Mataio 6
6
Ualare la maso toaita mai kofa
1Kiva leitia, eve haura leita mai la karu ve soso voa ere ofae eavai vei, levi leitia. Lōfeare leitita, a—, e eve kauri voa peita Oa voa tava levi ovai roi.#Mat 23:5
2Soka a meru miaraita lea mea, ave omopa voa u la levi fōfōaia, usoso aiera‐aiera karu sa leita lōfeare sunako voa aea karikara pisiri voa, karu sa erero marase ari vei. Okofa ara ero o la moi, Ere ereve tava farakeka la ovaita reha. 3A—, ao, a meru la miaraita lea mea, ave mai toare sa leita lea etau, ave mai ava la lei levi ore leiti vei. 4A miaraita meru murufa lei miaraita, a—, murufa voa ofae eavaita ave lea Oa sa tava aro miarai roi.
5Aea a Ualare la veveu toaita lea mea, a aiera‐aiera karu feare levi leitia; ere sunako voa aea otiharo lakalaka voa Ualare la veveu toai vei soi pavai haikaeaita, ereve mai karu sa ofae eavai vei. Okofa ara ero omoi, ere ereve tava ovaita reha.#Luk 18:10–14 6A—, ao, a Ualare la veveu toaita lea mea, ave iri lalava voa oropi, utape sasauka, ave murufa peita Oa la veveu toaia, aea murufa voa ofae eavaita ave lea Oa sa tava aro miarai roi.
7A Ualare la loki leitita lea mea, o kerorikerori rauapo levi aria, usoso toruipi hariaharia karu feare, ipi ereve haiiri ereve lea loki o la Ualare sa mapai roi ereve o rauapo eavia. 8A—, ereve mai feare levi leitia, ipi eve Oa e sa haikaeaita lea etau ore, e arero loki omopa leiti auke leitita lea soa voa. 9Soka Ualare la loki leita mai mōfeare leitia:
Elave Oa kauri voa,
ave rare safu lei taivotai meava;
10ave basileia lei foreraia;
ave haikaeaita mai mearovaeka voa leitia, kauri voa ta lōfeare.
11Sare sare ve larietau iso sare elaro miaraia.
12Elave kaiae ve tava la felaukea mutapaia,
ela ta elaro kaiae leitita karu ve tava la felaukea mutapaita lōfeare.
13Vuteaita mea voa elaro levi lariōvaia,
a—, maealolo voa elaro fareōvi lei makuri leitia.
14Ipi e karu ve kaiae la felaukea mutapaita, a—, eve kauri Oa eve kaiae ta felaukea mutapai roi.#Mak 11:25–26 15A—, e karu ve kaiae la felaukea mutapai auke leitita, a—, eve kauri Oa eve kaiae ta levi felaukea mutapai roi.
16E larietau avoha leita lea soasoa voa, soso levi paroroaia, aiera‐aiera karu feare, ipi ere ereve soso lei maealolo leititore, ereve larietau avoha mai karu voa muiai vei. O kofa ara ero omoi, ere ereve tava ovaita reha. 17A—, ao, a larietau avoha leitita lea mea, ave harofave teoru sa vevetia, aea ave soso maukaia; 18ipi a avoha lei meita lea mea, karu aro lōfeare vei ofae levi eavai roi, a—, Ualare sa haria, murufa lei meita ave lea Oa; aea murufa lei ofae eavaita ave lea Oa sa tava aro miarai roi.
19Eve pisoso mearovaeka voa levi toea maravi roroava, mōvoa ifo, aea sirisiri sa hasiava vovea, aea mōvoa torea leita karu tofapi torea lei vovea.#Iak 5:2–3 20A—, eve pisoso kauri voa toea maravi roroava, lōvoa ifo, sirisiri ita hasiavai sore, aeata lōvoa torea karu ta tofapi torea leiti sore. 21Ipi ave pisoso etau leavoa siseita ave haiiri ta lōvoa eaeava roi.
22Maea ve lamepa ofae reha. Ave ofae lareva leitita, a—, ave maea foromai ovava leiti roi. 23A—, ave ofae maealolo leitita, a—, ave maea foromai murumuru leiti roi. Lea vei ovava ave iri voa murumuru leitita a—, are murumuru kofa leiti roi.
Haikavora levi leitia
(Luka 6:13; 12:22–31)
24Karu farakeka aea papukaru orakoria ve sarufa tivi leitita ore kao; ipi are aea la kaifa leiti roi, aea la haikakare leiti roi; ō mōfeare varo, are aea la toari meava roi, aea la are kōutoa meava roi. E Ualare ita moni ita tivi fareho topiari leitita ore kao.
25Lea vei ara ero o la moi, eve makuri vei haikavora levi leitia ipi larietau lekōru la lari roi, aea ma lekōru la lari roi, aea ipi eve maea vei puta lekōru la mopai roi. Ipi makuri ve eite are arori voa, larietau are ipi voa, aeata maea ve eite are arori voa, puta are ipi voa. 26Furuka ori la haiiri seseōvaia; ere mere vipai sore, ere fare ta sarapai sore, ere larietau sitoa voa ta toeai sore, a—, eve kauri Oa sa erero ta savua vovea. Eve eite sa ori seika la sapatai kao ei? 27E karu leisa, are haikavora vei, areve makuri ve savori topiaraita ore ei?
28Soka e puta vei haikavora leipeta ipi levea? E furuka tola merava ve pupuri la ofae eavaia, ereve mai leafeare asa vovea, ere heafo leiti sore, aea puta ta sari sore. 29A—, ara ero o la moi, Solomono areve sosorusosoru voa, puta ereve lōfeare mopai kao.#1 King 10:4–7; 2 Basil 9:3–6 30Soka sukaerereai taheka karu e, Ualare furuka ve kavuru la lōfeare mopaita, aea lea kavuru iso sare mōvoa, aea vevere a toea sari roi, are ero ta puta lareva ita levi mopai roi ei?
31Lea vei e o haikavora ita mō levi aria, Ela lekōru la lari roi? aea ela ma lekōru la lari roi? aea ela lekōru la mopai roi? 32Ipi lea etau toruipi hariaharia karu sa eli vovea; ipi e haikaeaita lea etau foromai eve kauri Oa sa ore leititore. 33A—, areve basileia aea areve haura ita la omopa elia, aea lea etau foromai ero topiarai roi. 34Soka e vevere ve etau vei haikavora levi leitia, ipi vevere areve elore etau vei haikavora leiti roi. Iso sare ve haisora rauapo iso sare voa haria ovaia.
Published by the Bible Society of Papua New Guinea in 1983.