Matayo 10

Yesu átuma endumwa sai ekumi ne'biri mwa mulimo

(Mar 3:13-19; 6:7-13; Luk 6:12-16; 9:1-6)

1Lusuku luuma Yesu âmaalaa ebanafunzi* bai ekumi na babiri, era kuberesa ebuashi bwe'kwâmbula ebihwasi, ne'kulamya chira bulwala. 2Esi ndumwa ekumi ne'biri, emasina mabo mu mamano: Emubere i'Simoni ola wásulwaa esina lya Petero, na munyakabo mbu i'Andereya, na Yakobo mwenyi Sebetayo, na munyakabo mbu i'Yowani, 3na Firipo, na Baritolomayo, na Tomasi, na Matayo mufuchisi we'mbarata, na Yakobo mwenyi Alufayo, na Tateo, 4na Simoni wo'mwa chikembe che'Baseloti*, na Yuta Isikariyota, ola wárenganyaa Yesu.

5Esi ndumwa ekumi ne'biri, Yesu era kusituma mwa mulimo. Era kubura'si mbu: «Muténdaa mwáya era mwe'bandu be'sinji mbaa, kanji mùtengiriraa mu'chiro na musi we'Basamariya*. 6Si mundaa mwánaya era mwe'Baisiraeli oshâo, bushi bàli nga mbuli sa sáerire. 7Ne'ra mungénde mwárenga yoshi, mundaa mwáhubanganyisa ebandu mbu: ‹eBwami bo'kwa nguba bulí ofu!› 8Mundaa mwálamya ebalwala, mwánende mwômola ne'bafu, ne'kulamya ebabenzi-benzi, na kunde mwâmbula ebihwasi. Rero, bushi mwèresibwe kwa buha, nenyu mundaa mwâna kwa buha.

9«Mùtekaa chiro na luteya lusibya mwa mifuko yenyu. 10Kanji, mùtekaa hao, nesi njimba ebiri, nesi birato, nesi kachi, bushi kwémire emukosi kunde êresibwa elwêmbo lwai.

11«Mango mungénde mwêngirira mwa musi ábe munene nesi mueke, mwánahonda emundu ola ùngêmerera kubahukasa. Mwánabera mwa mwai kuikira mango mungátenga mwo'yu musi. 12Mango mungénde mwêngirira mu nyumba irebe, mwánalamusa besha'mo mbu: ‹Mubáa ne'bôlo!›#10:12 Ebayuta béndee bálamusanya mbu: «Mubáa ne'bôlo!» 13Akaba besha mwe'i nyumba bàbahuukasise, mubarekeraa obu bôlo. Na akaba banányire kubahuukasa, mufúlukanaa obu bôlo bwenyu. 14Kanji akaba besha mu nyumba irebe nesi besha musi murebe bànganana kubahuukasa na kubomvírisa, muténgaa'mo. Mwa kutenga'mo, mwánakunguta emukungu ola ulí kwa bihando byenyu. #10:14 Mwa Bayuta, ekukunguta emukungu kutenga kwa bihando, kwábaa kulosa kwa bandu bàlikanukire bulio. Kuli kuteta kanji mbu emundu ola wàtumwaa àtachete mwinda wo'la àtumwaa'ko. Somaa Mariko 6:11. 15Kubinali, nábabura kwa mango elusuku lwe'buchinjibusi lukáika, besha oyu musi bakáchinjibusibwa busese kurenza besha Sotomo ne'Komora.»

Ebandu bakálibusibwa bushi na Yesu

(Mar 13:9-13; Luk 21:12-17)

16«Muményaa! Nabátumire nga mbuli mwa kachi-kachi ke'nyishibwabwa. Bushi no'ku, mubáa bákalange nga njoka, kanji mwánaba barembu nga biruka. 17Muchilángaa bushi ebandu bangénde bábeka era muhondo se'baishi be'manja. Abu baishi be'manja, bangénde ba bàhuchisa mwa tuchi mwa mashenge mabo. 18Kanji, bangénde bábeka era muhondo se'bakulu-kulu ne'bami bushi nanyi, chasiya múbe babei banyi era muhondo sabo, ne'ra muhondo se'bandu be'sinji mbaa. 19Si mango bangénde bábeka era muhondo sa'bu bakulu-kulu, muténdaa mwáchibusa mbu: ‹Chi tungáteta nesi kute tungáteta.› Bushi mwe'bi bihangi, Ongo àngaberesa ebinwa bya mungáteta. 20Ne'bi binwa, bitátenge era mwenyu, si eMuchima we'Ho i'ungáteta mwa ndanda senyu.

