Tobit 5
5
CAB. 5
1Eisht dreggyr Tobias as dooyrt eh, Ayr, neem’s jannoo ooilley ny reddyn t’ou er harey dou:
2Agh kys oddym yn argid y gheddyn, fa nagh vel enn aym er?
3Eisht hug eh yn laue-scrieuee da, as dooyrt eh rish, Jeeagh uss son dooinney oddys goll mayrt, choud as ta mish foast bio, as verryms faill da: as immee as fow yn argid.
4Shen-y-fa tra hie eh dy yeeaghyn son dooinney, hooar eh yn ainle Raphael.
5Agh cha row fys echeysyn er; as dooyrt eh rish, Nod uss goll maryms gys Rages? as vel enney mie ayd er ny buill shen?
6As dooyrt yn ainle rish, Hed-yms mayrt as s’mie shione dou yn raad: son ta mee er-reish aaght y ghoaill marish nyn mraar Gabael.
7Eisht dooyrt Tobias rish, Fuirree rhym, derrey insh-ym da my ayr.
8Eisht dooyrt eh rish, Immee, as nagh fuirree. Myr shen hie eh stiagh as dooyrt eh rish e ayr, Cur-my-ner, ta mish er gheddyn fer hed marym. Eisht dooyrt eh, Eie er hym, dy vod fys ve aym cre’n tribe t’eh jeh, as vel eh dooinney surdremagh dy gholl mayrt.
9Myr shen deie eh er, as haink eh stiagh, as ghow ad boggey jeh my-cheilley.
10Eisht dooyrt Tobit rish, Vraar, soilshee dou cre’n tribe as lught-thie t’ou jeh.
11Dansoor eh, Vel oo shirrey son tribe ny lught-thie ny son dooinney faillagh dy gholl marish dty vac? Eisht dooyrt Tobit rish, Baillym hoiggal, vraar, dty chynney as dty ennym.
12Eisht dooyrt eh, Ta mish Asarias, mac yn Ananias mooar, as jeh dty vraaraghyn.
13Eisht dooyrt Tobit, Shee-dy-vea, vraar; nish nagh gow corree rhym, son dy vel mee er vriaght mychione dty hribe as dty lught-thie; son t’ou my vraar, jeh dooghys onneragh as mie: son ta enn aym er Ananias as Jonathas, mec yn Samaias mooar shen, liorish dy jagh shin cooidjagh gys Jerusalem dy ooashlaghey, as dy hebbal yn chied er ny ruggey, as jaghee ny messyn; as cha row adsyn cleaynit liorish shaghrynys nyn mraaraghyn: my vraar, t’ou jeh dooghys mie.
14Agh insh dou cre’n aill verrym dhyt? nailt drachym ’sy laa, as reddyn ymmyrchagh, myr da my vac hene?
15Dy jarroo, as ny smoo na shen, my hig shiu thie reesht dy sauchey, dy der-ym dooraght dhyt.
16Myr shoh choard ad. Eisht dooyrt eh rish Tobias, Fow oo-hene aarloo cour y jurnah, as dy der Jee jurnah mie diu. As tra va e vac er n’yannoo dy chooilley nhee aarloo son y jurnah, dooyrt e ayr, Immee uss marish y dooinney shoh, as dy der Jee, ta cummal ayns niau, jurnah vondeishagh diu as dy reill ainle Yee sheshaght riu; myr shen hie ad ny-neesht roue, as moddey yn dooinney aeg maroo.
17Agh cheayn Anna e voir, as dooyrt ee rish Tobit, cre’n-fa t’ou er choyrt er-sooyl nyn mac? nagh nee eshyn lorg nyn laue, ayns goll magh as stiagh roin?
18Nagh bee sayntoilagh dy chur argid gys argid: agh lhig da ve myr red gyn-veg ayns soylagh gys y lhiannoo ain.
19Son ta shen ny ta’n Chiarn er choyrt dooinyn dy veaghey er, ny saie dooin.
20Eisht dooyrt Tobit ree, Nagh cur geill, my huyr; hig eh reesht ayns sauchys, as ver dty hooillyn my-ner eh.
21Son hed yn ainle mie ry-heshaght marish, as hig e yurnah lesh, as hig eh hooin reesht dy sauchey.
22Eisht scuirr ee jeh keayney.
Okuqokiwe okwamanje:
Tobit 5: YNAPBR
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Yn Cheshaght Ghailckagh 1979, 2017
© Manx Gaelic Society 1979, 2017