Tio 12

Uvaʼs itxhusun quBʼaal Jesuus tiʼ talt inuqul, tiʼ uvaʼ, aʼ quBʼaal Jesuus at tiqleʼm tiʼ kam laʼ utxh ibʼanax tu xeem qʼij, kʼuxh laʼ txʼitix ivatz triigo

Kuxh 2.23-28; Luk 6.1-5

1Antetzxh tuulbʼal inqʼa qʼij inqʼae, tul nikich ixaon Jesuus xoʼl inqʼa txhiko t-val u xeem qʼij saavado. Yaʼne vaʼy vet inqʼa nikich itxhus tibʼ kʼatz Jesuus. Tul xeʼtaq vet tiʼ ibʼuqʼux inqʼa triigo. Tul ikʼuxaq vet vivatz.{*}#12.1 Bʼaʼn kuxh vatz u bʼekʼbʼal kam uvaʼ ibʼan inqʼa nikich itxhus tibʼ kʼatz quBʼaal Jesuus, eche uvaʼ nik tal tu Deuteronoomio 23.25.

2Tiletz vet inqʼa fariseeo, tul echaq tal vet s-eche: —¡Saqi txhaqnaq, inqʼa nik itxhus tibʼ sakʼatza! Aʼxh nik ibʼan txhaqnaq, kam uvaʼ yeʼ nik ikuy u qubʼekʼbʼal laʼ bʼanax tuulbʼal u xeem qʼij saavado, —xeʼtaqe.

3Yaʼne ech tal Jesuus te inqʼa fariseeo s-eche: —¿Kam nik elkaʼp sete uvaʼs nik esikʼlet u yol uvaʼ tzʼibʼamal ka tiʼ Daviid tuchʼ inqʼa imol uvaʼs motx ikam t-vaʼy? 4Tan paloʼk Daviid tuul u bʼuʼqla tatibʼal quBʼaal Tiuxh. Tul itxʼaʼ Daviid inqʼa paan, inqʼa maʼtich toksal vet vatz quBʼaal Tiuxh s-natxhkʼuulabʼal. Atz itxʼaʼat inqʼa imol Daviid. Tul yeʼlich laʼ isaʼa uvaʼ laʼich itxʼaʼ Daviid u paan. Atz jitoq inqʼa imol Daviid, tan yeʼ nik motx ikuy inqʼa qubʼekʼbʼal. Pet taʼnich kuxh inqʼa oksan yol vatz Tiuxh atich tokebʼal tiʼ itxʼaʼaxeʼ.#1 Samueel 21.1-6; Leviitiko 24

5Atz ¿kam nik elkaʼp sete tiʼ u yol uvaʼ itzʼibʼa ka Moisees? Tan nikich motx taqʼonv inqʼa oksanaq yol vatz Tiuxh tiʼ itzʼeʼsal inqʼa txoo tu xeem qʼij saavado. Tul yeʼlichaq ipaʼv s-tiʼ, tiʼ teesal iqʼij u xeem qʼij.#Nuumeros 28.9-10

6Pet toq val sete uvaʼ, aʼ ine, uvaʼ at in s-txheel sexoʼl uvaʼ palnaʼq viqleʼm viʼ inqʼa nik taqʼonv tu tostiuxh. 7Echetze uvaʼ nikoq ibʼen viyolbʼal quBʼaal Tiuxh sete uvaʼ ech nik tal s-eche: «Aʼ nik insaʼeʼ uvaʼ laʼ itxum tibʼ evatz. Pet jit kuxh taʼn uvaʼ laʼ etzʼeʼsa inqʼa txoo s-oya sinvatz,» chich u yol. Pet yeʼ nik ibʼen sete. Echetz yeʼ laʼ utxhi laʼ etal yol tiʼ inqʼa nik itxhus tibʼ sinkʼatza, tan yeʼl ipaʼv, tiʼ uvaʼ nik motx ibʼaneʼ.#Tio 9.13; Oseeas 6.6 8Tul taʼn ine, in, u Kʼaola uvaʼ qat bʼen s-alam aanima, at viqleʼm tiʼ talax kam uvaʼ laʼ bʼanax tu xeem qʼij saavado, —xeʼt Jesuus te inqʼa fariseeo.

