ዶመ 6
6
ኖሀነ ባሻ ሃ
(6:1—10:32)
አሳ ኢታተ
1አሳይ ሳኣ ቦላን ዳሬዳ ዎደ፥ ኡንቱንቶ ማጫ ናናይ የለቴድኖ፤#ኢዮባ 1:6፤ 2:1 2“ሳሉዋ መታቱዋ”#6:2 ሳሉዋ መታቱዋ፦ ጾሳ ናናቱዋ፤ ጾሳቱዋ ናናቱዋ። ጌተትያዋንቱ ሀ አሳ ማጫ ናናይ ማላ ሎአ ግድያዋ በኤድኖ፤ ያቲደ ኡንቱንቱፐ ባረንቶ ዶሬዳዋንታ አኬድኖ። 3መና ጎዳይ፥ “ታ አያናይ አሳን መናዉ ደኤና፤ አያዉ ጎፐ፥ አሳይ ሀይቂያዋ፤ አ ላይቱካ እት ጼታነ ላታማ ግዳና” ያጌዳ። 4ሄ ዎደነ ሄዋፐ ጉየ ሳሉዋ መታቱ አሳ ማጫ ናና አክና፥ ናናይ የለቴዳ ዎደ፥ ዎጋ አዱሳ አሳቱ ሳኣ ቦላን ደኤድኖ። ኡንቱንቱነ በን ዎደ ኦላዉ ምናነ ኤረቴዳ አሳ።
5መና ጎዳይ ሄ ዎደ ሳኣ ቦላን ደእያ አሳ ኢታተይ ዳሬዳዋነ ኡንቱንቱ ዎዛናይ ቆፕያባይ ኡባይ ኡባ ዎደካ ኢታ ጻላላ ግዴዳዋ በኤዳ፤#ማቶሳ 24:37፤ ሉቃሳ 17:26፤ 1 ጰጽ. 3:20 6መና ጎዳይ አሳ ሀ ሳኣ ቦላን መዳዎ ካዮቴዳ፤ ባረ ዎዛናን ሎይ ሴለቴዳ። 7ሄዋ ድራዉ መና ጎዳይ፥ “ታን መዳ አሳ ሀ ሳኣ ቦላፐ ሙለ ይሳና፤ አሳ፥ መህያ፥ ዶኣ፥ ቢታና ጎሸትያ መታቱዋነ ሳሉዋ ካፎቱዋ ይሳና፤ አያዉ ጎፐ፥ ታን ኡንቱንታ መዳዎ ካዮታድ” ያጌዳ። 8ሽን ኖሄ መና ጎዳ ስንን ናሸቴዳ።
ኖሀ
9ኖሄ ሀኔዳባይ ሀዋፐ ካሊደ ጻፈቴዳ። ኖሄ ጽሎ አሳ፤ እ ባረ ዎድያን ደኤዳ አሳ ግዶን ሱረ አሳ፤ ኖሄ ጾሳና ሀመቴዳ። 10ኖሄ ሴማ፥ ካማነ ያፌታ ግያ ሄዙ አቱማ ናና የሌዳ።#2 ጰጽ. 2:5
11ሄ ዎደ ቢታይ ሳአይ ጾሳ ስንን ቱኔዳ፤ ሳአይ ኡባይ ማካላን ኩሜዳ። 12ጾሳይ ሀ ሳኣ ጼሌዳ፤ ሳአይ ቱኔዳዋ በኤዳ፤ አያዉ ጎፐ፥ ሳኣን ደእያ አሳይ ኡባይ ባረ ኦግያ ቱንስ ዎዳ።
13ሄዋ ድራዉ፥ ጾሳይ ኖሀ ሀዋዳን ያጊደ አዛዜዳ፤ “ታን አሳ ኡባ ይሳና ሀናይ፤ ኡንቱንቱ ጋሱዋን ሳአይ ማካላን ኩሜዳ ድራዉ፥ ታን ቱሙፐ አሳካ ሳኣካ ይሳና። 14ሄዋ ድራዉ፥ ምኖ ምፐ ነዉ ማርካብያ ኬጻ፤ ሄ ማርካብያ ግዶን ጮራ ቆልኦቱዋ ከሳ፤ ያታደ ሶናነ ካረና ሽድያን ባራ። 15ማርካብያ ሀዋዳን ያታደ ኬጻ፤ አዱሳተ ሄዙ ጼቱ ዋ፥ ጎምፓ እሻታሙ ዋ፥ ጌሳ ሀታሙ ዋ ኦ፤ 16ማርካብያዉ ካራ#6:16 ካራ፦ ማስኮትያ። መ፤ ካራፐነ ጎዳፐ ግዱዋን እት ዋ ግድያ ሳ ካሎ አጋ ባሻ፤ ፐንግያ ማርካብያዉ ምይያና ከሳ፤ ማርካብያ ሄዙ ፖቅያ ከሳደ ኬጻ።
17“ታን ሳሉዋፐ ጋርሳን ደኡዋ ሸምፑዋና ደእያ መታ ኡባ ይሳናዉ፥ ሀ ሳኣ ቦላን ባሻ ሃ የዳና፤ ሀ ሳኣን ደእያባይ ኡባይ ያና። 18ሽን ታን ታ ቃላ ጫቁዋ ኔናና ጫቀታና። ኔን ነ ማቻቶ፥ ነ አቱማ ናናነ ነ አቱማ ናና ማቻቱዋ ኔናና አካደ ማርካብያ ግዶ ገላ። 19ኡንቱንቱ ኔናና ሸምፑዋና አታና ማላ፥ ሸምፑ ደእያ መታ ኡባፐ ቆሙዋን ቆሙዋን አቱማዋነ ማጫዋ ላኡዋ ላኡዋ አካደ፥ ማርካብያ ግዶ ገልሳ። 20ዱማ ዱማ ቆሞ ካፉዋፐ፥ ዱማ ዱማ ቆሞ መህያፐነ ቢታና ጎሸትያ ዱማ ዱማ ቆሞ መታቱዋ ኡባፐ ላኡዋ ላኡዋ ግዲደ፥ ሸምፑዋና አታና ማላ ኔኮ ያና። 21ቃይ ኔንነ ኔናና ደእያዋንቱ ማናዉ፥ ዱማ ዱማ ቆሙ ምያ ካ አፋደ፥ ማርካብያ ግዶን ቆላ” ያጌዳ።
22ኖሄ ኡባባካ ጾሳይ አዛዜዳዋዳን ኦዳ።#እብራ. 11:7
The Word for the World Ethiopia