Luqaasa 17
17
Asas Dhube Gidopa
1Yesuusi ba tamaaretako, “Ase dhubethidi nagaran gelsiyabay yoonna aggenna. Gidoshin, nagaran gelana mela oothiya ura ayye!” yaagis. 2He uray kaalotape issuwa balethanaape woxa ba qoodhen qachidi abban wulliko iyaw lo77o. 3Hessa gisho naagetite.#Maato 18:15.
“Ne ishay nagara oothiko hanqeta; qiirotidi maarotethan simmiko, iyaw atto yaaga. 4Issi gallasan laapun toho qohidi, laapun toho, ‘Taani ta nagaraa eras tana maara’ yaagidi neeko yiiko iyaw atto ga.”
5Hawaareti Godaako, “Ammano nuus gujarki” yaagidosona.
6Goday, “Gaashe ayfe mela ammanoy hintew de7iko ‘Haysa wolaa shodetada abba giddon toketa’ yaagiko hintew kiitetana” yaagis.
7Gujidika Yesuusi, “Hinte giddofe issuwas goshshanchoy woyko dorse heemmiya aylley de7iko ooso gadepe woyko wudepe soo simmiya wode, ‘Elle haayada kathi maanaw utta’ yaagey de7ii? 8Deenna, ‘Taw kaho giigisa; taani mada, uyada aggana gakanaw eqada muza. Hessafe guye, neeni qassi maasanne uyaasa’ yaageneyee? 9Hiza, goday, aylley kiita polida gisho anjiyee? 10Hessa gisho, hinteka kiitetoysa ubbaa polida wode, ‘Nu pathonna aylleta; oothanaw bessiya oosuwa polida’ yaagite” yaagis.
Baro Hargefe Geeyda Tammu Asata
11Yesuusi Yerusalaame bishe Samaarisinne Galilas giddora kanthidi aadhis. 12Issi gutaa geliya wode baro hargen oyketida tammu asati iya demmidosona. Entika haahon eqidi, 13“Godaa Yesuusa, nuus qadhetarki” yaagidi waassidosona.
14I enta be7ida wode, “Bidi hintenatethaa Ayhude kahine bessite” yaagis. Enti ogiya bolla bishe paxidosona.#Leewe 14:1-32.
15Entafe issoy ba paxuwa be7ida wode dhoqu gida qaalan Xoossa bonchishe Yesuusako simmis. 16I, Samaare biitta asi, shin Yesuusa toho bolla gufannidi iya galatis.
17Yesuusi, “Paxiday tammu asata gidokonaayee? Yaatin, uddufunati aw bidonaa? 18Ha allaga uraape#17:18 Ha allaga uraape: Baro hargiyafe paxida uray allaga geetetiday I Ayhude gidonna gishosa. attishin, hari simmidi Xoossa galatey deenna guusseyee?” yaagidi oychis. 19Uraako, “Ne ammanoy nena pathis; dendada ba” yaagis.
Xoossa Kawotetha Yuussaa
(Maato 24:23-28, 37-41)
20Farsaaweti, “Xoossa kawotethay awude yaanee?” gidi Yesuusa oychidosona. I, “Xoossaa kawotethay bentiya mallan yeenna. 21Qassika iya, ‘Hannina woyko hinina yaaganaw danda7enna. Ayis giiko, Xoossa kawotethay hinte giddon de7ees’ ” yaagidi zaaris.
22Yesuusi ba tamaaretako, “Asa Na7a gallasatape issuwa be7anaw hinte amotiya wodey yaana, shin hinte be7eketa. 23Asay, ‘I yan de7ees’ woyko, ‘Haysan de7ees’ yaagana, shin entana kaallidi boopite. 24Wol7anthi wol7amidi salo gaxape gaxa poo7isiya mela Asa Na7aa yuussaa gallasay hessada hanana. 25Shin hessi hananaape sinthe Asa Na7ay daro waayanawunne ha yeletethan ixetanaw bessees. 26Nohe wode hanidaysa mela Asa Na7a woden hessada hanana.#Medhe 6:5-8. 27Nohey Markabiyan gelida qamma gakanaw asay mishenne uyishe, ekishenne gelishe de7ishin dhayo haathay yidi ubbaa dhaysis.#Medhe 7:6-24. 28Looxe laythanka hessatho hanis. Asay mishenne uyishe, shammishenne bayzishe, tokishenne keexishe, gam7idosona.#Medhe 18:20—19:25. 29Looxey Soodomepe keyida gallas diinne geetetiya xuuggiyabay salope bukidi ubbaa dhaysis. 30Asa Na7ay qonciya wodeka hessada hanana.
31“He gallasan karen de7iya oonika keetha giddon de7iyaba ekanaw soo gelopo. Hessadaka, gaden de7iya asi aykoska soo simmofo.#Maato 24:17-18; Mar 13:15-16. 32Looxe machiw akeekite;#Medhe 19:26. 33ba shempiw ashshanaw koyiya asi oonika dhaysana; ba shempiw aathidi immiya oonika I ashshana.#Maato 10:39; 16:25; Mar 8:35; Luqa 9:24; Yoha 12:25. 34Ta hintew odayis; he gallasan nam7u asati issi arsan zin7ana; issoy eketana, hankoy attana. 35Nam7u maccasati wolla gaaccishin iissiya eketana, hankiya attana. 36Nam7u asati wolla gaden goyeysatape issoy eketana, hankoy attana”#17:36: Issi issi maxaafatan paydo 36 deenna. yaagis.
37Enti, “Godaw aw eketanee?” yaagidi oychidosona.
I, “Bawuti de7iya bessan ankoti shiiqoosona” yaagis.
The Word for the World International and The Word for the World Ethiopia