou.”
Okuqokiwe okwamanje:
Matiu 3: BIM
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
