Yoane 6
6
Etaŋiyo Yesu Aati Esiha Atomwana Miet
Mt 24:13-21; Mk 6:30-44; Lk 9:10-17
1Ihalu erre huna allaŋ Yesu aari tole an anya’to Galilea, ifurani inyi bwo fe Tiberia. 2Bwo fe ijifatye aati arryai nehalu honyi, nyo igonyuni isi etamijanita hun obolori hun ihanio inyi jyo hul oŋwai’to. 3Odok ati Yesu jyo obo adoŋe bwo isugai inyi iko leyiyanak honyi. 4Ihwania ilyaha neyom ono Allaŋan Anjelo, inyi neyom eneittok ono laati Yudea. 5Ofyala Yesu ette igonyuna aati hul olwaji bebe ofwonni jihonyi ette jaran jyo Filipo, ?Aja adi enyyaŋa hohoi emunio oŋida laati hulo oŋiye? 6Ikyana Yesu ihwania ikemyere Filipo nyo omijak inyi nanyo on ojo inyi ehanio. 7Itarraŋ Filipo ojo, Ara dwadi bu arobia hun olwaji obeŋi fe oremehini inyyaŋari emunio jo oŋida isi daŋ ababo omojuni minoŋ, minoŋ. 8Abotye olo leyiyanak honyi al anya Andrea illa Simone Petro ojo, 9Owon dini obo leito iko emunio honyi miet bwo naham arrihai. ?Oremehini ati hunia jyo aati arryai ihwa hulo? 10Attati Yesu jaran, Iramana aati hetetoŋohi. Obolo amaji miyaŋ dia, tania itoŋoi laati ifau. Arai alyawa esiha atomwana miet. 11Omoju Yesu hodwo imunio ette jaran humo jyo Hollum ette harana jyo hul owoniari’to iko aham bu ihwa an awaharik isi. 12Al ifoŋi aati ojo Yesu jyo leyiyanak honyi, Osuduhana ofitot, hotobyaŋahi orrohojari. 13Osuduhani ati isi ette itafutana nafejin ’tomon harrihai to ofitot huno emunio miet hun ofituni jyo hyodwo wati oŋiye. 14Ninya igonyuni isi etamijani eneittok an ihanio Yesu, ojori laati hulya, Ahode atulo alya inyi eyani sayyo ol ottu adi lifau.
15Ati omijak Yesu jo ofwonni adi isi inefuna inyi ihananiere inyi ahobu. Tania ette inyi iluny lidoŋe hama.
Adaha Yesu ta Ahide Hari
Mt 14:22-27; Mk 6:45-52
16Ara akikai ette leyiyanak honyi fwatan ihari eneittok. 17Teyya ette isi dahina itogol bwo itterye isi allaŋan hari many imiji Kapernaum. Iryok attari ati hobeŋ Yesu afany jihosi. 18Bwo fe itteryo aari efolyahita nyo ohuco oyyami bebe. 19Al iguroroi isi alamarai ihiji hari igonyuni isi Yesu adaha ta ahide hari ol ottu ajihosi. Ette isi baŋi bebe. 20Ati ojo inyi jihosi, Hebaŋata, ani alya. 21Ette isi ŋatana inyi hettu itwa togol. Teyya teyya ette atogol fanyan ilotifor hari jyo amaji an awahi isi ifwarri.
Attifya Wati Yesu
22Nya motye igonyuni laati hul arasai’to aŋati hari tole atogol abotye on odiha’to hama. Ette isi mijana hobeŋ Yesu olo iko leyiyanak honyi ati leyiyanak hama ofwoi ta ahwattek hosi. 23Ofwonni omuk atogoli to Tiberia ette isi isid jyo amaji oŋole oŋiyerek aati emunio ihalu isyarana Hobu ahumo jyo Hollum. 24Ninya igonyuni eluluŋ wati jo abeŋi Yesu iko leyiyanak honyi teyya, ette isi isuruna itogoli, ette fwatan Kapernaum ittifyari Yesu.
