Amavesi eBhayibheli adumile avela kokuthi မ︀တ︀်တ︀ႄး 6

Dlulisela

ဢ︀ꩫ︀်ႈၵ︀ႅꩫ︀်းဢ︀ၵ︀ႅက︀်ႉꩫ︀ႆ︀ႇယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩬ︀ူမ︀ႆ︀ႛꩭႂ်ႛဢ︀ုပ︀်ႉပ︀ိုင︀်တ︀ႃႉ။ ဢ︀ꩫ︀်ႈပ︀ၢင︀်ႈꩫ︀ႃႛမ︀ꩫ︀်းꩡ︀ဝ်ႛမ︀ႆ︀ႛ ꩬ︀ိုဝ်ႈꩡ︀ႂ်ႈꩫ︀ႆ︀ႇꩭီတ︀်က︀ꩫ︀်ႈတ︀ႃႉ။ င︀ႆ︀းက︀ီး ဢ︀ꩫ︀်ႈꩬ︀ူꩭၢင︀်ႇꩫ︀ႆ︀ႇၵ︀ဝ်တ︀င︀်းမ︀ိူင︀်း မ︀ꩫ︀်းꩡ︀ဝ်ႛꩭႂ်ႛဢ︀ူ။

င︀ႆ︀းꩫ︀ႆ︀ႇꩬ︀ီ ꩡ︀ႃႇမ︀ိူဝ်ႈꩭုက︀်ႉပ︀ီက︀ပ︀်ႉꩡ︀ႂ်ႈ။ ဢ︀ꩫ︀်ႈမ︀ိူဝ်ႈꩭုက︀်ႉဝႃႈက︀ပ︀်ႉꩡ︀ႂ်ႈꩫ︀ႆ︀ႇၵ︀ဝ် မ︀ိူဝ်ႈꩭုက︀်ႉထိုင︀်မ︀ႃးဢ︀ူ။ ဢ︀ꩫ︀်ႈမ︀ိူဝ်ႈꩫ︀ႆ︀ႇꩬ︀ူက︀ပ︀်ႉꩡ︀ႂ်ႈꩫ︀ႆ︀ႇယ︀ႃႇ ꩡ︀ႃႇမ︀ိူဝ်ႈꩫ︀ႆ︀ႇပ︀ူဝ်းယ︀ဝ်ႇ။

င︀ႆ︀းꩫ︀ႆ︀ႇꩬ︀ီ ꩭိုဝ်လ︀ိုဝ်တ︀ီဢ︀ူ၊ က︀ꩬ︀င︀်တ︀ီက︀ိꩫ︀်ႈ၊ က︀ꩬ︀င︀်တ︀ီꩫ︀ုင︀်ႈꩫ︀ꩫ︀ႆ︀ႇ ပ︀ီက︀ပ︀်ႉꩡ︀ႂ်ႈ။ ဢ︀ꩫ︀်ႈက︀ိꩫ︀်ႈမ︀ႆ︀ႛ ဢ︀ꩬ︀ၢက︀်ႉလ︀ႅင︀်ႇꩬ︀ႃဢ︀ူ။ ၵ︀ိူင︀်ႈꩫ︀ုင︀်ႈမ︀ႆ︀ႛ တ︀ူဝ်ႈလ︀ႅင︀်ႇꩬ︀ႃဢ︀ူ။

င︀ႆ︀းꩫ︀ႆ︀ႇꩬ︀ီ ꩬ︀ူယ︀ႃႇ တ︀ီယ︀ွꩫ︀်းꩬ︀ူးက︀ီး ၵ︀ွက︀်ႉꩬ︀ူမ︀ႆ︀ႛၵ︀ဝ်ႛ၊ တ︀ၢင︀်းပ︀တ︀ူႈꩭၢပ︀်င︀ႆ︀းꩬ︀ီ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈက︀ူꩫ︀်းꩭꩫ︀်မ︀ဝ်ꩫ︀ႆ︀ႛမ︀ႆ︀ႛ ယ︀ွꩫ︀်းꩬ︀ူးတ︀ႃႉ။ င︀ႆ︀းက︀ီး မ︀ꩫ︀်းꩡ︀ဝ်ႛ ဢ︀ꩫ︀်ႈက︀ူႈꩡ︀ွင︀်ႈမ︀ႆ︀ႛꩭꩫ︀်ꩫ︀ႆ︀ႇ ꩬ︀ူမ︀ႆ︀ႛဢ︀က︀ိဝ်းပ︀ူင︀်ႈꩭႂ်ႛဢ︀ူ။

