मर्कुस 7
7
रितिरिवाज सम्बन्धि सिछ्या
(मति १५:१-९)
1एक दिन यरुसलेम सहरबान आइलाइ फरिसिलत र केइ धर्म-गुरुलत येसुकर वरिपोरि जम्मा हक्ला। 2येसुराइ कुनइ-कुनइ चेलाल्किन रिति अन्सार हात नधोइके खाइ धर्ल होल्किन देख्ला।
3किनारइभने सेब्बाइ यहुदिलत खास गरिके फरिसिल्किन आफ्ने पुर्खादेखि चलि आइल रितिरिवाज अन्सार हात नधोइके खाइनार कुरो बइखात। 4बजारबान आइल पछि होल्को रिति अन्सार नुहाइके सुद्द हकिके मात्र केइ खाइछत। इन्खाए आने धेरे रितिरिवाज मान्छत, थाल, लोटा र भाडालत पुनि सुद्द पार्छत।
5होइहुदान फरिसिल्किन र धर्म-गुरुल्किन येसुलाइ सोद्ला, “तोर चेलालत पुर्खादेखि चलि आइल रितिरिवाज किनारे बइमानत, र रिति अन्सार सुद्द नहकिके खाइछत?”
6तब येसुन होल्काइ बल्-ल्याक,“यसइयान तोरा कपटिल्को बारेनाइ इत्तिके अगमबानि गर्लाछ,
‘ह्य जातिन मुइलाइ ओठिन मात्र आदर गर्छत,
तर हेल्को हिर्दय मुइबान बद्दुर आछि।
7 हेल्किन बेर्थेनाइ मोर आराधना गर्छत,
किनारइभने हेल्को सिछ्या ता मान्छेल्किन बानाइल बिधि मात्र हो।’ #
यस २९:१३
8 तोरा परमेसोरकर आग्या नमानिकइ मान्छेल्किन बानाइल रितिरिवाज मान्छो।”
9येसुन होल्काइ बल्-ल्याक,“तोरा किन्खा बाठा आछो, आफ्ने रितिरिवाज चालाइलाइ परमेसोरकर आग्यालाइ पन्छ्याइछो। 10किनारइभने मोसान बाज्लाछ, ‘आफ्ने आमा-ब्वालाइ आदर गरो, र जुनिन आफ्ने आमेक-ब्वाकर बिरुद्दनाइ दुस्ट कुरो बाज्छइ होलाइ मारइ ने पर्छइ।’#पर २०:१२;२१:१७; ले २०:९; बेब ५:१६ 11तर तोराल्किन मान्छेल्काइ आफ्ने आमेक-ब्वाकलाइ इन्खा बलइ सिकाइछो, ‘मुइनिन तोराल्काइ सायता बइगर्लनाइ दुख जुन मान, किनारइभने मुइनिन तोराल्काइ दिनार कुरो परमेसोरलाइ दिनार भाकल (अर्थात कुर्बान) गरिसक्लाछु।’ 12इत्तिके तोराल्किन होलाइ आफ्ने आमेक-ब्वाकर सेवा गरइ बइदेओ। 13होइहुदान तोराल्किन चलि आइल रितिरिवाजलाइ पालन गरिके परमेसोरकर बचनलाइ चाइ बेकामकर ठान्छो। अनि इन्खाए आने धेरइ काम तोराल्किन गरिधर्लाछो।”
सुद्द र असुद्द
(मति १५:१०-२०)
14येसुन मान्छेल्को भिडलाइ आफि हक्लनाइ बालाइके होल्काइ बल्-ल्याक,“तोरा सेब्बाल्किन मोर कुरो सुनो र बुजो। 15बाइरबान मानुसभित्र पस्ल कुनइ पुनि कुरोन होलाइ असुद्द पारइ बइसकि, तर मान्छेल्को हिर्दयबान निस्किनार कुरोन पो मान्छेल्काइ असुद्द पार्छइ। 16[जुनकर सुन्नार कान आछि होइनिन सुन्दिक।”]#७:१६ धेरइ जसो भर पर्दो सोरोतनाइ ह्य खन्ड बइपाय।
17येसुन मान्छेल्को भिडलाइ छाडिके घरभित्र पस्लपछि चेलाल्किन येसुलाइ ह्य उखानकर अर्थ केति हो बाजिके सोद्ला। 18येसुन होल्काइ बल्-ल्याक,“केति तोरा अजइ अबुज आछो? जे कुरो बाइरबान मानुसभित्र पोस्छि होइनिन होलाइ असुद्द बइपारि बाजिके तोराल्काइ था बइन्या? 19किनारइभने ह्व होक्र हिर्दयनाइ बया तर पेटनाइ पुग्छि, र पेटबान निस्किके जाइहाल्छि।” इत्तिके येसुन सेब्बे खाइनार कुरो सुद्द हो बाजिके बुजाइदिल्याक।
20येसुन बाज्ले,“मान्छेल्को हिर्दय भित्रबान बाइर निस्किनार कुरोन पो मान्छेल्काइ असुद्द पार्छइ। 21किनारइभने ह्य सेब्बे कुरो हिर्दयबान निस्किछि, जिन्खाए खराब बिचार, बेभिचार गरइ, चोराइना, ज्यान मार्ना, बेस्या काम गर्ना, 22लोब गर्ना, दुस्ट काम गर्ना, झुक्याइना, छाडा हक्ना, डार गर्ना, निन्दा गर्ना, घमन्डि हक्ना, मुर्ख बन्ना। 23ह्य सेब्बे दुस्ट कुरोलत हिर्दय भित्रबान निस्किछि। हेइनिन ने मान्छेल्काइ असुद्द पार्छइ।”
सिरियाकरि गिरिक बेटि
(मति १५:२१-२८)
24येसु ह्व ठउँ छाडिके टुरोस र सिदोनकर सहरनाइ जाइके एउटो घरभित्र पस्ले। ह्य कुरो कुन्नुल्किन था जुनपाइदिखन बाजिके येसुन चाइतेल। तर मान्छेल्किन था पाइहाल्ला। 25होइ बेला एउटि बेटिन येसुकर बारेनाइ सुन्लि र ह्व आइके येसुकर अगाडि घोप्टो पर्लि, किनारइभने होक्रि बेटेकलाइ भुत आत्मा लाग्ल रल्ति। 26ह्व सिरियाकर फोनिकेनाइ जन्मिलि गिरिक बेटि रइलि। होइनिन मोरि बेटेकबान भुत निकाल्देउ बाजिके येसुलाइ बिन्ति गर्लि। 27येसुन होलाइ बलल्ते,“पइला हाइनिन आफ्ने छानाछुनिल्काइ ख्वाइ पर्छइ, किनारइभने हेल्को खाइनार कुरो खोसिकइ कुकल्को अगाडि फ्याङ्दइ ठिक बया।”
28अनि होइनिन येसुलाइ बाज्लि, “हो पर्भु, तर कुकल्किन पुनि ता छानाछुनिल्किन टेबुल हेठ्ठान झार्ल टुक्रालत खाइछत।”
29येसुन होलाइ बलल्ते,“तुइनिन ह्य कुरो बल्ल हुदान तुइ ढुक्कसिन घर जा। तोरि बेटेरबान भुत निस्किके जाइसक्ले।”
30ह्व फर्किके घर पुग्तिन बेटेक खाटनाइ सुतिधर्ल भेटाइलि र भुतचाइ निस्कि जाइसक्ल रइल।
एउटो बहिरा र गुँगो मानुस
31येसु टुरोसबान हिनिके सिदोन हक्तिन डेकापोलिसकर सिमाना हक्तिन गालिल तालनाइ जाइले। 32उछिका मान्छेल्किन एउटो बहिरा र गुँगोलाइ येसु हक्लनाइ आन्ला, र ह्व उप्रान हात धर्दिक बाजिके येसुलाइ बिन्ति गर्ला। 33येसुन होलाइ मान्छेल्को भिडबान एकान्तनाइ लाकाइके आफ्ने अउला होक्र काननाइ लाइले र हातनाइ थुकिकइ होक्र जिब्रोनाइ छुइले। 34अनि स्वर्गदिस हेरिकइ लामो सास फेर्तिन बाज्ले,“इफ्फाता” अर्थात“खोलिजा!”
35उत्तिने खेर होक्र कान खोलल्ते र जिब्रोकर बन्धन फुक्लल्ते र ह्व मजसिन बोलइ लाग्ले। 36अनि येसुन होल्काइ “ह्य कुरो कुनुल्काइ पुनि जुनबल्खन” बाजिके आग्या दिल्याक। तर जत्ता-जत्ता येसुन जुनबल्खन बाजिके आग्या दितेल्याक, झन बढ्ता उत्साहित हकिके होल्किन सुनाइतिन हिन्तेला। 37होलत एकदम अचम्म मान्तिन बाजइ लाग्ला, “येसुन सेब्बे कुरो मजार गर्लाछ। येसुन बहिरालाइ सुन्नार र गुँगोलाइ बोलइ सक्नार बानाइछइ।”
© 2024 (Active), Mother Tongue Translators Society and Wycliffe Bible Translators, Inc. All rights reserved.