Mateo 8
8
Jeso yovegairira vesegasenari
(Mr 1.40-45; Ir 5.12-16)
1Impogini yanonkaara Jeso ipokaira, yogiaigapaakeri tovaini matsigenkaegi. 2Ikenapaake paniro vesegasenari itigeroaventapaakari ikantiri:
—Notinkamii, nokogavetaka povegaenara, kantankicha impatyora viro tyarika pinkante.
3Yogari Jeso yakontsaanake itsagatakeri ikantiri:
—Jeeje, nokogake, ¡maika veganaempa!
Irorotyo ikantakerira ogatyo ikenake yoveganaa yovesegavetakara. 4Impo ikantavakeri Jeso:
—Gara tyani pikamantumati. Inti piatimotake saserorote pokotagakemparira ontiri aikiro pamagetanakenerira piratsipage pintsatagakerora ikantakerira Moiseshi kameti ineasanotakempiniri ovashi inkantakempi vegaavi irogoigakempiniri maganiro vegasanotaavi.#Ire 14.1-22
Jeso yovegairira iromperane itinkamiegi soraroegi
(Ir 7.1-10)
5Impogini iatanake Jeso Kaperenaoku. Iroro yogonketapaakara ineiri ikenapaake paniro iromano. Irirori inti itinkamiegi soraroegi. Impo ikantapaakeri:
6—Notinkami, imantsigavagetanake nomperane aiño inoriaka anta novankoku. Ishinkogisevagetanaka yatsipereavagetaketyo kara.
7Ikantiri Jeso:
—Iroroventi noatake novegaerira.
8Inianake itinkamiegi soraroegi ikanti:
—Notinkami, garorokari pikiimatiro novanko, nogotaketari vinti gaveavagetatsirira. Piniimatakera intagatityo irovegantanaempa nomperane. 9Kañotari naro itimavetari peraiganarira, akyari itimi nashi nomperaneegi. Tyarikara nonintake nontigankakerira ikematsatakenatyo iatake. Pashinikya nokaemirira ipokake. Aikiro aiño pashini tatarika nomperatakari ikematsatakenatyo.
10Iroro ikemavakerira Jeso ikantakera maika yoganaketyo kavako ikantaigiri giaigapaakeririra:
—Arisanotyo nonkantasanoigakempi teratyo noneimageteri paniro Iseraerekunirira inkañotakemparira yoka iromano yogotasanotakera nagaveavagetira. 11Impogini irapatoitaigakerira Tasorintsi maganiro kematsaigiririra impegakempara Igoveenkariegite iripokaigake pashini tovaini terira iriroegi jorioegi imponiageigamatempatyo samani parikotipageku. Imponiageigamatempatyo oatakara ikontetira poreatsiri, pashini imponiageigamatempatyo iatira poreatsiri intentaigakemparira Averan, Isaako intiri Jakovo isekataigakempara, 12kantankicha yogaegiri jorioegi ikogavetakarira Tasorintsi intentaigakemparimera garatyo itentaigari, onti intigankaigakeri parikoti apavatsaasevagetara. Antari anta inkantakani iriraguntevageigakempa inkaemavavageigaketyo kara iratsikagisevageiganakerotyo irai.
13Impo ishonkashitari itinkamiegi soraroegi ikantiri:
—Maika piatae pivankoku, pogotaketari nagaveakera novegaerira pomperane, maika irovegaempatyo.
Iroro iniakera Jeso ogatyo ikenake yoveganaa.
Jeso yovegairora yagashintotirira Perero
(Mr 1.29-31; Ir 4.38-39)
14Impogini iatake Jeso ivankoku Perero ineapaakero yagashintotirira mantsigatake noriaka oanativagetakera. 15Itsagatapaakero akoku ogatyo okenake opeganaka oanatire ovashi otinaanaa opakoigakeri isekataigakempara.
Jeso yovegaigakerira tovaini mantsigaigankitsirira
(Mr 1.32-34; Ir 4.40-41)
16Impogini ochapinitanakera yamaigapaakeneri Jeso tovaini itimaguigakerira kamagarini. Irorotyo iniakera Jeso oga ikenaigake kamagarinipage iokaiganairi itimaguigavetakarira iaigaira parikoti. Aikiro yamaigapaakeneri tovaini mantsigaigankitsirira, yovegageigairi maganiro. 17Ariotari ikantakeri pairani kamantantatsirira Isaiashi ikamantakotakerira ikantakera: “Yatsipereaventaigakaira akañovageigara, aikiro yovegaigakaira amantsigaigakera.”
