Luke 7
7
1ကိုယ်တော်ယေရှုကော တီတ်ဆာပရိသတ်သာပ်သယ် အကြောင်းရာဖူမ်အားလုံးနယ် ဟောပြောလောစီးရာနောက် ကပေရနောင်မြို့ပါအာ ကြွလာမ်မာ့။ 2အင်းမာ့မြို့ဝါး ရောမတပ်မှူးaဟော်ဝါကာ့ တအား အားကိုးလောထော်ကာကာ့ အစေခံဟော်ဝါကော ကနာဟာကဲ့အယ် ရှီးဟပ်ကယ်အယ် လင်းမာ့။ 3အင်းမာတပ်မှူးကော ကိုယ်တော်ယေရှုကာ အကြောင်းနယ် သပ်မူဝမ်စန်းနော ဟီမ်ငါအစေခံနယ် လီကဲ့အယ် ကုလောကဲ့အီတီမ် ဂျူးလူမျိုး အသက်တုန်းငါး တီတ်ဆာကြအာလည် ကိုယ်တော်ပါအာ သာပ်ကဲ့အယ် စိမ်ငါစီမ်းမာ့။ 4အင်းမာ တီတ်ဆာလာပ်ကော လီကဲ့အယ် ကိုယ်တော်ယေရှုလည် “အင်းကာတပ်မူးကော ကိုယ်တော်ကာ အကူညီလည် လူသင့်နောကားဟီမ် ထာမာ့။ 5မဟာအောမ်ကယ်လိုးငေါနော ဟီမ်ငေါ အလေဆူလာပ်ကာ့ လူမျိုးလည် မူမ်းကဲ့အယ် အလေဆူလာပ်ခနန်း ဓမ္မာရုံ ဟူပ်အာ့လည်ရီး စာကဲ့အယ် လှူလောပေးကားဟီမ် ထာမာ့” ငေါကဲအယ် အားကြီစ်ရယ် လျှောက်သောဟီးမာ့။ 6အင်းသယ်မာ့ ကိုယ်တော်ယေရှုရီး ဟီမ်နာပ်နောက် တူတူလာပ်ကဲ့အယ် တပ်မှူးကာ ကျဥ်းအထုတ်ကြီစ် ထံငါးကာ့ နေရား ထုတ်အာမ်စန်းနော တပ်မှူးကော ဟီမ်ငါ့မိတ်ဆွေကြအာလည် သာပ်ကဲ့အယ် ကိုယ်တော်လည် “အရှင်၊ ငါဆူကာ ကျဉ်းငေါ အရှင်ကြွလီတီမ် ငါဆူနောက် ထိုက်တန်နိုသယ်မာ့ ပင်ပန်းခံနောကဲ့အယ် ကြွလီထိုး(ဝ်)ဆွမ်။ 7အင်းမာပြာန်နယ် ငါဆူရီး အရှင်ပါအာ လီကဲ့အယ် ဟော့ပ်တီတီမ်ညီး ငါဆူနောက် ထိုက်တန်နို။ အရှင် အမိန့်အီရာမ်ငါးနောက် ငါဆူကာ့ အစေခံငေါ ဇလားဟာမ်းငါမ်ကား။ 8ငါဆူကိုယ်တိုင်ရီး အထက်အရာရှိကာ လက်အောက်အား ငါကယ်ညယ် ငါဆူကာ့ လက်အောက်အားရီး စစ်သားဖူမ် နဲကြီစ်ငါမာ့။ ငါဆူကော စစ်သားဟော်ဝါလည် ‘လာမ်နိတ်’ ငေါကဲ့အယ် အမိန့်အီရာပ်သော် ဟီမ်လာမ်ထော်ကဲ့အယ်၊ အခြားဟော်ဝါလည် ‘လီရိတ်’ ငေါကဲ့အယ်ငေါရီး ဟီမ်လီထော်မာ့။ ငါဆူကော ငါဆူကာ့ အစေခံဖူမ်နယ် ‘အင်းကာ့ အောမ်နိတ်’ ငေါကဲ့အယ် ငေါဝါပ်သော် ဟီမ်နာပ်အောမ်ထော်မာ့” ငေါကဲ့အယ် လျှောက်တင်နော်စီမ်မာ့။ 