Jon 6
6
Na Yesus A Fafangan A Rabuna 5,000
Matiu 14:13-21; Maak 6:32-44; Luuk 9:10-17
1Lumui na Yesus a laak xuluna xaati e falet xe la xasa paxasing ina Laman Galili; ri xalie pana Raarum Taibirius. 2A toxan a tang malila taxa usie senaso ri fo xalum a maana mo fa'ipul aava nane fuuna vile xena vil faroxoi a mu rabuna pana giisan. 3Na Yesus a ung e laak xe xuluna put e fe nai pave xuvul pana mu fefeng sina. 4A fenamo molava sina mu Juda, a Yaan ina Paaliuan, fo faasilak.
5Na Yesus a kaalum e xalum a tang malila taxa savatmaan xe sina e nane fin na Filip, “Taara taa maraan a bret fexaxaas xena fafangan a mu rabuna aapave faa?” 6Nane kuus malaan senaso nane buk tafang mon na Filip, taasaxa nane fatak xa a texaas o so ta mo nane i taa vile.
7Na Filip a suie, “Ai, tamo ne faisok pana fulun pisiktul, ne pife fexaxaas sena maraan a bret fexaxaas xena fafangan nari xapiak pana xavil modak, modak.”
8Taasaxa saxa fefeng, na Endru, na ti Saimon Pita, a kuus, 9“A toxan a saxa lak modak nabe' pana bret baali pama e a din taragua; taasaxa fanganan modak malaan a pife fexaxaas xena fafanganaan nari xapiak.”
10Na Yesus a kuus, “Xuus a mu rabuna o ri taa nai.” A bina aave ve toxan a yi e mu tomexaan xo ri nai su' e a xakatan siri ve faasilak 5,000. 11Na Yesus a siak a bret baali e fenung e kuus faasiroxo paaliu xe sina Piran. Mui nane viak a bret e tavai a mu rabuna aava ri nai xolai pana e nane vil malaane pana din sait. E mu rabuna xapiak ri siak fanganan fefexaxaas sena vubuxanan siri.
12Layaan ri fo maasi xo, na Yesus a xuus a mu fefeng sina, “Faxuvul a mu xavil xapiak aava ri taxa waan senaso ne buk o piau ta saxa xavil i taa milung.” 13Lavaxa, ri faxuvule e ri fabas a bi sangafilu saxa pana taragua pana mu xavil ina bret baali aava waan lamina fanganan.
14A mu rabuna ri xalum a mo fa'ipul aava na Yesus fo vile e ri kuus, “A tuuna, nane ve a Mataa ina Kuus Fatuxai aava kavai ri fo kuus o i taa filimaan xe la xavala.” 15E voxo na Yesus fo texaas o nari rao ri taa yote e ri taa fatigineie malaan sena ʻkingʼ siri e nane sang mon fe laak fufunai xe xuluna put.
Na Yesus A Sangas Xuluna Laman
Matiu 14:22-33; Maak 6:47-51
16Lavaxa, a bina xo leaaf paaliu e mu fefeng si Yesus ri sivi xe la gun. 17Ri xawas xuluna xaati e rao ri taa falet xe Kapanam. A bina xo suk e na Yesus a pife savat siri lunai. 18Ri taxa falet e a tof a savat siri senaso a reref molava taxa tigina. 19Lamina yaan ri xaul, xaul naak faasilak a kilomita pama o pisaxa, ri xalum na Yesus i taxa sangasmaan xuluna laman. Nane savat faasilak la tana xaati e ri mataut fasaat paaliu. 20Nane xuus nari, “Nenia move, muta mataut!” 21E ri vubuk o i taa xawas xuluna xaati e fataapus paaliu ri savat la bina aava rao ri ung lana.
22La yaan lamina a malila aava ri waan pave la xasing ina laman, ri texaas o a xaati saxa mon fo waan pave e mu fefeng si Yesus sang mon ri fo falet taasaxa nane pife xawas xuluna xaati xuvul pari. 23Xasano xaati ti Taibirius ri savat xe la bina aapave; a bina aave a malila fo ngan a bret aava Memai fo fenung xuluna 24e voxo, layaan a malila ri texaas o na Yesus e a mu fefeng sina ri pife waan fulaa, nari sait ri xawas xuluna maana xaati e ri falet xena seng na Yesus pe Kapanam.