Yesu Emune Ono Nesu
25Ninya orumani isi inyi aŋati hari tolya ojori isi jihonyi, ?Hettiyanani, dwo baya ifany iye dini? 26Itarraŋ Yesu jihosi ojo, Eramak ni itai ahode ahode, ibyaŋata tai ittifyati ani te eram ono etamijanita ati ara te eram ono emunio hun iŋiyete tai ittata ifoŋ. 27Hegyamati ta aŋiyo on otuhuno adi ati igyamati ta aŋiyo an ara’to ta nesu on osyo fur. Isyo adi Lonyi tulo aŋiyo ania jihatai, nyo isyo Hollum Monye jihonyi adwaran. 28Ifiye isi inyi ojori, ?Aŋai adi egyama hohoi egyama ono Hollum? 29Itarraŋ Yesu jihosi ojo, Egyama ono Hollum ana, oŋida iruhoto jyo alya al ifahu inyi. 30Ati ojori isi jihonyi, ?Anani etamijani an ilo iye ihanio oŋida hohoi egonyu ette iruk jihoi? ?Anani egyama an ijo iye ihanio? 31Oŋiye nya hohonyok hohoi emune itimore ihwa igyoroni nya ojo, “Isyo Hollum jihosi emune on ottu’to t’edou iŋiyere.” 32Ojo Yesu jihosi, Ahode ahode eramak ni itai, obyaŋara Mose isyo jihatai emune on ottu’to t’edou, ati Monyoŋ isyo jihatai emune ania an ara’to ahode. 33Nyo emune an isyo Hollum ottu t’edou ette isyarana esu ifau. 34Ojori isi jihonyi, Hobu oduloi isyoryo jihohoi emune ania fur.
35Itarraŋ Yesu jihosi ojo, Ani emune ono nesu. Ol ottu’to jihoŋ obeŋ adi inyyak niama bwo fe al iruk’to jihoŋ obeŋ adi inyyak ibwoto. 36Ati ihwa eramak dwo ni itai dwadi igonyuna tai ani ibyaŋata tai iruhoto. 37Laati daŋ hul isyo Monyoŋ jihoŋ ofwonni adi jihoŋ bwo fe ol ottu’to jihoŋ abeŋ adi ni efuha addi. 38Abeŋ ni attu t’edou ifau ihaniere awahan hoŋ ati attu ni ihaniere awahan ono lya al ifahu’to ani. 39Awahan ono lya al ifahu’to ani ana, jo oŋida ani abeŋ etalitohi hulya daŋ hul isyo inyi jihoŋ. Ati oŋida ani isi etubuhu iholoŋ an isidori afau. 40Nyo awahan ono Monyoŋ ana, jyo hulya hul omijye’to Lonyi bwo fe iruhi jihonyi owoni iko nesu on osyo fur bwo etubuhu adi ni isi iholoŋ an isidori afau.
41Tania ette laati Yudea itteryo amwaŋa Yesu nyo ojo inyi jo, Ani emune on ottu’to t’edou. 42Ette isi jaran, ?Obyaŋara Yesu olo lonyi Yosefo? ?Ebeŋ hohoi emijak monyonyi iko honyonyi? ?Aŋai ojo inyi ihwania jo attu inyi t’edou? 43Itarraŋ Yesu jihosi ojo, ?Anyo ihahayati tai ta ahwattek hatai? 44Obeŋ obo ottu jihoŋ arari Monye al ifahu’to ani orihu inyi. Attadi ni itubuhuna inyi iholoŋ an isidori afau. 45Igyoroni nya eyak sayyo jo, “Ittiyenio adi Hollum isi daŋ.” Hul itaniŋuni bwo fe iyiyanai jyo Monye, ofwonni hya jihoŋ. 46Obeŋ obo atulo igonyu Monye arari lya ol ottu’to jyo Hollum, inyi hama igonyu Monye. 47Ahode ahode eramak ni itai, al iruk’to owon iko nesu on osyo fur. 48Ani emune ono nesu. 49Oŋiye nya hohonyok hatai emune itimore ati oyei isi. 50Oremehini laati ŋiyo emune ana on ottu’to t’edou ifau bwo obeŋi isi oyei. 51Ani emune ono nesu on ottu’to t’edou ifau. Ol oŋiyo’to emune ana isu adi tulaŋ, bwo fe ahwan hoŋ inyi emune an esyo ni ta nesu ono laati.