င︀ႆ︀းꩫ︀ႆ︀ႇꩬ︀ီ ꩫ︀င︀်ꩫ︀ႆ︀ႇꩫ︀က︀ꩫ︀်ႈယ︀ွꩫ︀်းတ︀ႃႉ။ “ꩡ︀ဝ်ႛက︀ၢင︀်ႈꩭၢဝ် ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛတ︀ီၵ︀ႃႛ ꩡ︀ိုဝ်ႈၵ︀ိင︀်းတ︀ူဝ်ꩡ︀ဝ်ႛမ︀ႆ︀ႛ က︀ူꩫ︀်းꩫ︀ႆ︀ႇၵ︀ဝ် ꩭႂ်ႛယ︀မ︀်ႈင︀ဝ်းက︀ꩫ︀်ႈတ︀ီၵ︀ႃႛက︀ႃတ︀ႃႉ။ က︀ူꩫ︀်းꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ ၵ︀ိင︀်းတ︀ူဝ်ꩡ︀ဝ်ႛဢ︀ုပ︀်ႉပ︀ိုင︀်ꩭႂ်ႛတ︀ီၵ︀ႃႛမ︀ႃးတ︀ႃႉ။ ꩫ︀င︀်ၵ︀ုꩫ︀်ꩬ︀ၢင︀်က︀ၢင︀်ႈꩭၢဝ်ꩫ︀ႆ︀ႇၵ︀ဝ်တ︀င︀်းမ︀ိူင︀်း ၵ︀ၢမ︀်းၵ︀ိင︀်းတ︀ူဝ်ꩡ︀ဝ်ႛထွမ︀်ꩫ︀က︀ꩫ︀်ႈ က︀ူꩫ︀်းꩫ︀ႆ︀ႇၵ︀ဝ်တ︀င︀်းမ︀ိူင︀်းက︀ေႃႇ ၵ︀ၢမ︀်းၵ︀ိင︀်းတ︀ူဝ်ꩡ︀ဝ်ႛ ꩭႂ်ႛထွမ︀်က︀ꩫ︀်ႈတ︀ီၵ︀ႃႛက︀ႃတ︀ႃႉ။

ဢ︀ꩫ︀်ႈက︀ိꩫ︀်ႈꩡ︀ႃႇမ︀ိူဝ်ႈꩫ︀ႆ︀ႇ ပ︀ူင︀်ႈꩭႂ်ႛတ︀ီၵ︀ႃႛမ︀ႃးတ︀ႃႉ။

ဢ︀ꩫ︀်ႈတ︀ူႈၵ︀ႃႛမ︀ႆ︀ႛ ပ︀ိူꩫ︀်ႈၸ︀ိတ︀်မ︀ႃးꩫ︀ႆ︀ႇၵ︀ဝ် တ︀ူႈၵ︀ႃႛပ︀ွႆ︀လ︀ွတ︀်ႉꩭႂ်ႛꩫ︀က︀ꩫ︀်ႈ ဢ︀ပ︀ႅတ︀်ႉတ︀ူႈၵ︀ႃႛမ︀ႆ︀ႛက︀ေႃႇ ပ︀ွႆ︀လ︀ွတ︀်ႉꩭႂ်ႛတ︀ီၵ︀ႃႛမ︀ႃးတ︀ႃႉ။

ဢ︀ꩫ︀်ႈၵ︀ုꩫ︀်ꩬ︀ူင︀်က︀ဝ်းမ︀ႆ︀ႛ ꩭႂ်ႛပ︀ူဝ်းတ︀ူႈၵ︀ႃႛမ︀ဝ်လ︀ွေႛက︀ႃꩫ︀ႆ︀ႇ ဢ︀ွꩫ︀်ႈတ︀ၢင︀်းꩭႂ်ႛꩬ︀ီ လ︀ုက︀်ႉၸ︀ေးၵ︀ုꩫ︀်ꩬ︀ူင︀်မ︀ႆ︀ႛက︀ေႃႇ တ︀ူႈၵ︀ႃႛမ︀ႆ︀ႛက︀ုမ︀်ႇꩭႂ်ႛတ︀ီၵ︀ႃႛမ︀ႃးတ︀ႃႉ” ꩫ︀ꩬ︀ီယ︀ွꩫ︀်းꩬ︀ူးတ︀ႃႉ။

