San Mateo 9
9
Jesúsne chasachimikara kakulnintu
(Mr 2.1-12; Lc 5.17-26)
1Suasne Jesúsne kanuara waat kit pi kwak kit paiña pɨpulura piannarɨt. 2Sua uspane chasachi intura kamara tukin iptɨt muaara. Chasachi intura karattuza iznarawane, Jesúsne uspa wat nɨjkulamtu piankam kit intura kaizta:
—Ap painkul mɨri. Tayalmun. Nane nu kwail kit aizpa me wat kultɨt, kizta.
3Suasne mɨnpazha Moisés kaizta aizpa kamtamtuzne usparuzpain ka minñara: “Sun ampune paiña pitkasain Diospa kwail kiztu.” 4Jesúsne uspa minñamtu aizpa piankam kit usparuza mɨmanara:
—¿Une chikishma katne kwail minñamtuas? 5¿Chikishma katne na kimtu aizpa mɨmamuspas? “Nane paiña kwail kit aizpa wat kulshinas. Kawarain paiña kamakis kuhsninshinas.” 6Nane uruza na kimtu aizpa annanash, ampu namtɨtmika an sukin ɨnintu piankamanapa. Nakas paiña kwail kirɨt aizpa wat kulninshinas. Nane au su uztuza ɨninshinamtu, kiznara. Suasne Jesúsne chasachi intumikara kaizta:
—Kuhsak kit up kama mɨl kit up yalta ɨrɨnka.
7Chasachi intumikane kuhsak kit paiña yalta ɨrɨt. 8Awa sun kirɨt aizpa izarawane, uspane ishkuamɨzta. Dios an ampura watsal kal kinpa kiwainta akwa, uspane Dios kwisha wari kizara.
Jesúsne Mateora akumtu
(Mr 2.13-17; Lc 5.27-32)
9Miwara ɨmtuasmin, Jesúsne maza awara, Mateo muntɨtmikara, izta. Usne Roma gobierno pial sapmu yalkin kal kimtuazi. Ustukin piannakane, Jesúsne ussa kaizta:
—Nawa kanpazha, ap kammumika namnapa.
Suasne Mateone kuhsak kit ussa kanpara. 10Sun payu Jesúskas paiña kammuruzkas Mateowa yalta kwan ɨara. Akkwan Roma gobiernowa pial sapmuruzkas mamaz kwail kimtuzkas piannaara, uspakasa kwan. Judío ɨnintuzne “uspa kwail awa mai” minñara, Judío awa ɨninta aizpa mɨarachi akwa. 11Fariseo awa sun izarawane, uspane Jesústa kanpamtuza ka mɨmaara:
—¿Chikishma up kamtam pial sapmuruzkasakas mamaz kwail kimtuzkasakas kumtu? mɨmanara.
12Sun mɨrawane, Jesúsne kaiznara:
—Nane tuttulkana ish. Kwail kimmikane ishtumikana i. Imtuchiruzne tuttul pashikain. Imtuin tuttul pashimtu. 13An watsal pit para aizpa piankamtain. Sun pit an ñamin Dios pɨnkɨhta ka parɨt: “U wakara piantana karamtukas, nane sun mɨlam pashitchish. Mamaztuza kiwainna an wari,” ka parɨt.#Os 6.6 Nane wat awa makpas mintuzne akwanamtuchish. Nane kwail kiarɨttuza akwanamtus, kwail kiarɨttuza wat kulnana.
Dios akwa pala kwatchin cha
(Mr 2.18-22; Lc 5.33-39)
14Juan munnammikawa kammuruzne Jesústa ɨat kit mɨmaara:
—¿Chikitma up kanpamtuzne Dios akwa pala kwatchin payura kuamtu? Uspa akwa impa chi. Aukas Fariseo awakas pishta payu kuamtuchimakpas. Au akwa impa, kizara.
15Jesúsne sɨnkanara:
—Kasara pishtakin akwattuzne kasara kimtumika akwa tayalamtuchi. Usne usparuzkasa tuasmin, uspane kuamtu. Impachi. Kawarain ap kammuruz nakasa purasmin, uspane kuamtu. Impachi. Mamaz payura ap izmuchiruzne nawa pizara. Nane apain tuamanash. Sun payu taizkane, ap kammuruzne tayal kit kuamanazi. 16Nane masas kamtam uruza kamtananamtu. Ɨlapawa kamtamkanachi. An masas kamtam mɨmtumikane ɨlapawa kamtam mɨkain. Paasas kamtam kiasachi. Sunkanain mɨnminkas pɨtta pĩnta yalsachi masas pĩnkasa. Masas pĩnkasa yaltane, masas sɨpparawane, pɨttɨt pĩnne an pihsharɨm. 17Sunkanain masas chappi pɨtta ayara ultuchi, sulnapa. Masas chappi pɨtta ayara ultane, chappi sulkane, ayane pihshat kit chappi puz kit wan karɨnazi. Katmizna sultachasmin, masas chappi masas ayara wintawa, chappi sulnapa, paasas kamanpa.
Jairowa pashukas imtu ashampakas
(Mr 5.21-43; Lc 8.40-56)
18Jesús sun kiznamtuasmin, Judío ɨninmikane ussa at kit us tukin wakpuj wain kit kaizta:
—Ap pashune mamin ire. Nu at kit up chihtɨkasa ussa parane, usne kakul kit mamasa uznazi, kizta.
19Jesúsne kuhsak kit uskasakas kammuruzkasakas ɨamɨzta. 20Suasne maza intu ashampane Jesús tukin ɨt. Doce añokima paiña aimpi pulparachi akwa, usne kwisha naizta. Jesúspa kwizpa at kit Jesúspa kwaksham puntakin paara. 21Usmin ka minta: “Paiña pĩnta paarane, wat paakwarakas,” minta.
22Jesúsne puij chat kit ashampara iz kit kaizta:
—Ashampa mɨzha. Tayalmun. Nu nawa wat nɨjkulta akwa, nu wat pari, kizta.
Ashampane sun urain wat parɨt.
23Judío awa ɨninmikawa yalta piannakane, Jesúsne akkwan kanta usamturuzakas akkwan azamturuzakas iznara. Uspane aat kit pashpara izara. Ussa watsat taara, kamna ɨnpain. Usne kaiznara:
24—Akkis puztain, nimpihsh ashampa irachi akwa. Pittɨt tui, kiznara.
Sun mɨamtuasmin, uspane Jesústa ishanara. 25Awaruza puzninnarawane, Jesúsne kalmalta nap kit nimpihsh ashampawa chihtɨ pizta. Suasne usne kuhsak kit kunta. 26Wan awane sun sukin Jesús kit aizpa piankamara.
Jesúsne paas izsachiruza izkulnintu
27Suas puztawane, paas kasu izsachiruzne ussa kanpail kit ussa tɨnta kwianpailta:
—Aumɨza mɨzhain. Davidne up antikwa pampawa papihsh ara. Nu mikwa Davidpa kwal akwa, nu Diospa nɨrɨtmika akwa, aumɨza kiwainchain, kizpailta.
28Jesús yalkin napkane, paasas kasu izsachiruzne us tukin ailta. Jesúsne usparuza ka mɨmara:
—¿U nawa nɨjkultukiwas. Na uruza izkulninshinaki?
Uspane kaizpailta:
—Watcha, Anpat. Aune nua nɨjkultuas, au paikumtu aizpa kinpa, kizpailta.
29Suasne Jesúsne uspa kasura paat kit kaiznara:
—U nawa nɨjkultu akwa, une masain wat izashinai.
30Uspa kasune izkulpailta. Suasne Jesúsne “sun kit aizpa mɨnainkas kainanamun,” kizta.
31Tas puzpailtawane, uspane wan awaruza Jesús uspa akwa kirɨt aizpa kainanamɨzta.
Jesúsne paramtuchimikasha paranintu
32Kasu izsachiruz puzpailkane, mɨnpazha Jesústukin aara. Uspane saliz piztɨt parasachimikasha karaara. 33Jesús salizta puzninkane, parasachimikane, paramɨzta. Awane iztaaspat kit kaizara:
—Aune Israel sura mizurainkas sunkanane iztakimakpas.
34Fariseo awane ka kaizamɨzta:
—Salizpa katsa mikwane Jesústa kiwaintu, mamaz saliztuza puzninnanapa, kizara.
Jesúsne awaruza kiwainashimtu
35Jesúsne wan ainki pɨpulurakas wan katsa pɨpulurakas chamɨzta, Judío kammu yalkin kamtanana. Usne Dios watsal pit kainanara, awa Dios ɨnintukin uzanapa. Usne wan inturuzakas wan ishturuzakas kakulninnara. 36Wan awaruza iznamtuasmin, Jesúsne usparuza kiwainnashira. Uspane kwisha tayalat kit kwaizarɨt. Uspane pɨrikukana chaamtu, izmumika mɨjchin. 37Suasne Jesúsne paiña kammuruza kaiznara:
—Akkwan pippa pakna wakas, akkwan kal kimtuzne purachi. 38Katmizna pakmuwamikasha paikwarain, awaruza paiña pakmura pakninna ɨninnapa.
Okuqokiwe okwamanje:
San Mateo 9: kwi
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2002, Wycliffe Bible Translators, Inc. All rights reserved.
