Tio 11
11
1Yaʼetz vet Jesuus tiʼ taqʼax iyol kabʼlaval inqʼa iapoostol, tul el vet bʼen Jesuus tzitzi. Tul yekich vet Jesuus xoʼl inqʼa tenam, t-vitenam inqʼa tij imam Israeel. Tul xeʼt vet Jesuus txhusun, atz paxsa tetz inqʼa bʼaʼnla txhaq yol xoʼl inqʼa xaol.
Uvaʼs taqʼt quBʼaal Jesuus ootzaqiloq te inqʼa nikich itxhus tibʼ kʼatz Xhun uvaʼ, aʼich quBʼaal Jesuus u Kʼaola uvaʼ bʼen s-alam aanima
Luk 7.18-35
2Atich jaʼ Xhun t-tzeʼ, tul tabʼi Xhun inqʼa mam kaebʼal aanima nikich ibʼan Jesuus, u Kriisto. Yaʼne itxhaq bʼen Xhun kaʼvaʼl inqʼa nikich itxhus tibʼ s-kʼatza tiʼ ibʼen tiʼ tilix Jesuus. 3Tul ech laʼich motx bʼen tabʼi te Jesuus s-eche: —¿Aʼetz kol axhe u Kriisto, uvaʼ alel ka u tulebʼal taʼn quBʼaal Tiuxh? Pet ¿maq jaʼl invaʼtoʼq toq qutxʼebʼ tuleʼ? —xeʼtaq te Jesuus.{*}#11.3 ¿Kametz s-tiʼil nikich ikaʼkabʼin ikʼuul Xhun, tiʼ uvaʼ maq aʼ quBʼaal Jesuuse u Mesiias, maq yeʼleʼ? Nik ibʼen bʼiil s-qe uvaʼ kamal, tiʼ uvaʼ jit aʼ itxhok quBʼaal Jesuus u tok siqʼesalil vatz txʼavaʼ xoʼl inqʼa tij imam Israeel. Tul jit aʼ ikʼaq tibʼ paqte tiʼ ibʼanax txhʼaʼo tiʼ teesal el inqʼa sol, inqʼa aj Rooma. Tan aʼ atich ok tiviʼ inqʼa tij imam Israeel uvaʼ, aʼ viqʼesalil laʼich ul ibʼan u Kriisto, eche viqʼesalil uvaʼ ibʼan Daviid. Tan, ech uvaʼe, tal quBʼaal Tiuxh te Daviid uvaʼ: —Tetxhal laʼ txhej vaʼl avij amam uvaʼ echatxh laʼ ibʼant iqʼesalil, eche uvaʼ qat abʼant iqʼesalil, —chich u yol. Ech uvaʼe, nik tal tu uʼ 2 Samueel 7.16. Pet aʼetz nikich itxʼebʼaqe uvaʼ, aʼich koq u Mesiias iqʼon iviʼ u txhʼaʼo tiʼ teesal iqʼij inqʼa jit tij imam Israeel nikich motx taleʼ. Jitetz aʼ viqʼesalil ul ibʼan u Mesiias s-bʼaxa. Pet aʼ ul ibʼan u Mesiias ibʼanax tutxh tatin inqʼa xaol tuchʼ quBʼaal Tiuxh. Tan yeʼl bʼaʼnil atich xoʼl inqʼa xaol tuchʼ quBʼaal Tiuxh, tiʼ uvaʼ tan, aʼ inqʼa paʼv nikich motx ibʼan inqʼa xaol. Tul aʼ ul ibʼan u Mesiias paqte vitxhojox vipaʼv inqʼa xaol tul atichetz vet tokebʼal inqʼa xaol tiʼ u kuybʼal tetz paʼv. Petetz vet uvaʼs laʼ tul u Mesiias tikaʼpaq, tan aʼ vet laʼ ul ibʼan viqʼesalil tiibʼa inqʼa xaol, eche uvaʼ ul ibʼan Daviid. Poro viqʼesalil uvaʼ ul ibʼan Daviid, tan atich iyaʼebʼal. Pet viqʼesalil uvaʼ laʼ ul ibʼan u Mesiias, aʼe u quBʼaal Jesuus, tan yeʼl iyaʼebʼal imotxebʼal.
4Yaʼne ech tal Jesuus te inqʼa nikich itxhus tibʼ kʼatz Xhun s-eche: —Bʼenoq ex. Tul bʼenoq etal te Xhun kam uvaʼ nik etil inbʼantaʼ, atz kam uvaʼ nik etabʼi valtaʼ. 5Tan il inqʼa tzot nik motx tilon veteʼ. Atz il inqʼa koyel ibʼenaʼ, bʼaʼn vet ixaoneʼ. Atz kʼuxh inqʼa qʼajchil nik bʼanon vitxhiʼoʼl, tan qat motx ey vet el u yaabʼil tiʼ vitxhiʼoʼl. Atz il inqʼa txhakan, nik motx tabʼin veteʼ. Atz kʼuxh inqʼa kamnaʼq, tan ile itzʼeʼvy vet inpaqte. Tul il inqʼa bʼaʼnla txhaq yol tiʼ vibʼant quBʼaal Tiuxh iqʼesalil t-taanima inqʼa xaol, nik motx ipaxsal vet xoʼl inqʼa meebʼaʼ.#Isaiias 35.5-6; 53.1-12; 61.1 6Atetz vibʼaʼnil quBʼaal Tiuxh tiibʼa inqʼa xaol uvaʼ yeʼ laʼ motx kaʼkabʼin ikʼuul s-viʼ, uvaʼ, aʼ ine u Kriisto, —xeʼt Jesuus te inqʼa nikich itxhus tibʼ kʼatz Xhun.
7Iletz kuxh inqʼa nikich itxhus tibʼ kʼatz Xhun nikich motx tel bʼen kʼatz Jesuus, tul xeʼt vet Jesuus yolon xoʼl inqʼa xaol tiʼ talax bʼaʼnla yol tiʼ Xhun. Tul ech tal Jesuus s-eche: —Aʼetz uvaʼs ebʼen tu txʼavaʼ uvaʼ yeʼl xaol jeqlel s-tuul, tul ¿kam ex etil te Xhun? ¿Maq ech kuxh inqʼa yol nikich tal Xhun, eche u aj uvaʼ paqul nik ibʼen tinpaqʼil, atz paqt nik ibʼen tinpaqʼite? Yeʼle abʼa. 8¿Kam ex etileʼ? ¿Maq aʼ, ex etil invaʼq vinaq uvaʼ bʼaʼnla oksaʼm atoʼk taʼn? ¡Yeʼle! Tan jaʼl naq u vinaq uvaʼ bʼaʼnla oksaʼm atoʼk taʼn, tan aʼ atil naq t-inqʼa mamaʼ txhaq otzotz, totzotz inqʼa mam iqʼesal inqʼa tenam. 9Pet toq val sete kam ex etileʼ. Tan aʼ Xhun, u qʼexsanich tetz viyol quBʼaal Tiuxh, ex etil tu txʼavaʼ uvaʼ yeʼl xaol jeqlel s-tuul. Tul echxhte, tan qʼexsanich tetz viyol quBʼaal Tiuxh Xhun. Tul aʼ Xhun palnaʼq tiqleʼm viʼ jolt inqʼa qʼexsanich tetz viyol quBʼaal Tiuxh, inqʼa motx pal vatz txʼavaʼ. 10Tan aʼetz Xhune uvaʼ ech val u yol tzʼibʼamal ka t-viyolbʼal quBʼaal Tiuxh s-tiʼ s-eche:
«Abʼi eeleʼ:
Tan toq inbʼaxabʼsa bʼen
val u vinaq savatz.
Tul aʼetz u vinaqe uvaʼ
toq amon abʼey
tiʼ vavaqʼbʼebʼal
xoʼl inqʼa xaol,»
chich u yol.#Malakiias 3.1
11Toqetz val sete, uvaʼ yeʼxhabʼil invaʼq xaol alamal vatz txʼavaʼ uvaʼ palnaʼql koq viʼ Xhun, u aqʼol kuʼ xaol xeʼ aʼ. Pet taʼnxh u xaol palnaʼq viʼ Xhun uvaʼ nik tiqʼo kuʼl tibʼ tiʼ ibʼant quBʼaal Tiuxh iqʼesalil t-taanima. 12Tuulbʼal uvaʼs ixeʼt tzaan Xhun tiʼ talax viyol quBʼaal Tiuxh, tetxhal tul t-inqʼa qʼij uvaʼ s-txheel, tul il inqʼa bʼaʼnla txhaq yol uvaʼ ul val tiʼ vibʼant quBʼaal Tiuxh iqʼesalil nik motx teesal iqʼij taʼn inqʼa iqʼesal uvaʼ jit aʼ nik ibʼan kam uvaʼ nik isaʼ quBʼaal Tiuxh. Tan aʼ nik taleʼ uvaʼ laʼ motx imaq vet kam uvaʼ nik isaʼ quBʼaal Tiuxh.{*}#11.12 Kaʼvaʼl nik elkaʼp tokebʼal u versiikulo kabʼlaval, tiʼ uvaʼ: —Nik teesal iqʼij vibʼant quBʼaal Tiuxh viqʼesalil, —chiche. U bʼaxa tokebʼal, aʼe, uvaʼ nikich teesa inqʼa qesal uqʼeʼybʼal iqʼij kam inqʼa nikich isaʼ quBʼaal Tiuxh laʼich ibʼan quBʼaal Jesuus tiʼ ibʼant iqʼesalil. Tan kʼuxh nikich motx til inqʼa qʼesal uqʼeʼybʼal kam inqʼa kaebʼal aanima nikich ibʼan quBʼaal Jesuus taʼn viyakʼil quBʼaal Tiuxh, poro aʼl motx taltaq iyatzʼax el quBʼaal Jesuus. U kaʼv tokebʼal, aʼe, uvaʼ nikich itxhiʼan inqʼa iqʼesal uqʼeʼybʼal tiʼ kam uvaʼ nikich isaʼ quBʼaal Tiuxh tiʼ ibʼant iqʼesalil xoʼl inqʼa xaol. Aloq yeʼxh nikich motx toleʼv tuchʼ inqʼa itxhianeʼ, tan tetxhal kuxh nikich toleʼv inqʼa xaol tiʼ ikuyt vibʼant quBʼaal Tiuxh iqʼesalil t-inqʼa taanima. Taʼn aʼxh nikich ibʼan inqʼa xaol yaʼl tiʼ tok s-niman tetz Jesuus, kʼuxh nikich motx talax iyatzʼax el. ¿Kam nik elkaʼpun u yol tiʼ vibʼant quBʼaal Tiuxh iqʼesalil? Aʼ nik elkaʼpun uvaʼ qat itxhaq tzaan quBʼaal Tiuxh quBʼaal Jesuus tiʼ ul talt u titzʼat tibʼ inqʼa xaol t-inqʼa ipaʼv. Tul laʼ motx ijaq ikuya te quBʼaal Tiuxh tiʼ inqʼa ipaʼv. Tul aʼetz laʼ inima vet inqʼa xaole inqʼa bʼaʼnla txhaq yol uvaʼ ul tal quBʼaal Jesuus, tul aʼ vet quBʼaal Tiuxh laʼ bʼanon iqʼesalil t-taanima. Tul nikat ibʼan quBʼaal Tiuxh iqʼesalil xoʼl inqʼa niman tetz Jesuus, eche uvaʼ ibʼan xoʼl inqʼa apoostol. Pet koq inqʼa iqʼesal uqʼeʼybʼal, inqʼa atichaq ok siqʼesalil uvaʼs tul Xhun tiʼ talax viyol quBʼaal Tiuxh, atz tuchʼ uvaʼs tul quBʼaal Jesuus, tan nikich motx teesa iqʼij kame inqʼa nikich tal quBʼaal Jesuus tiʼ vibʼant quBʼaal Tiuxh iqʼesalil. Tan aʼ nikich motx tal inqʼa iqʼesal uqʼeʼybʼal uvaʼ jikxh nikich motx ibʼen tiʼ kam uvaʼ nikich isaʼ quBʼaal Tiuxh. Tul jitetz kuxh taʼn nikich motx tale uvaʼ tira bʼaʼn inqʼa nikich motx ibʼaneʼ, pet tira nikich motx imaq ibʼanax kam uvaʼ nikich isaʼ quBʼaal Tiuxh ibʼanax taʼn quBʼaal Jesuus. Atz aʼl tira nikichaq itxhiʼan tiʼ quBʼaal Jesuus, tetxhal iyatzʼax el quBʼaal Jesuus taʼn. Atz tira nikich motx imaj u tokebʼal quBʼaal Jesuus s-vatz. 13Jankʼaletzxh inqʼa qʼexsanich tetz viyol quBʼaal Tiuxh, tzʼibʼamalaq ka taʼn, atz tzʼibʼamal ka taʼn Moisees t-inqʼa bʼekʼbʼal, tetxhal ul iyaʼtebʼe vet kʼatz Xhun, tan aʼ nik motx tal tiʼ u vulebʼal. 14Echetz maq laʼ eqea, atz maq yeʼ laʼ eqea, poro aʼ Xhune uvaʼ tzʼibʼamal ka inqʼa yol s-tiʼ, uvaʼ: «Qat bʼak itzʼeʼvy Eliias inpaqte uvaʼ alel u tulebʼal,» chich ex s-tiʼ.#Malakiias 4.5 15Jaʼletz ex, uvaʼ nik abʼin inqʼa yol uvaʼ nik valeʼ, tul bʼanvaq yaʼl tiʼ tootzaqileʼ.
Uvaʼs talt quBʼaal Jesuus inuqul tiʼ inqʼa xaol uvaʼ yeʼ motx qeon Xhun, atz inqʼa yeʼ motx qeon Jesuus
16¿Kam invaʼq uvaʼ txumbʼalimal laʼ inbʼan eela inqʼa xaol s-tuchʼ inqʼa itzʼlel s-txheel nik enatxheʼ?, ex, uvaʼ yeʼ nik qeon in. Toq inbʼan eela vetxumbʼal tuchʼ vitxumbʼal jolol inqʼa chelem nitxaʼ, inqʼa maʼt kuxh kʼuqeʼvoq t-kʼayibʼal. Tul nik kuxh motx isichʼin s-vatzaqil.{*}#11.16 Aʼ nik tal u kastiiya: ‹esta generación,› chiche. Aʼ ex tiqʼo tzaan quBʼaal Jesuus tiʼ viyol uvaʼ tal quBʼaal Tiuxh tiʼ inqʼa tij imam Israeel uvaʼ ipalsat viyol quBʼaal Tiuxh uvaʼs motx ipal tu tzaqa txʼavaʼ. Tan yeʼ motx iqej viyol quBʼaal Tiuxh, tiʼ uvaʼ tetxhal laʼich motx okaʼp tu txʼavaʼ Kanaan. Tan motx xoʼv te inqʼa aj Kanaan. Echetz talt vet quBʼaal Tiuxhe tiʼ inqʼa tij imam Israeel uvaʼ motx kuxh kam vet ka tu tzaqa txʼavaʼ, eche uvaʼ nik tal tu Deuteronoomio 1.34-40. 17Tul ech nik motx tal s-eche:
«Qat motx qoqʼsal
inqʼa qaj,
tul jitoq nik motx ebʼixeʼ.