9အင်းမာညယ် ငေါကားကာလည် ကိုယ်တော်ယေရှု သပ်မူဝမ်စန်းနော အန်းနောတင်းကဲ့အယ် ဟီမ်ငါနောက်အား လီရာပ်ချီးကား တီတ်ဆာဖူမ်နယ် “ငါ နီမ်နယ် ငေါကာပ်ကာကော် အစ္စရေးလူမျိုးဖူမ်ပါအာဟာမ် အင်းကာညယ်တုန်းရယ် ယုံကြည်မှုငါတင်းငါးကာဟီမ်နယ် ယူပ်မူမာန်ငိုး” ငေါကဲ့အယ် မိန့်နာန်မာ့။ 10တပ်မှူး သာပ်လီကားဟီမ်နာပ် ကျဥ်းမာထုတ်ထာစန်နော် အင်းမာ့အစေခံငေါ လုံးဝရယ် ဇလားကဲ့လင်းငါးလည် ယူပ်မူဟီးရာမ်မာ့။ 11အချိန်နည်းနည်းဟာ မာပ်အာမ်စန်းနော ကိုယ်တော်ယေရှုကော နာဣနကော်ကားကာ မြို့ပါအာ ကြွလာမ်ငါအချိန်နယ် ဟီမ်ငါတပည့်လာပ်နောက်တူတူတီတ်ဆာပရိသတ်ဖူမ်ငေါ် ကိုယ်တော်ကာနောက်အား လီရာပ်ချီးမာ့။ 12ကိုယ်တော်ယေရှုကော မြို့ကဖာန်ပေါက်နောက် ထံပါအာ ထုတ်အာစန်းနော တီတ်ဆာရှီးဟော်ဝါကာ့ အလောင်းနယ် ဂူနားစာန်းတီမ် တီတ်ဆာတစ်စုကော တီတ်ဆာရှီး အလောင်းနယ် ဖေးကဲ့အယ် မြို့ပြာန်ငါ လာပူပေးဟီးရီမာ့။ အင်းမာ့ အသက်ရှီးကားကာ့ ဟီမ်ငေါ မုဆိုးမကာ့ ဟော်ဝါဟာ ငါကားကာ့ဆာ ထာကဲ့အယ် မြို့ဝါးမာ့ တီတ်ဆာဖူမ်ငေါ အင်းမာ့မုဆိုးမနောက်တူတူ ဂူနားစာန်းတီမ် ဆာပ်အာပ်ချီးမာ့။ 13အရှင်ငေါ် အင်းမာ့မုဆိုးမလည် ယူပ်မူဝမ်စန်းနော တအားစာန်မာန်ကယ် အင်းမာ့မုဆိုးမလည် “ဟပ်ဝါပ့်” ငေါကဲ့အယ် ဟီမ်နယ် မိန့်နောမာ့။ 14စီးရာပ်သော် ကိုယ်တော်ကော ဟီမ်နာပ်ဖေးကဲ့လီကားကာ့ အလောင်းစင်နဘေးရား ကြွလောကဲ့အယ် အလောင်းစင်နယ် ထော်နောက် ထာဝမ်ကယ်မာ့ အလောင်းစင်နယ် ဖေးကဲ့လီရာပ်ကားကာ ဟီမ်နာပ်ကော ရပ်သောကဲ့အီရာမ်စန်းနော ကိုယ်တော်ကော “အောင်ဟား၊ နာန်နယ် ငါငေါပ်နာပ်။ ယုတ်စာပ့်” ငေါကဲ့အယ် မိန့်နောမာ့။ 15အင်းမာချိန်နယ် ရှီးကဲ့လင်းငါးကာ့ ဟော်လောဝါကော် ချက်ချင်းရယ် ယုတ်ကဲ့ထောင်းစီးရာပ်သော် စားလောကဲ့အယ် သပေါက်မာ့။ စီးရာပ်သော် အင်းမာဟီမ်နယ် ဟီမ်ငါအမေပါအာ အပ်သောဟာမ်းမာ့။ 