SAN LUCAS 3
3
Shitashca pambapi Bautizac Juan huillashcamanta
(Mt 3.1-12; Mr 1.1-8; Jn 1.19-28)
1Ña chunga pichca huatata jatun mandac Tiberio Roma*f** llactata mandacucpimi, Poncio Pilatoca Judea llactata mandacurca. Herodesca Galilea llactata, paipac huauqui Felipeca Iturea llactata, shinallatac Traconite llactatapishmi mandacurca. Shinallatac Lisaniasca Abilinia llactatami mandacurca. 2Anaspish, Caifaspish Israel*f** curacunata mandac curacunami carcacuna. Chai punzhacunapimi Zacariaspac churi Juan shitashca pambapi cacpi, Taita Diosca: “Ñucamanta huillagri” nirca. 3Chaimantami Juanca tucui Jordán yacu cuchulla llactacunapica:
—Juchayuc cashcamanta llaquirishpa, Taita Diosman cutirichic, shinallatac bautizarichic. Chashna ruhuacpimi, Taita Diosca cancunapac juchacunata perdonanga— nishpami, huillashpa puricurca.
4Juan chashna huillacpica, Diosmanta ñaupa huillac Isaías huillashcami pactashca. Isaías huillashpaca:
“Shitashca pambapi
shuc caparishca uyarishpaca:
‘Quishpichic shamuna ñanta allichichic.
Quingu ñancunatapish derechaichic.
5Tucui uchilla, shinallatac
jatun urcucunapish pambayachishca,
huaicucunapi jundachishca,
pamballami canga.
Huishtu ñancunapish derechashca,
shinallatac ucu jahua ñancunapish
sumacta allichishcami canga.
6Tucui gentecunami
Taita Dios ima shina
quishpichicuctaca ricungacuna’ ” nishcami.
7Bautizarisha nishpa shamuc gentecunataca, Juanca cashnami nirca:
—¡Culebra shina millai gentecuna! Taita Dios p'iñarishpa, yallita ñalla llaquichigricushcamanta cancuna quishpirichunca, ¿pitac huillarcayari? 8Ashtahuanpish cancuna Taita Diosman cutirishca cashcatatac ricuchingapacca, alli p'ucuc grano shina allita ruhuashpami ricuchina canguichic. ‘Ñucanchicca ñaupa taita Abrahampac huahua huahuacuna cashcamantaca quishpirishunllami’ nishpaca, ama yuyacunguichicchu. Ashtahuanpish ñucaca ninimi: Taita Dios cai rumicunatapish Abrahampac huahua huahuacunata ruhuasha nishpaca, ruhuanmanllami. 9Jachaca ñami yura chaquipi churashca. Taita Diosca mana p'ucuc yuracunataca sapipi p'itishpa, ninapi rupachic shinami ruhuanga— nirca.
10Shina nicpi chaipi caccunaca:
—Shinashpaca, ¿imatatac ruhuana canchic?— nishpa tapurcacuna.
11Chashna nicpi Juanca:
—Maijanpish ishcai churanata charicca, mana charicmanmi shuc churanataca cuna can. Shinallatac maijanpish micunata charicca, mana charicmanmi carana can— nirca.
12Shinallatac Roma*f** llactaman impuestota japiccunamanta maijan runacunapish bautizarisha nishpa shamushpaca:
—Yachachic. ¿Imatatac ñucanchicca ruhuana canchic?— nishpami tapurcacuna.
13Chashna tapucpi Juanca:
—Impuestotaca mashnata japina cashcallatami japina canguichic— nirca.
14Shinallatac maijan soldadocunapish:
—Ñucanchicca, ¿imatatac ruhuana canchic?— nirca.
Shina tapucpimi Juanca:
—Pitapish macanahuan manchachishpa, mana quichunachu canguichic. Cullquita japingaraicu, pitapish mana yanga juchanchinachu canguichic. Mashna cullquita japicushcallahuan cushilla caichic—nirca.
15Chai llactapi causaccunaca: “¿Taita Dios cachana Quishpichic Cristochu canga?” nishpami, Juantaca nicurcacuna. 16Chashna nicucpimi, Juanca tucui chaipi caccunataca:
—Ñucaca cancunataca yacullahuanmi bautizani, ashtahuanpish ñucapac q'uipa shamucmi Diospac Espirituhuanpish, shinallatac ninahuanpish cancunataca bautizanga. Paica ñucata atishpa, ima allita ruhuasha nishpapish ruhuacllami. Ñucaca paipac ushuta huatashcallatapish mana pascaipacmi cani. 17Cai pachapi causaccunataca, huairachinahuan shamushpa trigomanta t'amuta ch'icanyachic shinami, ñalla ch'icanyachinga. Allicunataca, grano huacaichina huasipi tandachic shinami huacaichinga. Shinallatac millaicunataca, t'amuta rupachic shinami jaicapi mana huañuc ninapi rupachinga— nirca.
