SAN LUCAS 13
13
Taita Diosman cutirinamanta
1Jesús chashna yachachicucpimi, maijancuna shamushpaca:
—Galilea llactamanta runacuna Taita Diosman animalcunata cushpa huañuchicucpimi, mandac Pilatoca paicunatapish huañuchichun cacharca. Chashna huañuchicpica, chai runacunapac yahuarca animalcunapac yahuarhuanmi chapurirca— nishpami huillarcacuna.
2Chashna huillacpi Jesusca:
—Chashna huañuchishcacunaca, ¿‘Galilea llactapi causac caishuc gentecunata yalli juchayuccuna cashcamantami chashna tucushca canga’ yuyanguichicchu? 3Mana yalli juchayuccuna cashcamantachu chashnaca tucushca. Cancunapish juchayuc cashcamanta llaquirishpa, Taita Diosman mana cutirishpaca, tucuillatacmi huañushpa, llaquita apanguichic. 4Shinallatac Siloepi jatun torre tigracpi, chunga pusacta ñitishca huañuccunaca, ¿‘paicuna tucui Jerusalenpi causaccunamanta yalli juchayuccuna cashcamantami chashna llaqui tucushca canga’ yuyanguichicchu? 5Mana chaimantachu chashna tucushca. Cancunapish juchayuc cashcamanta llaquirishpa, Taita Diosman mana cutirishpaca, tucuillatacmi huañushpa, llaquita apanguichic— nirca.
Mana p'ucuc higo yuramanta chimbapurashpa Jesús parlashcamanta
6Jesusca cai yuyaita japina parlohuanmi cashna nirca: “Shuc runami paipac allpapi higo yurata charirca. ‘Ñami p'ucushca canga’ nishpa ricungapac rishpaca, chushac yurallapimi tuparirca. 7Chashna imata mana tarishpaca, chagrata cuidactami: ‘Ñami quimsa huatata cai yurapica ima mana p'ucushcata ricuni. ¿Imapactac cai allpapi yanga shayacungallari? P'itishpa shitai’ nirca. 8Chashna nicpimi, chagrata cuidacca: ‘Amito, jallmashpa huanuta churashpa ricungapac, cai huatahuan shuyai. 9Chashna ruhuacpica, p'ucungapishchari. Mana p'ucucpica, p'itichinguillami’ ” nirca.
C'urcuyashca huarmita samana punzhapi Jesús alliyachishcamanta
10Samana punzhapimi*f** israelcuna*f** tandanacuna huasipi Jesús yachachicurca. 11Chai ucupica chunga pusac huatata c'urcuyashpa, ima shina mana derecharic huarmimi tiyacurca. Chai huarmica supai japishca cashcamantami, chashna ungushca carca. 12Chai huarmita ricushpami, Jesusca paipac cuchuman c'ayarca. Chashna c'ayashpaca:
—Huahua, ñami cantaca alliyachini— nirca.
13Chashna nishpa paipac uma jahuapi maquita churacpica, chai huarmica ña derecharishcahuan, Taita Diosta “allimari cangui” nircallami. 14Chaimanta tandanacuna huasipi mandacca, samana punzhapi Jesús alliyachicta ricushpaca, munai p'iñarishpami chai huasipi tandanacushcacunataca:
—Semanapica, sucta punzhallatami imata ruhuangapacca charinchic. Chai punzhacunapimi jambichingapacca shamuna canguichic, samana punzhapica mana— nirca.
15Shina nicpi Apunchic Jesusca:
—¡Mishqui shimi, jayac shungucuna canguichic! Samana punzha cacpipish, cancunapac huagrata, burrotaca, ¿manachu huatashcamanta cacharishpa, yacuchingapacca apanguichic? 16Cai huarmicarin, ñaupa taita Abrahampac huahua huahuapuramantami. Paitaca Satanasmi*f** chunga pusac huatata ung:uihuan huatashpa charicushca. Paitaca samana punzha cacpipish, ¿manachu ung:uimanta cacharichina cani?— nirca.
17Jesús chashna nicpica, tucui paita p'iñaccunacamanmi pingaihuan saquirircacuna. Ashtahuanpish chaipi cac tucui gentecunaca Jesús imatapish allita ruhuacta ricushpaca, munaimi cushicurcacuna.