Atz qat qubʼitzlel inqʼa bʼitz
uvaʼ nik ibʼitzlel
tiʼ invaʼq kamnaʼq,
tul jitoq qat motx oqʼ ex,»
chichaq s-vatzaq.{*}#11.17 ¿Kam s-tiʼil ech tal quBʼaal Jesuus s-eche?: —Qat motx qoqʼsal inqʼa qaj, tul jitoq nik motx ebʼixeʼ. Atz qat qubʼitzlel inqʼa bʼitz uvaʼ nik ibʼitzlel tiʼ invaʼq kamnaʼq, tul jitoq qat motx oqʼ ex, —chiche. Aʼ tal quBʼaal Jesuus uvaʼ chiibʼebʼal u tul quBʼaal Jesuus tiʼ talax inqʼa bʼaʼnla txhaq yol tiʼ u kuybʼal, atz tiʼ u akʼ txumbʼal uvaʼ nik ibʼan quBʼaal Tiuxh tiʼ ibʼant iqʼesalil t-taanima inqʼa xaol tuchʼ viTiuxhil, atz tiʼ inqʼa mam kaebʼal aanima ul ibʼan quBʼaal Jesuus. Aʼetz nik ibʼan quBʼaal Jesuus eelae tuchʼ u toqʼsal u aj, uvaʼ nikich ibʼix inqʼa xaol s-vatz. Tul echatetz koq nikich ichiibʼe inqʼa iqʼesal uqʼeʼybʼal tiʼ inqʼa mam bʼaʼnil uvaʼ ul ibʼan quBʼaal Jesuus s-vatz, atz tiʼ inimal inqʼa bʼaʼnla txhaq yol. Pet ech koqe, tan aʼl motx teesal iqʼij quBʼaal Jesuus taʼn, tul tira yeʼ motx inima. Tul aʼ tal quBʼaal Jesuus paqte tiʼ vibʼitzlel invaʼq kamnaʼq, aʼe, uvaʼ tijichxh tatin Xhun s-junal. Atz yeʼl Xhun nikich itxhʼuyeʼv xoʼl inqʼa iqʼesal uqʼeʼybʼal tiʼ kam uvaʼ nikich motx ibʼan tiʼ inimal inqʼa tuqʼeʼybʼal. Pet aʼ nikich itxhus Xhun te inqʼa xaol u titzʼataq tibʼ. Tul laʼich motx txumuni; atz laʼich motx oqʼ tiʼ inqʼa paʼv uvaʼ nikich motx ibʼaneʼ. Tul nikichat tal Xhun paqte uvaʼ, aʼich quBʼaal Jesuuse u Kriisto. Tul echat kuxh motx ibʼane inqʼa iqʼesal uqʼeʼybʼal, tan eesalat txhan iqʼij Xhun taʼn. Tul tira yeʼat motx inima.
18Tan aʼetz uvaʼs tul Xhun, tul jitoq txʼix nikich tetxhbʼu Xhun. Atz jitoq qʼuʼich taʼl uuva nikich tukʼa Xhun. Tul ech nikich etal tiʼ Xhun s-eche: «Demoonioe atoʼk t-taanima Xhun. Tul ech uvaʼe nik ibʼan Xhun,» chichich ex.{*}#11.18 ¿Kam s-tiʼil nikich tal inqʼa iqʼesal uvaʼ demoonio atich ok t-taanima Xhun? Nikichetz motx taleʼ, tan yiqxh txhiʼkʼuulaʼm nikich ibʼan inqʼa iqʼesal tiʼ Xhun, tan aʼ nikich tal Xhun kam u paʼv uvaʼ nikich ibʼan inqʼa iqʼesal. Atz nikich talax Xhun s-demoonio taʼn inqʼa xaol, tiʼ uvaʼ tan, yeʼ nikich isaʼ Xhun tatin xoʼl inqʼa xaol, pet eenich kuxh Xhun t-inqʼa txʼavaʼ uvaʼ yeʼl xaol s-tuul.