25Layaan ri tingine la xasa paxasing ina laman ri fine, “Ai, Mataa ina Fepitaa, laso ta yaan no fo savat nabe'?”
26Na Yesus a sui nari malaan, “Tuuna paaliu ne xuus nami, mi pife sengau senaso mi xalum a mo fa'ipul ne vile. Taasaxa mi sengau senaso mi fo ngan a bret pave e mi maasi. 27Muta faisok pana maana buk fanganan aava i taa masiik, piau. Taasaxa faisok pana fanganan aava i taa waan vulai e i taa lisan a toyan xe vulai. A fanganan naang ve a Natuna Mataa i taa tavai nami pana senaso a Piran Tamataara fo siak fatie e tavaie pana gutan xena vil malaane.”
28E ri kuus, “A so ta mo maam taa vile xena vil a faisok aava Piran a vubuxane?”
29Na Yesus a sui nari, “A faisok sina Piran a malaan: ‘Mi taa namkai sena saxa aava Piran fo fenge.’”
30E ri xuus fulane, “Lavaxa, a so ta fakalimaanan no taa vile talo maam taa xalume e namkai sema. No taa vil a so? 31A mu butaara ri ngan a mo taara xalie pana ‘maanaa’ pe la xobingil, malaan sena Ferawaian sina Piran aava kuus: ‘Nane tavai nari pana bret ti la xunavata xena fanganan.’” Ta'ulanan 16:4,15.
32Na Yesus a xuus nari, “Ne taa xuus tuunei nami pana fufuna ferawaian aave, na Moses pife tavai nami pana bret ti la xunavata, taasaxa a malaan, na Tamaang i taxa tavai nami pana bret tuuna ti la xunavata. 33Senaso a bret sina Piran a mo aava sivimaan ti la xunavata e i taa tavai a mu rabuna la xavala pana toyan.”
34E ri nunge, “Memai, tavai nemaam pana bret aanabe' vulai.”
35Na Yesus a xuus nari, “Nenia xa, ne bret ina toyan, nase' i taa filimaan xe siak i taa pife lagai e vaxa nane aava i taa namkai sega i taa pife ma'iu fulaa. 36Ne xuus nami o mi fo xalumau taasaxa mi pife namkai lunai sega. 37A maana rabuna aava Piran a tavaiau pana, ri taa tamana filimaan xe siak e ne taa pife feng tapin ta saxa mataa aava i taa savat xe siak. 38Senaso ne pife sivimaan ti la xunavata xena vil a vubuxanan siak, piau. Ne fo sivimaan xena vil a vubuxanan sina saxa aava fengau. 39E a vubuxanan sina saxa aava fengau a malaan: nari mu rabuna aava nane fo tavaiau pari, ne taa pife ta'ulan ta saxa iri. Taasaxa ne taa fatatoi fa'uli nari xapiak lana Yaan Fataxapiak. 40A vubuxanan si Tamaang a malaan: a maana mu rabuna aava ri xalum tuunei na Natuna e ri namkai sena, nari xo ri taa siak a toyan vulai, vulai, e fulaa ne taa fatatoi fa'uli nari lana Yaan Fataxapiak.”
41E nari mu Juda ri fefinaas xolai se Yesus senaso nane kuus, “Nenia, ne Bret aava sivimaan ti la xunavata.” 42E ri kuus, “Nane na Yesus, bo? A lak si Yosep? Na tamana narie ninana, taara texaas sere, bo? Malaafaa nane kuus: ‘Nenia, ne fo sivimaan ti la xunavata?’”
43Na Yesus a xuus nari, “Muta lo fefinaasai malaave. 44Piau ta saxa a fexaxaas sena filimaan xe siak tamo na Tamataara aava fengau, a pife xele. E nase' ta mataa aava fo xelan, ne taa fatatoie la Yaan Fataxapiak. 45A xakalayan aanabe' taxa waan lana Xakalayan sina mu rabuna ina kuus fatuxai: ‘E nari xapiak, a Piran taa fapiti nari.’ Aisaia 54:13.