18Chashna yuyachinacunahuan, shinallatac shuctac rimaicunahuan cunashpami, Juanca chaipi cac gentecunamanca alli huillaitaca huillarca. 19Chashnallatac mandac Herodestapish, paipac huauqui Felipepac huarmi Herodiashuan apanacushpa causacushcamanta, shinallatac tucui mana allicunata ruhuashcacunamantami “mana allichu” nishpa, Juanca rimarca. 20Chashna tucui laya millaita ruhuashca jahuapish, Herodesca Juantaca carcelpimi churarca.
Jesusta bautizashcamanta
(Mt 3.13-17; Mr 1.9-11)
21Juanca Herodes manarac carcelpi churacpimi, tucui chaipi cac gentecunata bautizacushpaca Jesustapish bautizarca. Jesús ña bautizarishpa Taita Diosman mañacucpimi, jahua pacha pascarirca. 22Chashnallatac Diospac Espíritu paloma shina jahuamanta shamushpa, paipac jahuaman uricumucuctami ricurca. Shinallatac jahua pachamanta rimashpaca:
—Canmi ñuca c'uyashca Churi cangui. Canllami ñucataca cushichingui— nishcami uyarirca.
Jesucristopac ñaupa taitacunapac shuticunami
(Mt 1.1-17)
23Jesús huillanata callarishpaca, ña quimsa chunga huatayuc shinami carca. Gentecuna Jesustaca Josepac churi cashcatami yuyarcacuna. Joseca Elipac churimi carca. 24Elica Matatpac churimi carca. Matatca Levipac churimi carca. Levica Melquipac churimi carca. Melquica Janapac churimi carca. Janaca Josepac churimi carca. 25Joseca Matatiaspac churimi carca. Matatiasca Amospac churimi carca. Amosca Nahumpac churimi carca. Nahumca Eslipac churimi carca. Eslica Nagaipac churimi carca. 26Nagaica Maatpac churimi carca. Maatca Matatiaspac churimi carca. Matatiasca Semeipac churimi carca. Semeica Josepac churimi carca. Joseca Judapac churimi carca. 27Judaca Joananpac churimi carca. Joananca Resapac churimi carca. Resaca Zorobabelpac churimi carca. Zorobabelca Salatielpac churimi carca. Salatielca Neripac churimi carca. 28Nerica Melquipac churimi carca. Melquica Adipac churimi carca. Adica Cosampac churimi carca. Cosamca Elmodampac churimi carca. Elmodamca Erpac churimi carca. 29Erca Josuepac churimi carca. Josueca Eliezerpac churimi carca. Eliezerca Jorimpac churimi carca. Jorimca Matatpac churimi carca. 30Matatca Levipac churimi carca. Levica Simeonpac churimi carca. Simeonca Judapac churimi carca. Judaca Josepac churimi carca. Joseca Jonanpac churimi carca. Jonanca Eliaquimpac churimi carca. 31Eliaquimca Meleapac churimi carca. Meleaca Mainanpac churimi carca. Mainanca Matatapac churimi carca. Matataca Natanpac churimi carca. 32Natanca Davidpac churimi carca. Davidca Isaipac churimi carca. Isaica Obedpac churimi carca. Obedca Boozpac churimi carca. Boozca Salmonpac churimi carca. Salmonca Naasonpac churimi carca. 33Naasonca Aminadabpac churimi carca. Aminadabca Arampac churimi carca. Aramca Esrompac churimi carca. Esromca Farespac churimi carca. Faresca Judapac churimi carca. 34Judaca Jacobopac churimi carca. Jacoboca Isaacpac churimi carca. Isaacca Abrahampac churimi carca. Abrahamca Tarepac churimi carca. Tareca Nacorpac churimi carca. 35Nacorca Serucpac churimi carca. Serucca Ragaupac churimi carca. Ragauca Pelecpac churimi carca. Pelecca Heberpac churimi carca. Heberca Salapac churimi carca. 36Salaca Cainanpac churimi carca. Cainanca Arfagadpac churimi carca. Arfagadca Sempac churimi carca. Semca Noepac churimi carca. Noeca Lamecpac churimi carca. 37Lamecca Matusalenpac churimi carca. Matusalenca Enocpac churimi carca. Enocca Jaredpac churimi carca. Jaredca Mahalaleelpac churimi carca. Mahalaleelca Cainanpac churimi carca. 38Cainanca Enospac churimi carca. Enosca Setpac churimi carca. Setca Adanpac churimi carca. Adanca Diospac huahuami carca.
Quichua Cañar Nuevo Testamento © United Bible Societies in Ecuador, 1996.