SAN LUCAS 5
5
Achca pescadocunata japishcamanta
(Mt 4.18-22; Mr 1.16-20)
1Shuc punzhami Jesusca Genesaret jatun cucha patapi carca. Taita Diosmanta Jesús chaipi huillacucpimi, uyangapac shamuccunaca t'angarinacushpa paita ñitimurcacuna. 2Shina cacpimi, Jesusca ishcai canoacuna cuchamanta cuchuyachishca, chushaclla shayacucta ricurca. Pescadota japiccunami chai canoacunataca chaipi saquishpa, linchicunata tacshacurcacuna. 3Jesusca shuc canoapimi huichicurca. Chai canoaca Simonpacmi carca. Jesusca Simontaca:
—Cai canoata yacu patamanta ashata caruyachi— nicpimi, ashata caruyachirca.
Jesusca chai canoapi tiyarishpami, tucui chai yacu patapi cac gentecunaman yachachirca. 4Ña tucui yachachishca q'uipami, Jesusca Simontaca:
—Canoapi chaupi cuchaman rishpa, chaipi pescadocunata japingapac linchicunata shitaichic— nirca.
5Shina nicpi Simonca:
—Yachachic, tucui tutapish imata mana japircanchicchu. Shina cacpipish can nishcamanta, linchicunata shitashpa ricushun— nishpami, chaupi cuchaman rishpa shitarca.
6Chashna shitacpica, achca pescadocunami jundarca. Linchicunaca ña lliquirinallami tucurca. 7Chaimanta mana llucchi pudishpami, shuc canoapi caccunata llucchinacuchun maquihuan c'ayarcacuna. Chashna c'ayacpi shamushpaca, ishcai canoacunapimi ucuyanalla tucucta pescadocunataca jundachircacuna. 8Caita ricushpa Simón Pedroca Jesuspac ñaupapi cungurishpami:
—Apunchic Jesús, ñucaca juchasapami cani. Chashna cashcamanta ñucamanta anchurilla— nirca.
9Chashna achca pescadocunata japishcamantami Simonpish, tucui paihuan chaipi caccunapish munai mancharishpa mana amirircacuna. 10Zebedeopac churicuna Jacobopish, Juanpish Simonhuan puriccunami carca. Paicunapish chashna tucushcata ricushpaca, mancharircacunami. Chashna mancharicucpimi, Jesusca Simontaca:
—Ama mancharichu. Canca cunanmantaca pescadocunata japic shinami, gentecunata Taita Diospacman pushamuc cangui— nirca.
11Chashna nicpimi, canoacunata yacu pataman llucchishpa, chaipi tucuita saquishpa, Jesusta c'atishpa rircacuna.
Lepra ung:uihuan cac runata Jesús alliyachishcamanta
(Mt 8.1-4; Mr 1.40-45)
12Chai q'uipa shuc puebloman Jesús chayashca cacpica, lepra*f** ung:uihuan apiyacuc runa Jesuspacman shamushpaca, cungurishpa pambacaman cumurishpaca:
—Ñucata can alliyachisha nishpaca, alliyachinguimanllami— nishpa, mailla mañarca.
13Shina nicpi Jesusca:
—Ari, alliyachisha ninimi. Alliyai— nishpa maquihuan tuparicpica, lepra ung:uica chai ungushca runamantaca anchurircallami.
14Chashna alliyachishpami Jesusca:
—Pi canta alliyachishcataca, pacta piman huillanguiman. Cunanca ri, Israel*f** curaman ricuchigri. Can alliyashcata paicuna ricuchunca, Taita Diosman cuna cashcata Moisés mandashca shinallatac cugringui— nirca.
15Ashtahuanpish ungushcacunata Jesús alliyachishcaca, tucui llactacunapimi punzhanta ashtahuan uyarishpa c'atirca. Chaimantami uyangapacpish, shinallatac ungushcacunata jambichingapacpish achcacuna Jesuspacmanca shamurcacuna. 16Chashna shamucpica paicunamanta caruyashpami, Jesusca shitashca pambapi Taita Diosman mañangapac ric carca.
Mana cuyuricta ruhuac ung:ui japishca runata
Jesús alliyachishcamanta
(Mt 9.1-8; Mr 2.1-12)
17Jesús shuc punzha yachachicucpimi, fariseocunapish,*f** mandashcacunata yachachiccunapish chaipi tiyacurcacuna. Chaicunaca Galilea llactamantapish, Judea llactamantapish, Jerusalén pueblomantapishmi shamurcacuna. Taita Dios paihuan cashcamantami, Jesusca ungushcacunataca alliyachirca. 18Chaimantami maijancunaca mana cuyuricta ruhuac ung:uihuan cac shuc runata chacanapi apamushpa, Jesús tiyacuc huasi ucuman yaicuchishpa, paipac ñaupaman chayachinata yuyarcacuna. 19Chashna yuyashpapish, achca gentecuna chai huasi ucu junda cashcamantami, Jesuspacmanca mana cuchuyai pudircacuna. Chaimantami huasi jahuaman*f** huichicushpa, c'atata pascashpa, ungushcataca huandumushcandic gentecunapac chaupipi Jesuspac ñaupaman uricuchircacuna. 20Tucui shunguhuan paicuna crishcata ricushpami, Jesusca:
—Riqui huahua, cambac juchacunataca ña perdonanimi— nirca.
21Jesús chashna nicpica, chai fariseocunapish, mandashcacunata yachachiccunapish: “Cai runaca, ¿ima cashpatac Dios shina tucushpa Diosta p'iñachicun? Juchacunata pipish mana perdonai pudinchu, Taita Diosllami juchacunataca perdonan” nishpami yuyacurcacuna.
22Paicuna chashna yuyacucta yachashpami, Jesusca:
—¿Ima nishpatac cancunapac shungupica chashna yuyacunguichic? 23Cai runataca, ¿ima ninatac ashtahuan jahualla canga? ¿‘Cambac juchacunata ña perdonanimi’ nina, mana cashpaca ‘jatari, rilla’ ninachu ashtahuan jahualla canga?— nishpa tapurca. 24Runa Tucungapac shamushca*f** ñucaca cai pachapi juchacunata perdonaclla cashcata cancuna yachachunmi, cai runataca: ‘Jatari, canta huandumushca chacanata apashpa, cambac huasiman rilla’ nini— nirca.
25Chashna nicpimi, chai ungushca runaca jatarishcahuan, tucui gentecuna ricucucpi paita huandumushca chacanata apashpa, Taita Diostaca “sumacmari cangui” nishpa huasiman rircalla. 26Jesús chashna ruhuacpica, tucui chaipi caccunami munai mancharinacushpa, mana amirishpa: “Jaicapi mana ricushcatami ricunchic” nishpa, Taita Diostaca “sumacmari cangui” nircacuna.
Leví shuti runata Jesús “jacu” nishcamanta
(Mt 9.9-13; Mr 2.13-17)
27Jesusca chai q'uipa chaimanta llucshishpaca, Roma*f** llactaman impuestota japic Leví runa impuestota chasquina mizapi tiyacuctami ricurca. Paita ricushpaca:
—Jacu ñucahuan— nirca.
28Chashna nicpimi, Levica jatarishpa tucuita saquishpa, Jesusta c'atishpa rircalla.
29Leví runa Jesushuan rishpaca, paipac huasipimi jatun micuita ruhuarca. Chai huasipica, impuestota japic tauca runacunapish, shinallatac caishuc juchayuccunapish micucurcacunami. 30Chaita ricushpa fariseocunapish,*f** mandashcacunata yachachiccunapish Jesuspac yachacuccunataca:
—¿Ima nishpatac cancunaca impuestota japiccunahuanpish, ñucanchic ch'icanyachishca caishuc juchayuccunahuanpish tandanacushpa micucunguichic, ubiacunguichic?— nishpa tapurcacuna.
31Chashna nicpimi Jesusca:
—Mana ungushca allicunaca jambictaca mana mashcanchu, ashtahuanpish ungushcacunallami jambicta mashcancuna. 32Ñucaca cashcata ruhuaccunataca mana c'ayac shamurcanichu, ashtahuanpish juchayuccunatami Taita Diosman cutirichun c'ayac shamurcani— nirca.
Jesús yachachishcaca mushuc cashcamanta
(Mt 9.14-17; Mr 2.18-22)
33Jesús chashna nicpimi, chai tapuccunaca:
—Bautizac Juanpac yachacuccunapish, fariseocunapac*f** yachacuccunapish tauca cutinmi ayunashpa, Taita Diosman mañancuna. ¿Ima nishpatac cambac yachacuccunaca mana chashna ruhuashpa micuncunalla, ubiancunallari?— nircacuna.
34Chashna nicpimi Jesusca:
—Cazarana bodaman c'ayashcacunataca Novio paicunahuan cacpica, ¿ayunachinguichicmanchu? 35Novio illaclla cana punzhacuna chayamucunmi. Chai punzhacunapimi ayunangacuna— nirca.
36Chashna nishpaca, Jesusca cai yuyaita japina parlocunahuanpish cashnami parlarca:
—Pipish mushuc churanamanta lliquishpa, mauca churanataca mana remendanchu. Chashna ruhuacpica, mushuc churanaca mana alli saquirinmanchu. Shinallatac mushucca maucapica mana alli ricurinmanchu. 37Shinallatac cunanlla ruhuashca vinotapish caramanta ruhuashca mauca capachucunapica, pi mana churanchu. Chashna churacpica, cunanlla ruhuashca vinoca mauca capachucunata tucyachinmanllami. Chashna tucyachicpica, vinopish, capachucunapish yangamantami canman. 38Chaimantami vinopish, capachupish ama ima tucuchun, cunanlla ruhuashca vinotaca mushuc capachucunallapitac churana. 39Pipish p'ucushca vinota ubiacca, llullurac vinotaca mana ubiasha ninmanchu. P'ucushcami ashtahuan alli ninmanmi— nirca.
Quichua Cañar Nuevo Testamento © United Bible Societies in Ecuador, 1996.