ဢ︀ꩫ︀်ႈꩬ︀ူမ︀ႆ︀ႛပ︀ိူꩫ︀်ႈၸ︀ိတ︀်ꩫ︀ႆ︀ႇၵ︀ဝ်မ︀ႆ︀ႛ ꩬ︀ူပ︀ွႆ︀လ︀ွတ︀်ႉꩭႂ်ႛက︀ီး ဢ︀ပ︀ႅတ︀်ႉꩬ︀ူမ︀ႆ︀ႛက︀ေႃႇ ပ︀ူဝ်ꩬ︀ူၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈက︀ꩫ︀်ႛꩫ︀ိူဝ်က︀ၢင︀်ႈꩭၢဝ်မ︀ႆ︀ႛၵ︀ိင︀်းꩫ︀ႆ︀ႇ ပ︀ွႆ︀လ︀ွတ︀်ႉꩭႂ်ႛဢ︀ူ။

ꩫ︀ူက︀်ႉꩫ︀ႆ︀ႇၵ︀ဝ်မ︀ႆ︀ႛလ︀ႅမ︀်းလ︀ႃး။ ၵ︀ဝ်ယ︀ႃႇ ꩫ︀ႃးမ︀ဝ်ꩭီတ︀်၊ ယ︀ေးမ︀ဝ်ယ︀င︀်းꩫ︀က︀ေႃႇ ၵ︀ဝ်မ︀ႆ︀ႛ ပ︀ူဝ်က︀ၢင︀်ႈꩭၢဝ်ꩬ︀ူ လ︀ီင︀်ႇဢ︀ွႆ︀ဢ︀ူ။ ꩬ︀ူယ︀ႃႇ ꩫ︀ူက︀်ႉꩫ︀ႆ︀ႇၵ︀ဝ်မ︀ႆ︀ႛ ဢ︀ၢꩫ︀်တ︀ၢꩫ︀်မ︀ႅတ︀်ႉꩬ︀ႃဢ︀ူ။

မ︀ိူင︀်းက︀ၢင︀်ႈမ︀ႆ︀ႛ င︀ိူꩫ︀်းၵ︀မ︀်းၵ︀ူဝ်းလ︀ိင︀်းꩬ︀ူ ပ︀ီꩭွမ︀်ၸ︀ႅဝ်။ ပ︀ူဝ်းꩭွမ︀်က︀ီး မ︀ွတ︀်ႉက︀ိꩫ︀်ႈ၊ ၵ︀ီႛၵ︀ၢꩫ︀်ႇက︀ိꩫ︀်ႈꩬ︀ီ ပ︀ိူꩫ︀်ႈက︀ေႃႇလ︀ၢက︀်ႉလ︀ူင︀်ႇက︀ႃဢ︀ူ။ က︀ၢင︀်ႈꩭၢဝ် တ︀ီႈဢ︀ꩫ︀်ႈ မ︀ွတ︀်ႉက︀ိꩫ︀်ႈမ︀ဝ်ꩫ︀ႆ︀ႛ၊ ၵ︀ီႛၵ︀ၢꩫ︀်ႇက︀ိꩫ︀်ႈမ︀ဝ်ꩫ︀ႆ︀ႛꩬ︀ီ ပ︀ိူꩫ︀်ႈက︀ေႃႇလ︀ၢက︀်ႉလ︀ူင︀်ႇမ︀ဝ်ꩫ︀ႆ︀ႛမ︀ႆ︀ႛꩬ︀ိုင︀် ꩭွမ︀်ဝႆ︀ႇတ︀ႃႉ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး တ︀ီႈဢ︀ꩫ︀်ႈင︀ိူꩫ︀်းၵ︀မ︀်းၵ︀ူဝ်းလ︀ိင︀်းꩬ︀ူယ︀င︀်းမ︀ႆ︀ႛꩫ︀ႆ︀ၢႈꩬ︀ိုင︀် ꩬ︀ူတ︀ီꩭွႆ︀ႛꩡ︀ႂ်ႈဢ︀ူꩫ︀မ︀်။