Kogaigavetankicharira irogiaiganakerimera Jeso
(Ir 9.57-62)
18Antari ineaigakerira Jeso yapatoventaiganakarira tovaini matsigenkaegi ikantaigiri irogamereegi:
—Tsame amonteaiganakera intati.
19Impo ikenapaake gotagantirorira itsirinkakotanakerira Moiseshi ikantiri Jeso:
—Gotagantatsirira, nokogake nonkantakanira nogiavagetakempi.
20Ikanti Jeso:
—Yogari etini aityo ikiantarira. Ario ikañoigaka tsimeripage irirori aityo imagantaigarira, kantankicha yogari Kañotasanotakaririra Matsigenka teratyo ontime ivanko irimagantakemparira.
21Impogini inianake paniro irogamere ikanti:
—Notinkami, nokogavetaka nogiatanakempimera, kantankicha aiñokyatari apa gatata nopoki. Antari inkamanaera nonkitatanaerira, ario pinkante nompokake nonkantakanira nogiavagetanakempi.
22Ikanti Jeso:
—Giavagetenatyo maika. Yogari igamagapage kantetyo inkitaigaerira terira inkematsaigeri Tasorintsi.
Okematsatakerira Jeso tampia ontiri inkaare
(Mr 4.35-41; Ir 8.22-25)
23Impo yomatetanaka Jeso pitotsiku itentaiganaari irogamereegi iriaigaera intati. 24Osamanitanakera otampiamatanaketyo omaranerikatyo tampia kara jiriririri ogatyo okenake ovoresekantanake inkaare osagusagutanakerotyo pitotsi. Yogari Jeso magasevagetake. 25Itsarogaiganake irogamereegi yogireaigutarityo ikantaigiri:
—¡Notinkamii, tainakario atake atsitigakoiganake!
26Irirori ikantaigiri:
—¿Antari gara pitsarogaigi? ¡Tekya pogotasanoigero yagaveavagetira Tasorintsi!
Itinaamatanakatyo inianakerora tampia ikantiro:
—¡Peganaempa, intaga pitampiati!
Iniiro aikiro inkaare ikantiro:
—¡Maireatanae!
Ogatyo okenake opeganaa tampia, ario okañotaka inkaare irorori omaireatanai.
27Iriroegi yogavageiganaketyo kavako ikantaiganakera:
—¿Tyanimpatyora yoga, nerotyo okematsagematanakerira tampia irorori ontiri inkaare?
Jeso yoneaganontaigaarira itimaguigakerira kamagarinipage
(Mr 5.1-20; Ir 8.26-39)
28Antari yogonketapaakara Jeso intati Gararaku ikenaigapaake piteni matsigenka itimaguigakerira kamagarini. Iriroegi onti iponiaigapaaka imperitanakiku yogantaganirira igamaga. Isurarivageigiratyo kara ipinkasanovageigunkani, teratyo tyani kenantumatemparone avotsi atacharira inaigakera. 29Impo ineaigavakerira Jeso ikaemavaitanake ikantaigiri:
—¡Eeee! ¡Jeso, Itomi Tasorintsi, arionena gara tyara pikantaigana! ¿Iroro pipokashitake pantsipereakagaigakenara maika tekyaenkara agumatempa nantsipereantaigakemparira?
30Ario inaigake kara shintori isekatavageigakara itovaigavagetiratyo kara. 31Impogini yogari kamagarini timaguigakeririra inianiaiganakeri Jeso ikantaigiri:
—Poneagaigakenarika onti pintigankaigakena nontimaguigakerira shintori.
32Ikanti Jeso:
—Nanityo piaige.
Igenanekyatyo ikonteigapanuti iokaiganairi itimaguigavetakarira irirokya iatashiigavetaka shintori. Iroro itimaguigavetapaakarira ogatyo ikenaigake ishigaiganaka otseraaku yanonkaiganaka iokaavioigaka pokorom pokorom pokorom, ipogereaigakatyo maganiro. 33Iroro ineaigavakerira sentaigiririra itsarogavageiganaketyo kara ishigaiganaka iaigai itimaigira ikamantageigapaakeri itovaireegi iokajaigakara shintori. Aikiro ikamantaigapaakeri tyara ikantaiganaka itimaguigavetakarira kamagarinipage. 34Ikemaigutatyo iriroegi iaigake anta inakera Jeso ikantaigapaakeri:
—Nokogaigavetaka piataera parikoti.
© 2008, Wycliffe Bible Translators, Inc. All rights reserved.