Luc 23
23
Sesu ve wusu Pilate
1Dibundu dyotsu dirambuge, bebege Sesu vewusu Pilate. 2Vane, befuriligange Sesu bambilange re «Dwaragesenu mutu wuwu agabakigi batu betu nonge bekole nulilu. Agabusi re batu bevegi lepu gu Sesare. Akukuvagange re yandi re Kirisete, kanangu.» 3Pilate negumwivule: «Ndyawu re kanangu yi Sif?» Sesu negumwagule re «Ndyabeni re wusedyambile.» 4Pilate akwambile bivunde bi bevegitsi be pagu ne bumongu: «Nzalabi mbele yi mutu wuwu.» 5Tumbe batu bane bekukugwambilange ne ngudu: «Agasibigi dibundu neginenzitsi gi andi bekole kugobise pakile gu Galile bulongu bwotsu bu Sif kwangene gu Sudé, amaruge kwangene gugu.»
Sesu ve wusu Erode
6Ve Pilate yulilu mambu mane, akwivule gere mutu wune ayi mwisi Galile? 7Bekumwagule re Sesu ayi mwisi Galile. Erode Antipas ayi mundumbe wu musyengi wune ne yandi gwandi ayibe gu Serisalem gigumbi gine. Vane, Pilate negutinde Sesu gu Erode. 8Ve Erode labile Sesu, akulu mugangu. Mbere amagulu tsangu tsi andi, arondange mwene mbetsi. Ayanbange re aguvage mwegilimbe. 9Akumwivulange mbili ngoku, tumbe Sesu asemwagulange. 10Bivunde bi bevegitsi be pagu ne bivunde bi migage mi Moyise babe vane, bekumusyembange ne ngudu tsyotsu. 11Erode ne gori tsi andi bekumusyengange ne gumudokange, bekumuvege gidwaru gi bundumbe ne gumugabuse gu Pilate. 12Erode ne Pilate beseyulusenungu, mwisi wune bekube mbatsi.
Sesu kabegu gweboku
13Pilate kurombe bivunde bi bevegitsi be pagu, ne bene menyange ne bisi dibundu. 14Akebambile re «Nusembegile mutu wuwu mbare agabegi batu betu bekole gobise. La ve wusu enu nzemwivule nzalabe dyambu dibi di yandi gwendile gu nzugu. Nzalabi mambu menwamufurigili. 15Ne Erode gwandi asalabe mambu megumuverile gu nzugu mbare amamugabuse gumbu gi etu. Dusalabi dyambu di yandi tsevage di gubokilu. 16Dibandu adimbu migebi, akugabusu.» [17Ve mumengu wotsu wu Pake, Pilate yobulange mutu wu gu nzugu#23.17 Girini gigi giserendu mu mbili bisangumu bi gulu bi Girek.] 18Tumbe bekwamugange yawu botsu: «Bokise mutu wune. Dwobulile Barebas.» 19Barebas veru gu nzugu mbare abe ne batu be yadi yine besegobisange migage, yandi gwandi aboke mutu. 20Pilate arondange gobule Sesu, akukubambile. 21Tumbe batu bane bekwamugange: «Mugomini anu mu kurusu, mugomini anu mu kurusu.» 22Pilate akukubambile dimu reru: «A dibi gye asevage? Nzalabe dibi di yandi agubokililu. Nigumudimbise, nikumusise.» 23Tumbe bekukunde gwamugange veveni re Sesu agominu mu kurusu. Myamu mi awu re mikudile. 24Pilate kusinge me yawu berombange. 25Ayobule mutu yawu berondange, awu veru gu nzugu mbare ayibe mugilonge gi batu be yadi besegobisange migage, yandi gwandi aboke mutu. Pilate besake Sesu bekuvage me yawu berondange.
Sesu agominu mu kurusu
26Ve bebegilange Sesu, bekubengune ne Simu mutu wu Sirene arugilange gu byambe. Gori bemugange, bemubakige nonge akunangule kurusu akubingange Sesu gu nzime. 27Mbili batu be dibundu bemubingange ne begetu bekulilange, bekumamange gukyelu andi. 28Sesu negugeluge gu yawu, negubambile re «Begetu be Serisalem, nuyalile gukyelu ami, lilanu gukyelu yenu beni ne bane benu. 29Mbare mewisi marugi ve begunwambile re “Diboti gukyelu begetu bebingume, besebetsibure, besanwisi.” 30Vane batu begwambilange mikongu re “Bonduganu mu yetu,” mikongu migegi “Midukubigi.” 31Mbare gere bavage nane gu gikoge gi monyu, a gikoge gifu gi guvagu tsye?» 32Bebege gwandi batu bebeyi, bikongu, nonge bekuboku konge ne Sesu. 33Neguvuduge gu mbure yanengure givenzi, gori begomine Sesu mu kurusu, begomine gwandi bikongu bine mu kurusu, wumosi gu mebagele mandi wumosi gu megetu mandi. 34Sesu kwambile re «Taye, benyesi, mba besayabi mambu mebavagi.» Begabene bivave bibange nandi bekuvage gingane giguyabe mutu wugubivegu. 35Batu be dibundu babange vane bekugengilange. Bivunde bi Sif bekumudokange, bekwambilange re «Asegobule batu bemosi akwegobuli yandi beni. Gere ayi Kirisete Mugobutsi wu Nyambi asale.» 36Gori gwandi bemudokange bebambeme nandi bemuvege melamu mengani. 37Bemwambile re «Gere ndyayu wu kanangu yi Sif, kwegobuli ndyabeni.» 38Vabe timbi ve yulu andi yirendu: «Awuwu kanangu yi Sif.» 39Gikongu gimosi gigominu amusyengange, akemwambilange: «Ndyayu wusa Kirisete Mugobutsi? Kwegobuli ndyabeni, ne yetu gwandi wukudwobule.» 40Tumbe wumosi akwanunange, negwambile re «Ndyayu wusadumi Nyambi, wuyagwambile nane ndya gwandi wugominu. 41Yetu nesi dusegominu dusevage mabi. Tumbe wuwu asavage dibi.» 42Vane akunde gwambile re «Sesu wuyandibegene ve ndyayu wugurugile ne kanangu.» 43Sesu negumwagule re «Nyakwambili negungenze, nemuni wugube nami gu bulongu buboti bu Nyambi.»
Dufu du Sesu
44Gigumbi gi dyumbi gabili ve yulu muru, nyangu neguvodeme, diviseme negusunde mu bulongu bwotsu kwangene megwere mereru me tsisige. 45Tsande yibe yileligu ve dingeninu di munendagu yi rereri yi ndagu Nyambi yipasige vegari. 46Sesu kwamuge: «Taye, nyakugangisi dinyuni di ami mu mekake magu.» Negumane gwambile nane, afu. 47Givunde gi gori yi Rom negulabe mambu mane. Akudumise dine di Nyambi, negwambile re «Dingenze mutu wuwu atsibe asungeme.» 48Batu botsu beruge guselabe mambu mane. Bekugabuge ne mune busane. 49Mbatsi tsyotsu tsi Sesu ne begetu bendange nandi pakile gu Galile, babange gu tage negugengisange motsu me vyogange.
Sesu maveru gu ngili
50-51Gubange mutu wanengure Sosefe, mwisi yadi Sudé Arimate. Mutu wune ayibe mutu boti wusungeme, avingilange re bulongu bu Nyambi burugi. Ayibange givunde gimosi gi dibundu. Aseronde nevu bembatsi betsonzigile neguvage. 52Akwende gweragene Pilate, negumwivule gibindi gi Sesu. 53Vane, negusule gibindi mu kurusu, negugipyete ne muvelu fwaru, negugisunze gu gari ngili yibuku gu dimani, mbe yisebetsiveru gibindi. 54Tsisige yatsonzigilu bivave mbare wisi gukole wapakile. 55Begetu bendange ne Sesu pakile Galile bekuruge ne Sosefe, begengise ngili belabe neve gibindi gi Sesu gibe gisunzu. 56Vane, bekugabuge gu yadi bekinze matsi ne miyombu migwesinge gibindi. Wisi gukole, besadyanzi, neve mugage wagwambili.
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES