SOERA MOZE I. FAZA 9.
FAZA 9.
I. Ifahowoeʼõ niha andrõ, saoeri, Lowalangi. II. Fawoeʼoe li Lowalangi ba niha. Tandra wawoeʼoesa li andrõ ndroemi. III. Femaboe Noachi. Fangelifi ba famahowoe, nilaoenia chõ nononia.
1I. Ba ifahoewoeʼõ Noachi ba ononia Lowalangi, imane chõra: Miʼoʼono ba miʼojaʼõ ami, mifoʼõsi goeli danõ! (F. 1, 28). 2Ndramoeʼataʼoefi ami, jamoehocha mboe zaliw̃aliw̃a ba danõ fefoe, awõ wofo ba daloe mbanoea fefoe, awõ zanananana ba danõ fefoe, ba awõ giʼa ba nasi, fefoe: barõ mbawami tebeʼe. 3Fefoe zaliw̃aliw̃a, si so noso, ba õmi: si mane fameʼegoe boeloe ndroeʼoe andrõ oebeʼe chõmi, fefoe. 4Ha nagole si so noso na bacha, si so donia na, ba lõ tola miʼā. (Moz. III. 7, 26; 17, 14. Hal. zin. 15, 20). 5Ba oelaoe mbalõ ndromi; ba zaliw̃aliw̃a ba danõ fefoe oelaoe, ba ba niha fefoe, oelaoe mbalõ noso niha, me no si fatalifoesõ; me no ibeʼe famaedonia niha Lowalangi, wamazõchi jaʼia. (Moz. II. 21, 12. 28). 6Na so zameʼe adoewa ndro niha, ba niha zoei zameʼe adoewa ndronia, me no ibeʼe famaedonia niha Lowalangi, wamazõchi jaʼia. (Mat. 26, 52. F. 1, 26). 7Ba jaʼami, ba miʼoʼono, miʼojaʼõ ami; miʼaliw̃aliw̃a ba goeli danõ ba miʼojaʼõ ami ba detenia.
8II. Ba imane na Lowalangi chõ Noachi ba ba nononia, si so ba ngainia: 9Hiza, fawoeʼoe li ndraʼodo chõmi, ba ba maʼoewoemi, (Jes. 54, 9), 10ba ba zi so noso fefoe, awõmi, he fofo ba he oerifõmi andrõ ba oetoe ndroeʼoe fefoe, si faofao chõmi, fefoe gofoe hadia zaliw̃aliw̃a ba danõ, si oroi nowo andrõ. 11Fawoeʼoesa li andrõ chõgoe chõmi: tenga saʼae nihori hadia ia nifazõchi, ba nidanõ andrõ, si nõnõi tanõ, ba lõʼõ saʼae itõrõ faʼanõnõ danõ, ba wamakiko oeli danõ. 12Ba imane Lowalangi: Daʼõ dandra wawoeʼoesa li andrõ, fawoeʼoesa li chõgoe chõmi ba ba zi so noso fefoe, awõmi, ba ngaʼõtõ fefoe mitooe. 13Doemi andrõ chõgoe, ba oebeʼe ba lawoeo, enaʼõ tandra wawoeʼoesa li ia ba gotaloeama danõ. 14Ba na so oehõna lawoeo, jaw̃a danõ, ba na teʼila ndroemi andrõ, 15ba itõrõ tõdõgoe wawoeʼoesa li andrõ, fawoeʼoesa li chõgoe chõmi ba ba zonoso fefoe ba nõsi goeli danõ maʼafefoe; fa bõi saʼae anõnõ danõ idanõ andrõ, ba wamakiko õsi goeli danõ fefoe. 16Ba na no so ba lawoeo ndroemi andrõ, ba oefaigi ia, enaʼõ itõrõ tõdõgoe wawoeʼoesa li andrõ, si lõ teboelõ, nilaoe Lowalangi ba zonoso fefoe ba nõsi goeli danõ maʼafefoe. 17Ba imane Lowalangi chõ Noachi: Ja daʼõ dandra wawoeʼoesa li andrõ, fawoeʼoesa li andrõ chõgoe ba nõsi goeli danõ fefoe.
18III. Ba ono Noachi si oroi nowo andrõ, ba Semi ba Chamo ba Jafeti; ba Chamo andrõ, ba ama Ganaʼana andrõ. 19Daʼõ nono Noachi si datõloe andrõ, ba jaʼira woeroegõ niha ba goeli danõ fefoe. 20Ba ibõrõtaigõ Noachi ifazõchi kaboe nagoe, sangahalõ ia. 21Ba me ibadoe nagoe, ba maboe ia, ba mõrõmõrõ tooe ia ba nosenia, lõ baloebaloe zaila ia. 22Ba me iʼila Chamo andrõ, ama Ganaʼana, lõ baloebaloe namania, ba mõi ia moew̃aʼõ chõ gaʼania si daroea andrõ, baero. 23Ba lahalõ mbaroe seboea ira Semi Jafeti, laʼangalisigõ, laʼerogõ weʼamõi chõ namara ba laboeloegõ zaila ia; noa sa laʼerogõ, fa bõi laʼila zaila namara. 24Ba me tokea Noachi, me dõhõ wemaboenia ba me irongo nilaoe nononia si achi andrõ chõnia, ba imane: 25Niʼelifi Ganaʼana, ja sawoejoe zawoejoe ia ba chõ gaʼania andrõ! 26Ba imane na: Nisoeno Jehowa Lowalangi Zemi, ba ja sawoejoera Ganaʼana! (F. 12, 8. Moz. II. 3, 14. Sangoehoek. 1, 28). 27Jamoefonaha sebolo Jafeti Lowalangi ba jamonahia [Jafeti] ba nose Zemi; ba sawoejoera dania Ganaʼana! 28Ba 350 fache tõ na Noachi, me no aefa waʼanõnõ danõ andrõ, ba 950 fache waʼanaoe noso Noachi fefoe, ba mate ia.
Okuqokiwe okwamanje:
SOERA MOZE I. FAZA 9.: NIA
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.