Luc 7
7
Sesu beluse mubingitsi wu givunde gi gori romain
1Sesu negumane gwambile mambu motsu mane vegari bumongu. Agabuge gu yadi yi Kaperenawum. 2Gu yadi yine, gubange givunde gi gori Rom gibange ne mudyanzitsi andi wubelange, beli gufu. Fumu andi amurondage veveni. 3Givunde gi gori negulu re Sesu gabelusi bibedu. Arume bivunde bi Sif gumbu Sesu gwemulembige nonge akuse beluse mudyanzitsi andi. 4Neguvuduge gu Sesu, bemwambile misamu negu gwarile mulembige re «Givunde gi gori yine, mutu boti. Kokolu vage di yandi gakwivuli. 5Agarondi bulongu bu etu, yandi adurungile ndagu ndembu yiyi ne doli tsi andi.» 6Vane, Sesu negwende nawu gu ndagu givunde gi gori. Beli guvuduge gu ndagu eni. Givunde gi gori negurume mbatsi tsi andi guse gwambile Sesu re «Fumu, wuya kwe tsogise gwende gu ndagu ami mba nzesungeme. 7Re dibandu nzarugile mebeni guse kwambile ve wusu. Tumbe nyakulembigi vege ke dinyange re mudyanzitsi ami abelugi. 8Mbare menu gwandi ni mutu wune bivunde ve muru ami. Nine gori gu nzime ami. Pasi nyagwambili wumosi re “yende” agagwendi. Wu fimbe re “ruge” agarugi. Nyagwambile mudyanzitsi ami re “Vage didi” agavagi.» 9Sesu negulu mambu mambile givunde gi gori akumame. Negu geluge gu batu bendange nandi, negu bambile re «Nyanwambili, nesi vegari bane be Iserayel, nzebetsi labe mutu wapagili gitu ne wune.» 10Vane, batu berumu negugabuge gu ndagu givunde gi gori, beseragesenu mudyanzitsi wubelange polu.
Sesu gabuse mwane mukwili monyu
11Sesu ne bebingitsi bandi ne bumongu bendange gu yadi yi Nayin. 12Ve kodu dimbu bekubengune ne batu bebegange gibindi gu pesi, gi mwane dikike di mugetu mukwili. Bumongu bu yadi bendange nandi.
13Fumu negumwene, akumulu ngebe negumwambile re: «Wuyalile.» 14Sesu negudute, negubembe gipoyu. Batu benangulange gipoyu negusikeme. Sesu negwambile re: «Mufudu, nyakuvegi dinyange Rambuge.» 15Mufudu negutsagene, negwambile. Sesu negumugabuse gu nguye andi.
16Botsu babe vane bekugangu ne wome, bekudumisange Nyambi: «Mubigitsi neni amalabene vegari etu. Vane gwandi Nyambi amaruge gutse gwamuse bane bandi.»
17Ve gari Sudé yotsu ne mu mbare ne mbare bulu mambu mekinze Sesu.
Sesu ne Sambatisete
18Gigumbi gi Sambatisete yibange gu nzugu, bebingitsi bandi bese mwambile motsu me Sesu vagange. 19Sambatisete negurume bebingitsi bandi bebeye, guse gwivule Sesu re «Ndyayu re wu dwavingili vo dwavingili mutu nzusu?» 20Neguvuduge gu Sesu, batu bane bemwivule re «Sambatisete sedurume gu mbu gi agu guse kwivule gere ndyayu re mutu wa rugi vo dwavingili wunzusu?» 21Gigumbi gi bebingitsi ba beye babile vane, Sesu negubeluse mbili batu babange ne mibelu, byere, bebegisungu ne menyuni mabi, ne batu babange ne pafu. 22Sesu ne gwagule batu be San rume re «Yendanu gwegwambile San re Batu be tsibange ne pafu nyabebeluse, bekalabi dikengi. Nyavege bibomfi ngudu yi gurambuge negutakule. Nyabeluse batu betsibange ne bwatsi. Betsibange ne medugi nyabebeluse, bekagulu dikengi. Nyagabuse batu bafu monyu. Nyagwene nenze musamu boti mu bigayi. 23Diboti gu mutu wusabusi gupagile gitu.»
24Batu berume San negugabuge, Sesu negwambile bumongu re «Pikilanu. Gye nusegwelabe gu kumu? Mutu wu gere mundubi wagibemi ne punge?» 25Gere sanane, gye gi nwagengisi? Nwagengisi mutu wa dwari bidwaru biboti, ne batu bene mbili bivave biboti ba tsagene gu ndagu kanangu. 26Gye gi nwelabe mubigitsi? Negu ngenze mubigitsi nyanwambili ayi vyagenu ne mubigitsi. 27Mu gisangumu gi Nyambi mubigitsi wu mosi gagwambili gukyelu San re «Nigurume gilumbi ve wusu Fumu. Nonge akwambile mbili batu re: Betsonzigi nzile ve wusu andi nesi aguruge#7.27 Mubigitsi Malasi 3.1.»
