Tobit 8
8
CAB. 8
1As tra v’ad er-reish shibber, hug ad lhieu Tobias stiagh huic.
2As myr v’eh goll, chooinee eh er goan Raphael, as ghow eh leoie jeh’n ghreesagh, as hug eh cree as aane yn eeast er shen, as ren eh jaagh ’yannoo lesh.
3Yn soar cheddin tra va’n spyrryd olk er hoaral, hea eh gys ny ayrnyn sodjey-magh Egypt, [as chiangle yn ainle eh.]
4As lurg daue ny-neesht v’er ve jeight sthie cooidjagh, dirree Tobias ass y lhiabbee, as dooyrt eh, Huyr, irree, as lhig dooin guee gys Jee dy yannoo chymmey orrin.
5Eisht ghow Tobias toshiaght dy ghra, Bannit t’ou uss, O Yee jeh nyn ayraghyn, as bannit ta dt’ennym casherick as gloyroil son dy bragh; lhig da ny niaughyn, as ooilley yn croo, uss y voylley.
6Ren oo Adam y chroo, as hug oo Aue e ven da son cooney as barrant: jeusyn haink sheelnaue: t’ou er ghra, Cha vel eh mie dy lhisagh dooinney ve ny lomarcan; lhig dooin ’yannoo da coontey casley rish hene.
7As nish, O Hiarn, cha vel mish goaill ee shoh my huyr myr-haynt, agh ayns ynrickys: shen-y-fa dy myghinagh giall dy vod mayd cheet gys shenn eaish cooidjagh.
8As dooyrt ish marishyn, Amen.
9Myr shen chaddil ad ny-neesht yn oie shen, As dirree Reguel, as hie eh as ren eh oaie y yannoo,
10Gra, Ta mee goaill aggle dy vel eshyn myrgeddin marroo.
11Agh tra va Reguel er jeet thie,
12Dooyrt eh rish Edna e ven, Cur unnane jeh’n mraane-aegey, as lhig j’ee ’akin vel eh bio: mannagh vel, dy vod mayd eh ’oanluckey, gyn-yss da dooinney erbee.
13Myr shen doshil y ven-aeg yn dorrys [as hie ee stiagh,] as hooar ee yn jees nyn-gadley,
14As haink ee magh, as dinsh ee daue dy row eh bio.
15Eisht ren Reguel Jee y voylley, gra, O Yee, t’ou uss feeu dy ve er dty voylley lesh moylley slane glen as crauee; shen-y-fa lhig da ooilley dty nooghyn uss y voylley marish ooilley dty chretooryn; as lhig da ooilley dt’ainlyn as dt’eallagh reiht uss y voylley son dy bragh.
16T’ou uss dy ve er dty voylley, son t’ou er n’yannoo mish gerjoil; as cha vel shen ny va mee ouryssagh jeh er jeet my raad; agh t’ou er n’uirraghtyn marin cordail rish dty vyghin vooar.
17T’ou dy ve er dty voylley, son dy vel oo er n’yannoo myghin er jees va’n ynrican cloan va ec ny ayraghyn oc; giall daue myghin, O Hiarn, as cur mullagh er y vea oc ayns slaynt lesh boggey as myghin.
18Eisht doardee Reguel e harvaantyn dy lhieeney yn oaie.
19As dreill eh yn gien-banshey kiare-laa-yeig.
20Son roish my row laghyn y phoosey cooilleenit, va Reguel er ghra rish liorish loo, nagh jinnagh mie da goll roish derrey veagh kiare-laa-yeig yn phoosey harrish;
21As eisht dy voddagh eh goaill lieh jeh e chooid, as goll ayns sauchys gys e ayr; as dy voghe eh yn fooillagh tra veagh eshyn as e ven marroo.
Okuqokiwe okwamanje:
Tobit 8: YNAPBR
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Yn Cheshaght Ghailckagh 1979, 2017
© Manx Gaelic Society 1979, 2017