Yoane 4
4
Ekyana Yesu iko Aŋotte Samaritanani
1Ihwania omijak Hobu Yesu jo, itaniŋuni Farisei jo onyimu inyi leyiyanak bwo fe ibatisyo isi agalik Yoane. 2Ara dwadi bu leyiyanak honyi ibatisye ati obeŋ ara Yesu ta ahwan honyi. 3Tania obusak inyi Yudea ette caharu Galilea. 4Bwo oŋida inyi olo otto fau Samaria. 5Tania afany inyi imiji Sikara ono Samaria an ilyaha limana ninya isyo Yakobo jyo lonyi honyi Yosefo. 6Bwo owon dia ahirri ono Yakobo. Tania itoŋo Yesu ifau iger hirri al aniama ta adaha honyi. Ara nya afanni.
7Ninya ottu aŋotte Samaritanani iwohori aari ojo Yesu jihonyi, Esyo ani omuk amat. 8Nyo ofwoi dwo leyiyanak honyi imiji inyyinyyaŋarai aŋiyo. 9Itarraŋ aŋotte Samaritanani ojo, ?Aŋai imojo iye aari jihoŋ, iye Ayudetanani bwo ni Asamaritanani? (Nyo oliwarik Yudea Samaritahyen.) 10Itarraŋ Yesu ojo, Kuyya imijak iye esyoryo Hollum bwo fe ŋai alya ol ojo dwo jihoi esyo ani omuk amat oŋida ifiyo iye inyi bwo isyo adi inyi jihoi aari hun isui’to. 11Ojo aŋotte jihonyi, Leittok, obeŋ obo ariŋ jihoi iwohuniere bwo fe owudo ahirri. ?Irumak adi iye aari hun isui’to aja? 12?Igalik iye hohonyi hohoi Yakobo linya isyo’to hohoi ahirri ana bwo fe amatatyo inyi ta ahwan honyi iko lonyirok honyi bwo anyanya honyi? 13Itarraŋ Yesu jihonyi ojo, Hul amatai’to daŋ jyo aari ana inyyahi adi ibwoto. 14Ati al amata’to aari hun esyo ni jihonyi obeŋ adi inyyak ibwoto ’tuŋ. Nyo odulori adi aari hwa itwa honyi ihwa olotilik on obeŋ oyoho bwo iyaŋuno jihonyi esu on osyo fur. 15Ojo aŋotte jihonyi, Leittok esyo ani aari hwa oŋida ani abeŋ enyyak ibwoto, bwo abeŋ enyyak daha dini iwohori.
16Ojo Yesu jihonyi, Ilo iloŋo habi hoi bwo ifwanna dini. 17Itarraŋ aŋotte ojo, Obeŋ ani ’le. Ojo Yesu jihonyi, Ibis iye ijari, Obeŋ ani ’le. 18Nyo iwatta nya iye iko alyawa miet bwo alle al iwatta’to ikoye ihwania obeŋ ara habi hoi. Ara nekyana odwo ikyana iye ahode. 19Ojo aŋotte jihonyi ojo, Leittok, amijak ni jo ira iye aheyani sayyo. 20Itahabuye hohonyok hohoi Hollum itwa doŋe ana bwo itai Yudea ijatta ara Yerusalem amaji an itahabuyerek aati daŋ Hollum. 21Ojo Yesu jihonyi, Hanioŋ, iruho nekyana hoŋ nyo ottu adi oloŋ an ibyaŋari adi iye ilari itwa doŋe kuyya Yerusalem itahabuyere Hollum. 22Itai aati Samaria, itimoti tai anyo itahabuyete tai ati emijak hohoi Yudea anyo etahabuyo hohoi nyo ottu etalahuna to Yudea. 23Idwoŋ oloŋ ihwania an itahabuyerek laati ahode Monye to oloyiri iko te elahode. Nyo ottifya Monye laati ihwa hya irari ahetahabwok honyi. 24Ara Hollum oloyiri bwo hul itahabuye’to inyi oŋida itahabuye inyi to oloyiri iko te elahode. 25Ojo aŋotte jihonyi, Amijak ni jo ottu adi onyimot olo Hollum al iloŋoi Kristo. Al attu inyi iramak adi inyi hohoi erre daŋ. 26Ojo Yesu jihonyi, Ani el ekyana’to jihoi, ani alya.