19Ajtetz qat ul vet in, in, u Kʼaola uvaʼ qat bʼen s-alam aanima, tul nik etileʼ uvaʼ nik intxʼaʼoneʼ, atz nik vukʼ aʼ. Yaʼne ech nik etal s-viʼ s-eche: «¡Aʼ kuxh itxʼaʼon naq uvaʼe! Atz ¡oq kuxh tukʼ naq taʼl qʼuʼich uuva! Tul taj yol kutxhit tibʼ naq tuchʼ inqʼa molol puaq tetz Rooma, atz tuchʼ txhaqnaq inqʼa aj paʼvom,» chich ex s-viʼ. Poro bʼenoqvaq sete, uvaʼ een ilbʼal tetz u titzʼabʼal quBʼaal Tiuxh tiʼ kame inqʼa jikla txhaq txumbʼal nik qubʼaneʼ, —xeʼt Jesuus te inqʼa xaol.{*}#11.19 ¿Kam s-tiʼil tal inqʼa iqʼesal uqʼeʼybʼal uvaʼ demoonio atich ok taanima quBʼaal Jesuus? Tiʼ uvaʼ tan, jit ech nikich imaqt quBʼaal Jesuus itxʼaʼon tiʼ inatxhax Tiuxh, eche uvaʼ nikich ibʼan inqʼa iqʼesal uqʼeʼybʼal. Tan tootzaqlich quBʼaal Jesuus kam laʼich ibʼan quBʼaal Jesuus tiʼ inatxhax Tiuxh. Xaʼtetze nikich motx ilakp iviʼ inqʼa iqʼesal uqʼeʼybʼal te quBʼaal Jesuus. Atz nikichat tul iviʼ inqʼa iqʼesal uqʼeʼybʼal te quBʼaal Jesuus, tiʼ uvaʼ tan, mam kaebʼal aanima nikich ibʼan quBʼaal Jesuus xoʼl inqʼa xaol. Tul yeʼxhkam invaʼq kaebʼal aanima nikich ibʼan inqʼa iqʼesal uqʼeʼybʼal kʼuxh bʼenamen nikich motx imaqt itxʼaʼon tiʼ inatxhax Tiuxh. Atz nikichat tul iviʼ inqʼa iqʼesal uqʼeʼybʼal inpaqte, tan nikich tal quBʼaal Jesuus inuqul vipaʼv. Atz nikichaq tul iviʼ inpaqte, tan mam xaol nikich motx tok bʼen tiʼ inqʼa txhusbʼal uvaʼ nikich tal quBʼaal Jesuus. Petetz koq inqʼa iqʼesal uqʼeʼybʼal, tan yeʼl xaol nikich motx tok bʼen s-tiʼ, kʼuxh sibʼichaqxh itxhusbʼal. Tul aalxh nikich ilakp iviʼ inqʼa iqʼesal uqʼeʼybʼal tiʼ quBʼaal Jesuus tiʼ u talt tibʼ quBʼaal Jesuus s-Tiuxh tiʼ ikuyp vipaʼv inqʼa xaol.
Uvaʼs talt quBʼaal Jesuus kam laʼ elkaʼp u tenam uvaʼ yeʼ nik qeon inqʼa bʼaʼnla txhaq yol
Luk 10.13-16
20Yaʼne xeʼt Jesuus yaon. Tul tal Jesuus jolol yol tiʼ inqʼa tenam tal uvaʼ maʼtich ikʼutxhvat Jesuus inqʼa kaebʼal aanima. Tan tira yeʼ nikich motx titzʼa tibʼ inqʼa xaol t-inqʼa ipaʼv, kʼuxh maʼtich motx tilt inqʼa mam bʼaʼnil. Tul ech tal Jesuus s-eche: 21—¡Txumlebʼalxh evatz, ex, inqʼa aj tenam Korasiin! Atz ¡txumlebʼalxh evatz, ex, inqʼa aj tenam Vetsaaida! Tan ¡ilxh u kʼaxkʼo tul setiibʼa! Tan ech koq nikich ibʼanax inqʼa mam kaebʼal aanimae xoʼl inqʼa aj tenam Tiiro, atz xoʼl inqʼa aj Sidoon s-naʼya, eche uvaʼ nik ibʼanax sexoʼl s-txheel, tul yekichebʼ motx titzʼaaq tibʼ t-inqʼa ipaʼv. Atz yekichaqebʼ motx toksa qitxhaqkin oksaʼm s-tiʼ, tiʼ ikʼaxataq tibʼ vatz quBʼaal Tiuxh. Atz motxebʼ taqʼaq jaʼ tzaʼ tiviʼ s-tetxhlal u titzʼat tibʼ vatz quBʼaal Tiuxh. 22Pet toq val sete uvaʼ palnaʼql u kʼaxkʼo laʼ etil viʼ u kʼaxkʼo uvaʼ laʼ til inqʼa aj tenam Tiiro tuchʼ inqʼa aj Sidoon uvaʼs laʼ taqʼt kuʼ quBʼaal Tiuxh inqʼa yol tinuqul.