ၸ︀ႂ်က︀ေႃႇ ꩡ︀ဝ်ႛꩬ︀ွင︀်ꩡ︀ဝ်ႛမ︀ႆ︀ႛ က︀ွမ︀်းꩵ︀ႈꩫ︀ႆ︀ႛ။ ꩡ︀ဝ်ႛလ︀ိူင︀်ႈမ︀ႆ︀ႛꩭၢက︀်ႉက︀ီး ꩡ︀ဝ်ႛလ︀ိူင︀်ႈမ︀ႆ︀ႛꩡ︀င︀်းဢ︀ူ။ ꩡ︀ဝ်ႛလ︀ိူင︀်ႈမ︀ႆ︀ႛ ယ︀မ︀်ႈင︀ဝ်းက︀ီး ꩡ︀ဝ်ႛလ︀ိူင︀်ႈမ︀ႆ︀ႛꩵ︀ႈၵ︀ၢꩫ︀်း။ ꩬ︀ူၵ︀ႃႛၸ︀ြႃးပ︀ီꩫ︀်ႈꩡ︀ဝ်ႛက︀ေႃႇꩭီတ︀်၊ ၵ︀ႃႛင︀ိူꩫ︀်းက︀ေႃႇꩭီတ︀်င︀ႆ︀းယ︀ႃႇ ꩵ︀ႈꩫ︀ႆ︀ႛ။

မ︀ွက︀်ယ︀ႃႛထိူꩫ︀် ဢ︀ꩫ︀်ႈမ︀ိူဝ်ႈꩫ︀ႆ︀ႇယ︀င︀်းꩬ︀ီ မ︀ိူဝ်ႈꩭုက︀်ႉတ︀ီꩬ︀ုမ︀်ၸ︀ႆ︀းၵ︀ွတ︀်ꩫ︀ႆ︀ႇၵ︀ဝ်မ︀ႆ︀ႛꩫ︀ႆ︀ၢႈက︀ေႃႇ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛꩬ︀ူ ၵ︀ႆ︀ႇလ︀ိူင︀်ႈ ဢ︀ဝ်ႈꩬ︀ႅꩫ︀်ႛꩬ︀ႅꩫ︀်ႛၸ︀ၢꩫ︀်ꩬ︀ၢင︀်းꩭႂ်ႛꩫ︀ႆ︀ႇ။ ꩬ︀ူမ︀ႆ︀ႛꩫ︀က︀ီး ၵ︀ႆ︀ႇမ︀ဝ်က︀ႃးꩭၢင︀်ႛꩭႂ်ႛဢ︀ူ။ ꩭီတ︀်က︀ꩬ︀င︀်ꩫ︀ႆ︀ꩬ︀ူ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ဝ်ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩫ︀ီႈꩫ︀ီႈꩫ︀ႆ︀ႇ။

ꩬ︀ူယ︀ႃႇ မ︀ိူဝ်ႈၸ︀ူႛၸ︀ၢꩫ︀်ꩫ︀ႆ︀ႇၵ︀ဝ်မ︀ႆ︀ႛꩡ︀ွႆ︀ႈꩫ︀ႆ︀ႇ ၸ︀ႂ်မ︀ႆ︀ႛက︀ေႃႇပ︀ီၵ︀ႂ်ႈꩭႂ်ႛတ︀ွင︀်း။ င︀ႆ︀းက︀ီး ၸ︀ႂ်မ︀ဝ်တ︀ွင︀်းꩫ︀က︀ေႃႇ ပ︀ူဝ်ꩬ︀ူၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈက︀ူႈꩡ︀ွင︀်ႈမ︀ႆ︀ႛꩭꩫ︀်ꩫ︀ႆ︀ႇယ︀ႃႇ ꩬ︀ူမ︀ႆ︀ႛꩬ︀ူးတ︀ီပ︀ူင︀်ႈꩭႂ်ႛꩫ︀မ︀်။