27Hekyana inyi ofwonni leyiyanak honyi ette illilliha nyo ikyana inyi iko aŋotte, ati obeŋ obo olosi ifiyo inyi jo, ?anyo iwak iye? ?Anyo ikyanati tai ikonyi? 28Tania ette aŋotte ania busana atobok hari honyi ette caharu itwa miji. Ette ikyana jyo laati ojo, 29Ifwanna, efwo mijo atulo al iramak’to ani erre daŋ hunya ehanio ni. ?Inyi adi Kristo lya? 30Ihwania odyotoi isi to miji ette fwatan imijyere inyi.
31Hofwonni isi to miji, illilloŋoi leyiyanak inyi ojori, Hettiyanani, iŋiye aŋirya. 32Ati itarraŋ inyi, Owon aŋirya hoŋ an aŋiyo ni an ibyaŋata tai imijana. 33Ette leyiyanak itteryo ahahaya ojori, ?Iyak dwo obo atulo inyi obo aŋiyo? 34Ojo Yesu jihosi, Aŋiyo hoŋ inyi ihaniere awahan ono lya al ifahu’to ani bwo fe ituhoniere egyama honyi. 35?Ibyaŋata tai ijatta jo, Ihalu ayafajin aŋwan ette adyoŋo ’tuna? Eramak ni itai, imijyete, ofyalati amatta nyo adori isi bwo aremehini ta adyoŋo. 36Ifwotutta adyoŋoni aduma honyi bwo ittuttubuno aŋer jyo nesu on osyo fur. Jo oŋida layani hinyomo iko adyoŋoni omunoi arabotye. 37Te eram ana obis ekyana on ojo’to, Oyehi obo bwo obo odeŋu. 38Efak ni itai idyoŋori matta hun ibyaŋata tai igyamati. Igyamai omuk bwo itai ifwotuna erre hun igyamuni isi.
39Iruhi aati arryai to miji Samaria jihonyi nyo te etamijani ono aŋotte ania on ojo, Iramak inyi ani erre daŋ hunya ehanio ni. 40Tania afanyi Samaria ette isi mojo inyi itoŋori ikosi ette inyi itoŋo dia oŋitek arrihai. 41Tania inyyahi omuk iruk arryai al itaniŋuni isi nekyana honyi. 42Ette isi jaran jyo aŋotte, Ihwania ebeŋ hohoi eruk te ekyanita hoi hama nyo etaniŋu hohoi inyi ta ahwattek hohoi, bwo fe emijak hohoi ahode jo inyi alya Etalahani wati daŋ hutta fau.
Etaŋidaryo Yesu Lonyi Eleittok
43Ihalu oŋitek hunia arrihai olo Yesu teyya Galilea, 44nyo ikyana Yesu ta ahwan honyi jo obeŋ etahabuyo jyo eyani sayyo imiji hosi. 45Ninya attu inyi Galilea ette laati Galilea muno bebe ette iyaro inyi imiji nyo owoni nya isi daŋ iyom otto Yerusalem ette isi igonyuna erre daŋ hunya ihanio Yesu.
46Tania ottu inyi imiji Kana ono Galilea ninya maji iloicere inyi aari ahari ajalaŋi. Owon obo eleittok olo hobu dia ol oŋwai lonyi honyi imiji Kapernaum. 47Itaniŋu inyi jo ottu Yesu to Yudea, Galilea, ette inyi leten jihonyi bwo olwaha jihonyi jo, Waŋ, ilo itaŋida lonyi hoŋ nyo ilyaha inyi aye. 48Ojo Yesu jihonyi, Al ibyaŋata tai igonyuna etamijanita iko edwariti ibyaŋata tai iruhoto. 49Ojo eleittok jihonyi, Hobu waŋ, efwo kokwak hobeŋ lonyi hoŋ oye. 50Itarraŋ Yesu, Ilo ati, isu lonyi hoi. Tania ette atulo alya iruk ekyanita hun ikyana Yesu jihonyi, ette leten. 51Hadaha inyi tekoi ette irwaŋanio iko legyamak honyi hul ojori, Isu lonyi hoi. 52Ette inyi ifiyo isi, ?To noloŋ baya itteryo inyi aŋidari? Itarraŋi isi, Ŋoleŋole ayir oloŋ ol otoryai ette anahan hwan busana inyi. 53Tania ette monye giluna inyi amaji holoŋ ania oŋole ikyanari Yesu jihonyi ojo, Isu lonyi hoi. Ette inyi iruk iko aati hutta haŋ honyi jyo Yesu. 54Etamijani ana etarrihi an ihanio Yesu, lattu inyi to Yudea, Galilea.
This text was originally published by the British and Foreign Bible Society in 1969.