Uvaʼs itxhusun quBʼaal Jesuus tiʼ talt inuqul, tiʼ uvaʼ, aʼ quBʼaal Jesuus at tiqleʼm tiʼ kam laʼ utxh ibʼanax tu xeem qʼij saavado

Kuxh 3.1-6; Luk 6.6-11

9Eletz vet bʼen Jesuus kʼatz inqʼa fariseeo, tul yekich vet Jesuus tu kʼulbʼal tibʼ inqʼa tij imam Israeel. 10Tul atich val u vinaq tzitzi uvaʼ tira kʼoxhiʼxich kuxh vet paqʼil iqʼabʼ. Tul atichat jolol inqʼa fariseeo tzitzi. Aʼichaqetz kuxh isaʼ itxhej ipaʼv Jesuus.

Tul ech motx tal te Jesuus s-eche: —¿Niketz kol ikuy u qubʼekʼbʼal uvaʼ laʼ bʼanax bʼaʼn vaʼq yaabʼ tu xeem qʼij saavado? —xeʼtaq te Jesuus.

11Yaʼne ech tal Jesuus s-eche: —Ape. Pet toq vabʼi sete. ¿Laʼ kol utxhi laʼ bʼen etiqʼo jaʼul invaʼq ekarneʼl t-jul tuulbʼal u xeem qʼij saavado oq uvaʼ laʼ bʼen t-jul? Toq bʼen etiqʼo jaʼul abʼa. 12Oqetz uvaʼ laʼ utxh tiqʼol jaʼul u karneʼl t-jul tuulbʼal u xeem qʼij saavado, tul bʼane; ¡aʼetz koq u karneʼl palnaʼq tiqleʼm viʼ u vinaq vatz quBʼaal Tiuxh! Echetz s-tiʼile bʼaʼn kuxh vatz u qubʼekʼbʼal uvaʼ laʼ bʼanax bʼaʼn invaʼq yaabʼ tuulbʼal inqʼa xeem qʼij saavado, —xeʼt Jesuus.

13Yaʼne ech tal Jesuus te u vinaq s-eche: —Jikbʼa vaqʼabʼ, —xeʼt Jesuus. Tul ijikbʼa vet u vinaq viqʼabʼ. Tul yekich ibʼan vet bʼaʼn. Tul echat kuxh ex ibʼan vet, eche inpaqʼite.

14Tiletz kuxh vet inqʼa fariseeo kam uvaʼ ibʼan Jesuus, tul xeʼtaq vet tiʼ ikuʼ yol tiʼ iyatzʼax el Jesuus.{*}#12.14 ¿Kametz vet s-tiʼile tul xeʼt vet inqʼa fariseeo tiʼ taqʼax kuʼ yol tiʼ iyatzʼax el quBʼaal Jesuus? Tiʼ uvaʼ jit ech nikich inimat quBʼaal Jesuus u bʼekʼbʼal, eche uvaʼ nikich motx ibʼan tiʼ inimaleʼ. Tiletz vet inqʼa fariseeo ibʼant quBʼaal Jesuus bʼaʼn viqʼabʼ u vinaq tu xeem qʼij, tul mam xaol laʼich niman vet quBʼaal Jesuus s-vatz. Echetz itxhoʼnaq vete s-te uvaʼ, aʼ vet u tetz laʼich el iqʼij. Tul kʼuxhetz aʼxh vinuqul nikich ibʼan quBʼaal Jesuus, tan jit aʼ uvaʼe, nikich motx titzʼa. Pet aʼ kuxh nikichaq isaʼeʼ uvaʼ yeʼlaq laʼich el iqʼij tuchʼ inqʼa tetz. Echetz motx itxhokt vet txumbʼale tiʼ iyatzʼax el Jesuus.

Uvaʼs telaʼp val u yol tiʼ quBʼaal Jesuus uvaʼ itzʼibʼa ka Isaiias tiʼ u Kriisto

15Tabʼietz vet Jesuus uvaʼ maʼtich ikuʼ vet yol s-tiʼ taʼn inqʼa fariseeo, tul el vet bʼen Jesuus tzitzi. Tul mamala xaol motx txhʼuyeʼv bʼen tiʼ Jesuus. Tul iqʼomichaq yaabʼ taʼn. Tul nikich ibʼan Jesuus bʼaʼn inqʼa yaabʼ s-kaqaayil. 16Tul yek nikich itiila bʼekʼu ka Jesuus te inqʼa xaol uvaʼ yeʼlich laʼ ipaxsa el inqʼa yol tiʼ inqʼa bʼaʼnil uvaʼ nikich ibʼan Jesuus. 17Echetz telaʼpune val u yol uvaʼ tzʼibʼamich ka taʼn Isaiias, u qʼexsanich tetz viyol quBʼaal Tiuxh, tiʼ u Kriisto, uvaʼ ech nik tal s-eche:

18—«Il u vAqʼonvil at veteʼ

uvaʼ chʼexel vaʼn.

