Génesis 12
12
Yawtebꞌal Naj Abram Yu Jehová
1Ey jun cꞌual jix yal Jehová tet naj Abram jaxca tiꞌ: Bꞌejcan ja txꞌotxꞌ cꞌal masanil jantaj ebꞌ ja wican, cꞌal ebꞌ caan bꞌey sna naj ja mam, catuꞌ chach too bꞌey jun txꞌotxꞌ oj jin txꞌox ey jaach. 2Jaꞌ ebꞌ ja wicꞌaal oj oc yin miman conobꞌal wu, catuꞌ oj jin txꞌoxon jin watxꞌcꞌulal ey jaach. Yel xacꞌal miman oj yun ja bꞌinai; ja wu yuxan oj ẍaꞌ syaaxilal ebꞌ ánima. 3Oj wakꞌ syaaxilal yibꞌan ebꞌ watxꞌ oj yute scꞌul ja win, jal ebꞌ pena oj yute snaꞌbꞌal ja win, oj watej sjowal jin cꞌul yibꞌan ebꞌ. Ja wu cꞌal yuxan oj watej syaaxilal yibꞌan masanil ebꞌ ánima bꞌey yul yibꞌankꞌinal tiꞌ, ẍi Jehová.
4Jix lawi tuꞌ, jix el naj Abram bꞌey txꞌotxꞌ Harán tuꞌ jaxca jix yun yalon Jehová tet. Eyxa 75 abꞌil skꞌinal Abram yet jix too naj bꞌey txꞌotxꞌ Canaán. 5Jix yiꞌontoj yistil Abram tuꞌ, jaꞌton ix Sarai, yetoj naj Lot, scꞌaal camom yuẍtaj, yetoj jantaj ebꞌ ẍejabꞌ cꞌal yetoj jantaj tzet ey yul skꞌabꞌ yet jix ecꞌ bꞌey Harán. Queytuꞌ jix yun yapni oc bꞌey txꞌotxꞌ Canaán. 6Jaꞌ yet jun tiempoal tuꞌ, caan tocꞌal ecꞌ ebꞌ Cananeo bꞌey txꞌotxꞌ Canaán. Jaꞌ Abram jix bꞌey cꞌal stoo sattaj, masantaꞌcꞌal jix apni oc naj bꞌey Siquem, bꞌey ey teꞌ jii yul yet Moré, jaꞌton teꞌ xaan yili yu ebꞌ Cananeo yet jun tiempoal tuꞌ. 7Jaꞌ tituꞌ jix xꞌox sbꞌa Jehová tet naj Abram, jix yalon tet jaxca tiꞌ: Jaꞌ jun txꞌotxꞌ tiꞌ oj wakꞌ masanil tet ebꞌ ja wicꞌaal, ẍi Jehová tet.
Jix lawi tuꞌ, jix waꞌnele a jun yet xaambꞌal sattaj Jehová yu naj Abram tuꞌ, yutol jaꞌ tituꞌ jix xꞌox sbꞌa Jehová tet. 8Jix lawi tuꞌ, catuꞌ jix too sjolomlaj wonan, snan xol conobꞌ Betel yetoj conobꞌ Ai. Jaꞌ tituꞌ jix caey ecꞌoj. Jaꞌ conobꞌ Betel tuꞌ, jatuꞌ ey yetcꞌulal bꞌey chi too cꞌu. Jaꞌ tituꞌ jix swaꞌne a junxa yet xaambꞌal yet chi oc yin eyilal tet Jehová. 9Jix lawi tuꞌ, cꞌuancꞌulal cꞌal jix bꞌey stoo Abram masantaꞌcꞌal jix apni oc bꞌey txꞌotxꞌ Négueb.
Jix Too Naj Abram Bꞌey Egipto
10Jaꞌton yet jun tiempoal tuꞌ, jix yakꞌ jun miman wail yibꞌan masanil ánima bꞌey yul yet Canaán tuꞌ. Yuxan jix too Abram caey junoj tiempoal bꞌey Egipto, yutol ey loꞌbꞌe tituꞌ. 11Jaꞌ yet tuxa chi apni oc naj bꞌey txꞌotxꞌ Egipto, jix yalon tet Sarai jaxca tiꞌ: Jaach wistil ey wal jun tzet chin naꞌ an, jaach tiꞌ caw sakꞌal ja wili ocoj. 12Jaꞌ yet oj yilon ebꞌ naj a Egipto tiꞌ, oj mi yal ebꞌ naj jaxca tiꞌ: Jaꞌ jun ix tiꞌ yistil jun winaj tiꞌ, ẍimla ebꞌ naj. Tala chi snaꞌa ebꞌ naj jin smakꞌon camoj, jal jaach tiꞌ xin cꞌam tzet oj jaach yute ebꞌ, asan tol oj jaach can yetoj ebꞌ. 13Yu jun tuꞌ xin, jaꞌ yet oj skꞌanlen ebꞌ naj ey jaach, oj ja walaꞌ tol wanabꞌ jaach an, yet watxꞌ oj tzala ebꞌ wetoj an, yuxan man oj jin smakꞌ cam ebꞌ naj ja yaꞌiloj, ẍi naj tet ix Sarai tuꞌ.
14Jaꞌ yet jix apni oc naj Abram bꞌey Egipto tuꞌ xin, jix yilon oc ebꞌ naj a Egipto tol jaꞌ ix Sarai tuꞌ caw sakꞌal yili ix. 15Catuꞌ jix yilon pax oc ebꞌ naj ey yopiso yintaj naj rey Faraón, tol caw sakꞌal yili oc ix. Yu jun tuꞌ, jix too ebꞌ naj yalon tet naj, jix lawi tuꞌ jix yiꞌontoj ix ebꞌ naj bꞌey sna naj rey tuꞌ.
16Yu ix Sarai tuꞌ, yuxan watxꞌ jix il-le Abram yu naj rey tuꞌ. Yuxan caw miman sbꞌisil smeꞌ naj jix saꞌlei, noꞌ wacax, noꞌ bꞌuru, cꞌal noꞌ camello, yetoj cꞌal ebꞌ naj ẍejabꞌ cꞌal ebꞌ ix ẍejabꞌ jix akꞌle tet naj. 17Syaꞌiloj cꞌal ix Sarai tuꞌ xin, yuxan miman syaꞌilal jix yatej Jehová yibꞌan naj rey tuꞌ, yetoj cꞌal ebꞌ caan yetoj naj bꞌey yul sna. 18Yuxan yin eymanil jix bꞌet iꞌletej Abram tuꞌ yu naj rey Faraón tuꞌ, catuꞌ jix yalon tet jaxca tiꞌ: ¿Tzet yuxan queytuꞌ chin ja wute? ¿tzet yuxan ma ja wal ey jin ta tol ja wistil ix ix tiꞌ? 19Ilaꞌ tol jix ja wal ey jin tol ja wanabꞌ ix, tucꞌal jix ja wilocoj yet jix wiꞌontoj ix yu yoc ix wistiloj waloni. Yuxan jaꞌ tinaniꞌ, iꞌtoj ix, catuꞌ chach eltoj yul conobꞌ tiꞌ, ẍi naj tet naj Abram.
20Jix lawi tuꞌ xin, jix yalon naj rey Faraón tuꞌ tet ebꞌ soldado, tol chi iꞌle eltoj Abram yul conobꞌ Egipto tuꞌ yetoj yistil, cꞌal masanil tzetyetal ey yul skꞌabꞌ.
© 2016, Wycliffe Bible Translators, Inc. All rights reserved.