23Atz kʼuxh ex inqʼa aj tenam Kapernauum, ¿maq aʼ nik etitzʼa uvaʼ toq iqʼoloq jaʼ ex tu amlikaʼ taʼn quBʼaal Tiuxh? Yeʼle. Pet aʼl tira toq palsaloq kuʼ ex tu Kʼaxkʼola Atibʼal taʼn quBʼaal Tiuxh.#Isaiias 14.13-15 Tan ech koq ibʼanax inqʼa mam kaebʼal aanimae xoʼl inqʼa aj tenam Sodooma s-naʼya, eche inqʼa qat motx bʼanaxiy sexoʼl s-txheel, tul titzʼalaqebʼ tibʼ. Atz atebʼ u tenam Sodooma s-txheel. 24Pet toq val sete uvaʼ tira palnaʼql u kʼaxkʼo laʼ etil viʼ u kʼaxkʼo uvaʼ laʼ til inqʼa aj tenam Sodooma uvaʼs laʼ taqʼt kuʼ quBʼaal Tiuxh inqʼa yol tinuqul, —xeʼt Jesuus.
Uvaʼs talt quBʼaal Jesuus uvaʼ, aʼ laʼ ilank inqʼa xaol kʼatz quBʼaal Jesuus tiʼ yeʼ ibʼant vet u paʼv
Luk 10.21-22
25Antetzxh tuulbʼal inqʼa qʼij inqʼae, tul inatxh Jesuus quBʼaal Tiuxh. Tul ech tal Jesuus s-eche: —Nik voksa aqʼij, inBʼaal, axh, uvaʼ nik bʼanon iqʼesal tiibʼa u amlikaʼ, atz tiibʼa u vatz txʼavaʼ s-kaqaayil. Tan qat aaqʼ tootzaqibʼal inqʼa xaol uvaʼ qat niman in, eche nitxaʼ uvaʼ nik ootzaqin invaʼq kam uvaʼ yeʼ tootzaqle. Pet jit aʼ qat aaqʼvat ootzaqiloq te inqʼa at tootzaqibʼal, atz inqʼa at itxumbʼal nik taleʼ. 26Echxhte, inBʼaal. Tan ech uvaʼe qat asaʼa, —xeʼt Jesuus te quBʼaal Tiuxh.
27Tul ech tal Jesuus xoʼl inqʼa xaol s-eche: —Jankʼalxh inqʼa kam uvaʼ nik inbʼaneʼ, tan ayaʼl inqʼae qat tal vinBʼaal inbʼantaʼ. Tan taʼn kuxh in ootzaqin tetz vinBʼaal. Pet yeʼxhabʼil invaʼq ootzaqin tetz. Tan at t-inqʼabʼ oq laʼ insaʼ tootzaqit u xaol vinBʼaal. Tul taʼn kuxh u quBʼaal ootzaqin tetz u viqleʼm, in viKʼaol. Tul yeʼxhabʼil invaʼq ootzaqin. Pet taʼn ootzaqin vetz inqʼa nik niman in, tan qat inkʼutxhl s-te kam viqleʼm kʼatz vinBʼaal.
28Pet etulvaq sinkʼatza, jatvaʼlxh ex, uvaʼ uqliy ex, atz kʼaxbʼiy vet ex taʼn inqʼa paʼv. Tan inetz toq bʼanon uvaʼ yeʼ laʼ oleʼv vet u paʼv setiʼ. Echetz toq etilane sinkʼatza. 29Tul tzumxh etiqʼot vinyolbʼal sinkʼatza, eche kaʼvoʼq yakʼa vaʼk uvaʼ tzumxh nik motx ibʼen tiʼ tiqʼot invaʼq iqatz. Tul ilvaq etetz sinkʼatza uvaʼ tzʼuʼkinla aanima in. Atz nik viqʼo kuʼl vibʼ vatz quBʼaal Tiuxh. Tan oq aʼ laʼ txhʼuyeʼvik ex s-viʼ, tul toqetz eleq ilanchil kʼatz quBʼaal Tiuxh.#Jeremiias 6.16 30Tan yeʼ kuxh tzaʼl, atz yeʼ kuxh al laʼ etiqʼot vinyolbʼal, eche itxhelet kaʼvoʼq yakʼa vaʼk yuuka tiviʼ, —xeʼt Jesuus.
Okuqokiwe okwamanje:
Tio 11: ixlC
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2016, Wycliffe Bible Translators, Inc. All rights reserved.
