मत्ती 6
6
दान चो बारे ने सिक्या
1“खबड़दार राहा! तुमी मानेमन के दकातो काजे आपलो धरम चो काम नी करा, नाहले आपलो सरग चो बुआ ले काई बले फल नी पाआसे।” 2“ऐईकाजे जिदलदाय तुय दान करसे, तेबे आपलो पुरे तुरी नी बजाव, जसन कपटी, सभामन आउर खोरीमन ने करू आत, बल्ले लोग हुनमन चो बड़ाई करोत। मय तुमचो ले सते बलेंसे कि हुनमन आपलो ईनाम पाऊन चुकला। 3मान्तर जिदलदाय तुय दान करसे, तेबे जोन तुचो उजा हाथ करेसे, हुनके तुचो डेबरी हाथ नी जानुक सको। 4बल्ले तुचो दान गुपत रओ, आउर तेबे तुचो बुआ जोन गुपत ने दकु आय, तुके ईनाम देयदे।”
पारथना चो सिक्या
5“जिदलदाय तुय पारथना कर से, तेबे कपटीमन चो असन नी हो, कसनबल्लोने लोगमन के दकातो काजे आराधना घरमन ने आउर सड़कमन चो मोड़या थाने उबा होऊन भाती पारथना करतोर हुनमन के अच्छा लागु आय। मय तुमचो ले सते बलें सें कि हुनमन आपलो ईनाम पाऊन चुकला। 6मान्तर जिदलदाय तुय पारथना कर से, तेबे आपलो बाकरा ने जा; आउर कपाट ढ़ाकुन भाती आपलो बुआ ले जोन गुपत ने आसे पारथना कर। तेबे तुचो बुआ जोन गुपत ने दकेसे, तुके ईनाम देयदे। 7पारथना करतो समया दुसर जातिमन चो असन बकर-बकर नी करा, कसनबल्लोने हुनमन समजु आत कि हुनमन चो खुबे बोललो ने हुनमन चो सुना जायदे। 8ऐईकाजे तुमी हुनमन चो असन नी बना, कसनबल्लोने तुमचो बुआ तुमचो मांगतोर ले पयले ची जानेंसे कि तुमचो काय-काय जरूरतमन आय।”
9“आउर तुमी ऐ रीति ले पारथना करा:
‘हे आमचो बुआ, तुय जोन सरग ने आशीष; तुचो नाव पवितर माना जाओ।’
10‘तुचो राज ऐओ। तुचो इच्छा जसन सरग ने पुरा होऊ आय, असने धरतनी थाने बले होओ।’
11‘आमचो दिनभर चो रोटी आजी आमके देस।’
12‘आउर जोन परकार आमी आपलो अपराधिमन के छमा करलु से, असने ची तुय बले आमचो अपराधमन के छमा कर।’
13‘आउर आमके परीक्षा ने नी आन, मान्तर खराप ले बचाव; (कसनबल्लोने राज आउर पराकरम आउर महिमा हरमेशा तुची ची आय।’” आमीन।)
14“ऐईकाजे अगर तुमी माने चो अपराध छमा करा से, तेबे तुमचो सरग चो बुआ बले तुमके छमा करेदे। 15आउर अगर तुमी मानेमन चो अपराध छमा नी करासे, तेबे तुमचो बुआ बले तुमचो अपराध छमा नी करेदे।”
उपास चो सिक्या
16“जिदलदाय तुमी उपास करा, तेबे कपटीमन चो असन तुमचो मुंह थाने मुरमुरा नी छाऊ रवो, कसनबल्लोने हुनमन आपलो मुंह बनाऊन रऊ आत, बल्ले लोग हुनमन के उपासी जानोत। मय तुमचो ले सते बलें सें कि हुनमन आपलो ईनाम पाऊन चुकला। 17मान्तर जिदलदाय तुय उपास कर से तेबे आपलो मुण्ड थाने तेल लगाव आउर मुंह धो, 18बल्ले लोग नाई मान्तर तुचो बुआ जोन गुपत ने आसे, तुके उपासी जानो। ऐ हाल ने तुचो बुआ जोन गुपत ने दके से, तुके ईनाम देयदे।”
सरग ने धन रूंड़ा करा
19“आपलो काजे धरतनी ने धन रूंडा नी करा, जोन थाने कीड़ा आउर काई नशाऊ आत, आउर जोन थाने चोर सेंध लगाऊ आत आउर चोरू आत। 20मान्तर आपलो काजे सरग ने धन रूंडा करा, जोन थाने ना तो कीड़ा आउर ना काई नशाऊ आत, आउर जोन थाने ना चोर सेंध लगाऊ आत आउर ना चोरू आत। 21कसनबल्लोने जोन थाने तुचो धन आसे हुता तुचो मन बले लगु रयदे।
देंह चो दिया
22“देंह चो दीया आँईक आय: ऐईकाजे अगर तुचो आँईक छुकछुका आसे, तेबे तुचो सपाय देंह बले उजर होयदे। 23मान्तर अगर तुचो आँईक घिन-घिना रयदे, तेबे तुचो पूईतराय देंह बले अंधार होये दे; ऐई कारन हुन उजर जोन तुचो थाने आसे अगर अंधार होयदे तेबे हुन अंधार भारी बड़े होयदे!
काई गोठ चो चिन्ता नी करा
24“कोनी माने दुय मालिकमन चो सेवा नी करूक सके, कसनबल्लोने हुन गोटक ले बईर आउर दुसर ले मया संगायदे, नाहले गोटक ले मिलुन रयदे आउर दुसर के तुच्छ जाने दे। तुमी माहापुरू आउर धन दुनो चो सेवा नी करूक सकास। 25ऐईकाजे मय तुमचो ले बलेंसे कि आपलो जीव चो काजे ऐ चिन्ता नी करा कि आमी काय खाऊंदे आउर काय पीऊंदे; आउर ना आपलो देंह चो काजे कि काय पिंदुदें। काय जीव भात ले, आउर देंह फटीई ले बडुन भाती नुआय? 26बादरी चो चड़ीईमन के दका! हुनमन ना तो बुने सोत, ना काटु आत, आउर ना बेड़ामन ने सकलु आत; फेर बले तुमचो सरग चो बुआ हुनमन के खुआयसे। काय तुमी हुनमन ले जादा मल्या नुआहास? 27तुमचो ने कोन आसे, जोन चिन्ता करून आपलो उमर ने गोटक घड़ी बले बड़ाऊक सके?
28“आउर फटीई चो काजे केंव चिन्ता करे सास? सोसन चो फुलमन उपरे धिआन करा कि हुनमन कसन बाडु आत; हुनमन ना तो मसागत कर सोत, ना काटे सोत। 29तेबले बले मय तुमचो ले बलेंसे कि सुलेमान बले, आपलो पुईतराय धनमाल ने हुनमन थानले काचीई असन फटीई पिन्दुन नी रलो। 30ऐईकाजे जिदलदाय माहापुरू भाटा चो लाटा के, जोन आजी आसे आउर काली के भाटी ने जलाया जायदे, असन फटीई पिन्दाऊ आय, तो हे अल्पबिश्वासीमन, तुमके हुन ऐमन ले बडुन भाती केंव नी पिंदाये?
31“ऐईकाजे तुमी चिन्ता करून ऐ नी बोला कि आमी काय खाऊंदे, नाहले काय पीऊंदे, नाहले काय पिंदुदें। 32कसनबल्लोने दुसर जाति ऐ सपाय तीजमन चो खोज ने रऊ आत, मान्तर तुमचो सरग चो बुआ जाने से कि तुमके ऐ सपाय तीजमन चो जरूरत आसे। 33ऐईकाजे पयले तुमी माहापुरू चो राज आउर हुनचो धरम चो खोज करा तेबे ऐ सपाय तीजमन बले तुमके मिरून जायदे। 34आउर काली चो चिन्ता नी करा, कसनबल्लोने काली चो दिन आपलो चिन्ता खुद करेदे; आजी चो काजे आजी ची चो दुख खुबे आय।”
Halbi Bible by The Love Fellowship is licensed under Creative Commons Attribution-ShareAlike 4.0 License.