Tul kamxh in s-tiʼ;

atz nik inchiibʼ s-tiʼ.

Tul toq voksa vinTiuxhil

t-taanima.

Tul toq ipaxsa inqʼa yol

xoʼl inqʼa jit tij imam Israeel

tiʼ vaqʼt kuʼ inqʼa yol tinuqul

uvaʼ tijikulxhtuʼ.

19Atz jit kuxh yajo ibʼ

laʼ ibʼan tuchʼ inqʼa xaol.

Atz jit kuxh sichʼiʼm

laʼ ibʼana.

Atz jit tal kuxh laʼ abʼilik

iqʼeqʼun t-qʼeʼtxaq bʼey.

20Tul yeʼ laʼ teesa iqʼij

inqʼa xaol inqʼa aj paʼvom,

eche yeʼ laʼ itxʼaqax

invaʼq aj

uvaʼ paqtzʼinaʼql veteʼ.

Tul jit aʼl laʼ ul imaqt

inqʼa xaol

tiʼ talt invaʼq iyol s-te,

eche yeʼ laʼ itzajsal u xamal

tiʼ invaʼq bʼuʼq

uvaʼ qʼuyqʼuʼlan kuxh tel

isibʼel.

Pet tetxhal laʼ oleʼv

tiʼ itzoqpisal

taqʼax kuʼ inqʼa yol tinuqul

tiibʼa inqʼa xaol.

21Echetz s-tiʼile

aʼ laʼ kʼuqeʼvk vet ikʼuul

inqʼa jit tij imam Israeel

s-tiʼ,

tiʼ ibʼanax bʼaʼnil s-te,»

xeʼt quBʼaal Tiuxh,

—chich u yol.#Isaiias 42.1-4

Uvaʼs talt quBʼaal Jesuus inuqul te inqʼa fariseeo, tiʼ uvaʼ jit demoonio aqʼon tiqleʼm

Kuxh 3.20-30; Luk 11.14-23

22Yaʼne iqʼol ok val u yaabʼ vatz Jesuus uvaʼ atich ok demoonio t-taanima. Tul tzotiche, atz memich taʼn u demoonio. Tul ituki el Jesuus u demoonio tiʼ u xaol uvaʼe. Tul yekich ilon veteʼ. Atz yekich xeʼt vet yolon. 23Tul kaayichxh vet taanima inqʼa xaol. Tul ech motx tal vet s-eche: —¡Jankʼatoʼq jit naq u Kriisto, u Tij Imam Daviid, u mam iqʼesal! —chichichaq veteʼ.

24Tabʼietz vet inqʼa fariseeo talax inqʼa yol tiʼ Jesuus, tul echaq motx tal vet tiʼ Jesuus s-eche: —Yeʼle. Jit Tiuxhe nik aqʼon tiqleʼm Jesuus. Pet Velsevuue, viqʼesal inqʼa demoonio, nik aqʼon tiqleʼm, —chichichaq tiʼ Jesuus.

25Tootzaqichetz vet Jesuus titzʼabʼal inqʼa fariseeo, tul ech tal Jesuus s-te s-eche: —Yeʼle. Tan oq Satanaas nik bʼanbʼen in nik etaleʼ, tul juntetzebʼ kuxh nik ituki el Satanaas imol. Tan eche tatin invaʼq u mam tenam uvaʼ jit eela iyol inqʼa iqʼesal s-vatzaq. Tan yeʼl paqul laʼ elaʼpun tibʼaʼnil. Atz kʼuxh tatin xaol t-invaʼq tenam, atz kʼuxh tatin xaol t-totzotz, tan oq jit eela iyol, tul yeʼl paqul laʼ elaʼp tibʼaʼnil. 26Oqetz ant kuxh Satanaas laʼ tukin el imol s-vatzaq, aʼetze jitaq eela iyol, tan junt koqxh laʼ iyansa Satanaas tatin viqʼesal.