28Ve gari batu botsu be buru, gu sandi mutu nesi wu mosi wa kibi San. Tumbe mutu wu gu bulongu bu Nyambi nesi ayi mugegi ayi vyagenu ne San. 29Batu botsu bulu San gagwambili, ne bebolitsi be lepu bevege Nyambi miranu. Bambile re Nyambi asungeme re dibandu besingile gubatisu nandi. 30Tumbe Farisi ne bivunde bi migage mi Moyise bebuse di Nyambi ronde re bevagi. Re dibandu bebusile gubatisu ne San.
31Sesu negukunde gwambile re «Anibenze gwelige batu be dilale didi ne nye? Dibongene ne nye? 32Dibongene ne bane basani ve kane ya bengunini batu botsu, be fimbe bekwambilange bembatsi re “Dusenusigile dibike, tumbe nusagine. Dusegwimbe nimbu tsi mvwange, tumbe nusalile.” 33Nyagwambili nane mbare Sambatisete neguruge, asayange pembi, asanungu melamu. Gukyelu mambu mane nwagwambili re “Agabeli bivulu.” 34Menu Mwane mutu neguruge, nigaye pembi niganu melamu neve mutu yandi wotsu agavagili. Yenu, nwagwambile re “Gengisanu mutu wapikili ka guye ne gunu melamu. Byenze bi andi ka bebolitsi be lepu ne bevagitsi be bitsimbu.” 35Tumbe, bayabi re nzile yi dyele yi sungeme ne monyu yi batu botsu bavyogili mu nzile eni.»
Sesu gu gari ndagu Simu yi Farisi
36Farisi ya nengure Simu arombe Sesu nonge akwe guyi konge nandi. Sesu negwingene gu ndagu Simu. Negutsagene ve tavuli. 37Gu yadi yine, gubange mugetu wubange ne mutsagenu wubi. Neguyabe re Sesu akayi gu ndagu Simu, aruge ne girure gi fwaru gibase ne muyombu wune tsulu boti. 38Negwingene gu ndagu Simu akubambeme ne byeru bi Sesu mekuteme. Negubandeme, akulilange metsange mandi me kubotsange byeru bi Sesu. Akubisingunange ne nange tsi andi, akubififange mbili nyongu akubitilange muyombu. 39Simu negulabe mambu me vagange mugetu wune, akupikilange gu murime andi re «Mbere Sesu yi mubigitsi, mbere asasingi gubembu ne mugetu wune.» 40Sesu negwambile Simu re «Nyarondi kwambile mwe dyambu.» Simu negumwagule re «Agye Mulonzi? Yambile.» 41Vane, Sesu negumuverile kugu: «Gikiti anwanise batu bebeye doli. Wumosi amunwanange kame megumi me toseni, awu mubeyi megume beyi me toseni#7.41 Gumbu be Sif «Denier» gu yetu «doli». Wurege avegu 500 deniers, awu mubeyi 50 deniers. Denier yimosi divane di muse gidyanzu. . 42Batu bane babeyi besedenge doli tsi gugabusile gikiti. Abunzule dinwane di yawu botsu babeyi. Nyanwambili batu bane babeyi nye wu gikiti akibe ronde?» 43Simu ne gwagule re «Nyapikili re wu nwanange mbili doli.» Sesu negumwambile re «Wuseyabe mi agu miranu.» 44Vane, Sesu negugeluge gu mugetu negwambile Simu re «Walabi mugetu wuwu? Ve nzegwingenine gu ndagu agu wusa pege nesi mambe me gugunge byeru bi ami. Tumbe yandi asebotse byeru bi ami ne metsange mandi, abisingune ne nange tsi andi. 45Wusanzambegene gu gupege mbulu. Tumbe yandi ningenine gu ndagu agu asakoli gupege mbulu ne digobe dineni. 46Wusagwitile matsi ve yulu muru ami. Tumbe yandi asekobise, asegwitile muyombu mu byeru bi ami. 47Re dibandu nyakwambili re: Bitsimbu bi andi byotsu bima bunzulu dibandu girondu gi andi gitsibe gineni gukyelu ami. Tumbe mutu wapikili re asane mbili bitsimbu, asarondi veveni mutu wa mubunzuli bitsimbu.» 48Negwambile mugetu re «Bitsimbu bi agu byotsu bya bunzulu.» 49Batu bayange konge nandi ve tavuli bekupikilange re «Mutu wuwu asane dinyange di gubunzule bitsimbu Nyambi vike re benze divage.» 50Tumbe Sesu negukunde gwambile mugetu re «Neve wusepagile gitu, Nyambi amakuvege monyu. Yende pembi ne polu.»
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES