मात्ति 3
3
बाप्टिस्मा कापि युहान्नाङाना पारचार
(मारकुस १:१-८; लुका ३:१-१८; युहान्ना १:१९-२८)
1आम्टेप्मा बारखा एङ्स्वा बाप्टिस्मा कापिबा युहान्ना ओलोडुना याप्मि याहुदिया छेट्राङि साक्चा उयुङ्निना डेन्ङि नाड्डे पारिक् पारचार चोक्सा टाए, 2“खानि पापलाम्मा काएल्-काबु लिसानिउङ् माङ्हाङ्लेङ् नोक्टानि, पोङ्भोने टोनालोग्ङिना मुलुक् नेट्टाङ् टाइसे॥”#मात्ति ४:१७; मारकुस १:१५ 3याप्मा बारखा पाइले यासैया माङ्काटाङा ना युहान्नाङाना बारेङि नाड्डे माट्टुए–
“साक्चा उयुङ्निना डेन्ङि ठिबाङ् याप्मि टाराङ्-टाराङ् राट्सा पिग्येट्,
‘टाङ्बाङाना लाम्बो टेयार चोगानुम्, उन् लाम्टिना लाम्बो नुलोक् पेमाडान् चोगानुम्॥’”#यासैया ४०:३
4युहान्नाङा उँटा ओयामुङ्लाम्मा फाबालाक् लोट्लिङ् वाडुना डाना, हिट्नुङ् ओकाम्बोरङि ओहोॽवाङाना फोॽइ रेक्टुगा डागा, हिट्नुङ् माङ्घिरिॽवा लोक् जाङ्गालि वेसुमाङाना ओवा चोगा डागा॥#२ हाङ् १:८ 5यरुसलेम खालाङ्गा हिट्नुङ् सोब्बे याहुदिया छेट्रा, हिट्नुङ् यारदान होङ् योम्बो-टोम्बोगा सोब्बे याप्मिचि उन् सोरि ओटाए, 6हिट्नुङ् आ-आप्पे पापलाम्मा काएल्-काबु उलिसागा लोङ्सा युहान्नाङा हिट्नागा यारदान होङ्ङि बाप्टिस्मा पिडुचे॥
7टरो फारिसि याप्मिचि हिट्नुङ् सादुकि याप्मिचि छुम्माङिगा जोम् याप्मिचि बाप्टिस्मा लाट्माउङ्सा ओआबागा निसुचिउङ् हिट्नागा लोडुचे, “हाउ बिखालु ओप्पु गाड्डेगा दुस्टा याप्मिचिगा छालेट्चि, माङ्हाङ्लाम्मा ठाना उकुन्जिरिक्वालाम्मा पिम्मा खाप्मा पोङ् खानिङा निङ्ग्वा आचोगुमेना?#मात्ति १२:३४; २३:३३ 8छेम्बा डोक्, खानिङा आ-आप्पे आचोगुम्गा पापलाम्मा काएल्-काबु आलिसिगा भोने, हिट्नाड्डे गाड्डे डोक् चोगानि॥ 9हिट्नुङ् ‘आन्याँम्टे आब्राहामङाना ओछालेट्चि गोलो टे’ पिक्सा माङ्हाङ् उपुन्जिरिॽवालाम्मा होम्मा हिडिटिङा नुङ् मिट्नेनिन्, पोङ्भोने आङा खानि लोनाँनि, माङ्हाङ्ङा नागा लिङ्गेॽवालाम्मा चा आब्राहाम ओछालेट्चि चोक्मा हिडुटु॥#युहान्ना ८:३३ 10हाट्ले डोक् सिङ् उभुङ्मा ओजाराङि माङ्हाङ्ङा न्याएङाना फेन्डिक्ङा ठोग्मा टेयार चोगुएसुए॥ हिट्डेउङ् ओचेट्नुलोक् टुल्फुल ओकेङुन्गा सोब्बे सिङ् उभुङ्माचि ओटाङुचिउङ् मिङि ओठेन्डुचिचि॥#मात्ति ७:१९; लुका ३:९
11“छेम्बा डोक्, खानि पापलाम्मा काएल्-काबु आलिसिउङ् माङ्हाङ्लेङ् आनोक्टिगा रिङ् निमेप्मा लोङ्सा आङा खानि चुवाङा बाप्टिस्मा पिनाँनि, टरो आङाना ओएङ्स्वा टायुगेट्ना आङा नुङ्ना साक्तिसालि वाहेट्, आङाउम्टे उन्ङाना ओलाङ्सुप् खुमा चा याङ्खान्ना नुना याप्मि माखाक्॥ हिट्नुङ् उन्ङा डोक् खानि सेङ्सेङ्ना हाङ्सा लोक् मिङा बाप्टिस्मा मापिडिटि॥ 12उन्ङा चासोङ् चेङ्मा लाउङ्सा नाङ्गोलोक् उमुक्ङि याङुएसुए, हिट्नुङ् उन्ङा ओखाला ओचेट्नुलोक् फेगुटु, हिट्नुङ् चासोङ् चेङ्ढुङ् ढुङ्गुरिङि युङ्सुटु, टरो उभुसुॽवाउम्बाक् खोना बेला चा सिनिना मिङि उडुडिसुटु॥”
येसुङा चुवाङि बाप्टिस्मा लाडुना
(मारकुस १:९-११; लुका ३:२१-२२; युहान्ना १:३२-३४)
13हिट्नुङ् येसु गालिल छेट्रालाम्मा युहान्नालाम्मा बाप्टिस्मा लाट्मा यारदान होङ्ङि होन्डा टाए॥ 14टरो युहान्नाङा बाप्टिस्मा लाट्मा छाक्सा उन् नाड्डे लोडुए, “आङि पोङ् बाप्टिस्मा लाट्मा आटाएना? आङा गोलो खान्लाम्मा बाप्टिस्मा लाट्मा कोन्युक् टे॥”
15येसुङा उन् नाड्डे लोडुए, “हाट्ले नाड्डे डोक् उलियाक्, पोङ्भोने नाड्डेउङ् डोक् माङ्हाङ्ङाना सोब्बे उनिङ्ग्वाङिना रिङ् आनि युमा कोन्युक्॥”
हिट्नुङ् युहान्नाङा उरिङ् खेम्सुङ् उन्ङा येसु बाप्टिस्मा पिमा टेन्डे॥
16हिट्नुङ् येसुङा बाप्टिस्मा लाडुनामे उन् चुवालाम्मा भारा होन्डे॥ हिट्नुङ् हिट्ना बेला डोक् टोनालोग् ओङ्से, हिट्नुङ् उन्ङा माङ्हाङ्ङाना हाङ्सा ढुकुरङाना उरुप्ङि उन् उठुङ्ङि ठाया उङ्साना निसुए॥ 17हिट्ना बेला डोक् टोनालोग्लाम्मा ठिक् साब्दा मुक्टे, “ना आङाना आमायालु छा, उन्लोक् आड्डिक् टुक्लोक् आचाप् टाइसे॥”#उत्पति २२:२; छाम्लोमा छाप्ला २:७; यासैया ४२:१; मात्ति १२:१८; १७:५
© 2023, Wycliffe Bible Translators, Inc. and Nepal Bible Society