27Pet oqetz tuchʼ ibʼij Velsevuu nik intukivat el inqʼa demoonio t-taanima inqʼa xaol nik etaleʼ, tul echatetzebʼxh nik ibʼan inqʼae txhusel etaʼn tiʼ itukil el inqʼa demoonio t-taanima inqʼa xaol. Tan nikat itukil el inqʼa demoonio taʼn. Aloq antxh inqʼa xaol inqʼae toq motx alon eyol uvaʼ jit tuchʼ ibʼij Velsevuu nik intukivat el inqʼa demoonio t-taanima inqʼa xaol.

28Pet bʼenoqetz sete uvaʼ, aʼ viTiuxhil Tiuxh nik bʼanbʼen in tiʼ intukit el inqʼa demoonio t-taanima inqʼa xaol. Tul aʼetz tetxhlale uvaʼ quBʼaal Tiuxhe qat txhaqon tzaan in tiʼ inbʼant viqʼesalil t-taanima inqʼa xaol.

29Toq val sete kam nik inbʼan tiʼ intukit el demoonio taanima inqʼa xaol. Tan ech nik inbʼan, eche nik ibʼan vaʼq u xaol uvaʼ maʼt tokebʼe vaʼq otzotz. Tan bʼaxa qat iqitz u xeen tetz u otzotz uvaʼ sibʼxh iyakʼil, yaʼne toq tiqʼo el inqʼa kam uvaʼ at tu otzotz.

30Tan kaʼvaʼl kuxh viqʼesal ati. Echetz jaʼl uvaʼ yeʼ txhʼuyel s-viʼ, tul aʼetz uvaʼe nik eesan inqʼij. Atz jaʼl uvaʼ yeʼ nik lotxhon in tiʼ imolox ok inqʼa xaol sinkʼatza, tul aʼetz uvaʼe nik tukin el inqʼa xaol, eche imakʼax el triigo.#Kuxh 9.40 31Echetz toq valte sete uvaʼ: Kʼuxh at xaol nik alon yol tiʼ imol, tan laʼ utxh ikuyux vipaʼv. Pet koq ex, inqʼa nik alon viTiuxhil Tiuxh s-demoonio, tan yeʼl vepaʼv laʼ kuyuxi. 32Atz jaʼl invaʼq uvaʼ laʼ alon invaʼq yol s-viʼ tiʼ teesal inqʼij, in, u Kʼaola uvaʼ qat bʼen s-alam aanima, tan laʼ kuyuxi. Pet oq tiʼ viTiuxhil Tiuxh laʼ talvat invaʼq yol, tul laʼ teesa iqʼij viTiuxhil Tiuxh, bʼantan yeʼl vipaʼv laʼ kuyux tuulbʼal jattanulxh yaʼbʼ s-txheel, atz kʼuxh jattant yaʼbʼ s-jatu.

Uvaʼs talt quBʼaal Jesuus uvaʼ, aʼ vibʼanoʼm inqʼa xaol laʼ kʼutxhun kam uvaʼ at tu taanima

33Toq val sete kam laʼ etulbʼe tilix invaʼq u xaol, uvaʼ bʼaʼnla xaol. Tan oq bʼaʼn vibʼanoʼm u xaol, tul aʼetz u bʼaʼnile at s-kʼatza. Tan eche viʼoq bʼaʼnla tzeʼ, tan bʼaʼnetze vivatz toq taqʼeʼ. Pet oq yeʼbʼaʼn vibʼanoʼm u xaol, tul aʼetz u yeʼbʼaʼne at s-kʼatza. Tan eche viʼoq tzeʼ uvaʼ yeʼbʼaʼn, tan yeʼatetz bʼaʼne vivatz toq taqʼeʼ. Echetz aʼ veyolon nik kʼutxhun uvaʼ jit ex bʼaʼn.#Tio 7.20 34¡Echetze ex, tan tira nik ekʼaxbʼisa inqʼa xaol tuchʼ veyoloneʼ, uvaʼ eche chij itziʼ kan! Tan ¡keʼch koq laʼ teluʼl vaʼq bʼaʼnla yol tetziʼ!, tan aʼ u yeʼbʼaʼn at t-vetaanima. Tan jankʼal uvaʼ at tetaanima, tul antetzxh uvaʼe nik ijaʼul tetziʼ.#Tio 15.18

35Tan ech tatin taanima u xaol, eche vaʼq kaaxha. Oq bʼaʼnla kam uvaʼ kolel tu kaaxha, tul bʼaʼnetze uvaʼ toq jaʼoq ul. Pet oq kantxhaq uvaʼ kolel tu kaaxha, tul kantxhaqatetze uvaʼ toq jaʼoq ul. Echetze vetatineʼ, tan oq aʼ u bʼaʼn at t-vetaanima, tul bʼaʼnetze vetxumbʼal. Pet oq yeʼbʼaʼn uvaʼ at t-vetaanima, tul kantxhaqetze vetxumbʼal.