A maana rabuna xapiak aava ri fo langai a ferawaian si Tamataara e ri fo siak a texaasan sena, nari ve ri taa filimaan xe siak. 46Piau ta mataa fo xalum na Tamataara taasaxa saxa aava fo sivimaan ti laa'ui sina Piran, nane sang mon fo xalum na Tamataara. 47Ne xuus tuunei nami, nane aava namkai i taa toxan a toyan vulai, vulai. 48Nenia ve ne Bret ina Toyan. 49A mu bumi ri ngan a ‘maanaa’ pe la bina xobingil, taasaxa ri femaat. 50Nabe' ve si a bret aava sivimaan ti la xunavata e voxo layaan ta mataa taa ngane i taa pife maat. 51Nenia xa, ne bret i taxa to aava sivimaan ti la xunavata. Tamo ta mataa taa ngan a bret aanabe' i taa to vulai. A bret aanabe' ve a vipin iga aava ne taa lisane xena maraan fa'uli a maana rabuna ti la xavala.”
52E voxo mu Juda ri fetok faagut la palou iri, “Malaafaa a mataa aanabe' a fexaxaas sena tavai netaara pana vipin ina xena nganaana?”
53E na Yesus a xuus fulan nari, “Ne taxa xuus tuunei nami, tamo mi pife ngan a meska ina Natuna Mataa e mi pife num a ria ina, mi taa piau ta toyan tuuna. 54Nase' ta mataa taa ngan a meska iga e num a ria iga, nane ve, a toxan a toyan vulai e ne taa tamana fatatoie la Yaan Fataxapiak. 55Senaso a meska iga a fanganan tuuna e a ria iga a mo ina numan tuuna. 56Nase' ta mataa i taa ngan a meska iga e i taa num a ria iga, i taa taagul lapaana gutan siak e nenia, ne taa taagul xuvul pana. 57Ta mataa aava i taa ngan vulanau i taa to senaso nenia, ne taxa to. A mo aanabe' a fexaxaas senaso na Tamataara fo fengau e ne taxa to vulai lapaa Tamataara. 58Nabe' ve a bret aava sivimaan ti la xunavata. A pife malaan sena ‘bret maanaa’ a mu bumi fo ngane, piau. A bret siri a pife ti votan a maatan seri. Taasaxa nane aava i taa ngan a bret aanabe' i taa siak a toyan vulai, vulai.” 59Na Yesus a kuus malaan layaan nane taxa fapiti nari lana lifu ina faxuvulan pe Kapanam.
Saxano Fefeng Si Yesus, Ri Ta'ulane
60E xaves ina mu fefeng si Yesus, layaan ri langai a ferawaian aanabe' ri kuus malaan, “A ferawaian aanabe' a lagaf temasaat. Nase' fexaxaas i taa langaie?”
61Na Yesus a texaas lana xunus ina o a mu fefeng sina ri taxa fefinaas sena mo aanabe' e a xuus nari, “A ferawaian aanabe' naak i taxa fakasal temasaatan nami, bo? 62A so ta mo i taa savat tamo mi taa xalum a Natuna Mataa i taxa laak fa'ulaa xe la bina aava nane waan lana paamua? 63A Vovau a tatavai pana toyan; a vipin o meska, re mo palau mon. A mu vapaling aava ne fo xuus nami pana, nari ve ri vovau e ri toyan xana mataa. 64Taasaxa saxanofuna imi, mi pife namkai.” Senaso na Yesus fo texaas ti la tangpat o nase' ta mu fefeng sina ri pife namkai tuuna e nane texaas o nase' i taa pet lisane. 65E nane kuus fulaa, “A vilaana aanabe' a fufuna ferawaian siak layaan ne xuus nami o piau ta mataa fefexaxaas sena filimaan xe siak tamo na Tamataara a pife xele.”
66Tangpat la yaan aanabe' e falet, saxano fefeng sina ri ta'ulane e ri pife sangas xuvul pana fulaa.
67E na Yesus a fin nari mu yaamut sangafilu saxa pana taragua, “Nami vaxa, mi buk paan patak?”
68E na Saimon Pita a suie, “Memai, maam taa falet xe sise'? Nano, no toxan a ferawaian ina toyan vulai 69e maam fo namkai e masam tuuna o nano, no Saxa Mataa Taap sina Piran.”
70E na Yesus a suie, “Ne fo siak fati nami bo, nami Sangafilu Saxa pana Taragua? Taasaxa saxa la palou imi ve si Setan.” 71Nane taxa ferawai se Judas, na natu Simon Iskeriot senaso nane a saxa sina mu Sangafilu Saxa pana Taragua e nane ve i taa pet lisan na Yesus.
Okuqokiwe okwamanje:
Jon 6: TFSP
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Wycliffe Bible Translators, Inc. All rights reserved.