52Tania ette Yudea mwaŋa ta ahwattek hosi ojori, ?Aŋai oremik atulo olo isyo ahwan honyi iŋiyere? 53Ojo Yesu jihosi, Ahode ahode eramak ni itai al ibyaŋata tai iŋiyete ahwan ono Lonyi tulo bwo fe ibyaŋata imatati nooto honyi, obeŋ obo nesu itwajin hatai ’tuŋ. 54Alya ol oŋiyo’to eriŋo hwan hoŋ bwo fe amata nooto hoŋ owon iko nesu on osyo fur, bwo fe etubuhu adi ni inyi iholoŋ an isidori afau. 55Nyo eriŋo hwan hoŋ inyi aŋiyo an ara’to ahode, bwo fe nooto hoŋ ara ariŋ an amatai ahode. 56Alya ol oŋiyo’to eriŋo hwan hoŋ, bwo fe amata nooto hoŋ ogolik inyi jihoŋ bwo fe ni agolik jihonyi. 57Ihwa ifahu Monye al isu’to ani bwo ni ette isu to Monye, bwo ol oŋiyo’to ani isu toni. 58Ara ana emune on ottu’to t’edou ifau. Obeŋ inyi orrijori iko emune ono hohonyok hatai inya oŋiye isi bwo arasai yetyo. Ol oŋiyo’to emune ana isu adi fur tulaŋ. 59Ikyana Yesu ekyanita huna al ittiyenio inyi ihaji imojit imiji Kapernaum.
Nekyanita Huno Nesu on Osyo Fur
60Ninya itaniŋuni isi ana ojori omuk hulo leyiyanak honyi jo, Ogol ekyana ana. ?Ŋai adi itaniŋu inyi? 61Omijak Yesu ta ahwan honyi jo omwaŋai leyiyanak honyi inyi te ettiyenio ana ette inyi jaran jihosi, ?Itamedeyuk ekyana ana atajya hatai? 62?Aŋai adi al igonyuna tai Lonyi tulo odok jyo amaji inya awanari inyi beryen? 63Isyo oloyiri nesu. Obeŋ ahwan ihanio obo ariŋ. Nekyanita hodwo ekyana ni jihatai arai isi huno oloyiri iko nesu. 64Ati hobeŋi omuk hulatai iruhi. Nyo omijak Yesu t’etteri hul obeŋi’to iruhi jihonyi bwo fe omijak inyi lya ol ottu adi itinyyaŋana inyi. 65Tania ojo inyi jo, Te eram ana eramak ni itai obeŋ obo ottu jihoŋ arari al orihuno Monyoŋ inyi.
66Tania ette omuk leyiyanak honyi bwanyaru bwo obeŋi inyyahi daha ikonyi. 67Ifiyo Yesu hulo ’tomon harrihai ojo, ?Ara bwo itai, iwahata bwo fe itai acaharu? 68Itarraŋ Simone Petro ojo, ?Jyo ŋai adi efwo hohoi, Hobu? Owoni nekyanita huno nesu on osyo fur jihoi. 69Bwo fe eruk hohoi bwo emijak jyo, iye Aliboroni olo Hollum. 70Itarraŋ Yesu jihosi ojo, ?Abeŋ nya ni itai anyimu ’tomon harrihai bwo fe obo alatai ihanio ehanita huno Sitan? 71Ikyana Yesu ihwania to Yuda lonyi Simone Iskariote nyo ara Yuda obo olo ’tomon harrihai al ara’to adi ahetinyyaŋani Yesu.
This text was originally published by the British and Foreign Bible Society in 1969.