36Jankʼaletzxh inqʼa kantxhaqla yol uvaʼ laʼ jaʼul titziʼ inqʼa xaol, tan tetxhal laʼ bʼen tal inuqul vatz quBʼaal Tiuxh tu qʼij uvaʼs laʼ taqʼt kuʼ inqʼa yol tinuqul tiʼ inqʼa tenam s-kaqaayil. 37Echetz jankʼalxh inqʼa yol uvaʼ laʼ jaʼul tetziʼ, tan tetxhal laʼ bʼen etal te quBʼaal Tiuxh. Tan antxh veyol laʼ ibʼanbʼe quBʼaal Tiuxh tiʼ echitpeʼ, atz maq tiʼ etaqʼax bʼen tu mam kʼaxkʼo, —xeʼt Jesuus te inqʼa fariseeo.

Uvaʼs talt quBʼaal Jesuus te inqʼa iqʼesal tijaq imam Israeel uvaʼ taʼn kuxh etxhlal laʼ motx bʼen s-te eche uvaʼ palk Jonaas

Luk 11.29-32

38Yaʼne ech tal inqʼa fariseeo tuchʼ inqʼa nikich txhusun inqʼa bʼekʼbʼal s-eche: —Txhusul qetz, nik qusaʼeʼ uvaʼ laʼ akʼutxh invaʼq etxhlal s-quvatz, —xeʼtaqe.

39Yaʼne ech tal Jesuus s-eche: —Echetze ex, inqʼa itzʼlel ex s-txheel, inqʼa palsan yol, atz ex inqʼa jitxh ex kʼuqlebʼ kʼuul vatz quBʼaal Tiuxh, eche invaʼq u lampaqʼla ixoq uvaʼ jitxh kʼuqlebʼal kʼuul tatin kʼatz itzumel. Tan aʼ nik esaʼeʼ uvaʼ laʼ kʼutxhux invaʼq etxhlal sevatz. Poro yeʼxhkam invaʼq etxhlal laʼ inkʼutxha. Pet aʼ kuxh laʼ bʼen sete kame uvaʼ palk Jonaas, u qʼexsanich tetz viyol quBʼaal Tiuxh. 40Tan oxvaʼl qʼij, atz oxvaʼt aqʼbʼal atin koʼp Jonaas tuul u mamaʼ txay. Echetz uvaʼe toq palk in, in, u Kʼaola uvaʼ qat bʼen s-alam aanima. Tan oxvaʼl qʼij, atz oxvaʼt aqʼbʼal laʼ inbʼan jaqʼ u txʼavaʼ.#Jonaas 1.17 41Pet ex, tan tetxhal bʼen ekʼul etibʼ vatz quBʼaal Tiuxh tuchʼ inqʼa aj tenam Niinive uvaʼs laʼ taqʼt kuʼ quBʼaal Tiuxh inqʼa yol tinuqul tiʼ inqʼa tenam. Tul antxh inqʼa aj Niinive laʼ alon vet ekʼaxbʼisaleʼ, tiʼ uvaʼ tan, nal kuxh motx titzʼa tibʼ t-inqʼa ipaʼv vatz quBʼaal Tiuxh uvaʼs ex talt Jonaas viyolbʼal quBʼaal Tiuxh s-xoʼl. Pet iletz invaʼl alol iyolbʼal quBʼaal Tiuxh at sexoʼl uvaʼ palnaʼq tiqleʼm viʼ Jonaas, tul tira yeʼ nik etitzʼa etibʼ t-inqʼa epaʼv.