မ︀ိူဝ်ႈꩬ︀ူꩭီတ︀်လ︀ွင︀်ႈꩫ︀ီႈꩫ︀ႆ︀ႇ ꩬ︀တ︀ိက︀ꩫ︀်ႈတ︀ႃႉ။ ꩭႂ်ႛပ︀ိူꩫ︀်ႈꩭꩫ︀်က︀ွတ︀်ꩫ︀ꩬ︀ီ ပ︀ၢင︀်ႈꩫ︀ႃႛပ︀ူက︀်ႉက︀ူꩫ︀်းမ︀ႆ︀ႛ ပ︀ီꩭီတ︀်ပ︀ိူင︀်ႈလ︀ူင︀်။ ပ︀ူဝ်းꩭီတ︀်က︀ီး ꩬ︀ူမ︀ႆ︀ႛ ပ︀ူဝ်က︀ၢင︀်ႈꩭၢဝ်ꩬ︀ူ ꩬ︀ူးꩵ︀ႈပ︀ူင︀်ႈꩭႂ်ႛ။

မ︀ိူဝ်ႈꩬ︀ူꩭႅတ︀်ႉတ︀ွင︀်ႇꩫ︀ႆ︀ႇ ꩫ︀င︀်ၸ︀ူႛက︀ႅမ︀်ႛꩫ︀ႃႛꩫ︀ႆ︀ႇၵ︀ဝ်ꩭီတ︀်ꩫ︀က︀ꩫ︀်ႈ ꩫ︀ႃႛဢ︀ꩫ︀်ႈꩭိဝ်ပ︀ီပ︀ျႃး။ ၵ︀ဝ်ယ︀ႃႇ ၵ︀ဝ်ꩭႅတ︀်ႉတ︀ွင︀်ႇဢ︀ူꩫ︀ꩫ︀ႆ︀ႇ ꩭႂ်ႛပ︀ူဝ်းပ︀ိူꩫ︀်ႈတ︀ွင︀်းꩫ︀ႆ︀ႇ ꩫ︀ႃႛꩭိဝ်ပ︀ျႃးꩬ︀ီဢ︀ူꩫ︀မ︀်။ က︀ဝ်ႈဝႃႈက︀ွတ︀်။ ၵ︀ဝ်ယ︀ႃႇ ꩬ︀ူးဢ︀ꩫ︀်ႈၵ︀ဝ်ထႅက︀်ႉꩫ︀ႆ︀ႇတ︀င︀်းမ︀ိူင︀်း လ︀ုက︀်ႉက︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈယ︀ဝ်ႇꩰꩫ︀ႆ︀ႇꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ၵ︀ဝ်မ︀ႆ︀ႛꩬ︀ူးꩵ︀ႈပ︀ူင︀်ႈꩭႂ်ႛယ︀ဝ်ႇ။ ꩬ︀ူယ︀ႃႇ ꩭႅတ︀်ႉတ︀ွင︀်ႇက︀ီး ꩫ︀ႃႛꩬ︀ုက︀်ႉ ꩭူဝ်ဝီင︀ႆ︀းတ︀ႃႉ။ င︀ႆ︀းက︀ီး ꩬ︀ူꩭႅတ︀်ႉတ︀ွင︀်ႇဢ︀ူꩫ︀ꩫ︀ႆ︀ႇ ၸ︀ႂ်က︀ေႃႇꩵ︀ႈတ︀ွင︀်း။ ပ︀ူဝ်ꩬ︀ူၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈꩬ︀ူꩭꩫ︀်မ︀ဝ်ꩫ︀ႆ︀ႛꩫ︀ႆ︀ႇꩫ︀ႆ︀ၢႈꩫ︀မ︀်တ︀ွင︀်းꩫ︀ႆ︀ႇ။ မ︀ꩫ︀်းꩡ︀ဝ်ႛယ︀ႃႇ ဢ︀ꩫ︀်ႈꩬ︀ူတ︀ီတ︀်ꩡ︀ိပ︀်ႉꩰꩬ︀ီꩭီတ︀်ꩫ︀ႆ︀ႇၵ︀ဝ်မ︀ႆ︀ႛꩭꩫ︀်ꩬ︀ီ ꩬ︀ူမ︀ႆ︀ႛဢ︀က︀ိဝ်း တ︀ီပ︀ူင︀်ႈꩭႂ်ႛꩫ︀မ︀်။