उत्पत्ती 6
6
रागी ब्वाक्कुम सुम्शो
1मिनु नोले रागीमी मुर शुश दुम्मा बाक्त। मेकोपुकीमी शुश तमी थीमा बाक्त। 2मिनु परमप्रभु आ तौपुकीमी मुर आन तमी आन कली तशा “दारशो बाक्नीम” दे मिम्तमे बाक्त। मिनु मेको आन दाते रे योव़शा चाक्ग्मे बाक्त। अय्युब १:६; २पत्रुस २:४; यहूदा ६ 3मिनु परमप्रभु यावेमी “आं सोक्त मुर आन कली शुश बर्स बाक्चा मगेनुङ। मुर बेक्चा माल्नीम। आन ब्रोंइतीक सहे का २० बर्स ला दुम्ब” देंमाक्त।
परमप्रभु आ थुं मनुशो
4मेना रागीमी नेफीलीम माइश्शो थम लाइश्शो मुरपुकी बाक्शो बाक्मा बाक्त। मिनु नोले परमप्रभु आ तौपुकीमी रागी ङा तमी आन कली चाक्शा, आल थीमे बाक्त। मेको बोल्यो नु ठेयब लडाइ पाइब मुर दुम्मा बाक्त। इजीकीएल ३२:२७
5मिनु परमप्रभु यावेमी “रागीम बाक्शो मुर आं अरेशो मटीब नु मरिम्शो पाइब ला बाक्नीम। मार मिम्ताक्म हना यो, मरिम्शो बाक्त” दे मिम्ता बाक्त। उत्पत्ती ८:२१ 6मिनु परमप्रभु यावेमी आंम सेल्शो मुर आन कली तशा, शुश आ थुं मनुथु बाक्शो बाक्माक्त। १सामुएल १५:११-३५; येरमीया १८:७-१० 7मिनु परमप्रभु यावेमी “आं सेल्शो मुर आन कली रागी रे क्याम्नुङ। मुर नु जन्तु नेल्ल क्याम्नुङ। खपीम ग्रेशा गाक्ब आइक्च जन्तु नु सरीङम बेरब चिक्ब यो क्याम्नुङ। मारदे हना गो मेको आन कली सेल्शा यो, आं थुं मनुङ” दे मिम्ता बाक्त। गन्ती २३:१९; रोमी ३:३-४; २तिमोथी २:१३ 8मिनु परमप्रभु यावेमी नोआह तवानु, मेको कली दाक्ता बाक्त। हिब्रू ११:७
नोआह नु आ तौ
9नोआह आ तौ सां बाक्मा बाक्त। नोआह शुश रिम्शो मुर बाक्माक्त। मुर नेल्लेमी “ठीक पाइब दोस मताइब मुर बाक्ब” दे तुइक्तमे बाक्त। नोआह परमप्रभु नु गाक्बाक्माक्त। उत्पत्ती ५:२२ 10मिनु नोआह आ तौ सां आन नें शेम, हाम नु यफेथ बाक्मा बाक्त।
11परमप्रभुमी मुर आन कली कोव़ङानु, नेल्ल मरिम्शो बाक्मा बाक्त। रागी नेल्ल हुश ख्राक्श पोक्तीकेमी ब्रीमाक्त। अर्को मरिम्शो पाइब यो बाक्मा बाक्त। 12मिनु परमप्रभुमी रागीम बाक्ब मुर आन कली कोव़ङानु, शुश मरिम्शो बाक्मा बाक्त। मुर नेल्लेमी आन दला दाक्स पामे बाक्त। भजन संग्रह १४:२-३ 13मिनु परमप्रभुमी नोआह कली “गो मुर नेल्ल आन कली क्याम्नुङमी। मारदे हना मेको आन पर्बम रागी हुश ख्राक्श पोक्तीकेमी ब्रीत। मुर नु रागी नेल्ल आन कली क्याम्नुङ। आमोस ८:२ 14गे चहिं खिं खोदेंशो पा शी के ठेयब डोंगा का सेलो। मिनु आगामी कोठापुकी सेलो। ब्वाक्कु मओव़चा ङा पा आगा नु लाङगा अल्कत्राम सिल्दो” दे नोआह कली देंमाक्त।
नोआहमी परमप्रभु कली टिशो
15मिनु परमप्रभुमी “डोंगा दोपा सेल्चा माल्नेवे देंशा हना, मेको आ लाइश्शो सहे सां कुबीत दुम्चा माल्ब। आ ब्रेम्शो ५० कुबीत दुम्चा माल्ब। आ ग्येत्थ लाइश्शो ३० कुबीत दुम्चा माल्ब। कुबीत का ०.५ मिटर खोदेंशो बाक्ब। 16मिनु छाना रे हात का प्रोंइशा, फश ग्रूतीक बोखा का सेल्चा माल्नेवे। मिनु का पटटीम लाप्चो का वोइक्चा माल्नेवे। आगामी खप तला का, दाते तला का नु तला तारी बाक्तीक का सेल्चा माल्नेवे। 17आं देंशो रिम्शो पावो। मारदे हना गो मारेइ मारेइ साइक्चा कली रागी ब्वाक्कुम प्रिंनुङ। रागीम मार मार सेस बाक्मा, मेको नेल्ल बेक्चा माल्नीम। 18तन्न गो इन कली कोव़नुङ, गे नु आं कबल पाइनुङ। मिनु गे, इ तौपुकी, इ मीश, नु इ चाइमीपुकी मेको डोंगामी ओव़चा माल्नीनी। मेको नेल्ल गे नु ब्रोंइचा माल्नीम। मेको पोथी भाले, बी ब्यफ नेल्ल निक्निक्शी बाक्चा माल्नीम। उत्पत्ती ९:९ 19गेपुकी नु मारेइ मारेइ सेस जन्तु निक्निक्शी ओव़चा माल्नीम। 20मारेइ मारेइ चिक्ब, मारेइ मारेइ जन्तु नु मारेइ मारेइ खपीम ग्रेशा गाक्ब आइक्च जन्तु निक्निक्शी ब्रोंइचा, दे गे नु डोंगामी ओव़शा, बाक्चा माल्नीम। 21मिनु इन कली, मार मार जचा ब्वचा ओंइशा, उप्शा वोतो। मेको इन कली नु मेको आन कली जचा थोव़क दुम्ब” दे परमप्रभुमी नोआह कली अरेवा बाक्त। 22मिनु परमप्रभुमी मार मार मदा, नोआहमी नेल्ल टिशा, पवा बाक्त। हिब्रू ११:७
© 2011, Wycliffe Bible Translators, Inc. All rights reserved.