उत्पत्ति 16
16
अब्राम, हागार व इश्माएल
1अब्रामया कलाः साराईया पाखें मस्त मदु। वया छम्ह हागार धाःम्ह मिश्र देशयाम्ह दासी दु। 2साराईनं अब्रामयात धाल, “परमप्रभुं जितः छम्ह हे मचा बियामदी। उकिं जिम्ह दासीयाथाय् वनाः व नाप द्यँ। वयापाखें सां जितः सन्तान दइ ला।” अब्रामं साराईनं धाःगु खँ न्यन। 3साराईनं मिश्र देशयाम्ह थः दासी हागारयात हयाः थः भाःत अब्रामयात कलाः यायेत लःल्हाना बिल। अब्राम कनानय् वयाच्वंगु झिदँ लिपा थ्व जूगु खः।
4अब्राम हागारयाथाय् वन। अले हागारया प्वाथय् दत। हागारं थः प्वाथय् दुगु सीवं थः मालिकनी साराईयात क्वह्यंकाहल। 5अले साराईनं अब्रामयात धाल, “जितः जूगु दुःख फुक्क छिं यानाः जूगु खः। जिं हे छितः थः दासी लःल्हाना बियागु खः। आः वं थः प्वाथय् दत धयागु सिसांनिसें जितः क्वह्यंकाहल। आः परमप्रभुं हे छिगु व जिगु न्याय यानादी।”
6अब्रामं धाल, “छंम्ह दासी छंगु हे ल्हातिइ दु। छं छु याये मास्तेवः वयात अथे हे या।” अले साराईनं हागारयात दुःख बीगु यात। थुकिं यानाः हागार अनं बिस्युं वन।
7परमप्रभुया दूतं वयात मरुभूमिइ शूरपाखे वनेगु लँय् लाःगु लःया मुहान दुथाय् नापलात। 8अले वयात न्यनादिल, “साराईया दासी हागार, छ गनं वयागु, अले गन वनेत्यनागु?”
वं लिसः बिल, “जि थः मालिकनी साराईपाखें बिस्युं वनाच्वनागु खः।”
9अले परमप्रभुया दूतं वयात धाल, “छ थः मालिकनीयाथाय् हे लिहां हुँ, अले वयागु हे अधीनय् च्वँ।” 10परमप्रभुया दूतं हाकनं धाल,
“जिं छिमि सन्तानयात
ल्याः खाये मफयेक यक्व दय्काबी।”
11वं धाल,
“छं आः प्वाथय् दु।
छं छम्ह काय् बुइकी।
अले वयागु नां इश्माएल#१६:११ इश्माएल हिब्रू भाषाय् थ्व खँग्वः परमेश्वरं न्यनादी खँग्वः लिसे ज्वः लाः। तइ।
छाय्धाःसा परमप्रभुं छ ख्वःगु न्यनादीगु दु।
12मनूतय्गु दथुइ व जंगली गधा थें जुइ।
व सकसिगुं विरोधय् दनी।
अले सकलें वयागु विरोधय् दनी।
व वया थःथितिपिं फुक्कलिसे अलग जुइ।”
13हागारं धाल, “जिं धात्थें हे परमप्रभुयात खना। अले वय्कःयात खनेधुंकाः नं जि म्वाना हे च्वना।” अले वं परमप्रभुयात थथे धकाः नां तल, “जितः स्वइम्ह परमप्रभु।” 14उकिं मनूतय्सं कादेश व बेरेदया दथुइ लाःगु बुंगाःचायात बेअर-लहै-रोइ#१६:१४ बेअर-लहै-रोइ थुकिया अर्थ खः जितः स्वइम्ह म्वानाच्वंम्हय्सिया बुंगाःचा। धकाः नां तल।
15हागारं काय् बुइकल। अब्रामं हागारया पाखें दुम्ह थः काय्या नां इश्माएल तल। 16उबलय् अब्राम चयखुदँ (८६) दुम्ह खः।
Okuqokiwe okwamanje:
उत्पत्ति 16: NEW
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2024 Nepal Bible Society, Newa Christian
Literature Center and Wycliffe Bible Translators, Inc.