42Atz laʼat txakeʼv u ixoq uvaʼ nikich bʼanon mam iqʼesalil tiibʼa u tenam uvaʼ aʼl ikuʼeʼ. Tul laʼ xeʼt tiʼ talax ekʼaxbʼisaleʼ uvaʼs laʼ taqʼt kuʼ quBʼaal Tiuxh inqʼa yol tinuqul tiʼ inqʼa tenam, ex inqʼa at ex s-txheel. Tan elam koq bʼey ixaj u ixoq tiʼ ul tabʼit inqʼa bʼaʼnla txhaq txumbʼal uvaʼ nikich tal Salomoon. Pet iletz invaʼl at sexoʼl s-txheel uvaʼ palnaʼq tiqleʼm viʼ Salomoon, tul jitoq nik motx eqejeʼ.#1 Reeyes 10.1-10; 2 Kroonikas 9.1-12

Uvaʼs talt quBʼaal Jesuus uvaʼ yeʼ laʼ ikʼul vet u xaol u demoonio t-taanima inpaqte, pet aʼ laʼ ibʼana uvaʼ, aʼ viTiuxhil Tiuxh laʼ bʼanon iqʼesalil t-taanima

Luk 11.24-26

43Echetz bʼenoq sete, tiʼ uvaʼ nik teleʼl vaʼq demoonio t-taanima vaʼq u xaol, tul nik itukun vet t-inqʼa atibʼal inqʼa tzaqat kuxhtuʼ. Tul tikʼ nik itxhok vet taanima vaʼt xaol tal uvaʼ laʼ ilan ka. Tul oqetz yeʼ nik ileq vet u tatibʼal, 44tul ech nik tal vet s-eche: «Antxh maʼtk in bʼa tu taanima u xaol uvaʼ elkeʼl in s-bʼaxa,» chich veteʼ. Tul antxhtuʼ. Maʼt til veteʼ uvaʼ jit aʼ viTiuxhil Tiuxh nik ibʼan iqʼesalil t-taanima u xaol uvaʼe, tul nik til veteʼ uvaʼ josqʼilxh vet tatin taanima u xaol, eche tatin vaʼq otzotz uvaʼ bʼeeno tamaxeʼ, yeʼl chʼis s-tuul, atz bʼeenoxh vet iviqixeʼ. 45Yaʼne aʼl laʼ bʼen tiqʼot vet u demoonio juqvaʼt imol uvaʼ palnaʼq vet tial ikʼuul viʼ vaʼl u demoonio uvaʼ atich s-bʼaxa. Tul laʼ motx vet ok t-taanima u xaol, tul laʼ motx atin veteʼ. Tul aʼl laʼ ipal vet iviʼ inqʼa kantxhaq laʼ atin tu taanima u xaol uvaʼe viʼ, eche inqʼa kantxhaq uvaʼ atich t-taanima s-bʼaxa. Echetz laʼ elkaʼpun exe, inqʼa palsan yol, inqʼa at vatz txʼavaʼ s-txheel, —xeʼt Jesuus.

Uvaʼs talt quBʼaal Jesuus tiʼ jaʼl uvaʼ, aʼ quBʼaal Tiuxh nik inima, tul eela kuxh tatin vet tuchʼ eche titzʼin tatzik quBʼaal Jesuus

Kuxh 3.31-35; Luk 8.19-21

46Sebʼtichetz tel iyolon Jesuus xoʼl inqʼa xaol, tul atich vet itxutx Jesuus tuchʼ inqʼa titzʼin Jesuus tiʼ otzotz. Tul nikichaq motx isaʼeʼ uvaʼ laʼich yolon tuchʼ Jesuus. 47[Yaʼne ech ex tal val u xaol te Jesuus s-eche: —Il atxutx at tiʼ otzotz tuchʼ inqʼa eetzʼin. Tul nik motx isaʼeʼ chi, laʼ yolon savuchʼ, —xeʼt eʼl Jesuus.]

48Yaʼne ech tal Jesuus te inqʼa xaol s-eche: —¿Jaʼletz koqe uvaʼ toq inbʼan eela tuchʼ intxutx, atz tuchʼ inqʼa vitzʼin? —xeʼt Jesuus.

49Tul ikʼutxh Jesuus inqʼa nikich itxhus tibʼ s-kʼatza. Tul ech tal Jesuus s-eche: —Echat kuxh nik insaʼt inqʼae, eche nik insaʼt vintxutx, atz echat kuxh nik insaʼt inqʼae, eche vitzʼin, inqʼa ila jay. 50Tan jatvaʼlxh inqʼa xaol uvaʼ laʼ niman kam uvaʼ nik isaʼ vinBʼaal Tiuxh, uvaʼ tu amlikaʼ, tul echatetz kuxhte vitzʼin, atz eche vanabʼ, atz eche intxutx, —xeʼt Jesuus.

Okuqokiwe okwamanje:

Tio 12: ixlC

Qhakambisa

Dlulisela

Kopisha