21«Emundu àngêchisa munyakabo. Ne'she we'mwana àngêchisa emwana wai, ne'bana nabo bangábindukira ebasere babo na kubechisa. 22Ebandu boshi bangábahomba bushi nanyi. Si ola ungásesa emuchima kuikira kwa businda angánunulibwa. 23Mango bangénde bábalibusa mu musi murebe, mwánahaira mu unji. Kubinali, nábabura kwa mutámale kusungula mwa misi yoshi ye'Isiraeli era muhondo nyi Mwana we'Mundu ndasa kufuluka.

24«Emwanafunzi* àtatula àrenzise emukangirisi wai, ne'muanda nai, àtatula àrenzise enawabo. 25Si kukomire emwanafunzi* énde ába nge'mukangirisi wai. Ne'muanda nai, kukomire énde ába nga enawabo. Akaba ena mwa nyumba bàngamukena na kumwěrika mbu i'Belisebuli, #10:25 Belisebuli lìri linji esina lya Wamusimu. rero si kubanganerika na besha mwa mwai emasina mabi busese bacha!»

Ekwôbaa ebandu

(Luk 12:2-9)

26Yesu era kuteta kanji mbu: «Abu bandu, muténdaa mwôbaa'bo. Bushi kutáli kandu kasibya ka kàbishirwe ka katákabihulwe. Kanji kutáli na mwasi asibya ola ùbishirwe, ola utákamenyeke. 27Chira mwasi ola nabáburaa mwa musimya, mundaa mwábala'o changanama esuba limenze. Ne'mwasi ola mwòmvaa mwa byooo, mundaa mwábala'o na murenge munene mwiménze kwa ngangamo se'nyumba. 28Muténdaa mwôbaa ebandu ba bàngeta emubiri oshâo, si bàtangaala kwîta emuchima. Si mundaa mwôbaa Ongo, bushi yeke éte ebuashi bwe'kwîta emubiri ne'muchima mwa muliro we'suku ne'mango.»

29«Ewashe, si bénjire báusa bitera-mbuwa bibiri ku chikoroto chiuma oshâo! Si chiro bacha, kutáli chiro na chitera-mbuwa chiuma cha chìngatowera ala'shi busira ekuhonda kw'Eho wenyu. 30Nenyu, Ongo anátula eshi emuanjo we'mviri senyu soshi. 31Bushi no'ku, muténdaa mwôbaa, bushi mwabo mu mwète mufa munene kurenza bitera-mbuwa binene.»

32«Chira mundu ola wányemerera era muhondo se'bandu, nanyi nyikámwemerera era muhondo sa Tata ola ulí kwa nguba. 33Si ola wányinana era muhondo se'bandu, nanyi nyikámunana era muhondo sa Tata ola ulí kwa nguba.»

Yesu áretaa emalikano

(Luk 12:51-53; 14:26-27)

34Yesu era kuendekera áteta mbu: «Mwáanyisa mbu nábahire kureta bôlo kuno butala? Nyono ndábahire kureta bôlo si malikano! 35Bushi nábahire kulikanya emundu ne'she, ne'munyere na nyina, ne'mwasana na nasala. 36Rero, ebarenda be'mundu, bakánaba besha mwa mwai.#10:35-36 Somaa Mika 7:6.

37«Ola utúla ùsimire eshe nesi nyina kunyirenza, oyola àtangaba mundu wanyi. No'la utúla ùsimire muala wai nesi mwali kunyirenza, oyola nai àtangaba mundu wanyi. 38No'la ùtasa kwêka emusalaba wai anányikulikire, oyola nai àtangaba mundu wanyi.

39«Bushi no'ku, ola wáhonda kulamya ekalamo kai angáesa'ko. Si ola ungáesa'ko bushi nanyi, yeke angáhuba kukabona.»

Elwêmbo lwa ba bakáhuukasa ebanafunzi ba Yesu

(Mar 9:41)

40«Ola wábahuukasa, eri nyi àhuukasise. No'la wànyihuukasise, eri ahúukasise ola wányitumaa. 41Ola wáhuukasa emurebi* bushi àli murebi*, oyola àkêmbibwa nga murebi*. No'la wáhuukasa emundu mubuya-buya bushi àli mubuya-buya, nai àkêmbibwa nga mundu mubuya-buya.

42«Kubinali, nábabura kwa emundu ola ukêresa muuma mwa bano batoto ngumbu ya meshi ma mâha bushi àli mwanafunzi* wanyi, oyu mundu akábona elwêmbo lwai.»

目前選定：

Matayo 10: tbt

醒目顯示

複製

想要在所有設備上保存你的醒目顯示嗎？註冊或登入

了解更多關於 Echilaano Chiyayaya 的詳情

Matayo 10

Matayo 10
的熱門經文

聆聽 Matayo 10

聖經:

Tembo

譯本: Echilaano Chiyayaya - tbt

Matayo 10

Matayo 10

Matayo 10 的熱門經文

聆聽 Matayo 10

聖經:

Tembo

譯本: Echilaano Chiyayaya - tbt

Matayo 10

Matayo 10
的熱門經文