Yoane 2
2
Alomone Imiji Kana
1Ninya allaŋi oŋitek arrihai owon alomone imiji Kana ono Galilea, bwo fe owon honye Yesu dia. 2Iloŋuni bu Yesu iko leyiyanak honyi jyo alomone ana. 3Ette aari ajalaŋi byaŋan bwo honye Yesu ikyana jihonyi ojo, Abeŋi aari ajalaŋi jihosi. 4Itarraŋ ati Yesu jihonyi ojo, Iyaŋ, heramak ani egyama hoŋ. Hobeŋi oŋitek hoŋ ottubai. 5Ojo honyonyi jyo legyamak ojo, Ihaniete nerre daŋ hun iramak adi inyi jihatai. 6Osyehini fe dia amoco ille hun ofiniarik ihwa an ihanierek aati Yudea. Oremehini isi ababo ta asofia miet kuyya bu ille. 7Ikyana Yesu jihosi ojo, Itufutana naari limoco. Ette isi itufutana many lihala bebelet. 8Ette Yesu jaran jihosi ojo, Ihwania owohuniete, iyatti jyo labusuti. Ette isi iyaro. 9Iniŋ labusuti naari hun olwoi ahari ajalaŋi ati otimo inyi tai ofwonni aari hwa, ati omijani legyamak hyodwo owohunie’to aari. Tania iloŋo inyi layamani, 10ette jaran ojo, Aati daŋ isyori do aari ajalaŋi hun oyiji’to bwo fe al ifoŋi laati isyori hun ofyahaji’to. Idehi dwadi iye aari ajalaŋi hun oyiji’to many iko ihwania. 11Ihanio Yesu etamijani netteri ana imiji Kana ono Galilea italeyeuniere etahwo honyi bwo leyiyanak honyi ette iruk jihonyi.
12Latuhunie erre hunia alo inyi Kapernaum iko honyonyi. Ofwoi bwo fe illarak honyi iko leyiyanak ikonyi attati isi itoŋo dia oŋitek kai.
Italibo Yesu Aji Imojit Eneittok
Mt 21:12-13; Mk 11:15-18; Lk 19:45-46
13Ihwania ilyaha neyom ono Yudea an ifurani Allaŋan ono Anjelo, ette Yesu leten Yerusalem. 14Itwa haji imojit eneittok orumak inyi etinyyaŋak itinyyaŋai esuŋ, akyoro iko awolosin bwo atobok gurusi itoŋoi iger teremejahyen. 15Ihuhum inyi allyoto to ofi ette inyi ifuhara isi addi to haji. Ifuha inyi akyoro iko nesuŋ bwo itisarrahi agurusi ette sulara ateremejahyen. 16Ojo inyi jyo etinyyaŋak wolosin, Iyatti daŋ addi. Heloitoto aji Monyoŋ ahaji hahalak. 17Attati leyiyanak honyi giluna jo igyoroni nya jojo, “Ifut adi inyi iko efiriwa ta aji honyi.” 18Ette Yudea ifiye inyi ojori, ?Anani etamijani an itahutak jihohoi elaballok hoi ihaniere erre huna? 19Itarraŋ Yesu jihosi, Al itatturoto tai aji ana aduhok adi ni inyi to oŋitek hunihoi. 20Itarraŋi Yudea ojori, Oduhoni nya aji imojit eneittok ana ta aŋasi atomwana aŋwan heille. ?Aŋai ijo iye jo aduhok adi ni inyi to oŋitek hunihoi? 21Ati ikyana inyi ta ahwan honyi an ara’to ihwa aji. 22Ihalu ebuhuna honyi to ye ette leyiyanak honyi giluna nekyana ania ette isi iruk nekyanita hunya igyoroni igyerita bwo nekyanita hunya ikyana Yesu.
Omijak Yesu Aati Daŋ
23Ninya awanari inyi Yerusalem te eyom ono Allaŋan Anjelo iruhi arryai ifure honyi nyo igonyuni isi etamijanita hun ihanio inyi. 24Ati obeŋ inyi itiyihi ahwan honyi jihosi nyo omijak inyi aati daŋ. 25Obeŋ inyi owak obo iramak inyi eram wati nyo inyi ta ahwan honyi omijak anyo owon itwa tulo.
This text was originally published by the British and Foreign Bible Society in 1969.