Luke 6
6
Sesu aloonze mu dyaambu di wisi wukaloogi Basifu
1Mu wisi wukaloogi Basifu, Sesu ne bayikitsi baandi bayendenge mu nzile yivyogenge mu pwase banuungi. Bayikitsi baandi badokenge miluunde#6.1 Miluunde myene mibagunu misu ma muresi. Banyigenge myo mu wulambe mape. nuyange. 2Dikabu di bafwarisi bayambile yawu re: «Mugi yenu digonedoke miluunde mu wisi wukaloogu?» 3Sesu ayagule yawu re: «Mayatsi re yenu dirange dyaambu divage David, wisi wu yane batu baandi bayulu nzale. 4David ne batu babile naandi banyingene gu Ndagu Nzambi. Aboonge mape mayakusu Nzambi, ayi ne aveege bababile naandi, nisi nave siingise mugage dyo ke gu baveegitsi ba malagu.» 5Sesu akoonde wuyambile nawu re: «Mwaane mutu, re Fumu wisi wukaloogu.»
Mutu wubile ne dikake dikateme
6Wisi wususu wulooge, Sesu anyingene gu ndagu disaambulu, ne aloonzenge. Ve ganegare batu babayulungu musamu, gubile mutu ne dikake dimabagele dikateme. 7Bateenditsi ba migage ne bafwarisi babeminenge Sesu, mulabe gane agubeeluse mutu wene mu wisi wulooge, mumbare babenenge disuge di wufurigile yandi. 8Te Sesu wuyabenge mataase mawu ayambile dibagele dibile ne dikake dikateme re: «Teleme, ruge ve ganegare batu vave.» Ne ateleme ne agogule. 9Kere Sesu ayambile nawu re: «Mugage wugonerume manenu nde muvage dinyi, vo nde muvage dibi mu wisi wulooge? Bweedi nde muyamune mutu vo nde mubokise?» 10Abemine yawu bootsu, kere ayambile dibagele dibile ne dikake dikateme re: «Sukule dikake dyagu!» Asukule, ne dikake dyene dibeelugu. 11Te basupulitsi ba migage ne bafwarisi babasu ne kabu, ne bayambilenge yawu ne yawu mubene disuge dikevage yawu Sesu.
Sesu asoole digumi ne kime beyi
12Ve dikyesi dyene Sesu ayende gu yulu mukoongu musaambile. Amane dibati difwiimbe nusaambile Nzambi. 13Ve gi wisi, Sesu atsitse bayikitsi baandi, asoole digumi ne babeyi, aveege yawu nduge re: bakime. 14Mine mawu bile re: Simu yilugu ne Sesu re Pyere ne André mwaane ngwandi, Sak ne Sa, Filip ne Batelemi, 15Mati ne Tome, Sak mwaane Alfé ne Simu yiroonde yobule tseengyandi, 16Sude mwaane Sak ne Suda Iskaryote wugabe Sesu.
17Sesu asunde nawu ne asikeme ve mulaandu. Dikabu dimbili bayikitsi baandi dibile vane. Ne vane ve bile piti yi batu bababurugu gu tseengi yotsu yi Sudé ne gu Serusalem. Bamosi baburugu gu mavule ma Tire ne Sidon gu tuungu mubu. 18Baruge muyulu maambu maloonzenge yandi, ne mure Sesu akebeeluse yawu bambeedu bawu. Babaritsugungu maguge ne manyunyi mamabi, ne yawu gaandi babeelusu. 19Batu bootsu babene wugaangilenge Sesu mumbare ngudi yivatenge mu yandi, yibeelusenge yawu bootsu.
Myule ne milogu
20Ve yulu vane Sesu abemine bayikitsi baandi nuyambile re:
«Myule gu yenu masaandi,
mumbare Bufumu bu Nzambi nde bweenu!
21Myule gu yenu badigonerape nzale ne mapape,
mumbare yenu digudile kure yimbili.
Myule gu yenu badigonelile ne mapape,
mumbare yenu diguseve.
22Myule gu yenu ga batu bakole yenu, ga barune yenu, ga baseenge yenu, ga bapunze yenu, ne wuvagile yenu bumweenyi bububi mu dyaambu di Mwaane mutu. 23Veke labenge yenu maambu mene mootsu, labanu wunyi ne bilanu ne yinyunge, mumbare yenu diguveegu miseende mimbili gu yulu. Yabanu re nane re naritsugungu babigitsi maguge ne batayi bawu.
24Te milogu gu yenu bikiti,
mumbare yenu dimamane wudile menu manyi.
25Milogu gu yenu badimayikure ne byootsu ne mapape,
mumbare yenu diguyulu nzale.
Milogu gu yenu badigoneseve ne mapape,
mumbare yenu digubilenge ne rungile nulile mbili.
26Milogu gu yenu, ga batu bayambilile gu yenu ke maambu mamanyi. Nane gaandi re navagenge batayi bawu gu babigitsi ba wufure.
Diroonde gu bakolitsi
27Te mayambile yenu badigoneyulu maambu mami re: roondanu bakolitsi benu, vagilanu manyi gu babagonekole yenu. 28Veeganu myule gu yawu babagonedigene yenu. Saambilanu mu yawu babagonegyele yenu. 29Mutu ga adiimbe yu mu dibuge dimoosi, veege yandi ne dine. Mutu ga aboongile yu yigubuku gyagu ne mbabu, veege yandi ne kapagu. 30Gu wotsu wukevonde yu yivaave, veege. Mutu ga aboongile yu yivaave gyagu, yiyatombe yandi mu gabuse gyo. 31Mootsu makaroondi yenu re batu bavagili yenu, vaganu munoongu wumoosi gu yawu. 32Yenu ga diroonde ke babakaroondi yenu, ditaase re Nzambi aguveege yenu myula? Mumbare ne bange mabi bakaroondi ke babakaroondi yawu. 33Yenu ga divagile manyi ke gu babakavagili yenu manyi, ditaase re Nzambi aguveege yenu myula? Mumbare ne bange mabi bakavagi munoongu wumoosi. 34Yenu ga disoombise badole ke gu batu babakerungule wugabusile yenu, ditaase re Nzambi aguveege yenu myula? Nisi bange mabi bakasoombisi gaandi bange mabi mu gabusulu nzi yisoombise yawu. 35Te roondanu bakolitsi benu, vagilanu yawu manyi. Soombisanu gugataase wugabusulu, kere vane Nzambi Puungu aguveege yenu museende wumunene. Ne yenu digubile baane baandi, mumbare ayi wumunyi gu batu bootsu ne babanyi ne bababi. 36Labanu batu bootsu dingyebe nakalabi Tayenu.
Diyasosise bambaatsi
37Yenu diyasosise ne yenu dikeresosusu. Diyaveege batu mbele ne yenu dikereveegu mbele. Siingilanu batu kokolu ne Nzambi akesiingile yenu kokolu. 38Veegenganu bivaave bibinyi gu batu ne Nzambi aguveege yenu bimbili. Ne yandi agubase poonzyenu ne tsutsuru#6.38 Tsutsuru: bigu Gugare poonzi bivyogilile mubilulu. . Nzambi aguyetsige manenu ne gyetsugu gi dikayetsigi bambaatsi.»
39Sesu abetwile yawu noongu re: «Nge pafu arungule wuyenze nge pafu ga yandya? Yawu bootsu babeyi mbe bagulage gu dibile. 40Wuki muyikitsi asakerungule wuvyogilile muloonzi wandi. Te muyikitsi wotsu wumaditige mootsu maloonzu yandi, agubile ga muloonzi wandi. 41Mugi yigonebemine yigyegise gi gu diisu di mbaatsyagu, te yisegonelabe murwale wu gu dyagu? 42Tsenyi yirungule yambile mwaane ngwagu re: “Mwaane maame, siise maburuli yigyegise gi gu diisu dyagu”, te murwale wu gu diisu dyagu, yisegonelabe wo? Ga yisalabe murwale wu gu diisu dyagu, tsenyi yigurungule burule yigyegise gi gu diisu di mbaatsyagu? Yifutsi, burule kinde murwale wu gu diisu dyagu, kere vane yigulabe yigyesise gigu diisu di mwaane ngwagu ne velee.»
Muyikitsi wungyenze
43Sesu abekoonde wuyambile yawu re: «Mwiri wumunyi wuserungule wubure miluunde mimibi, vo mwiri wumubi wurebure miluunde miminyi. 44Mwiri wotsu wukayabunu ke mu miluunde myandi. Basakerungule wudooke banyiinge mu dikwake di ifuundi, vore bilili gu dikwake di misuumbe. 45Mutu wumunyi akapusi maambu mamanyi mabase gu murime wandi; ne mutu wumubi akapusi maambu mamabi mabase gu murime wandi. Mumbare maambu mabaase gu murime, re makayambili mune.
Ndagu beyi
46Mugi yenu dikatsitsi me re: “Fumu, Fumu!”, ne mane yenu disakavagi makayambili me? 47Maguritsige yenu yibagunu gi mutu wotsu wukayitsi gu me: Akayulu maambu mami ne akavagi mo. 48Ayi ga mutu wugoneruunge ndagu: Adoongise mikikile mi yibuge gyandi nguu ne mu dimanyi, nubaande wumakise ndagu. Ve ruge nyidu, mwaambe wubase ne maambe magubegene mu ndagu, te yisetsukeme, mumbare yo yiruungu bweedi. 49Te wukeyulu maambu mami, nubuse wuvage na yambile mo, ayi ga mutu wuruunge ndagu ve yibuge gigabuku mikikile, ve ruge nyidu, mwaambe wubaase, maambe magubegene mu ndagu, vane ne vane ndagu yotsu yibuundugu.»
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES