Luqaasa 21
21
Am7e Muxaata
(Mar 12:41-44)
1Dure asay xoossa keethan muxaata saaxiniyan yeggishin Yesuusi dhoqu gidi asaa be7is. 2Qassi issi manqo am7iya nam7u sikina yeggishin be7idi, 3“Ta hintew tuma odayis; ha manqo am7iya ubbaafe aathada immasu. 4Ayis giiko, ha asa ubbay bantaw de7iyabaape immidosona, shin iya ba pacaape, baw de7iya aquwa ubbaa immasu” yaagis.
Wode Wursetha Malaatata
(Maato 24:3-14; Mar 13:3-23)
5Yesuusa tamaaretape issoti issoti Xoossa Keethay daro lo77iya shuchaninne asay Xoossaas immida imotan lo77idaysa odetoosona. 6Shin Yesuusi, “Ha hinte be7iyabay ubbay laaletonna, shuchi shucha bolla gimbetida mela attonna wodey yaana” yaagis.
7Entika, “Astamaariyaw, ha ubbay hananay awudee? Qassi haysi hananaysas malaatay aybee?” yaagidi oychidosona.
8Yesuusi yaagidi entaw zaaro immis: “Baletonna mela naagetite. Daroti, ‘Taani Kiristoosa, wodey matatis’ yaagishe ta sunthan yaana, shin hinte enta kaallopite. 9Hinte olabaanne asaa geellatetha si7iya wode dagammofite. Hessi sinthatidi hananaysi attonnaba gidiya gisho wodiya wursethay ellesidi yeenna” yaagis.
10Kaallidika, “Derey deriya bolla, kawotethay kawotethaa bolla dendana. 11Gita biitta qaaxoy hanana, koshaynne gadoy dumma dumma bessan darana, yashshiyabaynne gita malaatati salope qoncana. 12Shin ha ubbay hananaape sinthe ta sunthaa gisho gidi asay hintena gooddananne oykana. Ayhude woosa keethaninne qasho keethan hintena yeggana. Kawota sinthenne deriya haareyisata sinthe hintena efana. 13Hessika tabaa hinte entaw markatanaw lo77o oge gidana. 14Hessa gisho, hinte oyshetiya wode woygidi zaaro immane gidi hinte wozanan un7etonna mela akeekite.#Luqa 12:11-12. 15Ayis giiko, hinte morketi hintera eqetanawunne palamanaw danda7onna doonanne cincatethi ta hintew immana. 16Hari attoshin, hintena yelidaysati, hinte ishati, hinte dabbotinne laggeti hintena aathidi immana. Hinte giddofe issota issota wodhana. 17Ta sunthaa gisho asa ubbaa sinthan hinte ixetidaysata gidana. 18Shin hari attoshin, hinte binaanape issoyka dhayenna. 19Polo danda7an hinte, hinte shempuwa ashshana.”
20“Yerusalaame katamay wotaadaren diretidi uttidashin hinte be7iko iyaw dhayoy matatidaysa erite. 21He wode Yihudan de7iya ubbay deriyako baqato, kataman de7eysati yaape keyo, gaxariyan de7eysati katama gelopo. 22Ayis giiko, ha xaafetidabay poletana mela hessi Xoossay kushe zaariya wode.#Hose 9:7. 23Sa7a bolla gita metoy yaana, hessanka asaa bolla Xoossaa hanqoy yaana. Hessa gisho, qanthatidaysatanne dhantheyisata ayye! 24Enti mashshan hayqana, asa ubbay allaga biitta di7etana. Ayhude gidonna asaa wodey poletana gakanaw Yerusalaamey entanan yedhetidaysa gidana.
25“Awan, ageenaninne, xoolintota bolla malaatati hanidi bentana. Abbaafenne zuliya deshuwape dendoysan biittan de7iya asay un7etananne yarkana.#Isa 13:10; Hiz 32:7; Ermi 2:31; Qon 6:12. 26Saluwa wolqati buqettana gisho asay yashshaninne biitta bolla aybi hanandesha gidi naagon bantana baletana. 27He wode Asa Na7ay wolqaninne gita bonchuwan shaarara yishin enti be7ana.#Daane 7:13; Qon 1:7. 28Hinte atotethay matatida gisho ha hanoti poletethi oykiya wode giigeti eqite, hinte huuphiya dhoqu oothidi xeellite” yaagis.
29Kaallidika, haysada gidi leemiso odis; “Balase mithinne hara mithata ubbaa be7ite. 30Enti aaciya wode torchey matatidaysa hinte ereeta. 31Hessada ha hanoti poletishin hinte be7iko Xoossaa kawotethay matatidaysa erite.
32“Ta hintew tuma odayis; ha ubbay poletana gakanaw ha yeletethay aadhenna. 33Saloynne sa7i aadhana, shin ta qaalay aadhenna.
34“Hiza, dhassi bayna de7on, ushsha daroninne duussabaas un7etethan hinte wozanay oyketonna melanne he qammay akeekona xiheda hinte bolla gakonna mela naagetite. 35He qammay biitta kumethan de7iya ubbaa bolla gakana. 36Hessa gisho, yaa iitaape attanawunne Asa Na7a sinthan eqanaw danda7ana mela ubba wode minnidi woossite” yaagis.
37Gallas gallas Yesuusi xoossa keethan tamaarsishe, qamma qamma Shamaho zuma bolla keyidi aqees.#Luqa 19:47. 38Asa ubbay iya si7anaw wonta guura iyako Xoossaa Keethi yoosona.
The Word for the World International and The Word for the World Ethiopia