Rut 3
3
Rut nor Boas ni saam trigu hati
1Ni leolban iid, Noemi dega la ni hiin heu manuri, "Rut, tempu raat soub, au nae maen iid naa nee la o, oid o leob nei uma kain rasik, manura o leob mori seneda. Ka manbae?
2Fliik kodkoed ma. O hii anoin maen iid gala Boas too ka? Ura fe nee hati la o, oid o leob loi trigu ni hiin serbius seirgaa ni hoho. Ura sao nor aem, ois au mane baefe maet soub. Hoda uri roo rini hii la ni saam trigu hati. Boas meit hii la ni la-ura. 3Au akar manuri: O la riu telo, fois mina megi nor huut hena baefe kode, oid o duu la ni saam trigu hati. Mahee ganaan raat Boas aa-eun meit soub, hina ura leob fei o ni la-ura. 4Aa meit soub, ura hii la boe. O fei kodkoed, ura boe her bae. Arfiil ura boe soub, o la ni la-ura, laek ni kafoit i nee sinaal la ura, i o boe fedeis ura ni oe. Boas taad ura ni lisan, manuri ura hii dega la o, sabiid fe o tenki fun."
5Rut ataan, "Kode. Au hii fun tuir manura." 6I ura duu la ni saam trigu hati. I ura fun tuir meit sabiid fe ura ni kai ruu.
7Arfiil Boas aa-eun meit soub, ura senti besu. I ura la boe ni trigu bou ni seri. Ganaan raat ura mata hae, Rut la not-not ni Boas ni hati. I ura laek kafoit ois Boas ni oe, i ura boe ni la-ura. 8Ni hoda tuu, Boas blee. Arfiil ura tagael lolo, ura heleeh, deislaa nei hiin iid boe bael ni ura ni oe. 9I Boas tuug la ura, "seen fe uri?"
Rut ataan, "Au Rut, iit ata hiin. Mahee am-nai fe nei 'direitu naa seul togout' au. [Ura man am-nai fe nei direitu kaben nor au, oid nee bei-ana la au mane baefe maet soub]. Manura au tuug la am-nai taa au nor kafoit eha, man sinaal iid iit akar kaben didi nor au."#Ezequiel 16:8
10I Boas heleeh ura meit dega, "Au tuug la NAI nee bensaun la iit! Iit leob nae maen ulkoil room baefe soi ka kiak ni uri, mahee iit ba fun iid ura. Iit artuub kode! Deislaa iit atuud doim nor respeitu la iit mane baefe maet soub ni sao room. Iit hua-lala kode kiid uri, tuu faklau siil muna iit atuud la iit kai Noemi. 11Deis manura fe iit ba leob matau! Au hii fun tuir iit akar meit. Balikan anoin rini, deislaa roo tuu meit ni sidade uri room taad soub dega, iit uri hiin iid ke hua-lala kode nor melema ubu. 12Mahee au hii nei naam iid naa dega, au iit mane baefe maet soub ni sao, au fe 'nei direitu naa seul togout' iit. Mahee nei roo iid baefe fedeis faklau au. Manura ura fe nei direitu naa kaben nor iit.#Rut 2:20 13Au atuud saal manuri: hoda uri iit hela ni uri lea. Ada man au la kase nor ura. Se ura akar naa kaben nor iit, ba nam iid. Mahee se ura boi, au jura oid NAI Maromak mori ni gala, au rasik fe hii kaben nor iit. Iit lisan dega, au 'fe seul togout' iit. Leob la boe ni la-ura lea raat leol sae."
14I Rut boe ni Boas ni oe. Ni ada bus rae fuu buti, Rut blee soub. Deislaa Boas dega soub, "Ba kode se roo taad hiin iid ma ni saam trigu hati. 15Ma, lui iit kafoit la au oid fois trigu." I ura fois trigu ni nukat loba haet liim-nai-ida la Rut ni kafoit. I ura hu tuul la ni Rut ni kabaas. Boas meit suli la ni aldeia.
16Arfiil Rut raat ni uum, ni kai tuug, "Namoro mansaba?"
Rut nee taad meit sabiid fe Boas fun la ura, 17i ura dega, "Boas fe nee trigu uri ma au. I Boas meit dega, 'Iit ba leob suli la iit kai nor lima mamu.' "
18I Noemi ataan, "Doloo soub! Agora o ganaan manhati, deislaa Boas akar teis teor ura i boi ganaan deis soub. Doloo ura akar teis ni leolban kiid ura didi."
© 2023 Wycliffe Bible Translators Inc