16တီတ်ဆာဖူမ်အားလုံးငေါ အန်းနောကဲ့ ကစာပ်စာပ်ရယ် “အလေပါအာ ကြီးမြတ်သောကားကာ ပရောဖက်တစ်ပါး ပေါ်လောရီပ်။ ဘုရားရှင်ငေါ် ဟီမ်ငါလူမျိုး ထာကာကာ့ အလေလည် ကယ်တင်နောတီမ် ကြွလီရာမ်” ငေါကဲ့အယ် ဘုရားရှင်နယ် ချီးမွမ်းနောဟီးမာ့။ 17စီးရာပ်သော် ကိုယ်တော်ယေရှုကာ သတင်းငေါ ယုဒပြည်တစ်ခွင်လုံးနောက် ထံပါအာကာ့ ပတ်ဝန်းကျင်ဒေသအားလုံးပါအာ ပျံ့နှံ့နာန်မာ့။ 18စီးရာပ်သော် ဝေးငဟူပ်ကာမင်္ဂလာ ဆရာယောဟန်ငါ့ တပည့်ဖူမ်ငေါ် ကိုယ်တော်ယေရှုအောမ်ငါးအကြောင်းဖူမ် အားလုံးနယ် ယောဟန်နယ် ဆောမ်းနာန်စန်နော် ဟီမ်ငေါ တပည့်ကယ်ဟောလည် ကော်ကဲ့အယ် 19“ကိုယ်တော်ကော၊ ကြွလိကားငေါကားကာဟီမ်နေး အင်းညယ်အဟီပ်ရာ အလေဆူလာပ်ကော တခြားဟော်ဝါလည် လေးကဲ့လင်းထော်ခူမ်းနေး” ငေါကဲ့အယ် စီမ်ညူတီမ် ကိုယ်တော်ပါအာ သာပ်လာမ်မာ့။ 20အင်းမာတီတ်ဆာလာပ်ကော ကိုယ်တော်ယေရှုပါအာ ထုတ်အီစန်းနော “ဝေးငဟူပ်ကာမင်္ဂလာ ဆရာယောဟန်ငေါ် အလေဆူလာပ်သယ် ကိုယ်တော်ပါအာ သာပ်လီကဲ့အယ် ‘ကိုယ်တော်ကော ကြွလိကားငေါကားကာ့ဟီမ်နေး အင်းညယ်အဟီပ်ရီ အလေဆူလာပ်ကော တခြားဟော်ဝါလည် လေးထော်ပ်ခူမ်းနေး’ ငေါကဲ့အယ် လျှောက်တင်နော်စီမ်မာ့” ငေါကဲ့အယ် လျှောက်တင်နော်ဟီမာ့။ 21အင်းမာချိန်နယ် ကိုယ်တော်ယေရှုကော ကနာဟာကားဟီမ်နာပ် အနာရောဂါငါကား တီတ်ဆာလာပ်သယ် ဇလားဟာမ်းစီမ်းကဲ့အယ် စိတ်ဆလားဆာမ်ငါးခံနောထော်ကာ တီတ်ဆာလာပ်ပါအာမာ့ စိတ်ဆလားလည်ရာ ငါပ်ပူကဲ့အီကဲ့အယ် လင်းငါးပြာန်နယ် ဟီမ်ငေါ မီပ်တူ အယူပ်မူကားကာ တီတ်ဆာဖူမ်နယ်ရား မီပ်တူယူပ်မူဟာမ်းကွန်းနယ် အောမ်ကဲ့အယ် အီကဲ့လင်းမာ့။ 22စီးရာပ်သော် ကိုယ်တော်ကော ယောဟန်ငါ တပည့်လာပ်သယ် “နီမ်ယူပ်မူ သာပ်မူကားကာ့အရာဖူမ်နယ် ယောဟန်ပါအာ ငေါဟာလိတ်။ မီပ်တူ အယူပ်မူကားကာ့ တီတ်ဆာလာပ်ကော ရာမီပ်တူယူပ်မူဟာမ်းပါတ်။ ထော်သာ အသန်စွမ်နော်ရယ် လင်းငါးကာ တီတ်ဆာလာပ်ကော လမ်းဟာဟာမ်းရင်ပါတ်။ အနာတုန်ရောဂါသည်ဖူမ်ငေါ ရောဂါဖူမ် မီမ်ဟာမ်းဟူမ်ပါတ်။ ကနားတီစ်ကာ တီတ်ဆာလာပ်ကော ကနား သပ်မူဟာမ်းပါတ်။ ရှီးစီးကား တီတ်ဆာလာပ်ကော ဆိုင်းဟေရာမ်။ အပေါ်ဟာကား တီတ်ဆာလာပ်ရီး မင်္ဂလာသတင်းကလန်ဖူမ်နယ် သပ်မူဟီးမူဝါပ်။ 23ငါလည် ဆက်သောကဲ့အယ် ယုံကြည်လောကား ဟီမ်နာပ်ကော ကံကလန်ဟိကာ” ငေါကဲ့အယ် မိန့်နောမာ့။ 24ယောဟန်ငါ တပည့်လာပ် လာမ်ဟာမ်းစီးရာပ်သော် ကိုယ်တော်ကော တီတ်ဆာပရိသတ်သာပ်သယ် ယောဟန်ငါ အကြောင်းဟောလောကားကော “နီမ်ငေါ ဝေးငဟူပ်ကာမင်္ဂလာ ဆရာယောဟန် ဝေးငဟူပ်ကာမင်္ဂလာ အီကားအခါလည် တီတ်ဆာလာပ် အပေါ်ကာကာ့ ပေါက်ခါသာတုန်းငါး မဟာလည် ယူတီမ် လာမ်ဟီးကားသယ်။ လေတိုက်သောကား ဘက်လာ ယိုင်နာပ်ကားကာ့ စုတ်ကားကာ လိပ်စာပ်တွန်နယ်နာန်။ 25အင်းညယ်အဟီပ်ပန်နော် မဟာလည် ယူပ်မူကာပ်ကယ် လာမ်ဟီးကားသယ်။ နီမ်ငေါ ဈေးနီပ်ကာကာ့ အဝတ် ကလန်ကလန်ရယ် ဖူမ်ငါးကာ့ တီတ်ဆာလာပ်သယ်နာန်။ ဈေးနီပ်ကာကာ့ ဟန်ဆူန်ကလန်ကလန်ဖူမ်နယ် ဖူမ်ကဲ့အယ် စည်းစိမ်နယ် ခံစားလောကဲ့လင်းငါးကာ့ တီတ်ဆာလာပ်သယ်ကော ဘုရင်ငါ့ နန်းတော်အတွင်းနားဟာ ယူပ်မူမုကား။ 26အင်းညယ်အဟီပ်ရီ နီမ်ငေါ မညယ်ကာ့ တီတ်ဆာလည် ယူပ်မူကာပ်ကယ် လာမ်ဟီးကားသယ်။ ပရောဖက်တစ်ပါးလည် ယူပ်မူကာပ်ကားလေး။ မှန်နောမာ့။ နီမ်နယ် ငါငေါကာပ်ကာကော် ယောဟန်ငေါ် ပရောဖက်ထက်သယ် ကြီးမြတ်သောကားကာဟီမ် ထာမာ့။ 27ကျမ်းစာပါအာ ဘုရားရှင်ငေါ် မေရှိယလည် မိန့်နောပေးကားကော ‘နာန်ငါ လမ်းနယ် အရာမ်သင့် ထာကွန်နယ် ငါကာ့ စေတမန်နယ် အရာမ်ဆုံး သာပ်ခပ်ကား’ ရယ် ရေးလောပေးကားကော ယောဟန်ငါအကြောင်း ထာမာ့။ 28နီမ်နယ် ငါငေါနာပ်။ ယောဟန်ငါထက်သယ် ကြီးမြတ်သောကားကာ ဟော်ဝါဟာမ်း အင်းကာ့ကမ္ဘာပေါ်ဝါး ဟဲမာန်ဟအူမ်း။ အင်းညယ်ငေါဝမ်ရီ ဘုရားရှင်ငါ သာသနာတော်အတွင်းနား အရေးအပါလော်ဟန်ဆုံးတီတ်ဆာကော ယောဟန်ငါထက်သယ် ကြီးမြတ်သောမာ့” ငေါကဲ့အယ် မိန့်နောမာ့။ 29ယောဟန်ပါအာ ဝေးငဟူပ်ကာမင်္ဂလာ လာစီးကားကာ အခွန်ကောက်သောကားတီတ်ဆာလာပ်နောက်တူတူ တီတ်ဆာဖူမ်အားလုံးနာပ်ကော် ကိုယ်တော်ယေရှု သပေါက်ကားလည် သာပ်မူဝမ်စန်းနော ဘုရားရှင်ငါ လမ်းစဉ်ငေါ် မှန်ကန်နောမာ့ ငေါကားလည် ဝန်ခံနောဟီးမာ့။ 30အင်းညယ်ငေါဝမ်ရီ ဖာရိရှဲဖူမ်နောက် ကျမ်းထောကား ဆရာလာပ်ကော ဝေးငဟူပ်ကာမင်္ဂလာ အခံနော်ရယ် ဘုရားရှင်ငါ အစီအစဉ်နယ် ပစ်ပယ်လော်ဟီရီမာ့။ 31စီးရာပ်သော် ကိုယ်တော်ဆက်သောကဲ့အယ် ငေါကားကော “ရာမာ့ခေတ် တီတ်ဆာလာပ်သယ် မဟာနောက် နှိုင်းနောထော်ပ်ကားသယ်။ ဟီမ်နာပ်ကော မဟာနောက် တူလောကားသယ် ငေါက်သော် 32ဟီမ်နာပ်ကော ဈေးရားထောင်းကဲ့အယ် အချန်းချန်း ရမ်းကဲ့အယ် သပေါက်ညာပ်ချီကာကာ့ ဆဟာလာပ်နောက် တူလောမာ့။ ‘အလေ နီမ်ဟနန်း သီချာန်းတီးလောရီး နီမ်ငေါ ကားလောဟီးယိုး။ အလေ ဟပ်မီးကားသီချာန်းကြေကဲ့အယ် ပြလောရီး နီမ်ငေါ ဟပ်လာပ်ချီယို’ 33မဟာအောမ်ကယ်လိုးငေါနော ယောဟန်ငေါ် ရောက်ကား ရှောင်နောကဲ့အယ်b၊ စပျစ်ဝိုင်နယ်ရား အအူရယ် ဟာညာပ်ကဲ့လင်းမန်းနော နီမ်ငေါ ‘ယောဟန်ပါအာ စိတ်ဆလား ဆာမ်ကဲ့လင်းငါး’ ငေါကဲ့အယ် ငေါဟိကာ။ 34အင်းမာပြာန်နယ် တီတ်ဆာကာ့ဆာကော ရောက်ညာပ်ကယ်အယ် လင်းမန်းနော နီမ်ငေါ ‘အင်းကာဟီမ်ငေါ ရောက်ကားအူကားမက်သောကားဟီမ်ထာကယ်အယ် အခွန်ကောက်သောကားဟီမ်နာပ်၊ ဒုစရိုက်အပြစ်သားဖူမ်နောက် မိတ်ဆွေအောမ်ကဲ့လင်းငါး’ ငေါကဲ့အယ် ငေါဟာမ်းဟီးမာ့။ 35အင်းညယ်ငေါဝမ်ရီ အင်းမာဖူမ်အားလုံးနယ် လက်ခံနောကားတီတ်ဆာတိုင်း ဘုရားရှင်ငါ ဉာဏ်ပညာကော မှန်ကန်နောမာ့ ငေါကားလည် သက်သေပြလောမာ့” ငေါကဲ့အယ် မိန့်နောမာ့။ 36စီးရာပ်သော် ဖာရိရှဲဟော်ဝါကော ကိုယ်တော်ယေရှုလည် ဟီမ်ငါကျဥ်းမား နာန်ကြည်စာရောက်တီမ် ပင့်နောမာ့။ အင်းသယ် ကိုယ်တော်ကော အင်းမာဟီမ်ငါကျဥ်းမား ကြွလာမ်ကယ်အယ် ရောက်တီမ်အူတီမ် စားပွဲရား ထောင်းငမ်မာ့။ 37အင်းမာမြို့ဝါး ဒုစရိုက်အပြစ်ဖူမ် ကျူးလွန်နော်ပေကာကာ့ ယာပ်ရှီဟော်ဝါ ငါမာ့။ ဖာရိရှဲကာ ကျဥ်းမား ကိုယ်တော်ထောင်းကဲ့ရောက်ကဲ့ လင်းငါးကာလည် သပ်မူကယ်မာ့ ဟီမ်ငေါ ဈေးနီပ်ကယ်အယ် တန်ဖိုးကြီးလောတင်းငါးကာ့ အနံ့တူမ်းငါးကာ ဆလော တစ်ပုလင်းနယ်လာကဲ့အယ် အင်းမာနေရား လီမာ့။ 38စီးရာပ်သော် ဟီမ်ငေါ ကိုယ်တော်ကာနောက်အား စာပ်ကဲ့အယ် ဟပ်ကဲ့အယ် ဟီမ်ငါမီစ်ဝေးကော ကိုယ်တော်ကာ သာပါအာ ဆပူးဝမ်ကယ်မာ့ ဟီမ်ငါ ဟလာမ်းဟူပ်ပါအာမာ့ ဟောနောက်နူမ်ကယ်အယ် ဂေါစီမ်းမာ့။ စီးရာပ်သော် ကိုယ်တော်ကာ သာလည် မန်းတူမ်ကယ်အယ် တအား အနံ့တူမ်းငါးကာ ဆလောနောက် မောကဲ့အီမာ့။ 39ကိုယ်တော်လည် ပင့်ဖိတ်သောကားကာ့ ဖာရိရှဲကော အင်းမာလည် ယူပ်မူဝမ်စန်းနော “အင်းကာဟီမ်ငေါ ပရောဖက် မှန်နောဝမ်းနော ဟီမ်နယ် ထာကယ်လင်းငါးကာ့ ယာပ်ရှီကော မညယ်ကာ့ ယာပ်ရှီငေါကားကာလည် မီမ်းဟော်ပ်နာ့ပ်။ အကလန်ငါအောမ်ငါးကာ့ယာပ်ရှီ ငေါကားကာလည်ရား မီမ်းဟော်ပ်နာ့ပ်” ငေါကဲ့အယ် စိတ်နား တွေးလောကဲ့လင်းမာ့။ 40အင်းမာချိန်နယ် ကိုယ်တော်ယေရှုကော ဟီမ်နယ် “ရှိမုန်၊ နာန်နယ် ငါငေါတီမ်ကြအာငါမာ့” ငေါကဲ့အယ် မိန့်နာန်စန်နော်
ရှိမုန်ငေါ် “ငေါလိတ်ခဲ၊ ဆရာ” ငေါကဲ့အယ် ငေါဟာမ်းမာ့။ 41ကိုယ်တော်ယေရှုကော “ဖူးလှာကမ်ကဲ့ အီကားကာ့တီတ်ဆာဟော်ဝါပါ့အာ တီတ်ဆာကယ်ဟောကော ဖူးလှာကမ်ဟီးရီမာ့။ ဟော်ဝါကော ဒေနာရီဒင်္ဂါးcငါးရာ၊ အခြားဟော်ဝါကော ဒေနာရီဒင်္ဂါးငါးဆယ် အကြွေးငါမာ့။ 42ဟီမ်နာပ်ကော အကြွေးလည် ပြန်နောကဲ့အယ် အဆပ်တောရင်ညယ်လင်းကယ် အကြွေးရှင်ငေါ် ဟီမ်နာပ်ကယ်ဟောစလုံးငါ့ အကြွေးဖူမ် ဆပ်သောတီမ် လိုလော်စော်မန် ငေါကဲ့အယ် ငေါဝါပ်သော် အင်းမာ ကယ်ဟောပါအာ ဟင်ငေါ အကြွေးရှင်နယ် ပိုလောကဲ့အယ် ကျေးဇူးတင်နော့ကာသယ်” ငေါကဲ့အယ် ဟီမ်နယ် စီမ်ညူဝမ်မာ့။ 43ရှိမုန်ငေါ် “အကြွေးပိုလောကဲ့ လှာကမ်ပေးကားဟီမ်ငေါ ပိုလောကဲ့ ကျေးဇူးတင်နော့ကာရယ် ငါမသပ်မာ့” ငေါကဲ့အယ် လျှောက်တင်နာန်မာ့။
ကိုယ်တော်ယေရှုကော “နာန် မှန်နောမာ့” ငေါကဲ့အယ် မိန့်နာန်မာ့။ 44ကိုယ်တော်ကော အင်းမာ့ယာပ်ရှီကာ့ဘက်လာ မန်းကဲ့အယ် ရှိမုန်နယ် “နာန် အင်းကာယာပ်ရှီလည် ယူပ်မူနေး။ ငါကော နာန်ငါကျဥ်းမာ ကြွလီစန်နော် နာန်ငေါ ငါ သာဝေးဖောတီမ် ဝေးအအီရီး အင်းကာ့ယာပ်ရှီကော ငါ့သာလည် ဟီမ်ငါ မီစ်တူဝေးနောက် ဖောကဲ့အယ် ဟီမ်ငါဟောနောက် ဂေါကွန်းနယ် နူမ်ကယ်အယ်အီမာ့။ 45နာန်ငေါ ငါကြွလီစန်နော် ငါလည် မန်းတူမ်ကယ်အယ် ကြိုဆိုလိုး။ အင်းမာ ယာပ်ရှီကော ငါကာ့သာလည် အဆက်မပြတ် တူမ်မီမာ့။ 46နာန်ငေါ ငါကာ့ ဟလာမ်းဟူပ်သယ် သံလွင်ဆလောနောက်ချန်း မောကဲ့အအီရယ်လင်းညီး ဟီမ်ငေါ ငါလည် တအားတန်ဖိုးကြီးလောတင်းငါးကာ့ အနံ့တူမ်းငါးကာ ဆလောနောက် ငါကာ့သာလည် မောကဲ့အီရီမာ့။ 47အင်းသယ် နာန်နယ် ငါငေါကားကော အင်းကာ့ယာပ်ရှီကော နံတင်းငါးကာ့ ဒုစရိုက်အပြစ်ဖူမ်နယ် ခွင့်လွှတ်သောကား ခံနောထော်ကာကော် ဟီမ်ငါ ကြီးမားလောကား ချစ်ခြင်းမေတ္တာလည် ပြလောကယ် ထာမာ့။ ဒုစရိုက်အပြစ် နည်းနည်းဟာ ခွင့်လွှတ်သောကား ခံနောထော်ကာဟီမ်ငေါ နည်းနည်းဟာနိုက်ချာ ချစ်ခြင်းမေတ္တာ ငါဟပ်ကား” ငေါကဲ့အယ် မိန့်နောမာ့။ 48စီးရာပ်သော် ကိုယ်တော်ကော အင်းမာ ယာပ်ရှီလည် “နာန်ငါ ဒုစရိုက်အပြစ်ဖူမ်အားလုံးနယ် ခွင့်လွှတ်သောဝါပ်” ငေါကဲ့အယ် မိန့်နောမာ့။ 49အင်းမာချိန်နယ် ကိုယ်တော်နောက်တူတူ ထောင်းမောက်ကားကာ့ တခြားဟီမ်နာပ်ကော “ဒုစရိုက်အပြစ်သယ်ဟာမ် ခွင့်လွှတ်သောကဲ့အီရင်နာ့ ငေါကဲ့အယ် သပေါက်ကယ်မာ့ အင်းကာတီတ်ဆာကော ဟင်သယ်” ငေါကဲ့အယ် တွေးလောကဲ့အယ် လင်းဟီးမာ့။ 50အင်းညယ်ငေါရီး ကိုယ်တော်ယေရှုကော အင်းမာ ယာပ်ရှီလည် “နာန်ငါ ယုံကြည်ခြင်းငေါ နာန်နယ် ကယ်တင်နောဝါပ်။ နာန်ငေါ ငြီမ်းငြီမ်းချမ်းချမ်းရယ် လာမ်စာပ်” ငေါကဲ့အယ် မိန့်နောမာ့။
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.