Mostaza muyumanta chimbapurashpa Jesús parlashcamanta
(Mt 13.31-32; Mr 4.30-32)
18Chashna nishca q'uipami Jesusca: “Taita Dios mandacucca, ¿ima shina cashcatatac nisha? ¿Ima parlohuan chimbapurashpatac ‘cai shinami, chai shinami’ nishpa parlasha? 19Taita Dios mandacucca, mostaza uchilla muyuta shuc runa paipac allpapi tarpucpi, huiñashpa jatunyac shinami. Chashna jatunyacpica, zhutacunapish chai ramacunaman shamushpaca c'uzharincunallami” nirca.
Levaduramanta Jesús chimbapurashpa parlashcamanta
(Mt 13.33)
20Shinallatacmi Jesusca: “Taita Dios mandacuctaca, ¿imahuantac chimbapurashpa nisha? 21Taita Dios mandacucca, tandata ruhuac shuc huarmi quimsa taza jarinata ashalla levadurahuan chapushpa, tucui chaputa punguillichic shinami” nirca.
Quichqui punguta yaicunamanta
(Mt 7.13-14,21-23)
22Jerusalenman Jesús ricushpaca, pueblocunapipish, llactacunapipish yachachishpami ricurca. 23Chashna ricucpi, shuc runa tapushpaca:
—Apunchic Jesús, ¿ashacunallachu quishpirigrin?— nirca.
Shina nicpi Jesusca:
24—Quishpirishpa Taita Diospacman chayangapacca, quichqui punguta yaicunata yuyaichic. Achcacuna chaita yaicusha nicushpapish, mana yaicui pudingacunachu. 25Huasiyuc jatarishpa, punguta huichcashca q'uipaca, cancuna canzhapi saquirishpaca, yaicushun nishpami: ‘Huasiyuc, amito, punguta pascai’ nicunguichic. Chashna nicpi huasiyucca: ‘Pichari canguichic, mana ricsinichu’ ningami. 26Chashna nicpi cancunaca: ‘Canllahuantac micushpa puric carcanchicca. Canllatacmi ñucanchic llactacunapipish yachachicurcangui’ nicunguichicmi. 27Chashna nicpipish huasiyucca: ‘¿Manachu uyanguichic? ¡Caimanta anchurichic, millaita ruhuaccuna! ¡Cancunataca mana ricsinichu!’ ningami.
28Ñaupa taita Abrahamtapish, Isaactapish, Jacobotapish, ñaupa tucui huillaccunatapish Taita Dios maipi mandacucpi tiyacucta ricushpa, cancuna canzhaman shitashca cashpaca, quirucuna canirishpami huacacunguichic. 29Taita Dios maipi mandacucpi micungapac, tiyaringapacca tucui tiyashca llactacunamantami tandanacungacuna. 30Chaipica cunan ‘allimi canchic’ niccunaca, mana alli nishcami canga. Shinallatac cunan mana alli nishcacunaca, alli nishcami canga— nirca.
Jerusalén pueblopi causaccunata llaquishpa, Jesús huacashcamanta
(Mt 23.37-39)
31Chai punzhallatacmi maijan fariseocuna*f** Jesuspacman chayamushpaca:
—Mandac Herodesca canta huañuchisha nicunmi. Caimanta utca rilla— nircacuna.
32Chashna nicpimi, Jesusca cashna nirca:
—Richic. Chai atuc shina, vivo tucushcataca cashna nigrichic: ‘Riqui. Cai punzhacunaca supaicunata llucchisha, ungushcacunatapish alliyachisha. Minchacunami, ñuca ruhuanataca tucuchisha’ ninmi, nigrichic. 33Shina cacpipish Diosmanta huillactaca mana maipipish huañuchincunallachu, Jerusalenllapimi huañuchincuna. Chaimanta cunanpish, cayapish, minchacunapish ñuca ricushca ñantaca rinallatacmi cani.
34¡Aij, Jerusalenpi causaccunalla! Cancunaca Diosmanta ñaupa huillaccunataca huañuchiccunami canguichic. Diosmanta huillachun cachashcacunatapish rumicunahuan shitaccunami canguichic. Cancunataca tauca cutinmi mama huallpa huahuacunata c'ayashpa ucllac shina, tandachisha nircani. Chashna tandachisha nicucpipish, cancunaca mana uyarcanguichicchu. 35Chaimantami cancunapac huasica shitashca saquiringa. Cancunaman huillanimi: Taita Dios cachashca, ñuca cutimucpi ‘allimari cangui’ ningacaman, ñucataca manatac ricunguichicchu— nirca.
Quichua Cañar Nuevo Testamento © United Bible Societies in Ecuador, 1996.